Karriera e Nevil Dedes ka marrë një drejtim të jashtëzakonshëm brenda vetëm pak muajsh. Pas shkarkimit nga Ferizaj, trajneri shqiptar udhëhoqi Egnatian drejt titullit kampion në Shqipëri dhe një arritjeje historike në garat evropiane.

Më 19 prill, Ferizaj vendosi ta largonte Deden nga detyra, ndërsa skuadra ndodhej në luftë për mbijetesë. Megjithëse pati një rrugëtim me ulje dhe ngritje në kampionatin kosovar, ai arriti ta çonte ekipin deri në finalen e Kupës së Kosovës.

Ndarja me klubin nga Ferizaj nuk e mbylli aventurën e tij, por i hapi rrugën një etape të re, e cila do të shoqërohej me rezultate të mëdha.

Më 31 maj, Dede festoi titullin e kampionit të Shqipërisë në krye të Egnatias, pas një ecurie bindëse në fazën “play-off”.

Nën drejtimin e tij, Egnatia dominoi Elbasanin me rezultatin 4-0, fitoi 2-1 ndaj Vllaznisë së Shkodrës dhe mposhti 2-0 Dinamon, duke siguruar kështu trofeun e kampionit.

Rezultatet pozitive vijuan edhe jashtë Shqipërisë. Më 13 gusht, skuadra e drejtuar nga Dede u kualifikua në play-off të Ligës së Evropës, duke shënuar një tjetër moment historik në skenën ndërkombëtare.

Falë këtij kualifikimi, klubi shqiptar e ka të garantuar të paktën pjesëmarrjen në fazën e ligës së Ligës së Konferencës, pavarësisht se çfarë rezultati do të marrë në raundin pasues.

Për të siguruar një vend në Ligën e Evropës, Egnatia do të përballet në raundin final me Lillestrom. Ndeshja e parë do të zhvillohet më 20 gusht, me ekipin shqiptar si vendas, ndërsa takimi i kthimit është programuar për më 27 gusht.

Nga shkarkimi në Kosovë te kurorëzimi si kampion i Shqipërisë dhe afrimi me një tjetër sukses evropian, Nevil Dede ka përjetuar një përmbysje mbresëlënëse në karrierë, duke shkruar histori në stolin e Egnatias.

The post Nevil Dede, nga largimi prej Ferizajt te triumfi në Shqipëri dhe historia evropiane me Egnatian appeared first on Albeu.com.

Egnatia, kampionia e Shqipërisë, ka përmbysur në mënyrë spektakolare Shamrock Rovers, duke siguruar kualifikimin në finalen e play-offit të Ligës së Evropës.

Skuadra shqiptare kishte humbur 1-3 në përballjen e parë, por u kundërpërgjigj me një fitore të thellë 5-1, pavarësisht se luajti me dhjetë futbollistë që nga fundi i pjesës së parë.

Vetëm katër minuta pas nisjes së takimit, Adjessa shënoi golin e avantazhit për Egnatian, ndërsa Albanese e çoi rezultatin në 2-0 në minutën e 11-të.

Gruda realizoi golin e tretë në minutën e 20-të, kurse në të 38-ën Adjessa goditi sërish pas një tjetër bashkëpunimi me Madeiros.

Vështirësitë për Egnatian u shtuan në minutën 45+3’, kur Ndreca u ndëshkua me kartonin e dytë të verdhë dhe u largua nga fusha.

Edhe me një lojtar më pak, skuadra shqiptare vijoi dominimin. Albanese kompletoi het-trikun në minutën e 58-të, duke vulosur kalimin në fazën tjetër.

Shamrock Rovers arriti vetëm golin e nderit, të shënuar nga Burke në minutën e 74-t.

Në finalen e play-offit, Egnatia do të përballet me klubin norvegjez Lillestrom.

The post Egnatia realizon përmbysjen e jashtëzakonshme dhe siguron play-offin e Ligës së Evropës appeared first on Albeu.com.

Ruben Amorim ka shpalosur synime të mëdha për edicionin e tij të parë në stolin e Milanit, duke kërkuar që Rossonerët të luftojnë si për Scudetton, ashtu edhe për trofeun e Ligës së Evropës.

Trajneri portugez, sipas calciomercato.com, nuk pranoi t’i ulte pritshmëritë, ndonëse ka marrë drejtimin e një skuadre që po kalon nëpër një proces të gjerë rindërtimi.

“Nuk mund të vij këtu dhe të them se nuk mundemi ose se nuk duam ta fitojmë titullin. Duhet bërë shumë punë, pasi kemi një trajner të ri dhe ndryshime në skuadër, por kur përfaqëson një klub të përmasave të Milanit, objektivi duhet të jetë titulli. Prandaj, do të provojmë”, deklaroi fillimisht Amorim.

Ambicia e tij shtrihet edhe në arenën evropiane: “Në Ligën e Evropës duhet të kemi besim dhe ta dëshirojmë fitimin e këtij kompeticioni”.

Megjithatë, portugezi nënvizoi se zhvillimi i projektit nuk mund të jetë i menjëhershëm, ndërsa rikthimin në Ligën e Kampionëve e cilësoi si një çështje themelore për klubin.

“Të gjithë i duan të gjitha dhe i duan menjëherë, por puna e bërë siç duhet kërkon kohë. Unë kam zgjedhur t’i bëj gjërat e duhura në kohën e duhur”, përfundoi trajneri i Milanit.

The post Amorim vendos si objektiva për Milanin Scudetton dhe triumfin në Ligën e Evropës appeared first on Albeu.com.

Në një bisedë të hapur me të përditshmen italiane Gazzetta dello Sport, talenti shqiptar i Milanit, Ardon Jashari, ka ndarë ambiciet për sezonin e ri, bashkëjetesën me legjendën Luka Modric dhe prapaskenat e merkatos së verës.

Jashari synon të kthehet në një element të pazëvendësueshëm te kuqezinjtë, duke luajtur krah fituesit të Topit të Artë, dhe ëndërron të shkëlqejë për klubin që e ka mbështetur prej fëmijërisë. Pas një viti debutues nën pritshmëritë personale, i ndikuar edhe nga konkurenca me kroatun, mesfushori me origjinë zvicerane është i bindur se ardhja e trajnerit Ruben Amorim do të sjellë një kthesë për të.

Për të, objektivi është i qartë: një Milan që dominon si në Serie A, ashtu edhe në Ligën e Evropës, dhe çdo stërvitje është një hap drejt këtij misioni. Largimi nga Milani nuk i ka kaluar asnjëherë nëpër mendje, pikërisht sepse këtu dëshiron të lërë gjurmë. Tani e ka në dorë ta kthejë pasionin e fëmijërisë në realitet.

“Pas angazhimit në Kupën e Botës dhe pushimeve, jam i rimbushur me energji. Kam vetëm pak kohë që jam rikthyer, por besoj se e kam kapur menjëherë idenë e lojës që kërkon Amorimi. Më tërheq futbolli i shpejtë dhe agresiv dhe besoj se e kemi cilësinë për ta zbatuar. Milani duhet të interpretojë këtë filozofi dhe të synojë fitoren,” pohoi Jashari.

Kur u pyet për synimet konkrete, ai nuk la hapësirë për dyshime: “Të fitojmë ndeshje pas ndeshjeje, çdo herë që hyjmë në fushë. Ky është mentaliteti që duhet të na karakterizojë. Nëse ia dalim, do të gjendemi automatikisht në krye të klasifikimit. Por ende nuk ka ardhur momenti për të folur për titullin kampion: duhet të ndërtojmë fillimisht një mendësi fitimtare dhe të kënaqemi duke luajtur. Jam i sigurt që duke i bashkuar këto dy aspekte, do të arrijmë gjithçka që na nevojitet.”

Sa i përket mungesës në Ligën e Kampionëve, 21-vjeçari tregoi qasje pragmatike: “Natyrisht që do të dëshironim të luanim në Champions, ishte qëllimi ynë kryesor, por tani duhet të përqendrohemi totalisht te Evropa Ligë. Të kesh një kalendar të dendur është pozitive për të gjithë dhe ne duhet të jemi të përgatitur fizikisht. Ashtu si në kampionat, edhe në Evropë duam të dalim fitues. Ka një tjetër trofe në lojë dhe do të provojmë. Jemi në dijeni të nivelit të lartë të kundërshtarëve, por fokusi duhet të mbetet vetëm te vetja jonë.”

Duke reflektuar mbi vitin e parë në Itali, ai pranoi se gjërat nuk shkuan sipas planeve: “Ishte sezoni im debutues me Milanin dhe në futbollin italian. Për më tepër, pësova një dëmtim në fibulë dhe minutat ishin të pakta. Kjo nuk ishte ajo që prisja kur firmosa… Tani dua të shfaq potencialin tim të vërtetë, por për ta bërë këtë kam nevojë për hapësira dhe vazhdimësi. Kur të jem në formën time optimale, e di se do t’i bëj tifozët krenarë dhe do të kontribuoj me cilësitë e mia. Shpresoj të gjithë të kënaqemi së bashku.”

Bashkëjetesa me Modricin, larg të qenit pengesë, shihet si një pasuri: “Për mua, Lukita nuk përbën aspak problem. Përkundrazi, rinovimi i tij është një lajm fantastik. Të gjithë duhet të ndihemi krenarë që kemi një kampion të tillë në skuadër. Jashtë fushës kemi një marrëdhënie vërtet të shkëlqyer: shpresoj të kemi më shumë minuta bashkë këtë vit dhe të krijojmë një mirëkuptim perfekt. Sinjalet në pjesën e dytë të ndeshjes së fundit ishin shumë inkurajuese.”

Gjatë Kupës së Botës, zërat e merkatos e lidhën me klube si Juventusi dhe Atalanta, por Jashari e kishte të qartë të ardhmen e tij: “Erdha te Milani një vit më parë duke realizuar një ëndërr, pasi zemra më ka rrahur gjithmonë për kuqezinjtë. Dëshiroja me çdo kusht ta mbaja këtë fanellë dhe të tregoja aftësitë e mia në San Siro. Megjithatë, në futboll lumturia e vërtetë vjen kur luan… Këtë sezon shpresoj të jem në pozitë për të ndihmuar ekipin dhe për të dhënë maksimumin. Jam thellësisht i bindur se klubi ka të njëjtin mendim,” deklaroi ylli i kombëtares shqiptare.

The post Rrëfimi i Jasharit: Planet me Milanin, Modric si frymëzim dhe refuzimi i ofertave të mëdha nga Juventus e Atalanta appeared first on Albeu.com.

UEFA ka bërë të ditura dy modifikime të rëndësishme në rregulloret e saj, të cilat hyjnë në fuqi menjëherë dhe do të aplikohen nga sezoni 2026/27 në të gjitha kompeticionet evropiane për klube.

Rregullimi i parë lidhet me masën e pezullimit për kartonët e verdhë. Sipas dispozitës së re, një lojtar do të mungojë automatikisht pas marrjes së katër kartonëve të verdhë, në vend të tre të tillëve, siç parashikohej deri tani.

Pas pezullimit të parë, ndëshkimi i radhës do të aktivizohet për çdo numër çift kartonësh, pra pas kartonit të gjashtë, të tetë dhe në vazhdim.

Ndryshimi tjetër i miratuar nga UEFA ka të bëjë me mënyrën e funksionimit të orës zyrtare në stadium.

Rregulli që e ndalonte kronometrin në minutat 45:00 dhe 90:00 është hequr. Duke nisur nga sezoni i ri, ora do të vijojë të numërojë edhe në kohën shtesë, ndërsa minutat e akorduara do të shfaqen në një mënyrë të ngjashme me praktikën e përdorur prej vitesh në futbollin anglez.

Sipas UEFA-s, këto masa kanë për qëllim përditësimin e rregulloreve të garave evropiane dhe krijimin e një kuadri më të qartë për futbollistët dhe tifozët gjatë ndeshjeve.

The post UEFA ndryshon rregullat për kartonët e verdhë dhe kronometrin në garat evropiane appeared first on Albeu.com.

UEFA ka njoftuar dy përditësime të rëndësishme në rregulloret e saj, të cilat do të zbatohen përpara nisjes së sezonit të ri dhe prekin klubet pjesëmarrëse në Ligën e Kampionëve, Ligën e Evropës dhe Ligën e Konferencës.

Risi do të ketë edhe në mënyrën e shfaqjes së kohës në tabelat elektronike të stadiumeve. Kërkesa e mëparshme që kronometrat të ndalonin në minutën e 45-të dhe në atë të 90-të është hequr.

Prej këtij sezoni, koha do të vijojë të ecë edhe gjatë minutave shtesë të akorduara nga gjyqtari, si dhe gjatë kohës shtesë të ndeshjes. Me këtë vendim, UEFA po ndjek modelin e përdorur në Ligën Premier gjatë dy viteve të fundit.

Ndryshimi tjetër lidhet me kartonët e verdhë dhe pragun që çon në pezullimin e parë. Në fazën e ligës, një futbollisti do t’i nevojiten katër kartonë të verdhë, në vend të tre që kërkoheshin më parë, për të marrë një ndeshje pezullim.

Pezullimet e tjera do të aktivizohen pas grumbullimit të çdo dy kartonëve të rinj të verdhë, përkatësisht pas kartonit të gjashtë, të tetë dhe në vijim.

Vendimet e reja janë bërë publike në një periudhë tensionesh të forta mes UEFA-s dhe FIFA-s. Së fundmi, të 55 anëtarët e institucionit drejtues të futbollit evropian votuan unanimisht për tërheqjen nga gara e FIFA-s.

Shkak për këtë qëndrim janë planet e diskutueshme të organizatës botërore të futbollit për t’ua kaluar investitorëve privatë të drejtat tregtare dhe të menaxhimit. UEFA i ka cilësuar këto iniciativa si një akt shtrëngimi dhe ka kërkuar që propozimet të pezullohen tërësisht.

The post Përveç ndryshimeve për kartonët, UEFA sjell një rregull të ri në garat evropiane appeared first on Albeu.com.

Egnatia është mundur 3-1 në transfertë nga Shamrock Rovers, në takimin e parë të raundit të tretë kualifikues të Ligës së Evropës. Ky rezultat ua vështirëson kampionëve të Shqipërisë rrugëtimin drejt fazës “play-off”.

Fraksioni i parë ishte i baraspeshuar dhe u mbyll në shifrat 1-1, ndërsa pas pushimit skuadra irlandeze mori kontrollin e plotë të lojës dhe shënoi dy herë brenda një kohe të shkurtër.

Vendasit zhbllokuan rezultatin në minutën e 29-të. Pas penalltisë së akorduar nga gjyqtari, Graham Burke u tregua i saktë nga pika e bardhë dhe kaloi Shamrock Rovers në avantazh.

Përgjigjja e Egnatias erdhi në minutën e 40-të, pas ndërhyrjes së VAR-it. Kampionët shqiptarë fituan fillimisht një penallti, por portieri ndali goditjen e Guillem Jaime. Aksioni vijoi dhe Aaron Greene e devijoi topin në portën e vet, duke sjellë barazimin për Egnatian.

Skuadra shqiptare nuk e ruajti të njëjtin ritëm në pjesën e dytë dhe u ndëshkua shpejt. Roberto Lopes shënoi golin e rezultatit 2-1 në minutën e 55-të, mes protestave të futbollistëve të Egnatias, të cilët pretenduan se gjatë aksionit kishte pasur faull.

Dy minuta më pas, Aaron Greene realizoi pas një goditjeje nga këndi dhe e çoi rezultatin në 3-1 për Shamrock Rovers.

Pas golit të tretë, ekipi irlandez pati edhe disa mundësi të pastra për ta zgjeruar më tej epërsinë.

Takimi i kthimit është planifikuar për javën e ardhshme. Kampionët e Shqipërisë do të kërkojnë të përmbysin disavantazhin prej dy golash dhe të mbajnë gjallë shpresat për t’u kualifikuar në fazën “play-off” të Ligës së Evropës.

The post Egnatia humbet ndaj Shamrock Rovers, irlandezët vendosin ndeshjen pas pushimit appeared first on Albeu.com.

Rregullat që përcaktojnë pezullimet për shkak të kartonëve të verdhë në kompeticionet evropiane për klube janë ndryshuar nga UEFA.

Duke nisur nga sezoni 2026/27, futbollistët dhe zyrtarët e skuadrave që marrin pjesë në fazën e ligës të Ligës së Kampionëve, Ligës së Evropës dhe Ligës së Konferencës do të dënohen automatikisht me një ndeshje pezullim pasi të kenë grumbulluar katër kartonë të verdhë që nuk sjellin përjashtim. Sipas rregullit aktual, ky ndëshkim zbatohet pas kartonit të tretë të verdhë.

Ky vendim pason reformimin e formatit të turneve nga UEFA, përmes të cilit faza e ligës në Ligën e Kampionëve dhe Ligën e Evropës u zgjerua nga gjashtë në tetë takime.

Për të ruajtur të njëjtin sistem disiplinor në të tria kompeticionet, pragu i ri do të vlejë gjithashtu për Ligën e Konferencës.

Pas pezullimit të parë, çdo dy kartonë të verdhë të tjerë do të sjellin një dënim të ri. Rrjedhimisht, lojtarët ose zyrtarët do të pezullohen sërish kur të arrijnë kartonin e gjashtë, të tetë, të dhjetë e në vazhdim.

The post UEFA miraton prag të ri pezullimi për kartonët e verdhë appeared first on Albeu.com.

Ballkani ka bërë publik formacionin startues për ndeshjen e dytë kundër Connah’s Quay Nomads, e vlefshme për raundin e parë kualifikues të Ligës së Konferencës.

Pasi sfida e parë përfundoi pa gola, 0:0, ekipi nga Suhareka kërkon ta sigurojë kalimin në raundin e dytë përpara mbështetësve të vet.

Mislav Karoglan ka zgjedhur një qasje ofensive, duke i besuar repartit të avancuar Valentin Serbe, Almi Klinaku dhe Engjëll Ajazaj.

Skuadra që del fituese nga ky duel do të sigurojë një vend në raundin e dytë kualifikues të Ligës së Konferencës.

Ballkani: Golubovic, Vokrri, Batarelo, Halili, Dosso, Sabanadzovic, Giovanni, Kuç, Klinaku, Serebe, Ajazaj.

Connah’s Quay: Renshaw, Stone, Cowan, Deane, Flynn, Ferguson, Jones, Shariff, West, Murray dhe Franklin.

The post Ballkani – Connah’s Quay, formacionet zyrtare: Karoglan zgjedh një përbërje sulmuese appeared first on Albeu.com.