Transaksione që mbajnë shifra të ndryshme janë kryer në kompaninë “5D Konstruksion”, të Redi Mollës, Taulant Tushës dhe Mariglen Qatos.

Ndërsa kalimi i parave publike ka vijuar në fillim të vitit edhe për biznesin e ish-drejtorit të shitjeve në UKT, Elvin Tivari.

“Ora News” ka zbuluar se vetëm përmes një transaksioni financiar “Hotel La Brisa”, në pronësi të ish-drejtorit të Erjon Veliaj, Elvin Tivarit dhe Fatos Malaj, vëllait të kryetarit të Bashkisë Mat, Agron Malaj, ka fituar në fillim të vitit 83 milion e 900 mijë lekë të vjetra.

Kjo faturë është prerë nga subjekti “La Brisa” në 25 shtator 2023, ndërsa është ekzekutuar nga Drejtoria e Përgjithshme e Tatimeve në 9 janar 2024.

Fatura është me TVSH mbi mallrat dhe shërbimet brenda vendit. Ndërsa mendohet se pikërisht ambientet e hotelit të Elvin Tivarit janë shfrytëzuar nga administrata e Tatimeve për, trajnime, seminare dhe pushime gjatë sezonit të verës së vitit 2023.

Kjo shumë prej 83 milion e 900 mijë lekë të vjetra tashmë është arkëtuar në llogaritë e subjektit “La Brisa”.

Nga ana tjetër SPAK prej disa muajsh ka nisur hetim për zyrtarët dhe ish-zyrtarët e Bashkisë së Tiranës, të cilët nga drejtorë të thjeshtë shumë shpejt kaluan në investitorë strategjik dhe krijuan biznese të suksesshme duke shfrytëzuar korrupsionin përmes parave publike.

The post Dosja 5D/ Seminare, trajnime e pushime në hotelin “La Brisa”, Administrata e Tatimeve shpenzon në janar 83.9 mln lekë për Tivarin dhe Malajn appeared first on Albeu.com.