Grupi i deputetëve të Partisë Demokratike të Kosovës i ka dërguar një tjetër letër Avni Deharit, kryesuesit të seancës konstituive, me kërkesën që vazhdimi i saj të caktohet për të shtunën, më 22 gusht, në orën 11:00.

Sipas PDK-së, moskonstituimi i Kuvendit brenda afatit të paraparë ka sjellë një gjendje të rëndë, të karakterizuar nga shkelja e Kushtetutës dhe mospërfillja e akteve të Gjykatës Kushtetuese.

Në letër theksohet se gjendja rëndohet edhe më shumë nga moszbatimi i procedurave dhe afateve që përcakton Rregullorja e Kuvendit.

PDK-ja rikujton se jurisprudenca e Gjykatës Kushtetuese kërkon konstituimin e Kuvendit edhe pasi afati kushtetues të jetë tejkaluar, pasi shkelja e këtij afati nuk e anulon detyrimin për përmbylljen e procesit. Dokumenti mban nënshkrimin e sekretares së përgjithshme të partisë dhe deputetes Vlora Çitaku.

The post PDK-ja i shkruan përsëri Deharit, kërkon që seanca e Kuvendit të vazhdojë të shtunën appeared first on Albeu.com.

Kryeministri në detyrë i Kosovës, Albin Kurti, u ka shkruar përsëri mbrëmë drejtuesve të partive opozitare, duke kërkuar një takim për arritjen e një marrëveshjeje politike që do të shmangte zgjedhjet e reja.

Burime të RTK-së nga Qeveria kanë bërë të ditur se gjatë ditës së djeshme Kurti i kontaktoi liderët opozitarë përmes platformave telefonike dhe i ftoi në një takim të përbashkët, ku do të diskutohej situata aktuale politike në vend.

Sipas të njëjtave burime, takimi synon të shqyrtojë mundësinë e një dakordimi politik, përmes të cilit mund të kapërcehet ngërçi institucional dhe të evitohet një proces i ri zgjedhor.

Kurti edhe më herët u është drejtuar krerëve të partive opozitare me kërkesën për takim dhe për një marrëveshje politike.

Ende nuk është bërë e ditur nëse liderët e opozitës do ta pranojnë këtë ftesë dhe nëse takimi mes tyre do të realizohet.

Në të njëjtën kohë, tensionet politike janë shfaqur edhe sot në Kuvend. Seanca u karakterizua nga përplasje verbale ndërmjet deputetëve opozitarë dhe atyre të LVV-së, për shkak të qëndrimeve të kundërta mbi mënyrën e daljes nga kriza institucionale.

Partitë opozitare kërkojnë mbajtjen e seancës konstituive dhe përfundimin e procesit të konstituimit të Kuvendit, ndërsa debatet për veprimet e ardhshme institucionale janë shoqëruar me përplasje mes deputetëve.

Bllokada lidhur me konstituimin e Kuvendit dhe krijimin e institucioneve të reja vazhdon prej javësh, duke e rritur presionin politik për gjetjen e një zgjidhjeje.

The post Kurti u dërgon sërish mesazhe liderëve të opozitës appeared first on Albeu.com.

Rifat Latifi, ish-ministri i Shëndetësisë në Kosovë, ka reaguar ndaj deklaratës së presidentit Volodymyr Zelensky në kryeqytetin serb, ku theksoi se Ukraina nuk e ka njohur shtetësinë e Kosovës. Ai i ka dërguar një korrespondencë zyrtare udhëheqësit ukrainas.

Në shkresën e tij, Latifi shpreh një zhgënjim të madh nga qëndrimi i Kievit, të cilin e sheh si kontradiktor me vetë realitetin dhe sfidat me të cilat përballet Ukraina, duke shtuar se kjo qasje minon të njëjtat parime.

“Arsyetimet e ngritura kundër nesh janë përdorur fjalë për fjalë edhe kundër jush, nga e njëjta forcë,” shkruan ai në letër.

Ish-ministri nënvizon se Prishtina ka qëndruar fuqishëm përkrah Kievit që nga nisja e pushtimit rus, duke kujtuar përkrahjen e plotë për masat ndëshkuese perëndimore ndaj Moskës, mikpritjen e profesionistëve të medias dhe familjeve ukrainase, si dhe njohjen sovranitetit të Ukrainës brenda kufijve të saj të njohur globalisht, duke përfshirë gadishullin e Krimesë.

Latifi solli në vëmendje edhe përkushtimin e tij vetjak ndaj çështjes ukrainase. “Si një shqiptaro-amerikan me origjinë nga Kosova, unë shkova në Ukrainë për të ofruar ndihmë pas invazionit fillestar”, kujton ai, duke shtuar shpresën se gjatë një udhëtimi të radhës do ta gjejë vendin të çliruar.

Në mesazhin e tij, ai argumenton se qëndrimi i Ukrainës ndaj Kosovës është veçanërisht dekurajues, duke pasur parasysh paralelet e forta mes vuajtjeve që ka përjetuar populli i Kosovës dhe asaj që po kalon sot populli ukrainas nën sulmin rus.

“Ne e kuptojmë vuajtjen tuaj, sepse e kemi provuar mbi vete, nga e njëjta doktrinë dhe brenda kujtesës sonë të freskët,” thekson Latifi.

Ai nuk kurseu kritikat as për afrimin e Zelenskyt me presidentin serb Aleksandar Vuçiq, duke e paralajmëruar liderin ukrainas se bashkëpunimi me Beogradin dhe çdo përpjekje për t’iu afruar Moskës përbëjnë një drejtim krejtësisht të gabuar.

“Nëse po ndërtoni aleanca me Vuçiqin dhe po synoni miqësi me Putinin, keni marrë rrugën e gabuar. Plotësisht të gabuar,” shprehet ai në letër.

Latifi e mbyll mesazhin me një shprehje solidariteti për popullin ukrainas dhe një thirrje që Ukraina të mbajë anën e Kosovës. “Me nderim dhe solidaritet të palëkundur për popullin e Ukrainës.”

The post Ish-ministri shëndetësor i dërgon mesazh Zelenskyt pas qëndrimit për pavarësinë e Kosovës appeared first on Albeu.com.

Partia Demokratike e Kosovës (PDK) ritheksoi të premten se do të qëndrojë në opozitë, ndërsa kërkoi përmbylljen e konstituimit të Kuvendit për t’i hapur rrugën krijimit të institucioneve të reja.

Në një letër dërguar Albin Kurtit të premten, kryetari i PDK-së, Bedri Hamza, deklaroi se pozicioni i partisë së tij ishte sqaruar si gjatë takimit të 10 korrikut, ashtu edhe përmes përgjigjes së 3 gushtit.

Hamza bëri të ditur se, për shkak të dallimeve programore dhe konceptuale, PDK-ja do ta përmbushë rolin e saj opozitar në Kuvendin e Republikës së Kosovës. Sipas letrës, partia do të kontribuojë nga aty në forcimin e demokracisë, mbrojtjen e interesit shtetëror dhe përfaqësimin e interesave të qytetarëve, transmeton Kosovapress.

Kryetari i PDK-së i kërkoi Kurtit që, brenda afatit të vendosur me aktgjykimin e Gjykatës Kushtetuese, të ndërmarrë veprimet e domosdoshme për përfundimin e konstituimit të Kuvendit.

Në letër kërkohet që këta hapa të ndërmerren sot, në përputhje me afatin e përcaktuar nga Aktgjykimi i Gjykatës Kushtetuese, në mënyrë që të përmbyllet konstituimi i Kuvendit dhe të mundësohet formimi i institucioneve të reja.

Hamza konfirmoi gjithashtu se PDK-ja do t’i japë votat e saj për ta çuar deri në fund procesin e konstituimit të legjislativit.

Ai shkroi se Partia Demokratike e Kosovës do të japë kontributin e vet për konstituimin e Kuvendit të Republikës së Kosovës.

Dokumenti, i cili përbën përgjigje ndaj letrës dhe ftesës së Kurtit për takim, mban datën 7 gusht 2026.

The post Hamza i përgjigjet Kurtit me letër appeared first on Albeu.com.

Ministri në detyrë i Punëve të Jashtme dhe Diasporës, Glauk Konjufca, i ka dërguar letër Përfaqësueses së Lartë të Bashkimit Evropian për Politikë të Jashtme dhe Siguri, Kaja Kallas, ku kërkon që BE-ja të mbajë qëndrim më të fortë ndaj deklaratës së ministres serbe Snezhana Paunoviq.

Paunoviq kishte deklaruar se, po të gjendej në vend të Sllobodan Millosheviqit në vitin 1998, do ta kishte spastruar etnikisht Kosovën.

Në letrën drejtuar Kallasit, Konjufca e konsideron këtë deklaratë si “lavdërim të qëllimshëm të krimeve të luftës”, nxitje të urrejtjes dhe rrezik për paqen e stabilitetin në Ballkanin Perëndimor.

Ai vlerëson se fjalët e një ministreje në detyrë nuk mund të paraqiten si një gabim i zakonshëm. Sipas Konjufcës, intervista e saj përmbante retorikë revizioniste dhe armiqësore, e cila cenon dialogun për normalizimin e raporteve ndërmjet Kosovës dhe Serbisë.

Ministri në detyrë ka shprehur po ashtu shqetësim për reagimin e parë të Bashkimit Evropian, të cilin e ka cilësuar si të vonuar dhe të kufizuar.

“Një reagim publik më i qartë dhe më i fuqishëm është i domosdoshëm për të mbështetur angazhimin e Bashkimit Evropian për parandalimin e krimeve mizore, refuzimin e gjuhës së urrejtjes dhe luftimin e revizionizmit historik”, thuhet në letër.

Në dokument, Konjufca kërkon që BE-ja ta dënojë hapur dhe qartë deklaratën e ministres Paunoviq, t’u rikujtojë institucioneve serbe se deklarata të tilla nuk përputhen me vlerat evropiane dhe procesin e anëtarësimit, si dhe ta trajtojë këtë çështje në dialogun politik me Serbinë dhe në procesin e integrimit evropian.

Ai i ka kërkuar gjithashtu Kallasit që sa më shpejt të zhvillojnë një takim ose një bisedë telefonike për këtë çështje.

Në përmbyllje të letrës, Konjufca thekson se Kosova vazhdon të jetë e angazhuar për demokracinë shumetnike, sundimin e ligjit dhe mbrojtjen e të drejtave të të gjitha komuniteteve. Ai nënvizon se spastrimi etnik dhe ndëshkimi kolektiv mbeten të papranueshme në çdo formë.

The post Konjufca i kërkon Kallasit që BE-ja të reagojë më ashpër ndaj deklaratave të Paunoviqit appeared first on Albeu.com.

Mesazhi i plotë:

Zoti Kryeministër,

Mbasditja e sotme pritet të shënojë ditën e 24-t të një proteste ku dhjetëra mijëra qytetarë janë mbledhur në shesh, të zemëruar dhe të rraskapitur nga indiferenca, dehja dhe deliri i pushtetit të gjithë klasës politike të vendit.

Qytetarët ju kanë paraqitur një sërë kërkesash, por në vend të përballjes dhe llogaridhënies që ju takon si drejtues i shtetit, ju po përpiqeni padrejtësisht t’i fyeni, t’i rëndoni shpirtërisht dhe t’i denigroni, ndonëse ata po ushtrojnë një të drejtë themelore kushtetuese: protestën.

Populli shqiptar ruan një mirënjohje të thellë për SHBA-në dhe kjo protestë nuk është aspak kundër tyre, por kundër sistemit të brendshëm të ngritur ndër dekada mbi frikën, servilizmin dhe tjetërsimin e qenies shqiptare. Është një sistem ku, pavarësisht iluzioneve të para që pata, nuk e gjeta veten, të paktën jo si pjesë e një partie të caktuar.

Që prej momentit kur u bëra fizikisht pjesë e kësaj proteste, kuptova edhe më qartë se shqiptarët më në fund po e konsiderojnë atdheun e tyre si atdhe; po e shohin vendin si një hapësirë ku mund të jetohet dhe ku duhet të kthehen, e jo si një tokë nga e cila duhet të largohen. E admiroj qëndresën e tyre, sepse kjo dëshmon se kemi kujt t’i shërbejmë.

Populli shqiptar po përpiqet të kalojë nga vegjëlia drejt sovranitetit për të shprehur vullnetin e penguar dhe, pas kaq shumë vitesh, për të bërë kalimin nga ndërgjegjja personale te vetëdija kolektive, që mban thellë dhe pastër brenda vetes të trija kohët e njeriut.

Zoti Kryeministër, brezi i ri, të cilit i përkas edhe unë, nuk trembet si brezi i prindërve tanë, i cili shpesh pranonte poshtërimin dhe shantazhohej nga nevoja për mbijetesë. Ky brez është pa komplekse dhe kërkon të shfaqë energjinë dhe lirinë e vet pa u kthyer në vegël apo në hije të pushtetit.

Hyrja ime në politikë ishte një vendim për të cilin më është dashur kohë që të gjeja guximin ta hidhja atë hap, por largimi nga formacioni që ju keni ndërtuar, e që sot ndodhet në një dehje të thellë pushteti, më kërkoi edhe më shumë kohë derisa gjeta forcën për ta bërë realitet.

Shqiptarët janë të lodhur dhe nuk frymëzohen më as nga ju dhe as nga kasta e vjetër politike. Kjo ju ka çuar në një krizë të thellë legjitimiteti, e cila vështirë se mund të kapërcehet pa pasoja ose pa lëshime.

Ndërtimet, për të cilat qytetarët nuk janë pyetur kurrë, u bëjnë hije si tokës ashtu edhe qiellit. Mohuesit dhe rimohuesit e këtij vendi e kanë kthyer atë në një përzierje pa identitet dhe duket sikur shtyhen me bërryla mes tyre. Prandaj, me të drejtë, nuk besohet më te zhvillimi që ju shpallni.

Përçmimi ndaj revoltës së njerëzve të thjeshtë dhe kauzave si ajo e Rrjollit, Zvërnecit dhe shumë të tjerave ndër vite, ka ngritur një strukturë pakënaqësish që vështirë se shembet më.

Për ata që pyesin pse nuk fola më herët, përgjigjja është e thjeshtë. Drejtuesit e grupit që lashë pas nuk e pranonin mendimin ndryshe, as debatin dhe as ndjeshmërinë morale. Madje, me çdo mjet, ata përpiqen t’ia marrin frymën edhe përpjekjes më të vogël për të qenë ndryshe apo për të pasur mendim të lirë.

Jam e bindur se me botëkuptime tjetërsuese nuk mund të ndërtohen realitete të sigurta për të ardhmen. Prandaj ka ardhur koha të kalojmë nga ndërtimi i projekteve 3D te ndërtimi i një botëkuptimi tjetër, më autentik, të cilin kjo protestë po e mbjell dhe po e udhëheq më së miri; një botëkuptim ku i huaji nuk trajtohet më mirë se i yti, një mendësi që i jep shqiptarit të drejtën të jetë zot në shtëpinë e vet.

Armiqtë e vendit tonë pothuajse kurrë nuk kanë qenë të jashtëm, ashtu siç po përpiqeni t’i paraqisni edhe ju, por kryesisht të brendshëm, të fshehur mirë, të kollarisur dhe të pushtuar nga dalldia e pushtetit dhe shkëputja nga realiteti.

Zoti Kryeministër, një zhvillim është i mirë vetëm kur u shërben njerëzve të vet dhe i mban ata në mirëqenie, pa i detyruar të bëhen emigrantë në tokë të huaj dhe turistë në vendin e tyre. Përndryshe, ky zhvillim bëhet i dhunshëm, nëse të detyron të harrosh kush je dhe kujt i përket.

Shqiptarët nuk kanë nevojë medoemos për të huajën; ata kanë nevojë për realizëm dhe për një zhvillim që respekton natyrën, pronën, përkatësinë tonë, vlerat dhe mbi të gjitha një zhvillim që nuk mohon parimin e solidaritetit me brezat që vijnë. Ata kanë nevojë për njerëz që i përfaqësojnë me ndërgjegjen e së nesërmes.

Si deputete, e kam parë nga afër dhe jam e bindur se edhe një pjesë e madhe e elitës politike nuk ka më besim te ju, por guximi për ta pranuar dhe për të vepruar mund të kërkojë ende pak kohë.

Njerëzit mund të përqafojnë një ideologji të caktuar vetëm në masën që ajo u garanton një perspektivë individuale dhe një siguri kolektive. Sot, në Shqipëri, të dyja këto po çalojnë rëndë.

Ditë pas dite, shqiptarët në shesh dhe ata që i mbështesin nga larg po japin mesazhin se nuk janë një popull i ndaluar dhe se nuk pranojnë më të mbeten të harruar. Kjo protestë është një lumë i rrëmbyeshëm që rrjedh në lëkurën e historisë dhe që nuk pranon më të trajtohet sikur nuk shihet dhe nuk dëgjohet.

Mosmarrëveshja mes shtetit dhe kombit sjell shkelje të rënda morale, aleanca pa parime, hedonizëm të verbër dhe në fund një kulm të ri të së keqes: përqeshjen e Shqipërisë. Dhe ky pokerizëm që po i bëhet vendit tonë po na çon verbërisht nëpër natë drejt përplasjes me ajsbergun.

Ende keni kohë ta ndalni këtë. Të shfuqizoni ligjet klienteliste dhe favorizuese, të mendoni për Republikën dhe për popullin shqiptar, i cili ka parë dhe ka përjetuar mjaftueshëm dhe që tashmë meriton të respektohet dhe të mbrohet.

Unë e di se ka shumë kumona që bien brenda jush, por di po ashtu se kryeministri nuk është mëkëmbësi i Zotit. Nëse hyjnorja nuk e kërkon kurrë legjitimitetin, kryeministri e kërkon atë periodikisht. Dhe nëse dëshironi që legjitimiteti t’ju rikthehet, atëherë dëgjojeni sheshin. Dëgjojeni ahun e popullit tuaj.

Nuk është detyrë e pushtetit ta bëjë njeriun të lumtur; detyra e tij është të krijojë kushtet që ai të mund të jetë i lumtur. Protestuesit nuk janë as libertinë dhe as jakobinë; janë shqiptarë të ndërgjegjshëm që kanë vendosur t’i rikthehen vendit, vetes dhe dinjitetit të tyre.

Nëse do t’jua doja të mirën, do t’ju uroja më pak pushtet dhe më shumë fisnikëri. Kjo mund të arrihet vetëm nëse kryeni aktin tuaj të fundit politik: dorëheqjen.

E di që ky vendim kërkon ndjeshmëri morale, fisnikëri politike dhe mbi të gjitha atdhedashuri. Uroj t’i gjeni sa më parë këto virtyte, që vendin që shqiptarët jua dhanë ta lini me dinjitet. Për këtë, ende jeni në kohë.

Sheshi po thërret me za eumenidje. Po i jep pushtetit mundësinë të vendosë drejtësinë. Prandaj, si deputete e Kuvendit dhe si qytetare e Republikës së Shqipërisë, ju bëj thirrje të veproni në emër të së mirës së përbashkët; në emër të asaj që është dhe jo të asaj që ju mendoni se është; t’i shpërbleni shqiptarët me dorëheqjen tuaj.

Në mesazhet e fundit që kemi shkëmbyer, më keni thënë se do të mbetem vetëm e pa besim dhe se as njerëzit e maleve nuk do të më përfillin më. Por unë nuk kam frikë të ec vetëm; unë jam dhe do të mbetem Marjana e maleve, dhe tashmë e kam kaluar gardhin, pa kthim.

The post Koçeku i drejtohet me letër të hapur Ramës: Qytetarët nuk gjejnë më frymëzim te politika e vjetër appeared first on Albeu.com.

Socialistë shqiptarë!
Anëtarë të Partisë Socialiste!
Deputetë dhe mbështetës të kësaj partie!

Zgjohuni!

Në krye të partisë keni një njeri që ju komandon, kërkon bindje pa kushte për çdo gjë, ju fyen me gjuhën dhe sjelljet e tij, ju nëpërkëmb dinjitetin në vend që t’ju respektojë, të konsultohet me ju dhe t’ju udhëheqë.

Në krye të qeverisë, të dalë nga votat e socialistëve, kemi një kryeministër, të cilin një pjesë e madhe e popullit nuk e mbështet dhe nuk e do më, siç dëshmojnë protestat masive të ditëve të fundit. Këto protesta nuk janë fryt i ndonjë lufte hibride nga armiqtë e jashtëm të Shqipërisë, siç përpiqet t’u mbushë mendjen shqiptarëve kryeministri, por pasojë e dëshpërimit dhe zemërimit të akumuluar nga korrupsioni sistemik, arbitrariteti në vendimmarrje dhe keqqeverisja e tij.

Nuk është Partia Socialiste ajo që populli refuzon, por kryetari i saj dhe kryeministri i vendit, i cili, për trembëdhjetë vite (sot ai është kryeministri më jetëgjatë në detyrë në të gjithë Europën), ka sunduar me arrogancë, duke e trajtuar pushtetin si pronë personale. Në këto 13 vite në Shqipëri është bërë çfarë ka dashur dhe si ka dashur Edi Rama, jo për të përmbushur nevojat e qytetarëve dhe as duke dhënë llogari para tyre apo përfaqësuesve të tyre. Kjo nuk është mënyra se si funksionon një demokraci parlamentare, madje as një monarki kushtetuese. Ky është modeli i një autokracie, i një sulltanati, ku vullneti i një njeriu të vetëm zëvendëson vullnetin e popullit.

Prej vitesh z. Rama përsërit refrenin se ai qëndron në krye të qeverisë falë votave të socialistëve shqiptarë dhe përkrahësve të Partisë Socialiste—votave tuaja dhe votës sime. Por kjo është vetëm alibia e tij për të mos e lëshuar pushtetin, pas të cilit është kapur dhe amoruar njëlloj si Berisha dhe si çdo politikan që e shndërron autoritarizmin në metodë qeverisjeje dhe në mënyrë sundimi.

Mijëra të rinj që i janë bashkuar Partisë Socialiste vitet e fundit dhe dhjetëra mijëra socialistë që kanë votuar për këtë parti e kanë gjetur kryeministrin në krye të saj, pa pasur kurrë mundësinë të zgjedhin mes tij dhe dikujt tjetër. Në fakt, Rama u ka mbyllur çdo hapësirë të tjerëve në atë parti për të konkurruar me të.

Sa i përket alibisë së tij se janë tetëqind mijë votat e “popullit socialist” ato që e mbajnë në postin e kryeministrit, nga i cili thotë se, për shkak të atyre votave, nuk do të largohet kurrë, kjo është, si çdo alibi, një mashtrim i madh. Tetëqind mijë vota shqiptarët i kanë dhënë për Partinë Socialiste, jo për Edi Ramën. Dhe do t’i jepnin edhe nëse në krye të saj do të ishte një tjetër individ—një socialist i mençur dhe i ndershëm, që pushtetin e sheh si shërbim ndaj publikut dhe interesave të vendit, jo si pronë personale.

Nuk jam nihilist dhe nuk mohoj zhvillimet pozitive dhe arritjet e këtyre viteve të fundit. Por, nëse deri më sot keni besuar mitin e stisur nga vetë z. Rama—se vetëm ai mund ta drejtojë dhe zhvillojë këtë vend, se vetëm ai ka fuqinë magjike ta anëtarësojë Shqipërinë në Bashkimin Europian—sot është koha të çliroheni nga ky iluzion dhe të shihni realitetin në sy. Ashtu siç nuk ishte Berisha ai që e futi Shqipërinë në NATO dhe mundësoi lëvizjen e lirë pa viza në Europë, nuk është Rama ai që do ta fusë këtë vend në BE, pavarësisht përpjekjeve të tij për ta shitur këtë si të vërtetë.

Protestat masive të ditëve të fundit krijojnë një dyshim të arsyeshëm se Partia Socialiste, partia më e madhe në vend, mund të mos i ketë të garantuara në zgjedhjet e ardhshme votat që ka marrë deri më sot. Arsyeja është e thjeshtë: kjo parti është identifikuar plotësisht me kryeministrin Rama, largimin e të cilit sot e kërkon një pjesë e madhe e shqiptarëve, mes tyre edhe shumë socialistë.

Që të mos humbasë vokacionin, misionin dhe një pjesë të elektoratit të saj—veçanërisht të rinjtë e gjeneratës Z dhe, shumë shpejt, ata të gjeneratës Alpha—Partia Socialiste, organet drejtuese dhe anëtarët e grupit të saj parlamentar duhet të ndahen nga Rama. Koha është sot, jo nesër, kur të jetë vonë. Deri më sot, ai e ka përdorur PS-në si kalë beteje për të marrë dhe mbajtur pushtetin, por kurrë për të udhëhequr në emër të saj. Ka ardhur koha ta zbrisni nga ai kalë. I keni të gjitha mundësitë, nëse mposhtni frikën dhe thyeni kultin e individit dhe mitin e pazëvendësueshmërisë.

Unë nuk do të doja që, për shkak të kryetarit të saj, Partia Socialiste të pësonte fatin e Partisë Demokratike: të “berishizohej”, të bëhej kashtë e koqe, që masa e gjerë e socialistëve të zhgënjehej edhe më tej dhe figurat kryesore të saj të shndërroheshin në Vokshët dhe Nokat e PS-së—besnikë deri në fund ndaj kryetarit, por të verbër ndaj partisë së tyre.

Ju duhet ta merrni fatin e Partisë Socialiste në duart tuaja. Në duart e Edi Ramës kjo parti mund të mos ketë një fat më të mirë se ai PD-së së Berishës. Kjo do të ishte një humbje e madhe për demokracinë në Shqipëri.

Në emër të Shqipërisë dhe për të mirën e brezit të ri e të demokracisë në këtë vend, mos e lejoni që kjo të ndodhë!

Në fund të fundit, brezi i ri i sotëm dhe brezat e ardhshëm do të na gjykojnë jo vetëm për ato që kemi bërë e vazhdojmë të bëjmë, por edhe për ato që nuk i bëmë në kohën dhe mënyrën që duhej./ Gazeta Dita

The post Fatos Tarifa letër socialistëve: Populli nuk refuzon PS-në, por Edi Ramën, ka sunduar me arrogancë, pushtetin e trajton si pronë! appeared first on Albeu.com.

Në një letër të përbashkët, krerët e 76 bashkive e quajnë mbajtjen në paraburgim pa afat të Imamoglusë dhe Veliajt një “trend të rrezikshëm” që kërcënon demokracinë vendore në Ballkan dhe më gjerë.

Ata kërkojnë t’i jepet fund masës së paraburgimit ndaj tyre: “Thirrja jonë e qartë është t’i jepet fund paraburgimit pa afat të Kryetarit Ekrem İmamoğlu dhe Kryetarit Erion Veliaj, dhe t’u lejohet të presin në liri procedurat ligjore, duke ushtruar njëkohësisht detyrat që u janë besuar nga qytetarët që përfaqësojnë”.

Sipas nënshkruesve të letrës, largimi nga detyra i zyrtarëve të zgjedhur pa një vendim përfundimtar “nuk është drejtësi” dhe minon vullnetin e votuesve.

Ata i referohen edhe Raportit të tetorit 2025 të Komisionit të Venecias dhe Konventës Evropiane për të Drejtat e Njeriut, duke theksuar se ndalimi duhet të jetë masë e fundit dhe jo mjet për pengimin e mandatit.

B40 bën thirrje për drejtësi transparente, proporcionale dhe respektim të mandateve demokratike.

Më poshtë letra e plotë e Rrjetit të Qyteteve të Ballkanit B40:

Letër e përbashkët: Qëndrim solidarizues për Demokracitë Lokale dhe dhënien fund të masës së paraburgimit për Kryetarin e Bashkisë së Stambollit, Ekrem İmamoğlu dhe Kryetarin e Bashkisë së Tiranës, Erion Veliaj

Ne, të nënshkruarit kryetarë të bashkive të Rrjetit të Qyteteve të Ballkanit B40, nisma më e rëndësishme e rajonit të Ballkanit, e themeluar nën udhëheqjen e z. Ekrem İmamoğlu, Kryetar i Bashkisë së Stambollit, shprehim shqetësimin tonë të thellë lidhur me shfaqjen e një trendi të rrezikshëm që kërcënon demokracinë vendore në Ballkan dhe në botë.

Pavarësisht përkatësive tona të ndryshme politike, ne jemi të bashkuar në ngritjen e alarmit për paraburgimin pa afat të Kryetarit të Bashkisë së Stambollit, Ekrem İmamoğlu, President themelues i Rrjetit B40, Kryetarit të Bashkisë së Tiranës, Erion Veliaj, Presidenti i tretë i Rrjetit B40, si edhe të kryetarëve të tjerë. Largimi nga detyra i zyrtarëve të zgjedhur në mënyrë demokratike, pa një vendim përfundimtar, nuk është drejtësi. Ai minon vullnetin e votuesve dhe paraqet kërcënime të drejtpërdrejta për demokracitë vendore.

Raporti i tetorit 2025 i Komisionit të Venecias të Këshillit të Evropës paralajmëron shprehimisht se përdorimi i paraburgimit ndaj kryetarëve aktualë të bashkive përbën rrezik serioz për qeverisjen demokratike. Kur zbatohet pa afat, një paraburgim i tillë i privon në praktikë qytetarët nga përfaqësimi, duke i mënjanuar përfaqësuesit e zgjedhur prej tyre pa një procedurë të rregullt ligjore.

Sipas Konventës Evropiane për të Drejtat e Njeriut, ndalimi duhet të mbetet një masë e fundit, jo një mjet për ta penguar ushtrimin e mandatit për arsye politike. Kur një kryetar bashkie i zgjedhur mbahet i ndaluar pa kusht ose pa gjyq, qytetarët mbeten pa përfaqësim, çka gërryen besimin e publikut dhe legjitimitetin institucional.

Është e qartë se ndalimi dhe procedurat gjyqësore që lidhen me Kryetarin Ekrem İmamoğlu dhe Kryetarin Erion Veliaj nuk përputhen me parimet dhe standardet e sanksionuara në Konventën Evropiane për të Drejtat e Njeriut dhe të artikuluara në Raportin e tetorit 2025 të Komisionit të Venecias të Këshillit të Evropës.

Ne theksojmë çfarë nuk po kërkojmë. Ne nuk kërkojmë imunitet, as nuk komentojmë mbi thelbësinë e akuzave apo mbi fajësinë ose pafajësinë. Apeli ynë është i kufizuar, parimor dhe plotësisht në përputhje me standardet evropiane.

Thirrja jonë e qartë është t’i jepet fund paraburgimit pa afat të Kryetarit Ekrem İmamoğlu dhe Kryetarit Erion Veliaj, si edhe kryetarëve të tjerë të ndaluar, dhe t’u lejohet të presin në liri procedurat ligjore, duke ushtruar njëkohësisht detyrat që u janë besuar nga qytetarët që përfaqësojnë.

Drejtësia duhet të jetë transparente, proporcionale dhe respektuese ndaj zgjedhjes demokratike. Prandaj, u bëjmë thirrje të gjitha autoriteteve përkatëse t’i zbatojnë këto parime dhe të mbrojnë demokracinë vendore.

Ne, kryetarët e bashkive të nënshkruar më poshtë të Rrjetit të Qyteteve të Ballkanit B40, u bëjmë thirrje të gjitha autoriteteve përkatëse të sigurojnë rivendosjen e mandateve demokratike dhe zbatimin e qëndrueshëm të normave evropiane në të gjitha rastet që kanë të bëjnë me zyrtarë vendorë të zgjedhur.

The post 76 kryebashkiakë letër në mbështetje të Veliajt: T’i jepet fund masës së paraburgimit, cënim i demokracisë appeared first on Albeu.com.

Në letrën e cila mban firmën e kreut të grupit të PD-së, Gazment Bardhit theksohet se Kryeministri ndërpreu fjalën e tij për t’ia kaluar “ministres virtuale Diella”, duke e quajtur këtë akt një “veprim prej karagjozi” dhe një formë propagande.

Më tej për të justifikuar dhunën, PD akuzon kryeparlamentarin Niko Peleshi me pretendimin se nuk iu dha fjala për procedurë deputetëve të opozitës, ndërsa seanca sipas tyre, u mbyll në mënyrë të njëanshme dhe pa zhvilluar diskutime.

Sipas demokratëve, procedura e ndjekur në seancë ka qenë në shkelje të hapur të Kushtetutës dhe Rregullores së Kuvendit, duke përjashtuar opozitën nga debati parlamentar dhe duke shmangur detyrimin kushtetues për paraqitjen e programit nga Kryeministri.

Teksa kërkojnë përsëritjen e seancës, PD vijon letrën duke renditur disa shkeljet që ka bërë sipas tyre kryeministri Edi Rama:

-Kryeministri refuzoi të paraqiste programin politik në mënyrë të plotë;

-Deputetët u penguan të shtronin pyetje apo të merrnin pjesë në debat;

-U shkelën të drejtat e fjalës të garantuara për çdo deputet dhe kryetar grupi parlamentar;

-Procesi i votimit u zhvillua në kundërshtim me nenin 97 të Kushtetutës dhe Rregulloren e Kuvendit.

Opozita e konsideron seanca si një “shfaqje propagandistike” dhe Kuvendin të kthyer në “teatër kukullash”, ku u cenua seriozisht demokracia parlamentare.

Kujtojmë që pas fjalës së “Diellës”, ministres së Inteligjencës Artificiale, deputetët e opozitës morën “flakë” duke mos lejuar që seanca plenare të zhvillohet normalisht, ndërsa nuk munguan as sendet e forta si shishe apo kushtetuta të cilat fluturonin në drejtim të kryeministrit Edi Rama. Kreu i qeverisë kishte përgatitur një fjalim ku do të shpaloste objektivat e qeverisë së tij gjatë mandatit të katërt, por Rama nuk u lejua pasi “besnikët” e Berishës bënin zhurmuesin duke qëlluar tavolinat me dorë. Pas 20 minutash në mënyrë kaotike u mbyll seanca e sotme plenare ku me 82 vota të socialistëve u miratua programi politik i mazhorancës dhe Kabineti i Këshillit të Ministrave.

Letra e PD drejtuar Kuvendit:

Në mbështetje të nenit 97 të Kushtetutës dhe nenit 110 të Rregullores së Kuvendit, me urdhër të Kryetarit të Kuvendit, më datë 18.09.2025, ora 10:00, ishte thirrur seanca plenare, me rend dite projektvendimin “Për miratimin e programit politik dhe përbërjes së Këshillit të Ministrave”. Në përputhje me Kushtetutën dhe Rregulloren e Kuvendit, deputetët e opozitës ishin prezent në sallë, për të ushtruar detyrën e tyre kushtetuese dhe për të diskutuar mbi programin politik dhe përbërjen e Këshillit të Ministrave.

Sipas nenit 110 të Rregullores së Kuvendit, programi politik i Këshillit të Ministrave dhe përbërja e tij paraqiten në Kuvend nga Kryeministri. Kryetari i Kuvendit i dha fjalën Kryeministrit, i cili pas disa minutave diskutim, mori rolin e Kryetarit të Kuvendit, ndërpreu fjalën e tij dhe ia kaloi fjalën “Ministres virtuale Diella”, në kundërshtim të hapur me Kushtetutën dhe Rregulloren.

Ky veprim prej karagjozi dhe që cënoi rëndësinë kushtetuese të seancës plenare të datës 18.09.2025 u kundërshtua nga deputetët e opozitës, përmes një veprimi që nuk shkel etikën parlamentare dhe që është formë reagimi që përdoret në të gjitha Parlamentet e vendeve demokratike (rasti më i fundit në Parlamentin Europian, ku eurodeputetët pas refuzimit të kërkesës për një minutë heshtje përplasën duart mbi tavolinat e tyre të punës si formë demokratike reagimi). Fakti që Kryeministrin e kanë lëshuar nervat, është i lodhur dhe ndjehet i padenjë për të përballuar debatin parlamentar, nuk mund të nënkuptojë kurrë që ai mund t’i caktojë linjën e sjelljes deputetëve të Kuvendit të Shqipërisë, apo mund të vijë në seancë plenare dhe të sillet siç dëshiron në kundërshtim me Kushtetutën.

Salla e seancës plenare nuk mund të shndërrohet nga një Kryeministër karagjoz në një “teatër kukullash” dhe reagimi i opozitës ishte për mbrojtjen e Kushtetutës dhe Rregullores së Kuvendit. Kërcënimi i Kryeministrit që në nisje të fjalës së tij se deputetët e opozitës duhet të bëjnë apo sillen ashtu siç ai dëshiron, ose ndryshe Kryeministri nuk do të lejojë debatin parlamentar, është i papranueshëm dhe cënon rëndë rendin kushtetutes të një Republike Parlamentare.

Menjëherë pasi diskutimi i Kryeministrit ishte ndërprerë, jo nga ndërhyrjet e opozitës, por nga një video tallëse e një mesazhi virtual, Kryetari i Kuvendit, edhe pse fjala i ishte kaluar më parë Kryeministrit që duhet të vijonte me paraqitjen e programit politik, i kaloi fjalën Kryetarit të Grupit Parlamentar të Partisë Socialiste Taulant Balla, i cili pasi kërcënoi deputetët e opozitës me heqjen e të drejtës për të diskutuar, në përputhje me nenin 49, pika 1 të Rregullores së Kuvendit, kërkoi 5 minuta ndërprerje të seancës. Kërkesa ishte për çështje të procedurës, në zbatim të nenit 49, pika 1, ku thuhet se: “Për çështje të procedurës fjala jepet menjëherë. Janë çështje të procedurës ……., kërkesat për ndërprerjen ose shtyrjen e seancës plenare ose të diskutimeve…”.

Pas fjalës për procedurë të Kryetarit të Grupit Parlamentar të PS, sipas pikës 3 të nenit 49, ku thuhet shprehimisht: “3. Në këto raste, përveç propozuesit që diskuton jo më shumë se 3 minuta, kanë të drejtë të diskutojnë një folës pro dhe një folës kundër jo më shumë se 2 minuta secili dhe merret vendim me votim të hapur nga Kuvendi me ngritjen e dorës.”, Kryetari i Grupit Parlamentar të Partisë Demokratike Gazment Bardhi kërkoi të diskutonte si folës kundër 2 minuta lidhur me propozimin e bërë. Në kundërshtim me pikën 3, të nenit 49 të Rregullores së Kuvendit, Kryetari i Kuvendit nuk ia dha fjalën dhe ndërpreu seancën pa respektuar kërkesat e kësaj dispozite, dhe në mbyllje të saj u shpreh publikisht se do e jepte fjalën për procedurë menjëherë me rinisjen e seancës. Kërkesa për procedurë ishte regjistruar në sistemin elektronik të Kuvendit të Shqipërisë.

Në rinisjen e seancës, me një skenar asgjësues për Kuvendin dhe të parapërgatitur për të mos lejuar debat parlamentar, në kundërshtim me pikat 1 dhe 3 të nenit 49 të Rregullores, në vend që t’i jepte fjalën menjëherë Kryetarit të Grupit Parlamentar të PD, ashtu siç Rregullorja e detyron, Kryetari i Kuvendit ia kaloi përsëri fjalën Kryeministrit Edi Rama. Për të kundërshtuar këtë mohim të të drejtës së fjalës sipas Rregullores të deputetëve të opozitës, ende pa e marrë fjalën Kryeministri, një pjesë e tyre u ngritën në këmbë, për të kërkuar respektimin e Rregullores dhe të drejtën e fjalës për procedurë, që sipas nenit 49, pika 1 e Rregullores jepet menjëherë.

Në vend që t’i jepte opozitës të drejtën e fjalës për procedurë, Kryetari i Kuvendit ia rikaloi fjalën për procedurë Kryetarit të Grupit Parlamentar të PS Taulant Balla, një veprim që bie ndesh me nenin 49 të Rregullores, sepse i njëjti person nuk mund të marrë dy herë rresht fjalën për procedurë. Në shkelje flagrante të nenit 110 të Rregullores së Kuvendit, Kryetari i Grupit Parlamentar të PS, propozoi që Kryeministri të mos bënte paraqitjen në Kuvend të programit politik dhe përbërjes së Këshillit të Ministrave, deputetëve t’u hiqej e drejta e fjalës, e drejta për të bërë pyetje dhe të mos zhvillohej debat për programin politik dhe përbërjen e Këshillit të Ministrave, duke urdhëruar kalimin direkt në votim.

Kryetari i Kuvendit, në kundërshtim me nenin 97 të Kushtetutës dhe pikat 3 dhe 4, të nenit 110 të Rregullores së Kuvendit, ku specifikohet se: “3. Pas paraqitjes së programit politik, çdo deputet dhe grup parlamentar ka të drejtë të paraqesë pyetje për Kryeministrin. 4. Pas përgjigjeve të pyetjeve, Kryetari i Kuvendit deklaron hapjen e debatit për programin politik dhe përbërjen e Këshillit të Ministrave. Koha e debatit përcaktohet nga Konferenca e Kryetarëve, në përputhje me nenin 48 të kësaj Rregulloreje. Në përfundim të debatit, pas fjalës së kryetarëve të grupeve parlamentare, ka të drejtë të flasë Kryeministri jo më shumë se 10 minuta. Votimi nga Kuvendi i përbërjes dhe i programit politik të Këshillit të Ministrave bëhet sipas nenit 58 të kësaj Rregulloreje”, hapi procesin e votimit dhe hodhi në votim projektvendimin “Për miratimin e programit politik dhe përbërjes së Këshillit të Ministrave”.

Ky veprim i Kryetarit të Kuvendit, është në shkelje flagrante të procedurës parlamentare, të parashikuar nga neni 97 i Kushtetutës dhe 110 i Rregullores së Kuvendit, që përfshin:

1. Paraqitjen e programit politik dhe përbërjes së Këshillit të Ministrave nga Kryeministri përpara procesit të votimit;

2. Të drejtën e deputetëve për të bërë pyetje përpara procesit të votimit;

3. Të drejtën për debat parlamentar, ku çdo deputet mund të diskutojë për 10 minuta, përpara procesit të votimit;

4. Të drejtën e kryetarëve të grupeve parlamentare për të diskutuar në përfundim të debatit parlamentar;

5. Të drejtën e deputetëve për të votuar vetëm pasi kanë ushtruar të drejtën për debat.

Për shkak të shkeljes së procedurës sa më sipër, votimi i kryer në seancën e datës 18.09.2025, është në kundërshtim me Kushtetutën dhe Rregulloren, dhe për pasojë është i pavlefshëm.

Paraqitja e programit politik dhe përbërjes së Këshillit të Ministrave është një akt kushtetues, që nuk mund të ndryshohet apo shoqërohet me veprime propagandistike, videomesazhe virtuale, apo mesazhe tallëse për deputetët e opozitës. Refuzimi i Kryeministrit për të vijuar me paraqitjen e programit politik dhe përbërjes së Këshillit të Ministrave, është gjithashtu një akt jo kushtetutes, për shkak se paraqitja nuk është një akt vullneti i Kryeministrit, por një detyrim kushtetutes që buron nga neni 97 i Kushtetutës dhe neni 110 i Rregullores së Kuvendit.

Për sa më sipër, në përputhje me nenin 61 të Rregullores së Kuvendit, ku specifikohet se: “Çdo votim i kryer në kundërshtim me Kushtetutën, ligjin ose Rregulloren e Kuvendit është i pavlefshëm”, kërkojmë:

1. Anullimin e votimit.

2. Rithirrjen e seancës plenare me të njëjtin Rend Dite, ku të ndiqet me përpikmëri procedura parlamentare e parashikuar nga neni 97 i Kushtetutës dhe neni 110 i Rregullores së Kuvendit.

3. Shmangien e çdo lloj provokimi nga ana e Kryeministrit ndaj çdo deputeti të opozitës, duke ndjekur rregullat parlamentare të zhvillimit të seancës plenare dhe duke mos e shndërruar Kuvendin e Shqipërisë në një “teatër kukullash”

The post PD kërkon shpalljen e pavlefshme të seancës plenare ku u miratua kabineti i ri, Bardhi letër Kuvendit appeared first on Albeu.com.

Presidenti Trump, ia dorëzoi letrën Putinit personalisht gjatë bisedimeve të tyre në samitin e Alaskas, thanë zyrtarët për Reuters.

Melania Trump, e lindur në Slloveni, nuk ishte në udhëtimin ku u mbajt Samiti në Alaska.

Zyrtarët nuk e zbuluan përmbajtjen e letrës përveçse thanë se përmendeshin rrëmbimet e fëmijëve si pasojë e luftës në Ukrainë.

Ekzistenca e letrës nuk ishte raportuar më parë. Rrëmbimi i fëmijëve ukrainas nga Rusia ka qenë një çështje thellësisht e ndjeshme për Ukrainën.

Ukraina i ka quajtur rrëmbimet e dhjetëra mijëra fëmijëve të saj të çuar në Rusi, ose në territorin e pushtuar nga Moska pa pëlqimin e familjes ose kujdestarëve një krim lufte që përmbush përkufizimin e traktatit të OKB-së për gjenocidin.

Më parë, Moska ka thënë se ka mbrojtur fëmijët e cenueshëm nga një zonë lufte.

Zyra e Kombeve të Bashkuara për të Drejtat e Njeriut, ka thënë se Rusia u ka shkaktuar vuajtje miliona fëmijëve ukrainas dhe ka shkelur të drejtat e tyre që nga fillimi i pushtimit të plotë të Ukrainës në vitin 2022.

Trump dhe Putin, u takuan për gati tre orë në një bazë ushtarake amerikane në Anchorage, pa arritur një marrëveshje armëpushimi në luftën në Ukrainë.

The post Melania Trump i dërgoi letër Vladimir Putin, iu dorëzua personalisht nga presidenti Donald Trump, çfarë shkruhej në përmbajtje appeared first on Albeu.com.