Avokati mbrojtës për Top Channel ka theksuar se Ziza Pajaziti nuk është personi që është etiketuar nga portale të ndryshme si “eskortë”, por partnerja bashkëjetuese e Laert Haxhiut. Ai ka kundërshtuar mënyrën sesi është trajtuar figura e saj në media, duke argumentuar se ndaj saj është zhvilluar një linçim publik pa prova konkrete dhe pa një vendim gjykate.

Ndërkohë, edhe dokumente të përfshira në dosjen hetimore duket se përforcojnë këtë pretendim. Sipas raportimeve mediatike, Pajaziti ka paraqitur një deklaratë noteriale pranë institucioneve përkatëse, ku pohon se ka bashkëjetuar me Laert Haxhiun gjatë periudhës kur ai ndodhej jashtë burgut.

Më herët ka reaguar edhe avokati i Laert Haxhiut, i cili ka mohuar pretendimet për “takime të paligjshme” dhe ka kërkuar që çështja të trajtohet në rrugë ligjore, jo përmes etiketimesh publike.

Burime pranë mbrojtjes ligjore bëjnë me dije se gjendja psikologjike e modeles është përkeqësuar ndjeshëm pas publikimeve denigruese dhe komenteve fyese në rrjetet sociale. Sipas tyre, ajo ndodhet nën presion të vazhdueshëm emocional, ndërkohë që ndaj saj nuk ekziston asnjë vendim penal apo akuzë e provuar nga drejtësia shqiptare.

Ky rast ka rikthyer edhe një herë debatin mbi etikën mediatike dhe mënyrën sesi figura publike paragjykohen përpara se drejtësia të japë një vendim përfundimtar. Në mungesë të një vendimi të formës së prerë, juristë dhe analistë kërkojnë respektimin e prezumimit të pafajësisë dhe shmangien e etiketave që mund të cenojnë rëndë jetën personale të individëve./Top Channel

The post Takimet speciale me modelen ne burg, flet avokati i Laert Haxhiut: Ziza Pajaziti është bashkëjetuese e tij appeared first on Albeu.com.