Takimi ndërmjet Dritës dhe Drenicës në Superligën e Kosovës nisi me një akt solidariteti ndaj krerëve të Ushtrisë Çlirimtare të Kosovës, të cilët po përballen me procesin gjyqësor në Hagë.

Pak çaste para startit të ndeshjes, lojtarët e të dyja skuadrave u shfaqën në fushë duke mbajtur pankarta me mbishkrimet “Lufta për liri ishte e drejtë dhe e pastër” dhe “Kosova ju pret!”.

Pankartat përmbanin gjithashtu fotografitë e Hashim Thaçit, Kadri Veselit, Jakup Krasniqit dhe Rexhep Selimit, në shenjë përkrahjeje për ta dhe për luftën çlirimtare të UÇK-së.

Mesazhi i solidaritetit u përcoll disa ditë përpara Marshit për Liri, i cili do të zhvillohet më 12 shtator, nga ora 14:00, në sheshin “Skënderbeu” në Prishtinë.

“Lufta për liri ishte e drejtë dhe e pastër. Kosova po pret! UÇK!”, ishte mesazhi i përcjellë përmes pankartave.

Ky duel, i vlefshëm për javën e katërt të Superligës së Kosovës, përfundoi me rezultatin 0-0.

The post Drita dhe Drenica shfaqën mbështetje për drejtuesit e UÇK-së para përballjes në Superligë appeared first on Albeu.com.