Lista Serbe i ka kërkuar KFOR-it dhe EULEX-it të marrin masa të menjëhershme për ruajtjen e paqes, sigurisë dhe stabilitetit në Kosovë, sidomos në periudhën që i paraprin shpalljes së aktgjykimit ndaj ish-krerëve të Ushtrisë Çlirimtare të Kosovës.

Sipas komunikatës së partisë, misionet ndërkombëtare duhet të veprojnë brenda mandatit të tyre dhe të garantojnë sigurinë në territorin e Kosovës dhe Metohisë gjatë ditëve kur pritet vendimi për të akuzuarit në Hagë.

Partia politike serbe vlerëson se prania e misioneve ndërkombëtare të sigurisë duhet të rritet në zonat e përziera, veçanërisht në vendbanimet serbe në jug të Ibrit.

Lista Serbe thekson se një prani më e madhe do të shërbente si masë parandaluese kundër çdo përpjekjeje për të cenuar sigurinë e qytetarëve, për të nxitur incidente apo për të prishur rendin dhe qetësinë publike.

Gjithashtu, nga KFOR-i dhe EULEX-i kërkohet që, në kuadër të kompetencave të tyre, t’i bëjnë thirrje Policisë së Kosovës që detyrat t’i ushtrojë në mënyrë profesionale, të përgjegjshme dhe të paanshme.

Sipas partisë, Policia e Kosovës duhet të veprojë vetëm në përputhje me ligjin, duke respektuar të drejtat dhe sigurinë e çdo qytetari, pavarësisht përkatësisë së tij kombëtare.

Lista Serbe e ka vënë theksin te nevoja për masa të shtuara parandaluese përpara 16 shtatorit, datë kur është paralajmëruar shpallja e aktgjykimit në Hagë.

Qëllimi i këtyre masave, sipas njoftimit, është shmangia e tensioneve, provokimeve dhe incidenteve të mundshme që mund të cenojnë paqen dhe stabilitetin në terren.

Partia u ka bërë thirrje serbëve dhe të gjithë qytetarëve që të ruajnë qetësinë, të tregohen të përmbajtur e të matur dhe të mos ndikohen nga provokimet eventuale.

Lista Serbe ka vlerësuar se sjellja e përgjegjshme e qytetarëve mund të ndihmojë në ruajtjen e paqes dhe sigurisë.

Në përfundim, partia ka shprehur pritshmërinë që misionet ndërkombëtare të veprojnë në kohë dhe me përgjegjësi, duke dëshmuar gatishmërinë për të përmbushur mandatin e tyre dhe për të garantuar sigurinë e të gjithë qytetarëve, veçanërisht në zonat e ndjeshme dhe të përziera.

The post Lista Serbe kërkon forcimin e misioneve të KFOR-it dhe EULEX-it para vendimit të Hagës appeared first on Albeu.com.

Kuvendi po zhvillon një seancë të jashtëzakonshme për zgjedhjen e Qeverisë së re, ndërsa në sallën plenare, krahas deputetëve të Lëvizjes Vetëvendosje, janë paraqitur edhe përfaqësues të Listës Serbe.

Deputetët e Listës Serbe janë vërejtur teksa hynin në sallë, ku pritet të hidhet në votim formimi i Qeverisë Kurti 4.

Deri tani, në seancë nuk janë parë deputetë të LDK-së apo të PDK-së. Kjo e fundit ka bërë të ditur se nuk do të marrë pjesë në seancën për krijimin e Qeverisë.

Ndërkohë, procedura parlamentare vijon në pritje të nisjes së votimit për ekzekutivin e ri.

The post Seanca për formimin e Qeverisë së re nis pa praninë e deputetëve të LDK-së dhe PDK-së appeared first on Albeu.com.

Një deklaratë e Listës Serbe gjatë seancës për zgjedhjen e nënkryetarëve të Kuvendit të Kosovës ndezi tensione të forta dhe çoi në shtyrjen e votimit. Arsyeja ishte pohimi se kandidatura e tyre u paraqit “në emër të popullit serb”, një formulim që nxiti reagime të ashpra dhe refuzimin e tërheqjes së tij.

Ky episod ka rihapur diskutimin mbi mënyrën sesi Lista Serbe koncepton përfaqësimin politik të komunitetit serb brenda institucioneve kosovare dhe ndikimin që ka kjo forcë politike në funksionimin e legjislativit.

Analisti politik Gani Qarri, në një prononcim për “Bota sot”, e ka konsideruar këtë qëndrim si një provokim të papranueshëm dhe një përpjekje për të imponuar një retorikë që bie ndesh me themelet kushtetuese të vendit.

Ai e vështron deklaratën edhe në dritën e zhvillimeve më të gjera, duke u ndalur tek profili i kandidatit të propozuar. “I ‘propozuari’ i të ashtuquajturës ‘Listë Serbe’, Sllavko Simiq, në fakt do të duhej të ishte në burg dhe jo kandidat për nënkryetar të legjislativit të gjithë vendit. Ai, përveç lidhjeve të njohura me kryeterroristin serb Milan Radojçiq, dyshohet të jetë thellë i involvuar edhe në aferën e rëndë të spiunazhit kundër Kosovës dhe, siç është njohur që moti, Simiq mbante lidhje të forta edhe me kriminelin Vlladimir Radivojeviq dhe kriminel të tjerë serbë”, deklaroi Qarri.

Analisti shton se dyshimet mbi Simiqin shtrihen edhe në lidhjet e tij me një rast tjetër spiunazhi. “Shto gjithë kësaj lidhjet që Simiq mban me Beogradin, si dhe aferën e spiunazhit me spiunen serbe nga Mitrovica Ana Murganiq, të gjitha këto janë argumente tepër të forta që kanë obliguar dhe mbajnë nën obligim Prokurorinë e Shtetit, AKI-në dhe institucionet përkatëse të Republikës së Kosovës të hetojnë rrënjësisht Sllavko Simiqin, për lidhjet që ai mund t’i ketë edhe sot me BIA-n e Serbisë”, u shpreh ai.

Për Qarrin, është krejtësisht e papranueshme që dikush mbi të cilin rëndojnë pretendime të tilla të kandidojë për një post të lartë shtetëror. “Një njeri i tillë i dyshimtë dhe i akuzuar penalisht nga Prokuroria e Shtetit, i lidhur kaq ngushtë me kriminelë e terroristë dhe organizata terroriste serbe të ndaluara edhe me ligj në Kosovë, përbën rrezik permanent për gjendjen e sigurisë në mbarë Republikën e Kosovës”, theksoi ai.

Duke e lidhur situatën me një kontekst më të gjerë, Qarri solli në vëmendje trajtimin e shqiptarëve në Luginë. “Derisa Serbia fashiste, me dekada zbaton përdhunshëm dhe në mënyrën më të vrazhdë PASIVIZIMIN e adresave të shqiptarëve të Kosovës Lindore, duke dëbuar ata në mënyrë të heshtur nga shtëpitë dhe trojet e tyre stërgjyshore-autoktone, të cilët jo vetëm se nuk i trajton si popull por edhe i poshtëron përditshëm si komunitet të klasës së dytë apo të tretë, dora e zgjatur e Serbisë në Kosovë, e ashtuquajtura ‘Listë Serbe’, ditën për diell shkakton skandal në Parlamentin e vendit tonë, duke deklaruar se kandidaturën për nënkryetar të Kuvendit të Kosovës e bën ‘në emër të popullit serb’, duke nxitur përplasje të ashpra në Kuvend”, deklaroi ai.

Ai vijoi duke sqaruar pse kjo frazë është problematike nga pikëpamja ligjore. “Siç dihet, në Kosovë ka një komunitet të vogël, por nuk ka popull serb, ndaj përpos që propozimi i të ashtuquajturës ‘Listë Serbe’ ishte deklarim i rëndë provokues, akt skandaloz dhe i papranueshëm, e ashtuquajtura ‘Listë Serbe’ po tenton në mënyrë të kundërligjshme që përmes deklaratave kundërkushtetuese të imponojë një narrativë skandaloze politike që bie ndesh edhe me ligjin dhe rendin kushtetues të Republikës së Kosovës”, potencoi Qarri.

Ishte pikërisht refuzimi për ta korrigjuar këtë deklaratë që e bëri të pashmangshme ndërprerjen e seancës nga kryetarja e Kuvendit. “Kështu që deklarata e të ashtuquajturës ‘Listë Serbe’ se kandidatura për nënkryetar të Kuvendit bëhet ‘në emër të popullit serb’, ishte jo vetëm skandaloze, por dhe kundërkushtetuese dhe e papranueshme, e cila ka nxitur përplasje të ashpra në Kuvend dhe megjithëse kryetarja e Kuvendit, Albulena Haxhiu, i ka tërhequr vërejtjen deputetit të të ashtuquajturës ‘Listë Serbe’, mos tërheqja e deklaratës skandaloze të Igor Simiqit ka bërë që kryetarja e Kuvendit, Albulena Haxhiu, ta shtyjë edhe seancën për votimin e nënkryetarëve”, saktësoi analisti.

Në përmbyllje të analizës së tij, Qarri ngulmoi se kjo nuk është thjesht një përplasje procedurale, por pjesë e një strategjie të drejtuar nga jashtë. “Ky gjithë ky zhvillim na bën të kuptojmë se, me direktiva të drejtpërdrejta nga Beogradi, dora e zgjatur e Serbisë në Kosovë, e ashtuquajtura ‘Listë Serbe’, po keqpërdorë qëllimisht edhe Kuvendin për agjenda politike të Aleksandar Vuçiqit, vetëm që të cenojë sa më rëndë funksionimin e institucioneve të shtetit të pavarur të Kosovës”, tha ai.

Si rrjedhojë, ai apeloi për një përgjigje të prerë institucionale. “Andaj, duke qenë se në Republikën e Kosovës ka rregulla të qarta kushtetuese për propozimet institucionale, kjo shkelje e qëllimshme e dorës së zgjatur të Serbisë në Kosovë duhet të sanksionohet sa më ashpër nga autoritetet ligjore dhe organet kompetente juridike të shtetit të Kosovës, në mënyrë që veprime të tilla të mos guxojnë të përsëriten më në të ardhmen”, përfundoi Gani Qarri për “Bota sot”.

The post Përplasja në Kuvend dhe akuza për skenar të Beogradit: Gani Qarri zbërthen lëvizjen e fundit të Listës Serbe appeared first on Albeu.com.

Ministrja e Drejtësisë, Donika Gërvalla, ka reaguar kundër kandidaturës së propozuar nga Lista Serbe për postin e nënkryetarit të Kuvendit të Kosovës, duke e cilësuar atë si “skandaloze dhe të papranueshme”.

Sipas Gërvallës, në Kosovë jeton komuniteti serb dhe jo “populli serb”. Ajo ka deklaruar gjithashtu se zgjedhjet e “popullit serb” mbahen në Serbi, duke iu referuar procesit zgjedhor të 25 tetorit, përcjell “Bota sot”.

“Propozimi i Listës Serbe për nënkryetar të Kuvendit është skandaloz dhe i papranueshëm”, ka shkruar Gërvalla.

Ajo ka shtuar: “Në Kosovë nuk ka popull serb, por vetëm komunitet serb. Populli serb zgjedhjet i ka në Serbi, më 25 tetor.”

The post Gërvalla kundërshton propozimin e Listës Serbe për nënkryetarin e Kuvendit: “Skandaloz dhe i papranueshëm appeared first on Albeu.com.

Ura kryesore mbi lumin Ibër në Mitrovicë, e cila lidh pjesën jugore me atë veriore të qytetit, prej vitesh konsiderohet një nga simbolet më të ndjeshme të ndarjes ndëretnike në Kosovë. Edhe pse ajo mund të kalohet nga këmbësorët, qarkullimi i automjeteve ka mbetur i pamundur për vite me radhë. Hapja e urës është diskutuar gjithashtu në kuadër të dialogut të ndërmjetësuar nga Bashkimi Evropian.

Analisti i çështjeve të sigurisë, Dorajet Imeri, e cilëson paradoksale dhe të palogjikshme kundërshtimin e Listës Serbe ndaj hapjes së urës. Sipas tij, qëndrimi i kësaj partie bie ndesh me normalizimin e marrëdhënieve dhe synimin e rajonit për integrim në Bashkimin Evropian, ku parashihet edhe heqja e barrierave mes shteteve dhe qytetarëve.

Lista Serbe reagoi kundër hapjes së urës pasi nga Brukseli u bë e ditur se janë krijuar kushtet e sigurisë për një veprim të tillë. Në letrën dërguar Zyrës së BE-së në Prishtinë, partia kërkoi që të publikohej analiza e sigurisë mbi të cilën është mbështetur ky vendim. Ajo shprehu dyshime edhe për rolin e Policisë së Kosovës në mbrojtjen e serbëve.

Partia, të cilën Imeri e përshkruan si përfaqësuese të Beogradit dhe narrativave të tij në Kosovë, ka deklaruar se hapja e urës pa pjesëmarrjen dhe miratimin e palës serbe në dialogun e Brukselit vë në pikëpyetje vetë procesin dhe marrëveshjet e arritura atje. Lista Serbe i ka kërkuar gjithashtu Bashkimit Evropian të sqarojë përgjegjësitë në rast të ndonjë incidenti ose përkeqësimi të situatës së sigurisë, ndonëse pas largimit të KFOR-it është bërë e qartë se siguria në këtë pjesë do të jetë përgjegjësi e Policisë së Kosovës.

Duke folur për KosovaPress, analisti politik Dorajet Imeri tha se problemi nuk qëndron te hapja e urës, por te përpjekja për ta mbajtur atë si pengesë mes qytetarëve.

“Ekziston një kundërthënie politike që duhet theksuar. Nëse e ardhmja e rajonit lidhet me integrimin në Bashkimin Evropian, normalizimin e marrëdhënieve dhe eliminimin gradual të barrierave mes popujve e qytetarëve, atëherë nuk mund të justifikohet kërkesa që një urë të mbetet simbol i ndarjes. Nuk mund të flitet për normalizim në Bruksel dhe njëkohësisht të kundërshtohet në terren liria e lëvizjes, një prej parimeve kryesore të idesë evropiane. Në këtë mënyrë, Lista Serbe po kërkon ruajtjen dhe ngritjen e barrierave mes qytetarëve”, deklaroi Imeri për KosovaPress.

Sipas tij, Ura e Ibrit duhet të shihet si infrastrukturë publike në dispozicion të të gjithë qytetarëve, pa dallim të përkatësisë etnike. Çështja, shtoi ai, nuk duhet të trajtohet si përplasje politike apo etnike mbi pronësinë e urës, por si një çështje që lidhet me lëvizjen e lirë, komunikimin dhe integrimin.

“Ura kryesore e Mitrovicës është para së gjithash hapësirë publike dhe infrastrukturë që duhet t’u shërbejë qytetarëve. Ajo nuk është pronë e shqiptarëve, serbëve, ndonjë partie apo qeverie, por u takon qytetarëve të Kosovës, pavarësisht etnisë. Funksioni i saj duhet të jetë mundësimi i lëvizjes, komunikimit dhe integrimit. Pikërisht këtu shfaqet paradoksi i Listës Serbe: një subjekt që pretendon se mbron komunitetin serb duhet të shpjegojë se në ç’mënyrë mbajtja e urës të mbyllur përmirëson jetën, sigurinë apo të ardhmen e këtij komuniteti. Kjo është krejtësisht paradoksale dhe e palogjikshme, sepse ura duhet të shërbejë për lëvizjen, sigurinë dhe mirëqenien e njerëzve, objektiva që duhet t’i ketë çdo subjekt politik, me sa duket me përjashtim të Listës Serbe”, theksoi Imeri.

The post Imeri: Kërkesa e Listës Serbe për barriera në Urën e Ibrit bie ndesh me synimin për integrim në BE appeared first on Albeu.com.

Ozkan Ulutash, komandant i KFOR-it, zhvilloi në Shtabin e KFOR-it një takim me kryetarin e Listës Serbe, Zlatan Elek, pas një kërkese të këtij të fundit.

Në këtë takim ishin të pranishëm gjithashtu nënkryetari i Listës Serbe, Igor Simiq, deputetja Jovana Radosavljeviq dhe kryetari i Mitrovicës së Veriut, Milan Radojeviq. Bisedimet u përqendruan te gjendja e sigurisë në veri të Kosovës, si dhe te procesi që po zhvillohet për optimizimin e pranisë së KFOR-it.

KFOR-i bëri të ditur se Ulutash e lidhi nisjen e këtij procesi me përmirësimin e situatës së sigurisë në Kosovë.

Komandanti sqaroi se optimizimi do të zbatohet hap pas hapi, duke u bazuar në kushtet në terren. Sipas tij, procesi mund të zhbëhet nëse zhvillimet përkatëse rrezikojnë sigurinë e qëndrueshme në Kosovë ose stabilitetin rajonal. Ai nënvizoi gjithashtu se KFOR-i do të vazhdojë të jetë plotësisht i pajisur dhe i pozicionuar në mënyrë të përshtatshme për të reaguar ndaj çdo zhvillimi përkatës, në përputhje me mandatin e tij të gjatë në OKB.

Gjatë bisedimeve u trajtua edhe çështja e mbrojtjes së Manastirit të Deçanit.

Ulutash theksoi se KFOR-i vazhdon të jetë reaguesi i parë për sigurinë e Manastirit të Deçanit dhe mbetet i angazhuar për mbrojtjen e tij. Ai bëri të ditur se zhvendosja graduale e pranisë së KFOR-it nga ura kryesore në Mitrovicë ndodhet ende në fazën fillestare. Pas përfundimit të këtij procesi, KFOR-i do të ruajë një prani të fuqishme në Mitrovicën e Veriut dhe në veri të Kosovës, në dobi të të gjitha komuniteteve, thuhet në njoftim.

The post Ulutash pret drejtuesit e Listës Serbe, në fokus siguria në veri dhe prania e KFOR-it appeared first on Albeu.com.

Misioni paqeruajtës i NATO-s në Kosovë, KFOR-i, ka bërë të ditur se ka nisur procesin e ndryshimit gradual të pranisë së tij të përhershme në urën kryesore mbi lumin Ibër në Mitrovicë.

Sipas përgjigjes së KFOR-it për Radion Evropa e Lirë, ky vendim lidhet me vlerësimin se situata e sigurisë në Kosovë është përmirësuar. Misioni e konsideron këtë hap pjesë të optimizimit të pozicionimit të forcave të tij.

Procesi, siç është sqaruar, do të zhvillohet në mënyrë graduale dhe do të varet nga kushtet në terren. KFOR-i tha se po e bashkërendon atë me të gjithë aktorët përkatës, përfshirë institucionet e Kosovës, organizatat ndërkombëtare, Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX).

Për zhvillimet rreth këtij procesi, sipas KFOR-it, është njoftuar në mënyrë të rregullt edhe shefi i Shtabit të Përgjithshëm të Ushtrisë së Serbisë, gjenerali Millan Mojsilloviq.

Misioni i NATO-s ka siguruar se pjesëtarët e tij janë të pozicionuar në mënyrë që të mund t’i përgjigjen çdo zhvillimi të rëndësishëm, në përputhje me mandatin e tij të përcaktuar prej kohësh nga OKB-ja.

KFOR-i ka theksuar gjithashtu se do të vazhdojë të ketë një prani të dukshme në pjesën jugore dhe veriore të Mitrovicës, si dhe në veri të Kosovës, me qëllim që të kontribuojë në ruajtjen e një mjedisi të sigurt për të gjitha komunitetet.

Më herët gjatë së njëjtës ditë, KFOR-i njoftoi edhe për nisjen e përfshirjes graduale të Policisë së Kosovës në arkitekturën e sigurisë së misionit në Manastirin e Deçanit.

Policia e Kosovës nuk i është përgjigjur deri tani pyetjeve të Radios Evropa e Lirë lidhur me atë nëse pjesëtarët e saj janë vendosur në urën e Ibrit dhe nëse do të vazhdojnë të qëndrojnë aty pas largimit të trupave të KFOR-it.

Lista Serbe, subjekti kryesor politik i serbëve të Kosovës, e ka kundërshtuar çdo tërheqje ose reduktim të pranisë së KFOR-it në urën kryesore mbi Ibër.

Kjo parti njoftoi se i ka kërkuar një takim urgjent komandantit të KFOR-it, gjeneralmajor Ozkan Ulutash, për t’ia paraqitur shqetësimet e komunitetit serb në veri dhe për të kërkuar ndalimin e zbatimit të kësaj mase.

Sipas Listës Serbe, vendimet për praninë e forcave të sigurisë në atë zonë duhet të merren me kujdes, duke pasur parasysh situatën politike e të sigurisë dhe tensionet që kanë shoqëruar në të kaluarën zonën përreth urës.

Partia pretendoi se Policia e Kosovës nuk ka arritur të fitojë besimin e serbëve në veri, ndërsa praninë e KFOR-it në urë e cilësoi si një element të rëndësishëm të stabilitetit.

Lista Serbe i kërkoi KFOR-it të mbajë një prani të përshtatshme në urën kryesore dhe të vazhdojë angazhimin për sigurinë dhe stabilitetin.

Ura që lidh Mitrovicën e Jugut, ku shumica e banorëve janë shqiptarë, me Mitrovicën e Veriut, ku shumica është serbe, mbetet e hapur aktualisht vetëm për këmbësorë. Ajo ka qenë vazhdimisht një pikë e tensioneve etnike.

Që prej përfundimit të luftës në vitin 1999, ura është ruajtur në mënyrë të pandërprerë nga forcat e KFOR-it.

Qeveria e Kosovës kishte paralajmëruar në korrik të vitit 2024 hapjen e urës për qarkullimin e automjeteve. Ky paralajmërim shkaktoi tensione dhe reagime nga bashkësia ndërkombëtare.

Kosova dhe Serbia ishin pajtuar për hapjen e urës ndaj trafikut në vitin 2014, në kuadër të dialogut për normalizimin e marrëdhënieve. Marrëveshja parashikonte rikonstruktimin e urës dhe largimin e të gjitha barrikadave të vendosura nga serbët lokalë.

Pas mospajtimeve për mënyrën e interpretimit të marrëveshjeve të mëparshme, palët dakorduan në vitin 2016 një plan të ri zbatimi, i cili parashikonte që ura të hapej për automjete në janar të vitit 2017.

Ndërhyrjet për revitalizimin e urës përfunduan në qershor të vitit 2018. Pavarësisht investimit prej rreth 1.5 milion eurosh, ajo nuk u hap asnjëherë për qarkullim automjetesh dhe vazhdoi të shërbejë vetëm për këmbësorët.

Pranë urës kryesore, Qeveria e Kosovës ka ndërtuar edhe dy ura të tjera, një për këmbësorë dhe një për automjete. Ato synojnë të lidhin Mitrovicën e Veriut me atë të Jugut, në një qytet që prej luftës vazhdon të jetë i ndarë mbi baza etnike.

The post KFOR-i nis largimin gradual nga ura e Ibrit, Lista Serbe kërkon ruajtjen e pranisë ushtarake appeared first on Albeu.com.

Pesë zyrtarë të Listës Serbe pritet të kalojnë javën e ardhshme nga angazhimet politike dhe institucionet lokale në bankën e të pandehurve. Të enjten, më 13 gusht, Igor Simiq, Ivan Zaporosaq, Ivan Todosijeviq, Zoran Todiq dhe Vasilije Tomaseviq do të paraqiten si të pandehur para Prokurorisë Themelore në Mitrovicën e Veriut.

Të pestë kanë ushtruar ndër vite funksione politike në vend, ndërsa tani janë nën hetim për veprën penale “Falsifikim i dokumenteve”.

Zyrtarisht nuk janë bërë të ditura hollësi të tjera, përveç faktit se atyre u janë dërguar ftesa në cilësinë e të pandehurve. Megjithatë, RTK mëson se procedurat penale lidhen me funksionimin e komunave paralele serbe dhe dokumentet e lëshuara prej tyre, institucione që autoritetet e Kosovës i mbyllën përfundimisht gjatë aksioneve policore.

Pjesë e hetimeve është gjithashtu kundërshtimi i mëhershëm i këtyre zyrtarëve për t’i dorëzuar zyrat e katër komunave në veri.

Rasti ka marrë peshë të veçantë institucionale për shkak të Igor Simiqit, i cili aktualisht është deputet aktiv në Kuvendin e Kosovës dhe ndodhet në qendër të vëmendjes së këtij procesi.

“Fatkeqësisht në politikën kosovare, njerëzit që janë nën hetime ose aktakuza nuk japin dorëheqje së paku për arsye morale ose etike. Një gjë e tillë do të duhej të bëhej edhe nga ky deputet…”, tha Naim Jakaj, hulumtues i lartë në IKD.

Lista Serbe, si forca kryesore politike e serbëve në Kosovë, ka gëzuar prej vitesh mbështetje të fuqishme nga Beogradi zyrtar. Për këtë arsye, çështja shkon përtej pozitës juridike të zyrtarëve dhe përfshin edhe ndikimin që kjo parti mund të ushtrojë mbi zhvillimet politike dhe të sigurisë në Kosovë.

Përballja e tanishme me drejtësinë pason një periudhë të gjatë tensionesh dhe përplasjesh. Veprimet e Listës Serbe kanë qenë vazhdimisht në fokus, veçanërisht gjatë situatave të tensionuara në veri të vendit.

Sipas njohësve të sigurisë, kjo parti vijon të veprojë jashtë kuadrit kushtetues të Kosovës, duke ndjekur udhëzime të drejtpërdrejta nga Beogradi zyrtar dhe duke ruajtur një qasje destruktive.

“Serbia është 100% e fokusuar në Listën Serbe si patericë direkte. Duhej të ishte krejt e kundërta sepse janë shtetas të republikës dhe deputetë dhe duhej ti përfaqësonin interesat e Kosovës. Ata nuk i plotësojnë interesat e Kosovës dhe qasja e tyre në vitin 2026 është ende destruktive”, tha Arben Dashevci, njohës i sigurisë.

Në etapa të ndryshme, pozicionet e Listës Serbe kanë ndikuar në rrjedhat politike të vendit, veçanërisht përmes bojkotimit të institucioneve vendore. Përtej retorikës politike, ky proces shihet si një provë e rëndësishme për aftësinë e sistemit të drejtësisë që ta shtrijë ligjshmërinë në mënyrë të plotë.

The post Pesë zyrtarë të Listës Serbe përballen me hetime, rasti merr vëmendje politike dhe të sigurisë appeared first on Albeu.com.

Prokuroria Themelore e Mitrovicës ka konfirmuar se pesë përfaqësues të Listës Serbe do të merren në pyetje më 13 gusht në cilësinë e të pandehurve.

Igor Simiq, Ivan Zaporozhac, Ivan Todosijeviq, Zoran Todiq dhe Vasilije Tomasheviq kanë marrë ftesat për të dhënë deklaratat e tyre lidhur me dyshimet për veprën penale “Falsifikim i dokumenteve”.

Lajmi është bërë i ditur për Klankosova.tv nga Valon Preteni, zëdhënës i Prokurorisë Themelore të Mitrovicës.

“Mund të konfirmojmë që pesë (5) persona janë ftuar për intervistim në cilësinë e të pandehurve, për shkak të veprës penale ‘Falsifikimi i dokumenteve’. Rasti është në hetime”, deklaroi Preteni.

The post Prokuroria e Mitrovicës thërret pesë përfaqësues të Listës Serbe si të pandehur appeared first on Albeu.com.

Igor Simiq, Ivan Zaporozhac, Ivan Todosijeviq, Zoran Todiq dhe Vasilije Tomasheviq, përfaqësues të Listës Serbe, janë ftuar nga Prokuroria Themelore e Mitrovicës për të dhënë deklaratat e tyre më 13 gusht, në cilësinë e të pandehurve.

Sipas Listës Serbe, ndaj tyre rëndon dyshimi për falsifikim të dokumentacionit. Ky subjekt politik pretendon se ndjekja penale lidhet me faktin që ata kanë drejtuar institucione serbe të cilat nuk njihen nga Prishtina, raporton KP.

Rasti lidhet me refuzimin e tyre për t’ua dorëzuar zyrat e katër komunave veriore, ngjarje e ndodhur tre vjet më parë.

The post Prokuroria e Mitrovicës thërret pesë zyrtarë të Listës Serbe si të pandehur appeared first on Albeu.com.