Autori nga Fushë Kosova mori këtë vlerësim për tregimin “Gruaja që nuk pranoi të heshtë”, ndërsa më pas çmimin ia kushtoi mbesës së tij, Arila.

Në seksionin e narrativës për autorët që jetojnë jashtë Italisë, Qyqalla u rendit i dyti me këtë vepër, pas autorit nga Panamaja dhe para autores nga Greqia.

Veprimtaria kulturore mblodhi krijues nga shtete të ndryshme të botës, përfshirë shkrimtarë, artistë, filozofë, kompozitorë, muzikantë, gazetarë, psikologë dhe fotografë.

Ndarja e çmimeve u mbajt në Foggia, ku morën pjesë personalitete të shumta nga arti, kultura, letërsia, shkenca dhe filozofia. Të pranishëm ishin gjithashtu përfaqësues të Universitetit të Barit, anëtarë të jurisë, përfaqësues institucionalë dhe drejtuesja e çmimit, Maria Teresa Infante La Marca.

Në amfiteatrin e mbushur me pjesëmarrës dhe mysafirë, u nderuan krijuesit më të spikatur në fusha të ndryshme të artit, letërsisë dhe kulturës.

Gjatë ceremonisë, një hapësirë e veçantë iu kushtua edhe shkrimtarit nga Kosova, i cili pati mundësinë të paraqiste vlerat ideo-artistike të tregimit të tij. “Gruaja që nuk pranoi të heshtë” trajton një temë të ndjeshme dhe aktuale, në përputhje me frymën e këtij çmimi ndërkombëtar, që lidhet me ndërgjegjësimin kundër dhunës gjinore dhe dhunës ndaj të miturve.

Ky vlerësim shihet si një arritje e rëndësishme për letërsinë shqipe dhe si një lajm i mirë për kulturën në Kosovë, veçanërisht për Fushë Kosovën, vendlindjen e autorit.

Mes emrave të nderuar ishte edhe poeti shqiptar Nikollë Loka, i cili mori Çmimin e Ekselencës për poezi.

Pas pranimit të çmimit, Qyqalla falënderoi Akademinë e Arteve dhe Shkencave Filozofike të Barit, si edhe organizatorët e festivalit, duke përgëzuar njëkohësisht fituesit e tjerë të kësaj ngjarjeje kulturore dhe artistike.

“Ky çmim i dytë, i fituar në një konkurrencë ndërkombëtare me autorë nga shumë vende të botës, ia kushtoj mbesës sime të dashur, Arila, vetëm tre vjeçe. Uroj që ajo, me talentin, përkushtimin dhe ëndrrat e saj, të ecë përpara edhe më larg se gjyshi dhe një ditë të nderohet me Çmimin Nobel në letërsi, shkencë ose inovacion”, ka thënë Qyqalla.

The post Lan Qyqalla nderohet me vendin e dytë në festivalin ndërkombëtar “Çfarë nuk di Kaini” në Itali appeared first on Albeu.com.