Afati i vendosur nga Gjykata Kushtetuese për konstituimin e Legjislaturës së njëmbëdhjetë përfundoi më 7 gusht, por deputetët nuk arritën ta mbyllnin këtë proces. Përplasjet mes partive politike vazhdojnë, ndërsa funksionimi i institucioneve po përballet me pasoja gjithnjë e më serioze. Nga Instituti Demokratik i Kosovës vlerësojnë se vendi po afrohet me një proces të ri zgjedhor.

Edhe pse janë zgjedhur nga qytetarët, deputetët nuk e përfunduan konstituimin e plotë të legjislaturës së re brenda afatit kushtetues, i cili skadoi më 7 gusht.

Lëvizja Vetëvendosje, e cila doli fituese në zgjedhjet e 7 qershorit, ka kërkuar më shumë kohë për të shqyrtuar mundësinë e një marrëveshjeje politike për zgjedhjen e presidentit të ri. Në anën tjetër, Partia Demokratike e Kosovës, Lidhja Demokratike e Kosovës dhe Aleanca insistojnë që Kuvendi të konstituohet.

Analisti politik Artan Muhaxhiri e konsideron krizën aktuale tepër të rëndë dhe shqetësuese, duke e lidhur atë me bllokadën politike të vitit të kaluar. Sipas tij, në mungesë të një zgjidhjeje mes partive, Gjykata Kushtetuese mund të jetë sërish institucioni që do t’i japë fund situatës.

Muhaxhiri shprehet se partitë politike po tregohen të paafta dhe të papërgjegjshme për të gjetur vetë një kompromis të pranueshëm. Për këtë arsye, ai pret që Gjykata Kushtetuese të detyrohet të marrë një vendim, i cili, për shkak të papërgjegjshmërisë politike, mund të krijojë një precedent negativ për shtetin e Kosovës.

Analisti paralajmëron se zgjatja e krizës do ta dëmtonte edhe më shumë imazhin e Kosovës. Sipas tij, zgjidhja politike lidhet me një kompromis për postin e presidentit, i cili duhet t’i takojë partisë që ka fituar zgjedhjet.

Ai thekson se kjo është mundësia e vetme për zhbllokimin e situatës dhe se z. Kurti, bashkë me partinë e tij, duhet të pranojë këtë opsion. Muhaxhiri vlerëson se çdo alternativë tjetër do të nënkuptonte vazhdimin e bllokadës dhe të krizës aktuale. Ai paralajmëron se, nëse çështja nuk zgjidhet përfundimisht, Kosova mund të bëhet objekt talljeje, pasi palët nuk po gjejnë zgjidhje dhe as nuk po i shfrytëzojnë hapësirat ligjore që mund të ndihmonin në tejkalimin e ngërçit.

Situata politike është komentuar edhe nga Instituti Demokratik i Kosovës. Sipas IKD-së, zhvillimet aktuale po e çojnë vendin drejt zgjedhjeve të reja, por edhe një proces tjetër zgjedhor mund të rezultojë me një bllokadë të re.

Naim Jakaj nga IKD ka deklaruar se zgjedhjet e reja rrezikojnë të prodhojnë një tjetër ngërç politik. Ai ka bërë të ditur se dhjetëra institucione dhe organe kolegjiale vazhdojnë të jenë të paplotësuara, për shkak se Kuvendi dhe Qeveria nuk kanë bërë emërimet përkatëse. Si pasojë, disa prej tyre janë të paralizuara, disa funksionojnë me kapacitete të kufizuara, ndërsa të tjera nuk kanë borde ose drejtues me mandat të plotë.

Sipas vlerësimit të IKD-së, kjo situatë prek të paktën 24 institucione. Instituti paralajmëron se pasojat dëmtojnë funksionimin normal të shtetit, cenojnë sundimin e ligjit dhe dobësojnë integritetin institucional të Republikës së Kosovës. Ndërkohë, partitë politike ende nuk kanë arritur marrëveshje për t’i dhënë fund bllokadës institucionale.

The post Kriza politike vijon, Kuvendi nuk arrin marrëveshje për zhbllokimin e situatës appeared first on Albeu.com.

Afatet për konstituimin e Kuvendit dhe ngritjen e institucioneve të reja po afrohen, duke e vendosur Kosovën përballë një gjendjeje të ndjeshme institucionale. Nëse legjislativi nuk konstituohet gjatë ditëve të ardhshme, vendi mund të hyjë në një proces tjetër zgjedhor.

Juristi dhe analisti politik Blerim Burjani ka deklaruar se dështimi për konstituimin e Kuvendit do ta çonte Kosovën në zgjedhje të jashtëzakonshme brenda 45 ditësh.

“Në zgjedhje të jashtëzakonshme brenda 45 ditëve”, është shprehur Burjani, duke nënvizuar se zhvillimet varen tërësisht nga konstituimi i Kuvendit.

Nëse Kuvendi konstituohet, sipas tij, për formimin e institucioneve do të zbatohen afate të tjera.

“Nëse konstituohet Kuvendi, atëherë 25 ditë janë në dispozicion për t’u zgjedhur Qeveria dhe 60 ditë kohë për t’u zgjedhur presidenti”, ka thënë Burjani.

Sipas vlerësimit të tij, alternativa më e favorshme për kryeministrin në detyrë, Albin Kurti, është që së pari të mundësohet konstituimi i Kuvendit dhe më pas të vazhdohet me formimin e Qeverisë.

“Kurtit i bie mirë me konstitu Kuvendin, pastaj Qeverinë, pastaj ka kohë që presidenti të zgjedhet”, ka deklaruar Burjani.

Ai ka shtuar se, nëse konstituimi i Kuvendit dështon edhe këtë herë, zgjedhjet e reja do të jenë e vetmja rrugë për vendin.

“Në të kundërtën, shteti shkon në zgjedhje automatikisht”, ka përfunduar Burjani.

The post Pa konstituimin e Kuvendit, Kosova shkon automatikisht në zgjedhje appeared first on Albeu.com.

Instituti Demokratik i Kosovës (KDI) e ka cilësuar absurde dhe të papranueshme situatën e krijuar rreth konstituimit të Kuvendit.

Sipas këtij instituti, përfundimi i afatit të detyrueshëm prej 30 ditësh e ka gjetur Kuvendin ende të pakonstituuar.

“LVV-ja nuk e shfrytëzoi brenda këtij afati të drejtën dhe përgjegjësinë ekskluzive për të propozuar kandidatin për Kryetar. Edhe pasi afati përfundoi, ajo përsëri refuzoi të paraqiste kandidaturën dhe kërkoi kohë shtesë, duke e zgjatur me vetëdije bllokadën institucionale”, thuhet në vlerësimin e KDI-së.

KDI thekson se zhvillimet e fundit nuk mund të trajtohen më vetëm si një përplasje politike mes subjekteve parlamentare.

“Përfundimi i afatit pa konstituimin e Kuvendit ka hapur një çështje të drejtpërdrejtë kushtetuese lidhur me vlefshmërinë e procedurës që duhet të ndiqet më tej. Paraqitja me vonesë e një kandidature, një ndërprerje tjetër prej 48 orësh apo një marrëveshje e mundshme politike nuk i zhdukin vetvetiu pasojat e mosveprimit brenda afatit”.

Sipas institutit, pasojat e kësaj situate nuk mund të përcaktohen në mënyrë të njëanshme nga asnjë subjekt politik dhe as të zgjidhen duke krijuar një fakt të kryer.

“Përcaktimi i tyre është në kompetencë të Gjykatës Kushtetuese, e cila është autoriteti përfundimtar për interpretimin e Kushtetutës”.

KDI kërkon që së paku dhjetë deputetë t’i drejtohen pa vonesë Gjykatës Kushtetuese, duke referuar vendimet dhe veprimet e ndërmarra pas skadimit të afatit. Instituti propozon që Gjykata të japë përgjigje për disa çështje themelore:

– nëse mosushtrimi brenda afatit i të drejtës për propozim e ka përfunduar mandatin e kësaj përbërjeje për ta mbyllur procesin e konstituimit;

– çfarë vlere juridike kanë veprimet e kryera pas përfundimit të afatit;

– si dhe cila procedurë kushtetuese duhet të ndiqet në vazhdim, përfshirë mundësinë e hapjes së rrugës drejt zgjedhjeve të reja.

“Kosovës i duhen institucione të krijuara mbi një zgjidhje kushtetuese dhe jo përmes improvizimeve politike, në mënyrë që çdo veprim i mëtejshëm të mbështetet në Kushtetutë dhe të mos krijojë precedentë të rrezikshëm për funksionimin e institucioneve të Republikës”.

The post KDI: Moskonstituimi i Kuvendit brenda afatit 30-ditor ngre pikëpyetje kushtetuese për hapat e ardhshëm appeared first on Albeu.com.

Kosova ndodhet përballë një ngërçi të rëndësishëm institucional, pasi po afrohen afatet për konstituimin e Kuvendit dhe formimin e institucioneve të reja. Nëse ky proces nuk përmbyllet në ditët e ardhshme, vendi mund të rikthehet në zgjedhje.

Juristi dhe analisti politik Blerim Burjani deklaron se moskonstituimi i Kuvendit do të pasohet nga zgjedhje të jashtëzakonshme, të cilat duhet të mbahen brenda 45 ditësh.

“Në zgjedhje të jashtëzakonshme brenda 45 ditëve”, ka thënë Burjani, duke nënvizuar se zhvillimet varen drejtpërdrejt nga konstituimi i Kuvendit.

Burjani shpjegon se, nëse Kuvendi arrin të formohet, institucionet do të kenë në dispozicion afate të përcaktuara për zgjedhjen e drejtuesve të rinj.

“Nëse konstituohet Kuvendi, atëherë 25 ditë janë në dispozicion për t’u zgjedhur Qeveria dhe 60 ditë kohë për t’u zgjedhur presidenti”, është shprehur ai.

Sipas tij, për kryeministrin në detyrë, Albin Kurti, zgjidhja më e favorshme është që fillimisht të sigurojë konstituimin e Kuvendit dhe më pas të vijojë me formimin e Qeverisë.

“Kurtit i bie mirë me konstitu Kuvendin, pastaj Qeverinë, pastaj ka kohë që presidenti të zgjedhet”, ka deklaruar Burjani.

Ai shton se një dështim i radhës në konstituimin e Kuvendit do ta linte Kosovën pa alternativë tjetër përveç organizimit të zgjedhjeve të reja.

“Në të kundërtën, shteti shkon në zgjedhje automatikisht”, ka përfunduar Burjani.

The post Burjani: Moskonstituimi i Kuvendit e çon Kosovën në zgjedhje brenda 45 ditësh appeared first on Albeu.com.

Vazhdimi i seancës konstituive të Kuvendit të Kosovës është caktuar për sot, të shtunën, 8 gusht, në ora 11:00. Në rendin e ditës janë zgjedhja e kryetarit dhe e nënkryetarëve të Kuvendit.

Seanca nuk u mbajt të premten në mbrëmje, megjithëse PDK-ja, LDK-ja dhe AAK-ja kishin kërkuar që ajo të zhvillohej në ora 22:30. Sipas opozitës, në mesnatë skadonte afati kushtetues prej 30 ditësh për konstituimin e Kuvendit, i llogaritur nga certifikimi i rezultateve zgjedhore.

Deputetë të këtyre tri partive u paraqitën në Kuvend për të pritur vazhdimin e seancës, por deklaruan se nuk mundën të futeshin në sallë, pasi dyert e saj ishin të mbyllura.

Besnik Tahiri nga AAK-ja bëri të ditur se grupi parlamentar e kishte informuar në kohë kryesuesin e seancës konstituive, Avni Dehari, si dhe administratën e Kuvendit për kërkesën e tyre.

“Dyert e sallës ku do të duhej të konstituohej Kuvendi sonte janë të mbyllura”, deklaroi Tahiri.

Ai theksoi se afati kushtetues për konstituimin e Kuvendit mbyllej në ora 23:59, ndërsa akuzoi LVV-në për shkelje të aktvendimit të Gjykatës Kushtetuese.

Edhe kryetari i PDK-së, Bedri Hamza, tha pas mesnatës se deputetët kishin qëndruar në Kuvend për të dëshmuar gatishmërinë e tyre për të marrë pjesë në seancën konstituive.

Sipas Hamzës, aktvendimi i Gjykatës Kushtetuese nuk lë paqartësi dhe moskonstituimi i Kuvendit brenda afatit përbën shkelje të Kushtetutës.

“Kemi të bëjmë me mosrespektim të mendimit dhe aktgjykimit të Gjykatës Kushtetuese”, tha Hamza.

Nënkryetari i LDK-së, Lutfi Haziri, deklaroi se partia e tij kishte kërkuar që seanca të mbahej deri në ora 00:00, me synimin që të respektoheshin afatet kushtetuese.

“LDK ka pritur dhe ka kërkuar, ka ftuar që seanca të mbahet sonte deri në ora 00:00, në mënyrë që të ruhen afatet kushtetuese”, u shpreh Haziri.

Dështimi i seancës së kërkuar nga opozita ndodhi të premten, pikërisht në ditën kur, sipas përfaqësuesve opozitarë, u mbushën 30 ditë nga certifikimi i rezultateve të zgjedhjeve.

Për deklaratat e opozitës lidhur me një shkelje të rendit kushtetues reagoi edhe ministri në detyrë i Financave, Hekuran Murati. Ai rikujtoi se më 26 prill 2025 kishin kaluar 30 ditë nga certifikimi i zgjedhjeve të 9 shkurtit, ndërsa Kuvendi ende nuk ishte konstituuar. Murati tha se në atë rast kjo vonesë nuk ishte vlerësuar si problem apo si shkelje kushtetuese.

Seanca konstituive do të vazhdojë të shtunën, më 8 gusht, në ora 11:00. Opozita ende nuk ka treguar nëse do të jetë pjesëmarrëse. Bedri Hamza deklaroi se PDK-ja do ta shqyrtojë këtë çështje, ndërsa Lutfi Haziri bëri të ditur se grupi parlamentar i LDK-së do të mblidhet para fillimit të seancës.

The post Opozita kërkoi seancë në mbrëmje, Kuvendi e vazhdon sot në ora 11:00 appeared first on Albeu.com.

Edhe pse ora ka kaluar 12:00, Kuvendi ende nuk ka bërë të ditur nëse seanca konstituive e legjislaturës së 11-të do të vazhdojë këtë të premte.

Punimet u ndërprenë dje, pasi kreu i Lëvizjes Vetëvendosje, Albin Kurti, kërkoi më shumë kohë për bisedime me përfaqësuesit e partive, në përpjekje për të gjetur një marrëveshje lidhur me çështjen e presidentit.

Ndërkohë, mesnata vlerësohet si afati përfundimtar kushtetues për konstituimin e Kuvendit.

As Lëvizja Vetëvendosje dhe as Lidhja Demokratike e Kosovës nuk kanë njoftuar për ndonjë takim ndërmjet Kurtit dhe kryetarit të LDK-së, Lumir Abdixhiku. Të dy kishin shprehur më herët gatishmëri për arritjen e një marrëveshjeje politike.

Para ndërprerjes së seancës ishte përmbyllur verifikimi i mandateve të deputetëve, të cilët më pas dhanë edhe betimin.

The post Ende pa njoftim për vazhdimin e seancës konstituive të Kuvendit appeared first on Albeu.com.

Sot përfundon periudha kushtetuese për themelimin e Kuvendit të Kosovës, teksa mbetet ende e paqartë se kur do të rifillojë sesioni inaugurues i Legjislaturës së XI-të, i pezulluar ditën e enjte.

Ndërprerja e seancës erdhi pas kërkesës së liderit të Lëvizjes Vetëvendosje, Albin Kurti, i cili kërkoi më shumë kohë për t’u konsultuar me përfaqësuesit e subjekteve politike, me qëllim gjetjen e një marrëveshjeje për zgjedhjen e kreut të shtetit.

Deputetët e Partisë Demokratike të Kosovës (PDK) e kundërshtuan këtë kërkesë, por Avni Dehari, që drejtonte seancën, vendosi ta pezullojë atë.

Para se punimet të ndaleshin, Kuvendi arriti të kryejë dy pikat e para të rendit të ditës: miratoi krijimin e Komisionit për Verifikimin e Mandateve dhe zhvilloi ceremoninë e betimit për ligjvënësit e rinj.

Pasi u konstatua se mandatet e deputetëve përputheshin me legjislacionin aktual, ata dhanë betimin solemn, përfshirë edhe anëtarët e Listës Serbe.

Deri në këto momente, nuk ka asnjë njoftim zyrtar për thirrjen e vazhdimit të seancës inauguruese. Nëse procesi i konstituimit nuk mbyllet brenda kornizës kushtetuese, vendi rrezikon të hyjë në një etapë të re të pasigurisë politike dhe procedurale.

The post Afati i fundit për formimin e Kuvendit të Kosovës përfundon sot appeared first on Albeu.com.

Deputetja Arbërie Nagavci, ish-drejtuese e Grupit Parlamentar të Lëvizjes Vetëvendosje, ka thënë se zgjedhja e Presidentit ose Presidentes së Republikës përbën detyrim kushtetues dhe politik për secilin deputet të Kuvendit të Kosovës. Ajo ka nënvizuar se qytetarët kërkojnë sjellje të përgjegjshme dhe jo pengesa institucionale.

Sipas saj, zgjidhja nuk qëndron te dërgimi i vendit sërish në zgjedhje. Nagavci ka kërkuar që dallimet politike të tejkalohen dhe të gjendet një pajtim i gjerë rreth Presidentit ose Presidentes së Republikës.

Ajo ka vlerësuar se në krye të shtetit duhet të zgjidhet një personalitet që gëzon konsensus, përfaqëson unitetin e popullit dhe njihet për integritet, vlera, si dhe kontribut të dëshmuar ndaj shtetit e shoqërisë.

Nagavci ka sqaruar se kërkesa për më shumë kohë është bërë pikërisht që dialogu të mundësojë arritjen e një marrëveshjeje politike, e cila do t’u shërbente interesave të Republikës dhe qytetarëve.

Duke rikujtuar qëndrimet e kryeministrit Albin Kurti, ajo ka deklaruar se asnjë marrëveshje nuk mund të krijohet në mungesë të mirëkuptimit, koncesioneve dhe kompromisit.

Nagavci ka thënë se Lëvizja VETËVENDOSJE! e ka ndërmarrë tashmë hapin e saj të tërheqjes, duke hequr dorë nga kandidatura e Glauk Konjufcës. Sipas saj, tash u takon edhe forcave të tjera politike t’u krijojnë hapësirë bisedimeve dhe të ndihmojnë në sigurimin e një marrëveshjeje.

Ajo ka theksuar se qëndrimi pa kompromis duhet të vlejë vetëm kur mbrohen sovraniteti, integriteti territorial, demokracia dhe interesi i Republikës së Kosovës. Ndërkaq, për formimin e institucioneve, Nagavci ka vlerësuar se kompromisi dhe përgjegjësia janë të domosdoshme.

Në përmbyllje, Nagavci ka apeluar që dialogut politik dhe përpjekjeve për marrëveshje mbi Presidentin ose Presidenten e Republikës t’u jepet një mundësi e mirëfilltë. Sipas saj, në këtë mënyrë mund të shmangen zgjedhjet e reja, të parakohshme dhe të panevojshme, të cilat do të cenonin stabilitetin institucional dhe ekonominë e vendit.

The post Nagavci: Të gjithë deputetët mbajnë përgjegjësi për zgjedhjen e Presidentit appeared first on Albeu.com.

Institucionet e përkohshme të vetëqeverisjes në Kosovë u krijuan në vitin 2001. Prej atëherë, në krye të Kuvendit kanë qenë tetë figura politike, të shpërndara në 10 legjislatura.

Mandati i parë i drejtimit të legjislativit i takoi Nexhat Dacit. Ai u zgjodh kryetar si deputet i LDK-së pas zgjedhjeve të para parlamentare dhe qëndroi në këtë detyrë nga viti 2001 deri më 2006. Megjithatë, mandatin e dytë nuk e përmbylli, pasi në këtë post u zëvendësua nga bashkëpartiaku i tij, Kolë Berisha.

Berisha e udhëhoqi Kuvendin deri në përfundimin e legjislaturës së dytë, në nëntor të vitit 2007.

Pas tij, drejtimin e Kuvendit e mori Jakup Krasniqi i PDK-së. Ai shërbeu në këtë funksion për dy mandate, deri në fund të vitit 2014. Në kohën kur Krasniqi ishte kryetar, më 17 shkurt 2008, Kuvendi miratoi Deklaratën e Pavarësisë së Republikës së Kosovës.

Pas zgjedhjeve të vitit 2014, kriza politike u zgjidh me zgjedhjen e Kadri Veselit, po nga PDK-ja, në postin e kryetarit të Kuvendit. Veseli e ushtroi detyrën në dy mandate, të dyja të ndërprera në mes, deri në mbylljen e legjislaturës së 6, në vitin 2019.

Në dhjetor të po atij viti, Kuvendi zgjodhi në krye Glauk Konjufcën e Vetëvendosjes. Ai qëndroi vetëm disa javë në këtë pozitë dhe në shkurt 2020 dha dorëheqje, pasi u emërua zëvendëskryeministër në Qeverinë Kurti 1. Ky zhvillim erdhi si pjesë e marrëveshjes për ndarjen e pushtetit ndërmjet VV-së dhe LDK-së.

Pas largimit të Konjufcës, kryetare e Kuvendit u bë Vjosa Osmani. Ajo e mbajti këtë post deri në mars të vitit 2021, kur u zgjodh presidente e Republikës së Kosovës si kandidate e nominuar nga partia e Albin Kurtit.

Legjislatura përkatëse u ndërpre para përfundimit, pasi Kuvendi u shpërbë pas “shkarkimit” kushtetues të Avdullah Hotit nga detyra e kryeministrit.

Me formimin e Legjislaturës së 8-të, deputetët e shumicës ia dhanë edhe një herë drejtimin e Kuvendit Glauk Konjufcës. Ai e mbajti detyrën deri në përfundim të kësaj legjislature.

Në Legjislaturën e 9-të, posti i kryetarit kaloi te Dimal Basha. Zgjedhja e tij erdhi pas një ngërçi të gjatë, gjatë të cilit kandidatja e parë e Vetëvendosjes, Albulena Haxhiu, nuk arriti të siguronte votat e nevojshme, pavarësisht më shumë se 50 tentimeve.

Haxhiu u zgjodh përfundimisht kryetare në legjislaturën e re, të 10-tën. Kjo legjislaturë zgjati vetëm disa muaj, pasi Kosova shkoi në zgjedhje të jashtëzakonshme, për shkak të pamundësisë për zgjedhjen e presidentit të shtetit.

Emri i kryetarit ose kryetares së re të Kuvendit pritej të përcaktohej këtë të enjte, gjatë seancës konstituive. Por Albin Kurti, kryetari i partisë fituese, Vetëvendosjes, kërkoi pezullimin e procedurës deri në arritjen e një marrëveshjeje për zgjedhjen e presidentit.

Nëse drejtimi i Kuvendit i besohet sërish një përfaqësuesi të VV-së, kjo parti do të ketë numrin më të madh të kryeparlamentarëve: tre ose katër, në varësi të faktit nëse Albulena Haxhiu do të vazhdojë apo jo në këtë funksion. Dy emrat e tjerë të VV-së janë Glauk Konjufca dhe Dimal Basha.

Në këtë numërim nuk përfshihet Avni Dehari, i cili si deputeti më i vjetër ka drejtuar për disa muaj punimet e Kuvendit gjatë Legjislaturës së 9-të, në cilësinë e “kryesuesit”.

LDK renditet e dyta për nga numri i kryetarëve të Kuvendit, me Nexhat Dacin, Kolë Berishën dhe Vjosa Osmanin.

PDK-ja ka pasur dy kryetarë të Kuvendit dhe gjithsej katër mandate në këtë post: dy mandate për Jakup Krasniqin dhe dy për Kadri Veselin.

The post Nga Nexhat Daci te Albulena Haxhiu: kush e ka udhëhequr Kuvendin e Kosovës që nga viti 2001? appeared first on Albeu.com.

Deputetët e Kuvendit të Kosovës do të mblidhen nesër në orën 10:00 në sallën plenare, për të bërë konstituimin e legjislaturës së njëmbëdhjetë. Seanca do të zhvillohet vetëm një ditë para skadimit të afatit kushtetues për përfundimin e këtij procesi.

Hapi i parë i procedurës do të jetë krijimi i Komisionit të Përkohshëm për Verifikimin e Mandateve të Deputetëve. Pasi komisioni të paraqesë raportin dhe ai të miratohet, deputetët do të japin betimin, ndërsa më pas pritet të procedohet me zgjedhjen e kryetarit të Kuvendit, ka bërë të ditur Vullnet Bugaqku nga KDI.

“Vetëm pas konstituimit të Kuvendit mund të fillojë procedura për formimin e Qeverisë, ndërsa më pas nisin edhe afatet kushtetuese për zgjedhjen e Presidentit të Republikës”, tha Vullnet Bugaqku nga KDI.

Megjithatë, përveç konstituimit të legjislaturës, situata paraqet edhe një problem tjetër kushtetues që lidhet me ushtruesin e detyrës së presidentit. Bugaqku thekson se neni 90 i Kushtetutës e përcakton në mënyrë të qartë se kjo detyrë nuk mund të ushtrohet përtej gjashtë muajve.

“Ky afat përfundon më 4 tetor dhe, nëse deri atëherë nuk zgjidhet Presidenti i ri, vendi mund të përballet me një situatë të paprecedentë, pasi Kushtetuta dhe Ligji për Presidentin nuk parashohin një mekanizëm për tejkalimin e këtij kufiri kohor”, tha Vullnet Bugaqku nga KDI.

Analisti politik Artan Muhaxhiri e lidh krizën e krijuar me mungesën e vullnetit politik për të siguruar 80 votat që nevojiten për zgjedhjen e presidentit.

“Në mungesë të kompromisit politik, vendi rrezikon të mbetet i bllokuar mes afateve kushtetuese, interpretimeve juridike dhe sfidave në Gjykatën Kushtetuese, ndërsa skenari më realist mbetet ai i zgjedhjeve të reja”, tha Artan Muhaxhiri, analist politik.

Legjislatura e re e Kuvendit u krijua pas zgjedhjeve të parakohshme parlamentare të 7 qershorit.

The post Kuvendi i Kosovës nis nesër procedurën për krijimin e legjislaturës së re appeared first on Albeu.com.