Bashkimi Evropian deklaroi se është informuar për votimin e së dielës, përmes të cilit u konstituua Kuvendi i Kosovës dhe u formua Qeveria e re, por nënvizoi se vlerësimi për pajtueshmërinë e këtyre veprimeve me Kushtetutën i takon Gjykatës Kushtetuese.

“Jemi në dijeni të votimeve të së dielës, si dhe vendimeve për konstituimin e Kuvendit dhe formimin e Qeverisë. Gjithashtu, jemi në dijeni edhe për kërkesën e paraqitur në Gjykatën Kushtetuese lidhur me kushtetutshmërinë e këtyre vendimeve. I takon Gjykatës Kushtetuese të shprehet për kërkesën e paraqitur”, tha për Radion Evropa e Lirë një zëdhënës i Komisionit Evropian.

Sipas tij, Kosova ka nevojë për institucione “plotësisht të konsoliduara për të çuar përpara reformat dhe për të avancuar në rrugën e integrimit në BE, përfshirë edhe në kuadër të Planit të Rritjes për Ballkanin Perëndimor”.

Gjatë seancës konstituive të së dielës, më 13 shtator, Kuvendi zgjodhi nënkryetarët nga Lidhja Demokratike e Kosovës, komuniteti serb dhe pakicat joserbe. Kryetarja e Kuvendit, Albulena Haxhiu, e shpalli të përfunduar konstituimin e organit ligjvënës, ndonëse nuk ishte zgjedhur nënkryetari që i takon Partisë Demokratike të Kosovës, forcës së dytë politike në vend.

Disa orë pas kësaj, deputetët zhvilluan një seancë të jashtëzakonshme ku miratuan Qeverinë e re të Kosovës, të drejtuar nga Albin Kurti. Në këtë mbledhje nuk morën pjesë PDK-ja, LDK-ja dhe Aleanca, ndërsa të pranishëm ishin vetëm deputetët e Lëvizjes Vetëvendosje të Kurtit dhe përfaqësuesit e komuniteteve joshumicë.

PDK-ja, e cila mungoi në seancën konstituive, e kishte tërhequr më herët kandidaturën e Vlora Çitakut për postin e nënkryetares së Kuvendit, pasi LVV-ja nuk e kishte mbështetur atë në seancën e 11 shtatorit. Më vonë, LVV-ja deklaroi se do ta votonte Çitakun, por PDK-ja nuk u paraqit në seancë.

Në 11 shtator ishte zgjedhur edhe nënkryetari i Kuvendit nga radhët e LVV-së, ndërsa Albulena Haxhiu ishte votuar në krye të Kuvendit gjatë seancës së mëparshme, të zhvilluar më 9 shtator.

Pas këtyre zhvillimeve, PDK-ja iu drejtua Gjykatës Kushtetuese duke kërkuar vendosjen e një mase të përkohshme ndaj Kuvendit të ri. Partia kërkoi që masa të qëndrojë në fuqi deri në shqyrtimin e përputhshmërisë së procesit të konstituimit me Kushtetutën.

Komisioni Evropian konfirmoi gjithashtu se BE-ja është në dijeni të kësaj kërkese dhe përsëriti se vendimi për të i takon Gjykatës Kushtetuese.

Ankesa u dorëzua të hënën në mëngjes nga deputetët e PDK-së, Arian Tahiri dhe Përparim Gruda, së bashku me avokatin Faton Fetahu, në emër të kësaj partie.

Pas paraqitjes së kërkesës, Tahiri u shpreh para mediave se fillimisht duhet të miratohet një masë e përkohshme, “në mënyrë që të mos shkaktohen dëme e situata më të rënda në kuptim juridik dhe institucional”.

Përfaqësuesit e PDK-së pretendojnë se Lëvizja Vetëvendosje, e cila është në pushtet, ka shkelur afatin kushtetues prej 30 ditësh për konstituimin e Kuvendit, si dhe rregullin që parashikon thirrjen e seancës çdo 48 orë deri në përfundimin e këtij procesi.

Në bazë të një aktgjykimi të Gjykatës Kushtetuese të vitit të kaluar, Kuvendi duhet të konstituohet brenda 30 ditësh nga certifikimi i rezultateve. Ky afat skadoi më 7 gusht 2026. /REL

The post BE: Gjykata Kushtetuese duhet të vendosë për konstituimin e Kuvendit dhe Qeverisë appeared first on Albeu.com.

Partia Demokratike e Kosovës iu drejtua gjatë ditës së sotme Gjykatës Kushtetuese me një lëndë që lidhet me konstituimin e Kuvendit. PDK-ja u përfaqësua nga kryetari i Grupit Parlamentar, Arian Tahiri, deputeti Përparim Gruda dhe avokati Faton Fetahu.

Pas deponimit të ankesës, Arian Tahiri deklaroi në një konferencë për media se partia i është drejtuar Kushtetueses me kërkesën për vendosjen e një mase që do të parandalonte dëmet institucionale.

Duke komentuar këtë zhvillim, profesori i çështjeve juridike, Mazllum Baraliu, tha se Gjykata mund të caktojë një masë të përkohshme dhe për këtë mund të vendosë më shpejt, ose do të duhej të vepronte më shpejt. Megjithatë, ai vlerësoi se një masë e tillë nuk është e nevojshme, pasi bëhet fjalë për një çështje që është gjykuar.

Baraliu sqaroi gjithashtu se Gjykata nuk ka një afat të përcaktuar për nxjerrjen e vendimit. Sipas tij, rregullorja parasheh 60 ditë për çështje të caktuara, por ka pasur raste kur trajtimi ka zgjatur me muaj apo edhe me vite.

Ai shtoi se, përderisa Gjykata nuk ka marrë ndonjë vendim dhe nuk ka vendosur masë të përkohshme, Kuvendi mund të vazhdojë zhvillimin e seancave.

Sipas Baraliut, edhe nëse konstatohet se ka pasur shkelje, Gjykata nuk përcakton që vendi të shkojë automatikisht në zgjedhje. Ai theksoi se Kushtetuesja vendos në mënyrë njëinstanciale.

Në vlerësimin e tij, më e rëndësishmja është që Gjykata të marrë vendim sa më shpejt, pasi çështja është shumë urgjente. Baraliu tha se organet nuk duhet të pengohen në ushtrimin e veprimtarisë së tyre, përveç rastit kur Gjykata konsideron se është shkelur Kushtetuta.

The post Baraliu për kërkesën e PDK-së: Kushtetuesja duhet të veprojë shpejt për shkak të urgjencës appeared first on Albeu.com.

Albin Kurti u rizgjodh kryeministër i Kosovës me 62 vota, por votimi i Qeverisë së re nuk e mbylli krizën politike në vend. Pas krijimit të ekzekutivit, sfidat kryesore lidhen me zgjedhjen e presidentit dhe me paralajmërimin e opozitës për ta çuar në Gjykatën Kushtetuese procedurën e konstituimit të Kuvendit.

Qeveria Kurti 4 mori mbështetjen e Kuvendit të Kosovës të dielën, gjatë një seance të jashtëzakonshme. Nga gjithsej 120 deputetë, 62 votuan pro kabinetit të ri, ndërsa tetë deputetët e Listës Serbe votuan kundër.

Deputetët e Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës nuk ishin të pranishëm në seancë. Kabineti u miratua nga përfaqësuesit e Lëvizjes Vetëvendosje dhe deputetët e komuniteteve joshumicë.

Pas përfundimit të votimit, Kurti dhe ministrat e kabinetit të tij bënë betimin para deputetëve të Kuvendit.

Gjatë paraqitjes së programit qeverisës, para se të kërkonte votën e deputetëve, Kurti tha se mandati i ardhshëm katërvjeçar do të përqendrohet në sigurinë dhe mirëqenien e qytetarëve. Sipas tij, zgjedhjet e përsëritura kanë penguar punën e rregullt të institucioneve.

Ndër masat e prezantuara prej tij janë rritja e pagave, dyfishimi i shtesave për fëmijët dhe krijimi i një valute digjitale. Kurti përmendi gjithashtu forcimin e sigurisë, zhvillimin ekonomik dhe vijimin e reformave shtetërore.

Formimi i ekzekutivit u shoqërua me kundërshtime lidhur me procedurën e konstituimit të Kuvendit.

PDK-ja dhe AAK-ja e bojkotuan seancën, me arsyetimin se Kuvendi nuk mund të quhej i konstituuar pa u zgjedhur të gjithë nënkryetarët. Përfaqësuesit e opozitës kanë bërë të ditur se këtë çështje do ta adresojnë në Gjykatën Kushtetuese.

Kryetarja e Kuvendit, Albulena Haxhiu, e konsideroi institucionin të konstituuar pasi u zgjodhën nënkryetarët Kujtim Shala, Emilia Rexhepi dhe Tanja Vujoviq. Megjithatë, vendi i rezervuar për PDK-në mbeti pa u plotësuar.

Pas këtij vendimi, Lëvizja Vetëvendosje e propozoi Kurtin për mandatar. Mandati për krijimin e Qeverisë iu dorëzua nga Haxhiu, e cila po ushtron detyrën e presidentes.

Nëse opozita e dërgon rastin në Kushtetuese, diskutimi për ligjshmërinë e hapave të ndjekur do të vijojë edhe pas betimit të qeverisë së re.

Ndërkohë, pengesa më e rëndësishme politike për kabinetin e ri është zgjedhja e presidentit të Kosovës.

Për të zhvilluar votimin presidencial në Kuvend duhet të jenë të pranishëm të paktën 80 deputetë. Për këtë arsye, shumica që votoi Qeverinë nuk është e mjaftueshme dhe kërkohet një marrëveshje me opozitën.

Kurti dhe Lumir Abdixhiku, kryetar i LDK-së, raportohet se janë pajtuar për të mbështetur profesorin e së drejtës Bekim Sejdiu për postin e presidentit. Megjithatë, gjashtë deputetë të LDK-së kanë deklaruar se nuk do ta zbatojnë këtë marrëveshje.

Këto qëndrime e lënë të pasigurt arritjen e kuorumit dhe sigurimin e numrit të nevojshëm të votave. Në rast se Kuvendi nuk e zgjedh presidentin brenda afatit të përcaktuar nga Kushtetuta, Kosova mund të shkojë përsëri në zgjedhje të parakohshme.

Me 62 vota, Kurti siguroi formimin e Qeverisë, por jo një stabilitet të plotë institucional. Tash përballja politike pritet të zhvillohet rreth zgjedhjes së presidentit dhe vlerësimit të procedurës nga Gjykata Kushtetuese.

The post Qeveria Kurti 4 votohet me 62 vota, ndërsa përplasja politike kalon te Presidenti dhe Kushtetuesja appeared first on Albeu.com.

Bedri Hamza, kryetar i PDK-së, njoftoi se çështja e moskonstituimit të Kuvendit do t’i drejtohet Gjykatës Kushtetuese.

Ai bëri të ditur se rasti do të dorëzohet në Kushtetuese brenda afateve të përcaktuara me ligj.

Deklarata e Hamzës erdhi gjatë një konference për media, pasi PDK-ja u largua nga salla për shkak se Lëvizja Vetëvendosje nuk e mbështeti me vota Vlora Çitakun për postin e nënkryetares së Kuvendit.

Hamza tha se PDK-ja kishte marrë pjesë në seancë me synimin që Kuvendi të konstituohej dhe vendi të bëhej me institucione. Sipas tij, partia shumicë, Lëvizja Vetëvendosje, dhe Albin Kurti nuk synojnë t’i krijojnë institucionet e vendit, por po vazhdojnë me veprime të papërgjegjshme, joinstitucionale dhe joshtetërore, të cilat nuk u shërbejnë qytetarëve të Kosovës. Ai i akuzoi ata se po prodhojnë drama dhe kriza, si dhe po krijojnë situata të panjohura për ta vazhduar bllokadën.

Kreu i PDK-së deklaroi se, nga sot, Partia Demokratike e Kosovës nuk sheh më arsye për të marrë pjesë në punimet e Kuvendit të Kosovës. Ai konfirmoi se lënda do t’i referohet Gjykatës Kushtetuese, duke shtuar se PDK-ja është e bindur që afatet kanë përfunduar më 7 gusht.

Vlora Çitaku nuk arriti të zgjidhej nënkryetare, pasi nuk siguroi numrin e nevojshëm të votave për shkak të votimit kundër nga Vetëvendosje. Kandidatura e saj u mbështet nga PDK-ja dhe LDK-ja.

Në anën tjetër, Ardian Gola, i propozuar nga Vetëvendosje për nënkryetar, mori vota pro si nga PDK-ja, ashtu edhe nga LDK-ja.

The post Hamza paralajmëron dërgimin e çështjes në Gjykatën Kushtetuese appeared first on Albeu.com.

Instituti Demokratik i Kosovës (KDI) ka reaguar për situatën e krijuar rreth konstituimit të Kuvendit, duke vlerësuar se ky proces mund të përfundojë edhe pas kalimit të afatit kushtetues prej 30 ditësh. Megjithatë, sipas KDI-së, për këtë çështje nevojitet një sqarim juridik.

Sipas institutit, konstituimi i Kuvendit është i rëndësishëm për funksionimin e institucioneve dhe për kapërcimin e krizës institucionale.

KDI ka kërkuar që Gjykata Kushtetuese të përcaktojë pasojat juridike të mosrespektimit të afatit 30-ditor, si dhe ndikimin që do të kishte konstituimi i Kuvendit pas përfundimit të këtij afati.

“Kjo është çështje që duhet të trajtohet përmes mekanizmave kushtetues dhe nga institucionet kompetente”, thuhet në reagimin e KDI-së.

Instituti u ka bërë thirrje deputetëve dhe palëve të autorizuara që të kërkojnë interpretim për statusin juridik të konstituimit të Kuvendit pas skadimit të afatit, si dhe për vlefshmërinë e veprimeve që do të kryhen pas konstituimit.

KDI ka nënvizuar se kjo çështje shkon përtej krizës së tanishme, pasi lidhet edhe me mënyrën e funksionimit të rendit kushtetues të Kosovës në të ardhmen.

“Qytetarët e Kosovës kanë nevojë për institucione që funksionojnë, por kanë po aq nevojë që këto institucione të funksionojnë brenda rendit kushtetues”, përfundon reagimi.

The post KDI kërkon interpretim nga Kushtetuesja për Kuvendin pas afatit 30-ditor appeared first on Albeu.com.

Mësohet se në vendimin e marrë me 5 vota pro dhe 3 kundër në favor të Veliajt, Kushtetuesja shprehet se Gjykata e Lartë duhet të arsyetojë nëse masa “arrest me burg” është proporcionale në raport me pozicionin që Veliaj mban si kryebashkiak.

Po ashtu, në vendim thuhet se, në aspektin substancial, Gjykata shqyrtoi pretendimet për cenimin e lirisë personale në drejtim të proporcionalitetit të masës, të lidhur me të drejtën për t’u zgjedhur, të cilin GJK e gjeti të bazuar vetëm për faktin se Gjykata e Lartë nuk i ka dhënë përgjigje të arsyetuar këtij pretendimi të ngritur në rekurs nga kërkuesi.

Gjithashtu në vendim theksohet se Kushtetuesja e gjen të parasyetuar nga Gjykata e Lartë, edhe vendimin për rrëzimin e kërkesës së Veliajt për të qëndruar jashtë kafazit të xhamtë gjatë seanca gjyqësore, për cështjen ku ai është i pandehur në Gjykatën e Posaçme.

“Proporcionaliteti i masës, i lidhur me të drejtën për t’u zgjedhur, u gjet i bazuar vetëm në drejtim të faktit që Gjykata e Lartë nuk i ka dhënë përgjigje të arsyetuar këtij pretendimi të ngritur në rekurs nga kërkuesi”, theksohet në vendimin e Gjykatës Kushtetuese.

Njoftimi i Gjykatës Kushtetuese:

Në datën 25.05.2026, Gjykata Kushtetuese (Gjykata) mori në shqyrtim çështjen me kërkues Erion Veliaj, me objekt shfuqizimin e vendimeve nr. 7, datë 09.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar, vleftësuar me vendimin nr. 14, datë 12.02.2025 të po asaj gjykate, nr. 13, datë 13.03.2025 të Gjykatës së Posaçme të Apelit për Korrupsionin dhe Krimin e Organizuar dhe nr. 00-2025-1153 (176), datë 08.07.2025 të Kolegjit Penal të Gjykatës së Lartë, si të papajtueshme me Kushtetutën e Republikës së Shqipërisë.

Gjykata, bazuar në natyrën dhe thelbin e pretendimeve të parashtruara në ankimin kushtetues individual, e shqyrtoi çështjen në themel vetëm në drejtim të pretendimeve për aspektin procedural dhe atë substancial të caktimit të masës së sigurimit “Arresti në burg” ndaj kërkuesit.

Ne aspektin procedural, Gjykata shqyrtoi pretendimet për cenimin e:

i) Se drejtës së mbrojtjes për shkak të kohës së pamjaftueshme në dispozicion për njohjen me aktet e dosjes dhe të qëndrimit të kërkuesit në kafaz/kabinën e xhamit gjatë procesit gjyqësor në gjykatat e faktit. Në lidhje me këtë pretendim Gjykata, me shumicë votash, vendosi rrëzimin e tij si të pabazuar.

ii) Parimit reformatio in peius (mosrëndimit të pozitës) të lidhur me marrjen e provave të reja në Gjykatën e Posaçme të Apelit, të paraqitura nga Prokuroria e Posaçme. Në lidhje me këtë pretendim Gjykata nuk arriti numin prej pesë votash për vendimmarrje, për rrjedhojë, në kuptim të nenit 73, pika 4, të Ligjit Organik të Gjykatës ai konsiderohet i rrëzuar.

Në aspektin substancial, Gjykata shqyrtoi pretendimet për cenimin e:

i) Dinjitetit dhe prezumimit të pafajësisë të lidhur me qëndrimin e kërkuesit në kafaz/kabinën e xhamit gjatë procesit gjyqësor në gjykatat e faktit. Në lidhje me këtë pretendim Gjykata, me shumicë votash, vendosi pranimin e tij, në drejtim të mungesës së arsyetimit nga Gjykata e Lartë të këtij pretendimi të parashtruar në rekurs nga kërkuesi.

ii) Lirisë personle në drejtim të:

2.1. Dyshimit të arsyeshëm të bazuar në prova për caktimin e masës së sigurimit personal ndaj kërkuesit të lidhur edhe me parimin e prezumimit të pafajësisë për shkak të gjuhës së përdorur në arsyetimin e vendimeve të gjykatave. Në lidhje me këtë pretendim Gjykata, me shumicë votash, vendosi rrëzimin e tij si të pabazuar.

2.2. Proporcionalitetit të masës të lidhur me të drejtën për t’u zgjedhur të cilin Gjykata, me shumicë votash, e gjeti të bazuar vetëm në drejtim të faktit që Gjykata e Lartë nuk i ka dhënë përgjigje të arsyetua këtij pretendimi të ngritur në rekurs nga kërkuesi.

Në përfundim Gjykata, me shumicë votash, vendosi:

Pranimin e pjesshëm të kërkesës.

Shfuqizimin e vendimit nr. 00-2025-1153 (176), datë 08.07.2025 të Kolegjit Penal të Gjykatës së Lartë, si i papajtueshëm me Kushtetutën e Republikës së Shqipërisë. Dërgimin e çështjes për shqyrtim në Gjykatën e Lartë.

Vendimi përfundimtar do të shpallet i arsyetuar brenda afateve ligjore të parashikuara nga Ligji Organik i Gjykatës dhe nga Rregullorja për Procedurat Gjyqësore të Gjykatës Kushtetuese.

The post Vendimi për Veliajn, Kushtetuesja shpjegon pse e riktheu çështjen në Gjykatën e Lartë: Nuk u arsyetua proporcionaliteti i “arrestit me burg” appeared first on Albeu.com.

Sipas vendimit, Gjykata vlerëson se kërkesa nuk i plotëson kriteret e pranueshmërisë të përcaktuara me Kushtetutë, të saktësuara më tej në ligj dhe në rregulloren e punës.

“Duke marrë parasysh që konflikti i kompetencave, në rrethanat e rastit konkret, është ngritur përkitazi me një kompetencë të Presidentes dhe e cila nuk është përcaktuar me Kushtetutë, por me Ligjin për Zgjedhjet e Përgjithshme, Gjykata, bazuar në pikën 1 të paragrafit 3 të nenit 113 të Kushtetutës dhe praktikës së saj gjyqësore thekson se konflikti i kompetencave nuk është ngritur përkitazi me “kompetenca kushtetuese” të Presidentes dhe për pasojë, nuk është plotësuar kriteri i dytë kushtetues në kontekst të ngritjes së “konfliktit të kompetencave kushtetuese” për Presidentin, Kuvendin dhe/ose Qeverinë. (shih, rastin KO88/21, cituar më lart, paragrafi 72)”, thuhet ndër tjerash në vendim.

Gjithashtu në vendim thuhet se presidentja nuk ka ngritur çështjen lidhur me “kompetencat kushtetuese”.

“Rrjedhimisht, në vlerësimin e Gjykatës në rrethanat e rastit konkret, Presidentja e Republikës, ndonëse është palë e autorizuar që të ngritë çështje të konfliktit të kompetencave kushtetuese në mes të saj dhe Kuvendit, nuk ka ngritur para Gjykatës konflikt të “kompetencave kushtetuese”, sipas përcaktimeve të nënparagrafit 1 të paragrafit 3 të nenit 113 të Kushtetutës, dhe për pasojë, Gjykata shpall kërkesën e Presidentes së Republikës së Kosovës të papranueshme”, thuhet në vendim.

The post Osmani kërkoi sqarim për emërimin e anëtarëve të KQZ, Kushtetuesja e rrëzon:Kërkesë e papranueshme, s’i plotëson kriteret appeared first on Albeu.com.

Mësohet se mbledhja në Kushtetuese ka nisur.

Mes këtyre komunikimeve, që janë marrë si prova dhe nga SPAK është komunikimi mes ish-drejtorit të ARRSH-së dhe ish-zëvendëskryeministren, Belinda Balluku, për të cilën Prokuroria e Posaçme kërkon arrestimin.

Berberi ndodhet pas hekurave pasi sipas SPAK-ut, ai rezulton i përfshirë në raste korruptive me 8 tendera që kapin vlerën e miliona eurove.

The post Iu zbuluan mesazhet me Ballukun/ Kërkon shpalljen të pavlefshme të komunikimeve në celularë, Kushtetuesja shpall sot vendimin për Evis Berberin appeared first on Albeu.com.

Ndër çështjet kryesore që do të shqyrtohen është edhe kërkesa e jo më pak se një të pestës së deputetëve të Kuvendit, e cila lidhet me verifikimin e procedurës së zgjedhjes së Avokatit të Popullit, si dhe me kushtetutshmërinë e vendimit përkatës të Kuvendit.

Kjo nismë synon të vlerësojë nëse janë respektuar standardet ligjore dhe kushtetuese gjatë procesit të përzgjedhjes së këtij institucioni të rëndësishëm.

The post PD kundërshtoi zgjedhjen e Avokatit të Popullit, Kushtetuesja çon në seancë plenare kërkesën e deputetëve appeared first on Albeu.com.

Në fjalën e mbajtur para të pranishmëve, kryetarja Fiona Papajorgji e cilësoi 2025 periudhë të rëndësishme në konsolidimin e jurisprudencës kushtetuese.

“Numri në rritje i kërkesave është vlerësuar si shprehje e rritjes së besimit të publikut në garancitë e drejtësisë kushtetuese, si dhe si afirmim i rolit të Gjykatës në mbrojtjen e të drejtave themelore të njeriut”, tha ajo.

Referuar të dhënave të publikuara mësohet se Gjykata ka trajtuar në total 605 çështje, nga të cilat 501 ishin kërkesa të reja dhe 104 të mbartura. Në krahasim me 2024, numri i kërkesave mësohet se është rritur me17%.

Në total mësohet se Gjykata brenda vitit ka dhënë 429 vendime, nga të cilat 85 ishin përfundimtare dhe përbënin rreth 20% të totalit, ndërsa pjesa tjetër prej 344 vendimesh (80%) ishin moskalime.

Nga vendimet përfundimtare, 33 janë me pranim të pjesshëm, 28 me pranim të plotë, 23 me rrëzim dhe vetëm një rast u pushua.

Ndërsa rreth 97% e kërkesave u paraqitën nga individë, e vetëm 3% nga subjekte të tjera si organizata, deputetë, gjykata, Presidenti apo parti politike.

75% lidhen me kundërshtimin e vendimeve të gjykatave të zakonshme, ndërsa pjesa tjetër ka të bëjë me kushtetutshmërinë e ligjeve, të drejtat themelore, konfliktet e kompetencave dhe aktet e pushtetit publik.

The post Del raporti i Kushtetueses për 2025: Kërkesat kanë qenë në rritje, kryesojnë çështjet e qytetarëve appeared first on Albeu.com.