Në Kuvend u zhvillua sot promovimi i Kodit të Sjelljes Etike të Deputetëve, dokument që më herët është miratuar nga deputetët. Në këtë ngjarje folën Kryetari i Kuvendit, Afrim Gashi, Shefi i Misionit të OSBE-së në Shkup, ambasadori Kilian Val, Drejtori i lartë rezident i NDI-së në Maqedoninë e Veriut dhe udhëheqës i ekipit të Programit Zviceran për Mbështetje Parlamentare (PSP), Robert Skot Hejzlet, përfaqësuesja e Njësisë për Qeverisje Demokratike dhe Barazi Gjinore pranë ODIHR-it, Ajla Van Heel Merdanoviq, si edhe kryetari i Komisionit për Çështje të Rregullores, Mandatit dhe Imunitetit, Mile Lefkov.

Gjatë fjalës së tij, Afrim Gashi vuri në dukje se Kodi Etik, mbi të gjitha, është një marrëveshje morale që deputetët e lidhin mes tyre dhe me qytetarët që përfaqësojnë.

“Meqenëse konsideroj se nuk duam që ky dokument të përfundojë në arkivat e Kuvendit pas votimit, jemi mbledhur këtu për ta trajtuar atë si një zotim të përbashkët: që interesi publik do të mbetet gjithmonë mbi interesin personal; që debati politik do të zhvillohet mbi bazën e argumentit dhe jo të fyerjes; që dallimet politike nuk do të shndërrohen në armiqësi personale; dhe se dinjiteti i Kuvendit do të mbrohet çdo ditë, me përgjegjësi dhe përkushtim”, theksoi Gashi.

Ai falënderoi deputetët dhe grupet parlamentare, partnerët ndërkombëtarë dhe Shërbimin e Kuvendit, i cili, sipas tij, përmes angazhimit dhe përkushtimit profesional, ka dhënë një kontribut të rëndësishëm në secilën fazë të përgatitjes së Kodit.

Ambasadori Val deklaroi në fjalën e tij se “Kodi Etik jo vetëm që u ofron deputetëve një mjet praktik për ballafaqim me çështjet etike nga jeta reale, por përfaqëson gjithashtu hap konkret drejt një pune parlamentare mëtransparente, më të përgjegjshme dhe më të besueshme në shtet.

Nga ana e tij, Robert Skot Hejzlet tha se Programi Zviceran për Mbështetje Parlamentare i ka qëndruar pranë Kuvendit me mbështetje të pandërprerë gjatë të gjithë procesit kompleks të hartimit dhe përmbylljes së kësaj rregullative për integritetin që prej vitit 2019. “Kjo është një nga shumë fushat ku Zvicra ka qëndruar përkrah Kuvendit si një partner i qëndrueshëm dhe i besueshëm në reformat demokratike”, tha Hejzlet.

Ajla Van Heel Merdanoviq vlerësoi rëndësinë e integritetit parlamentar, duke e cilësuar atë si një instrument për forcimin e besimit të qytetarëve te etika e vendimmarrjes parlamentare.

“Qëllimi ynë i përbashkët është të mbështesim procesin e përparimit të etikës parlamentare. Na gëzon fakti që sot shohim rezultatin e bashkëpunimit shumëmujor ndërpartiak. Është për t’u përshëndetur edhe përfshirja e perspektivës gjinore në këtë Kod”, theksoi Merdanoviq.

Mile Lefkov tha në fjalën e tij se ky Kod Etik përbën një dokument të rëndësishëm për rikthimin e besimit në Kuvend.

Ai theksoi gjithashtu se ky dokument tregon se Kuvendi di ta pranojë ekspertizën ndërkombëtare. Sipas tij, veçantia e këtij Kodi qëndron te përfshirja e mekanizmave konkretë për zbatimin e tij: krijimi i një grupi pune me përbërje paritare që do të kujdeset për zbatimin e Kodit Etik, emërimi i një këshilltari për këshillim konfidencial të deputetëve, si dhe miratimi i një udhëzuesi, në hartimin e të cilit sërish do të shfrytëzohet ekspertiza ndërkombëtare.

The post Në Kuvendin e Maqedonisë së Veriut prezantohet Kodi i Sjelljes Etike për deputetët appeared first on Albeu.com.

Sot në Kuvend pritet të zhvillohet një tjetër takim i koordinatorëve dhe përfaqësuesve të grupeve parlamentare të partive lidhur me ndryshimet në Kodin Zgjedhor.

Nëse në Kuvend arrihet marrëveshje për Kodin Zgjedhor, atëherë LSDM dhe “E Majta” do t’i tërheqin amendamentet, çka do ta zhbllokonte procesin. Ndryshimet dhe plotësimet në Kodin Zgjedhor përbëjnë pikat e fundit nga dhjetë pikat në periudhën grejs për vendin tonë në kuadër të proceseve reformuese.

OBRM-PDUKM pret që LSDM dhe BDI të qartësojnë qëndrimet e tyre për propozimin e kësaj partie që diaspora të votojë me postë, ndërsa e gjithë procedura të rregullohet me akt nënligjor në një mbledhje të Komisionit Shtetëror Zgjedhor (KSHZ) jo më vonë se 30 shtatori 2028. Siç bëjnë të ditur, ata janë të gatshëm të pranojnë një njësi zgjedhore.

Nga ana tjetër, “E Majta” ka kërkuar që financimi shtetëror i reklamave zgjedhore për partitë me grupe parlamentare të jetë 10 përqind, si edhe vendimmarrja në KSHZ të bëhet me konsensus, kërkesë kjo që OBRM-PDUKM e konsideron të papranueshme.

Në kuadër të ndryshimeve në Kodin Zgjedhor që tashmë ndodhen në procedurë parlamentare, e për të cilat LSDM dhe “E Majta” kanë dorëzuar rreth 13,500 amendamente, çështja më e debatueshme ka qenë propozimi për votim elektronik të diasporës. LSDM e refuzoi menjëherë këtë propozim dhe thekson se nuk është kundër votimit të diasporës, duke nënvizuar se ajo ende ka mundësi të votojë, por kundërshton një mënyrë votimi që, sipas saj, nuk garanton siguri, transparencë dhe mbrojtje të vullnetit zgjedhor.

Për “Të Majtën”, votimi elektronik i diasporës ishte një zgjidhje e pranueshme, nëse kjo do të bëhej në këmbim të rritjes së përqindjes për reklamat politike të paguara gjatë zgjedhjeve.

Pjesëmarrësit në grupin e punës për Kodin Zgjedhor e kanë pranuar për financimin buxhetor të partive në zgjedhje propozimin e BDI-së dhe “Të Majtës”, sipas të cilit raporti i numrit të deputetëve do të shërbejë si kriter objektiv për përdorimin e 97% të këtyre mjeteve, ndërsa 3% do të jenë për partitë që nuk kanë deputetë në Parlament. Sipas kësaj formule, 42% do t’u takonin dy partive më të mëdha në pushtet, 42% dy partive më të mëdha opozitare, 8% partive me grupe parlamentare, 5% partive pa grupe parlamentare dhe 3% partive dhe grupeve të votuesve jashtëparlamentarë.

The post Parti politike rikthehen sot në Kuvend për një tjetër përpjekje marrëveshjeje për Kodin Zgjedhor appeared first on Albeu.com.

Nesër, koordinatorët e grupeve parlamentare do të mblidhen sërish në një tryezë të përbashkët, në një përpjekje të re për të gjetur dakordësi për Kodin e ri Zgjedhor. Synimi është që zgjidhja ligjore të miratohet përpara afatit të ri të vendosur nga Bashkimi Evropian, si pjesë e përparimit në agjendën e reformave.

Në takimin informues të sotëm me gazetarët, kryetari i Kuvendit, Afrim Gashi, deklaroi se ai e mbështet votimin e diasporës, me kusht që shteti të garantojë fshehtësinë e votës.

“Në parim, unë jam për votimin elektronik të diasporës, madje jam që kjo të mundësohet edhe brenda vendit. Me mundësimin e votimit elektronik të diasporës, do ta arrijmë parimin që çdo qytetar të ketë të drejtë vote, por nëse shteti është i gatshëm të sigurojë fshehtësinë e votimit. Duhet të ketë vullnet të mirë dhe mirëkuptim, sepse për këtë ligj nevojitet konsensus i partive dhe nuk është mirë të qëndrohet në llogore apo në vizatim vijash të kuqe”, tha Afrim Gashi, kryetar i Kuvendit.

Ndërkohë, puna e Komisionit për Sistem Politik është ndërprerë për momentin, pasi LSDM-ja dhe Levica dorëzuan 13.500 amendamente. Të gjitha këto amendamente duhet të përkthehen, ndërsa ende nuk ka asnjë njoftim se kur Komisioni mund ta rifillojë punën dhe nëse më herët do të ketë ndonjë marrëveshje të mundshme mes partive për Kodin Zgjedhor.

Nga LSDM-ja thonë se Mickoski dhe OBRM-PDUKM nuk kanë ndërmend të heqin dorë nga, siç pretendojnë ata, manipulimet dhe keqpërdorimet me mbi 200 mijë vota nga diaspora.

“Është e rrezikshme dhe shqetësuese që VMRO refuzon kategorikisht që KSHZ-ja, me konsensus, t’i rregullojë procedurat për votimin e diasporës. Nga çfarë ka frikë pushteti? Nëse vërtet qëllimi i tyre është proces zgjedhor i drejtë dhe demokratik, atëherë përse ikin nga një mekanizëm që siguron kontroll, besim dhe pëlqim mes gjithë faktorëve politikë? Por, e vërteta është se qëllimi i tyre nuk është proces zgjedhor më i mirë, por hapja e hapësirës për inxhiniering dhe manipulim zgjedhor”, shtoi Bogdanka Kuzeska, zëdhënëse e LSDM-së.

Dje, kryeministri Mickoski i bëri një ofertë të hapur opozitës, duke thënë se është i gatshëm të pranojë një njësi zgjedhore dhe gjithashtu kërkesën e Levicës për financim më të madh të fushatës për partitë e vogla, nëse miratohet Kodi Zgjedhor ku do të përfshihet votimi elektronik i diasporës. Edhe sot, nga OBRM-PDUKM vazhduan kritikat ndaj opozitës, duke e akuzuar se po e bllokon qëllimisht miratimin e Kodit Zgjedhor.

“Venko Zaev dhe LSD kundërshtojnë zgjidhjen që diaspora e Maqedonisë të votojë në numër sa më të madh. Ne si VMRO-DPMNE propozuam që kjo të bëhet në rrugë elektronike ose me postë. Ky propozim u refuzua nga ana e Venko Zaevit dhe LSD-së, sepse tek ata mbizotëron frika se qytetarët që e braktisën shtetin gjatë periudhës së qeverisjes së tyre, nuk do ta mbështesin politikën e tyre”, u shpreh Valentin Manasievski.

The post Nesër raund i ri bisedimesh për Kodin Zgjedhor, Gashi mbështet votimin elektronik të diasporës appeared first on Albeu.com.

Kryetari i Kuvendit të Maqedonisë së Veriut, Afrim Gashi, i ka përcjellë urime Shteteve të Bashkuara të Amerikës me rastin e 4 Korrikut – Ditës së Pavarësisë, duke veçuar rëndësinë e marrëdhënieve dypalëshe dhe kontributin amerikan në proceset demokratike dhe euroatlantike të vendit.

Në mesazhin e tij të urimit, Gashi uroi popullin amerikan dhe institucionet e SHBA-së.

“Me rastin e 4 Korrikut – Ditës së Pavarësisë së Shteteve të Bashkuara të Amerikës, shpreh urimet e mia më të përzemërta popullit amerikan dhe institucioneve të tij, duke u dëshiruar paqe, përparim dhe mirëqenie”, theksoi Gashi.

Ai vuri në pah se Republika e Maqedonisë së Veriut i çmon shumë lidhjet me SHBA-në, të cilat i përshkroi si miqësi të qëndrueshme dhe partneritet strategjik.

“Mbështetja e vazhdueshme amerikane për zhvillimin tonë demokratik, integrimin euroatlantik dhe stabilitetin rajonal mbetet me rëndësi të veçantë”, deklaroi ai.

Sipas Gashit, raportet ndërmjet dy shteteve pritet të forcohen edhe më shumë në vijim.

“Jam i bindur se bashkëpunimi ynë do të vazhdojë të forcohet edhe më tej, në shërbim të paqes, sigurisë, prosperitetit dhe vlerave tona të përbashkëta”, thuhet në mesazhin e tij.

The post Afrim Gashi uron SHBA-në për 4 Korrikun dhe thekson thellimin e partneritetit mes dy vendeve appeared first on Albeu.com.

Kuvendi i RMV-së e ka votuar Ligjin e ri për Procedurën Civile me 81 vota pro, 9 kundër dhe pa asnjë abstenim, duke e cilësuar atë si një nga hapat më të rëndësishëm në kuadër të reformës për avancimin e sistemit gjyqësor dhe përafrimin e tij me standardet moderne evropiane.

Ky kuadër i ri ligjor synon të krijojë mundësi për procese gjyqësore më të shpejta, më efikase dhe me standard më të lartë cilësie, ndërsa njëkohësisht garanton më shumë siguri juridike dhe mbrojtje më të mirë të të drejtave të qytetarëve dhe personave juridikë.

Ligji i miratuar parasheh rritjen e rolit të gjykatës në konstatimin e gjendjes faktike, përfshirjen e mjeteve bashkëkohore dixhitale në punën e gjykatave, si dhe lehtësimin dhe përshpejtimin e procedurave, sidomos në rastet e mosmarrëveshjeve me vlerë më të vogël.

Një nga risitë më të spikatura të këtij ligji është mundësia që dokumentet të dorëzohen në mënyrë elektronike dhe që seancat gjyqësore të zhvillohen përmes mjeteve elektronike, çka pritet të ulë edhe më tej kostot dhe kohëzgjatjen e procedurave.

The post Kuvendi i RMV-së miraton Ligjin e ri për Procedurën Civile, duke hapur rrugën për seanca gjyqësore me mjete elektronike appeared first on Albeu.com.

Kuvendi ka dhënë miratimin për Ligjin që rregullon përdorimin e trotinetëve elektrikë, duke vendosur kushte më të forta për lëvizjen e tyre dhe masa që synojnë shtimin e sigurisë në komunikacion. Sipas dispozitave të reja, këto mjete do të lejohen të përdoren vetëm nga persona mbi 18 vjeç.

Ndryshimet përfshijnë gjithashtu kufizime në qarkullim dhe përcaktime të qarta për mënyrën se si duhet të përdoren trotinetët elektrikë, me synimin për të reduktuar aksidentet në trafik. Ligji i ri vjen në një kohë kur këto mjete janë bërë gjithnjë e më të pranishme në komunikacionin urban.

Për shkelësit parashikohen ndëshkime më të rënda, ku përfshihen tejkalimi i shpejtësisë, drejtimi i mjetit nën ndikimin e alkoolit dhe bartja e personave të tjerë në trotinet. Krahas gjobave, për shkeljet më të rënda është paraparë edhe konfiskimi i përkohshëm i mjetit deri në 30 ditë.

Autoritetet nënvizojnë se këto ndryshime kanë për qëllim rritjen e sigurisë rrugore, pasi të dhënat statistikore tregojnë një rritje të numrit të aksidenteve ku janë përfshirë trotinetët dhe mjetet e ngjashme, mes tyre edhe raste me lëndime të rënda dhe pasoja fatale. Me këtë ligj synohet një ulje e aksidenteve dhe një rregullim më i qartë i përdorimit të këtyre mjeteve.

The post Kuvendi miraton rregulla të reja për trotinetët elektrikë, përdorimi lejohet vetëm mbi moshën 18 vjeç appeared first on Albeu.com.

Kryetari i Kuvendit të Republikës së Maqedonisë së Veriut, Afrim Gashi, mori pjesë në punimet e Asamblesë së 67-të të Përgjithshme të Asamblesë Parlamentare të Organizatës së Bashkëpunimit Ekonomik të Detit të Zi (PABSEK), e cila u zhvillua më 30 qershor dhe 1 korrik 2026 në Tbilisi të Gjeorgjisë.

Gjatë ceremonisë hapëse, Gashi iu drejtua delegacioneve të shteteve anëtare të PABSEK-ut, duke nënvizuar angazhimin e Republikës së Maqedonisë së Veriut ndaj bashkëpunimit në rajon dhe integrimit euroatlantik. Ai përshëndeti vendin mikpritës dhe vuri në dukje se rajoni i Detit të Zi përfaqëson një korridor me rëndësi jetike për ndërlidhjen, tregtinë dhe komunikimin ndërkombëtar.

Në fjalën e tij, ai theksoi se kjo hapësirë gjeografike ka histori, kulturë dhe potencial të madh, por njëkohësisht përballet me një sërë sfidash që kërkojnë veprim të përbashkët dhe solidaritet. Sipas tij, qoftë për zhvillimin ekonomik, sigurinë, mbrojtjen e mjedisit jetësor apo kohezionin social, e ardhmja e përbashkët varet nga fuqia e bashkëpunimit dhe nga lidhjet që ndërtohen sot.

Gashi veçoi edhe nevojën për përfshirje dhe pjesëmarrje të barabartë të të gjithë aktorëve në dialogun rajonal, duke theksuar se zhvillimi i qëndrueshëm dhe harmonia shoqërore mund të sigurohen vetëm përmes një qasjeje gjithëpërfshirëse dhe inkluzive. Në këtë kontekst, ai ritheksoi përcaktimin e palëkundur të Maqedonisë së Veriut për integrimin në BE, duke e cilësuar anëtarësimin në Bashkimin Evropian dhe NATO jo vetëm si zgjedhje strategjike, por edhe si rrugë thelbësore për forcimin e sovranitetit, sigurisë dhe prosperitetit të vendit.

Ai shtoi gjithashtu se vendet e rajonit, pavarësisht dallimeve që kanë, ndajnë interesa dhe synime të përbashkëta për paqe, përparim ekonomik dhe një të ardhme më të mirë për qytetarët e tyre, në veçanti për brezat e rinj.

Përveç pjesëmarrjes në Asamblenë e Përgjithshme të PABSEK-ut, Kryetari i Kuvendit, Afrim Gashi, po zhvillon edhe një vizitë zyrtare dypalëshe në Tbilisi, me ftesë të Kryetarit të Parlamentit të Gjeorgjisë. Në kuadër të kësaj vizite, pritet që dy drejtuesit e parlamenteve të shkëmbejnë qëndrime për çështje aktuale që kanë të bëjnë me sigurinë rajonale, diplomacinë parlamentare dhe mundësitë për thellimin e bashkëpunimit mes dy vendeve.

The post Gashi nga Tbilisi: Sfidat e rajonit tejkalohen me bashkëpunim dhe solidaritet të përbashkët appeared first on Albeu.com.

Me 59 vota “pro”, tre “kundër” dhe asnjë “të përmbajtur”, Kuvendi miratoi nevojën që projektligji për ndryshimin dhe plotësimin e Kodit Zgjedhor të procedohet me procedurë të shkurtuar. Ky projektligj bën pjesë në agjendën e reformave.

Nënkryetari i Kuvendit, Antonijo Miloshoski, ngarkoi Komisionin për Sistem Politik dhe Marrëdhënie Ndërmjet Komuniteteve si trupin kryesor punues, ndërsa edhe Komisioni Ligjor dhe Juridik do të mblidhet për shqyrtimin e projektligjit.

Nisma i është dorëzuar Kuvendit nga deputetët Antonijo Miloshoski, Zeqirija Tairi, Daniel Stojçevski, Blerim Bexheti dhe Ivanka Vasilevska. Mes zgjidhjeve të parashikuara në ndryshime janë votimi elektronik për diasporën, si edhe ndërhyrje në segmentin e financimit shtetëror të partive.

Duke arsyetuar pse Kodi Zgjedhor duhet të miratohet me procedurë të shkurtuar, propozuesi theksoi se përmbajtja e tij është diskutuar për katër muaj në kuadër të Ministrisë së Drejtësisë. Në këto bisedime kanë marrë pjesë përfaqësues të partive politike, me përjashtim të LSDM-së, e cila fillimisht u përfshi dhe më pas u tërhoq.

Miloshoski deklaroi se gjatë këtyre diskutimeve është arritur dakordim për 28 rekomandime të ODIHR-it, të cilat janë pranuar me konsensus. Sipas tij, në grupin e punës pranë Ministrisë së Drejtësisë nuk ka pasur mbivotim për asnjë çështje dhe vendimmarrja është bërë gjithmonë me pajtim të përbashkët. Ai shtoi se këto tema do të mund të diskutohen edhe në seancat parlamentare dhe në komisione.

Sa i takon modelit zgjedhor, Miloshoski tha se pjesa më e madhe e partive politike janë shprehur në favor të një njësie zgjedhore, ndërsa dy parti kanë mbështetur modelin me tetë dhe tre njësi. Meqë për këtë nuk u arrit konsensus, në fuqi mbetet zgjidhja aktuale me gjashtë njësi zgjedhore.

Për votimin e diasporës, Miloshoski sqaroi se është arritur pajtim që ai të mundësohet sipas praktikës së Francës dhe Estonisë, përmes votimit elektronik, të sigurt dhe të mbrojtur.

Ai theksoi gjithashtu se një ndihmë e madhe në këtë proces ka ardhur nga përfaqësuesit e KSHZ-së, Zyrës Shtetërore të Auditimit, ASHMAA-së dhe Komisionit Kundër Korrupsionit. Sipas tij, këto institucione paraqitën propozimet e tyre, të cilat në pjesën më të madhe u pranuan, për mënyrën se si të ndryshohet Kodi Zgjedhor në funksion të zhvillimit të zgjedhjeve demokratike, të drejta, transparente dhe efikase.

Lidhur me modelin e përdorimit të fondeve për reklamat zgjedhore, Miloshoski tha se për këtë çështje është arritur konsensus unanim.

Ai vlerësoi se në këtë proces nuk ka pasur asnjë rast kur një parti të ketë mbivotuar një tjetër, apo që përfaqësues të caktuar të partive politike të kenë injoruar propozimet e kolegëve të tyre. Sipas Miloshoskit, konsensusi i arritur nga shumica e partive që morën pjesë në Grupin e Punës në Ministrinë e Drejtësisë duhet të konsiderohet një arritje e rëndësishme dhe përparim në normat e Kodit Zgjedhor.

The post Kuvendi jep dritën jeshile për ndryshimet në Kodin Zgjedhor me procedurë të shkurtuar appeared first on Albeu.com.

Në seancën e 109-të të mbajtur sot, Kuvendi i Maqedonisë së Veriut votoi Ligjin e ri për lojërat e fatit dhe lojërat argëtuese, vendosi zgjatjen e gjendjes së jashtëzakonshme në një pjesë të territorit të vendit dhe emëroi Hristina Sofronijoska në postin e Zëvendës Sekretares së Përgjithshme të Dhomës Legjislative.

Projektligji për lojërat e fatit mori mbështetjen e 60 deputetëve, ndërsa 20 votuan kundër.

Sipas Zëvendësministrit të Financave, Nikolçe Jankulovski, dispozitat e reja parashikojnë që ambientet ku organizohen lojërat e fatit të ndodhen së paku 500 metra larg shkollave fillore dhe të mesme, distancë që do të llogaritet përgjatë rrugës më të sigurt për këmbësorët.

Ai nënvizoi gjithashtu se ndryshimet ligjore vendosin kufizime të forta për reklamimin e kazinove dhe pikave të basteve. Reklamat e ndriçuara do të ndalohen, ndërsa do të lejohet vetëm një tabelë me emrin e organizatorit, me përmasa maksimale 100 me 30 centimetra dhe pa përmbajtje promovuese.

Po ashtu, ligji parashikon lidhjen e detyrueshme GPS të pajisjeve dhe kazinove me Drejtorinë e të Ardhurave Publike, me synim forcimin e mbikëqyrjes, dixhitalizimin e sektorit dhe identifikimin më të lehtë të organizatorëve që veprojnë pa licencë. Këto zgjidhje janë në harmoni edhe me rekomandimet e Moneyval për parandalimin e pastrimit të parave dhe financimit të terrorizmit.

Jankulovski bëri të ditur se, në rast se gjatë zbatimit evidentohen mangësi, Ministria e Financave do të dalë me propozime të tjera për ndryshime shtesë.

Në të njëjtën seancë, deputetët konstatuan edhe nevojën për miratimin me procedurë të shkurtuar të ndryshimeve në Ligjin për Testimin dhe Shënjimin e Armëve të Zjarrit dhe Municionit, si edhe në Ligjin për Ndërmarrjet Publike dhe Shoqëritë Tregtare Shtetërore, në kuadër të ligjeve që lidhen me Axhendën e Reformës.

The post Kuvendi i Maqedonisë së Veriut miraton ligjin e ri për lojërat e fatit appeared first on Albeu.com.

Ndryshimet e propozuara në Kodin Zgjedhor kanë mbërritur në Kuvend. Sipas zgjidhjes së paraqitur, numri i zonave zgjedhore mbetet i pandryshuar, pra gjashtë, ndërsa nuk parashikohen as lista të hapura. Diaspora do të trajtohet si zonë e shtatë dhe votimi i saj do të realizohet online përmes KSHZ-së, e jo nëpërmjet ambasadave.

Këto dispozita, megjithatë, do të hyjnë në fuqi nga zgjedhjet e ardhshme presidenciale në vitin 2029. Propozimet janë firmosur nga OBRM-PDUKM, VLEN, ZNAM dhe BDI.

Në një konferencë për shtyp të mbajtur sot, kryetari i LSDM-së, Venko Filipçe, bëri të ditur se partia e tij do ta pengojë miratimin e Kodit Zgjedhor të propozuar. Sipas tij, ai përmban zgjidhje të rënda që nuk janë as evropiane dhe as demokratike, ndërsa lënë hapësirë për keqpërdorime në procesin zgjedhor.

“Ky Kuvend nuk duhet të miratojë një ligj të tillë. Ne do ta bllokojmë atë sepse qytetarët meritojnë të kenë një proces zgjedhor të drejtë dhe demokratik, dhe jo atë të kontrolluar që Hristijan Mickoski nisi ta vendoste duke ndjekur shembullin e mentorit të tij, padyshim një idhull, Nikolla Gruevski. Ne do ta bllokojmë këtë ligj në Kuvend”, tha Filipçe.

The post Propozim-ndryshimet për Kodin Zgjedhor dorëzohen në Kuvend, LSDM paralajmëron bllokadë appeared first on Albeu.com.