Sipas Metës, asnjë vend në botë, madje edhe ato në luftë nuk e kanë përjetuar një traumë të tillë të rënies së lindshmërisë për grua si Shqipëria.

Gjithashtu, Meta shton se ky është një alarm kombëtar dhe një kushtrim për ndryshim urgjent.

Postimi i Ilir Metës:

Shikoni grafikun e animuar më poshtë, se si merr tatëpjetën lindshmëria mesatare për grua te familjet shqiptare!

Asnjë vend në botë, madje edhe ato në luftë nuk e kanë përjetuar një traumë të tillë të rënies së lindshmërisë për grua si Shqipëria.

Nga 3.4 fëmijë për grua në vetëm 1.4.

Nga në krye të listës të vendeve europiane, në vendin e 177 nga 200 vende të klasifikimit të Kombeve të Bashkuara.

Ky është një alarm kombëtar!

Ky është një kushtrim për ndryshim urgjent!

Partia e Lirisë, ka objektiv të saj madhor Shqipërinë me 4 milion shqiptarë plus.

Mes shumë masave ekonomike, financiare, sociale dhe kulturore të rimëkëmbjes së kombit padyshim edhe fuqizimi i familjes dhe veçanërisht mbështetja me programe të posaçme të nënave të reja dhe familjeve të reja, do të jetë një përparësi absolute.

The post Meta publikon grafikun: Lindshmëria merr tatëpjetën, asnjë vend në botë nuk ka përjetuar një traumë të tillë appeared first on Albeu.com.

E prekur edhe nga normat e larta të emigracionit, popullsia e Shqipërisë ka hyrë në një proces plakje të shpejtë duke u shndërruar në një problem madhor për zhvillimin e qëndrueshëm ekonomik të vendit.

Gjatë vitit 2020 sipas Eurostat, Shqipëria pati vetëm 1.32 lindje të gjalla për grua me rënie 0.2 në krahasim me vitin 2019, duke lënë pas vetëm, Maltën, Spanjën, Italinë dhe Maqedoninë.

Në vitin 2020, 4.07 milionë foshnja lindën në BE, duke vazhduar një trend në rënie që filloi në vitin 2008 kur lindën 4.68 milionë fëmijë në BE, ndërsa në Shqipëri trendi i rënies ka vijuar më shpejtësi pas vitit 1990.

Norma totale e lindshmërisë ishte 1.50 lindje të gjalla për grua në BE në vitin 2020, një rënie e vogël nga kulmi i fundit në 2016 (1.57), por gjithsesi një rritje krahasuar me 2001 (1.43).

Shkalla më e lartë e lindshmërisë totale që nga fillimi i serive kohore të krahasueshme ishte 1.57 në 2008, 2010 dhe 2016. Në vitet ndërmjet, ajo luhatet midis 1.51 dhe 1.57.

Në vitin 2020, shteti anëtar i BE-së me shkallën më të lartë të lindshmërisë totale ishte Franca (1.83 lindje të gjalla për grua), e ndjekur nga Rumania (1.80), Çekia (1.71) dhe Danimarka (1.68).

Përqindja e fëmijëve të lindur nga nëna të huaja ndryshon ndjeshëm midis Shteteve Anëtare. Në vitin 2020, 64% e fëmijëve të lindur në Luksemburg ishin nga nëna të lindura jashtë vendit, ndërsa në Qipro pjesa ishte 39%. Në Austri, Maltë dhe Belgjikë, përqindja ishte rreth një e treta.

Në anën tjetër të shkallës, nëntë vende kishin më pak se 10% të fëmijëve të lindur nga nëna të lindura jashtë vendit, me përqindjet më të ulëta të regjistruara në Bullgari, Sllovaki (të dyja 2%) dhe Lituani (3%).

Në vendin tonë, gjatë periudhës 2011 – 2020 lindjet në shkallë kombëtare kanë rënë me 18%. Nga 34,285 bebe të lindura më 2011 në vitin 2020 linden 28,075. Qarku i Kukësit shënoi rënien më të madhe në shkallë vendi. Gjatë dhjetëvjeçarit të fundit në prefekturën Verilindore lindshmëria shënoi rënie me 37.8 për qind.

Pas Kukësit, rënien më të madhe të lindshmërisë gjatë dekadës së fundit e ka shënuar Qarku i Beratit me 34.3%. Gjirokastra renditet e treta për rënien e madhe të lindshmërisë me 32.2% dhe më pas Vlora me mbi 31% për të njëjtën periudhë. Në të kundërt rënien më të ulët të lindjeve e kishin Tirana dhe Durrësi përkatësisht me -1.6 dhe -12.0%. Këto dy qarqe, edhe pse me rënie të lindjeve, kanë shtesë natyrore pozitive të popullsisë për shkak të zhvendosjeve nga rrethet e tjera drejt tyre.

Si pasojë e kësaj situate, zhvillimet demografike janë duke u zhvilluar sipas skenarëve pesimistë të projeksioneve të popullsisë.

Sipas rishikimit të fundit që i takon periudhës 2019-2031, në skenarin pesimist indeksi i fertilitetit për një grua në vitin 2019 ishte 1.36 njësoj si në skenarin pesimist, por në të ardhmen treguesi mund të përkeqësohet përtej këtij skenari për shkak se anketat e tërthortë tregojnë se emigracioni në dekadën e fundit ka qenë më i lartë se pritshmëritë.

Vendet e Europës Lindore përjetuan rënie të lindshmërisë gjatë viteve 1990 dhe 2000, ku indeksi Sintetik i Fekondimit (ISF) arriti në nivele shumë të ulëta. Rastet më ekstreme janë ato të Bullgarisë (1,09 fëmijë për grua) dhe të Republikës Çeke (1,13 fëmijë për grua), për pjesën tjetër të vendeve të Evropës Lindore iSF arriti minimumin, rreth vlerës 1,2 lindje për grua. Në hipotezën e lindshmërisë së ulët në Shqipëri mendohet që iSF do të arrijë nivelin 1,2 në vitin 2031, por zhvillimet reale po tregojnë se ky nivel do të arrihet para këtij viti./monitor

The post Shqipëria e pesta ne Europë për normën më të ulët të lindshmërisë në 2020 appeared first on Albeu.com.

Rënia e lindjeve në shkallë të madhe ka përfshirë edhe qytetet e mëdha të tilla si Fieri, Elbasani, Durrësi dhe Tirana, popullsia e të cilave gjatë tranzicionit ishte rritur për shkak të imigrimit të brendshëm.

Të dhënat zyrtare nga INSTAT tregojnë se gjatë 9-mujorit 2021, lindjet në shkallë kombëtare ranë me 7.8% në raport me të njëjtën periudhë të vitit të kaluar. Por të dhënat sipas qarqeve tregojnë se lindshmëria ishte me rënie në të 12 qarqet e vendit, po në katër prej tyre, ritmet e rënies ishin dyshifrore.

Rënia më e fortë ishte në Gjirokastër, ku shihet se, në 9-mujorin 2021 lindjet e bebeve shënuan tkurrje me 22%. Në këtë qark lindën gjithsej 319 foshnja në janar- shtator 2021, nga 409 bebe në të njëjtën periudhë të vitit 2020.

Pas Gjirokastrës, Elbasani shënoi reduktimin më të madh të lindjeve me -17.5% në 9-mujor. Gjithsej në këtë qark lindën 1732 bebe nga 2100 në janar-shtator 2020.

Qarku i Vlorës ishte i treti për tkurrjen e madhe të lindshmërisë me mbi 15% në 9-mujor, me 153 bebe më pak se më 2020.

Më tej, Qarku i Fierit rezultoi me rënie të madhe të lindjeve me mbi 14%. Në-9 mujorin 2021, në Fier lindën 283 bebe më pak se vitin e kaluar, numër i mjaftueshëm për mbylljen e një shkolle.

Rënia e lindjeve ishte më e butë në Qarkun e Shkodrës ku numri i bebeve të lindura më 2021 ra me -1.3%, më tej në Lezhë me -4.7% dhe Berat me -7.3, Durrës,- 8.1%, Korçë -8.6%, Kukës -8.6% dhe Dibër -9.2%.

Gjatë vitit 2020, lindshmëria pa rritje pozitive së paku në tre qarqe, por ritmet pozitive të rritjes u zbehën në 9-mujorin 2021. Edhe kryeqyteti i cili nën efektin imigrimit të brendshëm ka pasur rritje të popullsisë, tani është në fazën e maturimit. Ritmet e rritjes së popullsisë në Tiranë po bien nga viti në vit, ndërsa një anketë mbi emigracionin që ka zhvilluar INSTAT ka treguar se gjatë viteve 2011-2019, më shumë se 10 % e familjeve në këtë qark kanë emigruar jashtë. Tashmë ky fenomen po pasqyrohet në rënien e numrit të lindjeve.

Rënia e lindshmërisë, nga njëra anë, dhe rritja e vdekshmërisë edhe si rrjedhojë e pandemisë Covid-19 po përkeqëson treguesin e shtesës natyrore të vendit. Me këto zhvillime, popullsia e vendit do të hyjë shume shpejt në rënie të pazëvendësueshme, ndryshe nga rënia që krijon emigracioni i cili gjithmonë mban në vetvete variantin e rikthimit në atdhe.

Treguesit demografikë të vendit po ecin më keq se projeksionet pesimiste, teksa pandemia i ka ndikuar negativisht. Në klinikat gjinekologjike dhe maternitete, konsultat për të lindur fëmijë kanë rënë dukshëm.

Kufizimet në lëvizje, përkeqësimi i situatës ekonomike dhe frika se shtatzënia do të dëmtohet nga pandemia kanë shtyrë planet për fëmijë. Të njëjtat burime thonë se abortet për shkak të COVID janë rritur. Ka pasur raste, ku Sars-Cov-2 ka shkaktuar abort edhe tek gra që kanë shfaqur simptoma të lehta./Monitor

The post Covid-19 përkeqëson lindshmërinë, të gjitha qarqet me rënie në 9-mujor, edhe Tirana appeared first on Albeu.com.