Lëvizja Revolta ka paralajmëruar mbajtjen e një proteste qytetare më 6 gusht, nga ora 10:00, në sheshin “Ibrahim Rugova” në Prishtinë, përpara Kuvendit të Kosovës.

Në njoftimin e saj, lëvizja ka bërë të ditur se tubimi do të zhvillohet “për mbrojtjen e sovranitetit dhe integritetit shtetëror të Republikës së Kosovës”.

Tri kërkesat e organizatorëve janë publikimi i numrit të aplikimeve dhe shtetësive të fituara nga shtetasit e Serbisë në bazë të ligjit për shtetësinë, shfuqizimi i Ligjit nr. 10/L-023 për Shtetësinë e Republikës së Kosovës, si dhe shfuqizimi i nenit 155 të Kushtetutës së Republikës së Kosovës.

“Nuk bëhet fjalë për një çështje partiake, por për sovranitetin, shtetësinë dhe të ardhmen e Republikës së Kosovës. Bashkohu”, thuhet në thirrjen e Lëvizjes Revolta.

The post Lëvizja Revolta thërret protestë para Kuvendit të Kosovës më 6 gusht appeared first on Albeu.com.