Zhvillimet në arenën ndërkombëtare para ndërhyrjes së policisë në kampin MEK, dhe sidomos çfarë ndodhi dhe u tha pas futjes së policisë atje, tregojnë se aksioni i focave të rendit tek muxhahedinët ishte shumë më shumë se sa një çështje e zbatimit të ligjit.

Duket se gjithçka sapo ka filluar dhe gjasat janë që do të përfundojë me largimin e MEK nga Shqipëria.

SPAK nuk ka deklaruar ende konkretisht se për çfarë dyshon te muxhahedinët, por marrja e serverëve dhe rezistenca e banorëve të këtij kampi duke u përballur me policinë si dhe djegia e disa materialeve që gjendeshin aty tregojnë se gjërat kanë shkuar më thellë nga sa duket.

Zhvillimet në arenën ndërkombëtare

Shqipëria nuk ka këllqe që të zhvillojë politikë të jashtme të vetën, aq më tepër duke dalë përballë interesave të Shteteve të Bashkuara të Amerikës.

Nisur nga këto rrethana, AlbEu ngriti dje në mëngjes pyetjen: A është konsultuar qeveria shqiptare me amerikanët para se të futej në kampin e MEK? Reagimi i DASH si edhe deklarata e sotme e ambasadores Yuri Kim tregojnë se qënka konsultuar.

Pikërisht kjo gjë të bën të kuptosh se çfarë ndodhi dje ishte vetëm fillimi.

SHBA-të janë duke ngritur një aleancë botërore kundër Rusisë tashmë, ndërsa vizita e Sekretarit Blinken në Kinë tregon se kërkohet që kjo e fundit të paktën të mos bëhet pengesë.

Muajt e fundit është parë edhe një zbutje e gjakrave me Iranin dhe duke ditur që regjimi atje ka qenë vazhdimisht i shqetësuar ndaj mbështetjes së lobeve të djathta amerikane ndaj MEK, gjasat janë që këta të fundit të kenë qenë për diskutim në tavolinën e bisedimeve.

Nga ana tjetër, MEK është goditur edhe në Francë, ku edhe kanë qendrën kryesore politike, ç’ka tregon se ka një qasje të përgjithshme kundër tyre.

Qeveria shqiptare

Ndërhyrja e djeshme e policisë në kampin e MEK u shoqërua në fillim me shqetësimin nëse qeveria po futej në një kurs përplasjeje me amerikanët që kanë qenë deri më tani ata që kanë negociuar sjelljen e tyre këtu si edhe mbrojtjen, por gjatë pasdites u pa se gjithçka duket se ishte bërë të paktën duke marrë “leje”.

Ajo që tregoi shumë mbi qëllimet e qeverisë shqiptare ndaj MEK ishte deklarata e djeshme e Ministrisë së Brendshme, e cila edhe pse e vonuar, por edhe shkruar nxitimthi, mbartte një fjali të rendësishme: MEK shkeli marrëveshjen me shtetin shqiptar!

Ky ishte mesazhi që tregon se qeveria shqiptare ka hapur tashmë “lojën” për përgatitjen e terrenit për largimin e MEK-ut nga Shqipëria, të cilët duket qartësisht se nuk ishin vetëm për qëllime humanitare këtu pasi kryenin aktivitet të përvitshëm politik përmes kongreseve në hotelet më të shtrenjta të vendit, por edhe nxisnin raportimin e lajmeve dhe denoncimeve ndaj regjimit në Iran.

Amerikanët

Në reagimin e sotëm për REL, DASH la të kuptohej se MEK ishte kthyer në një shqetësim dhe se ata nuk do të bënin asgjë nëse qeveria shqiptare vijonte operacionet për zbatimin e ligjit. Kjo qasje u përforcua sot nga ambasadorja Yuri Kim, e cila theksoi se ata ishin miq dhe si të tillë duhej të zbatonin rregullat e vendit.

‘Ky është një vendim që duhet ta marrë qeveria shqiptare. Një gjë është e qartë ne mbështesim të drejtën e Shqipërisë për të zbatuar ligjet e saj në vendin e saj. Ka gjithashtu terma të caktuar të cilat zbatohen për çdo lloj mysafiri në vendin tuaj dhe kështu duhet të bëjnë edhe ato për ju, t’ju zbatojnë.’- tha Kim.

Mediat

Që prej ditës së djeshme në media të ndryshme ka filluar të artikulohet idea se MEK përbën rrezik për Shqipërinë dhe se ata duhet edhe të largohen nga vendi. Ky duket të jetë një mesazh i koordinuar dhe jo spontan pasi edhe pse përçohet përmes kanaleve të ndryshme, narrativa është e njëjtë: MEK duhet të largohet nga vendi ynë!

Destinacioni i këtij rrugëtimi është i qartë tashmë, por ajo që i mbetet shtetit shqiptar të bëjë është mbajtja nën kontroll e 3 mijë anëtarëve të MEK në Shqipëri, të cilët nuk duhet harruar se kanë qenë anëtarë të formacioneve të armatosura dhe kanë përgatitje ushtarake. /albeu.com

The post Si po bëhet gati qeveria për të larguar muxhahedinët nga Shqipëria appeared first on Albeu.com.

Deputetët e opozitës kërkuan paraqitjen e ministrit të Brendshëm në mënyrë urgjente për të dhënë sqarime në lidhje me çfarë ndodhi sot në Manzë si edhe shkaqet që çuan në ndërhyrjen e policisë ndaj muxhahedinëve.

Deputeti i PD-së Ferdinand Xhaferaj e cilësoi këtë ngjarje si një skandal, nisur edhe nga fakti se muxhahedinët kanë ardhur këtu me kërkesë të amerikanëve, kurse kryetari i Komisionit Nasip Naço tha se më parë duhet marrë informacion pastaj të reagohet.

Debatet:

Ferdinand Xhaferaj: Nuk mund të nisim këtë komision kur në Manzë ka ndodhur një ngjarje e rëndë. Muxhahedinët boll i ka masakruar regjimi iranian. Ato kanë ardhur të mbrohen nga qeveria shqiptare, dhe jo të vriten nga policia shqiptare. Ky është akt skandaloz. Kjo është pritja shqiptare?! Kryeministri Rama merrte dekoratë mikpritje për afganët. Ky është kodi i mikpritjes? Kemi një marrëveshje, ata kanë ardhur këtu për t’u mbrojtur dhe në një kërkesë të aleatit strategjik. A janë bërë këto nga një vendim? Nëse duhet të respektojmë dinjitetin tonë, thërrisni ministrin këtu nesër!

Nasip Naço: Ndonëse keni informacion më të azhornuar, por mos dilni me konkluzione si ekspertë. Nëse del si ekspert me konkluzione…

Ferdinand Xhaferaj: Të vijë nesër ministri.

Nasip Naço: Ti dhe bërtet mo burrë, dale se vuajmë nga zemra. Mënyra se si aktroni ju, është….

Ferinand Xhaferaj: Një nga Shqipëria për aktrim.

Zv.ministri Hodaj: Nuk ka pasur informacion për viktima brenda, por duhet të presim dhe ta konfirmojmë. E kuptoj se dhe në kuadrin ku ka presion, besoj se policia del për të sqaruar të gjithë gjënë.

Flamur Noka: Vendimi i një gjykate duhet zbatuar dhe është detyrë e policisë së Shtetit. Askush nuk thotë pse u bë kjo ndërhyrje. Në media qarkullon informacioni, mbase të pakonfirmuara, për dhunë të ushtruar ndaj muxhahedinëve.

Ne jemi të gjithë anëtarë të Komisionit të Sigurisë, kam qenë ministër dhe kam firmosur sjelljen e një ekipi prej 300 muxhahedinësh në Shqipëri. Jemi të qartë se ka dhe mund të ketë dhe elementë të infiltruar brenda muxhahedinëve.

Kjo nuk përligj në asnjë rrethanë ekskalim të situatës nga ana e forcave të policisë. Policia duhet të ndërhyjë. Policia duhet të ndërhyjë me qetësi dhe jo me dhunë.

Ajo që më shqetëson është që zv/min i Brendshëm në rast se ju keni informacion aq sa ka media. Kjo ka shpjegim; ose po mbani të fshehtë realitetin, ose në rast se keni informacion aq sa ka dhënë media, tregon se këtu shteti nuk funksionon.

Në rast se nuk jeni në gjendje të na informoni, kërkesa e Xhaferajt është e saktë.

Ne duam që të dimë se çfarë ka ndodhur dhe jo të drejtojmë gishtin. Në rast se nuk informoni dot me detaje, nesër ministri të vijë të informojë për gjendjen, pasojat dhe arsyet e ndërhyrjes. Mund të bëjmë dhe seancë me dyer të mbyllura.

Hodaj: Ministri nuk ka tagër që të dijë informacione. Po merrni për të mirëqenë dhunë dhe pretendoni që unë…

Flamur Noka: Nuk po ju kërkoj info që të jepni sekretet. Por mediat kanë ngritur një alarm që atje ka eskalim të situatës, që atje ka dhunë. Mediat thonë se ka viktima dhe ajo që iu kërkova është që të sqaroni komisionin se çfarë informacione keni. Të më citosh ligjin është largim nga përgjigja. Duam informacion që kjo situatë, të jetë dhe të kemi një panoramë të qartë të asaj se çka ndodh. Jam i bindur që ka informacion top-sekret, ndaj mund ta bëjmë një mbledhje me dyert të mbyllura, por mos bëni rolin e strucit, se kjo nuk shkon.

Ferdinand Xhaferaj: Do ju lutesha shumë që çdo detaj, s’kemi pasur që ta vendosim në pozitë të vështirë zv.ministrin. Edhe ai vetë u shpreh se; nuk kam informacione më shumë se sa ju.

Ndaj ndërtova kërkesën për të pasur kohën e mjaftueshme që nesër të vijë ministri.

Mua më konfirmuan se një prej muxhahedinëve ka humbur jetën nga përdorimi i gazit lotsjellës. Nesër është gjëja më normale e mundshme që të vijojmë mbledhjen.

Pse ka frikë që të vijë nesër ministri?! Më shqetëson raporti me SHBA dhe mua më intereson interesi kombëtar i Shqipërisë. Nesër ministri duhet të vijë të japë llogari.

Çfarë ndodhi në Manzë

Policia e Shtetit zhvilloi sot një kontroll të gjerë në kampin e Muxhahedinëve të MEK në Manzë të Durrësit pas një vendimi të lëshuar nga Gjykata e Tiranës. Gjatë kontrollit pati pëplasje mes policisë dhe muxhahedinëve në kamp, të cilët rezistuan për të dhënë dokumentacionin e kërkuar si edhe hapjen e të gjitha ambienteve.

Nga përplasja dhe përdorimi i gazit lotsjellës pati edhe një të vdekur si edhe disa të lënduar, ndërsa në kamp ka shkuar edhe një prokuror nga Prokuroria e Durrësit për të hetuar rrethanat e humbjes së jetës së muxhahedinit. Paraprakisht dyshohet se ia ndërroi jetë nga infarkti.

Ndërkhë, mësohet se nga kontrollet në kamp janë gjetur edhe servera, nga të cilët dyshohet se janë kryer sulme kibernetike. Nuk ka ende të dhëna nëse sulmet kanë qenë brenda vendit apo kanë shënjestruar vende të tjera.

Në një reagim të mëvonshëm Ministria e Brendshme tha se muxhahedinët kishin shkelur marrëveshjen pasi ata janë këtu vetëm për strehim dhe qëllime humanitare dhe jo për të kryer veprimtari të tjera.

Pritet që në orët në vijim të jepet një informacion i detajuar nga Policia e Shtetit në lidhje me dyshimet e forcave të rendit dhe ecurinë e këtij operacioni. /albeu.com

The post Përplasja në Manzë, debate te Siguria: Çuçi të vijë të japë llogari! appeared first on Albeu.com.

Policia po ekzekuton një urdhër kontroll të lëshuar nga Gjykata e Tiranës në ambientet në territorin e kampit MEK në Manzë të Durrësit.

Në përfundim të kontrolleve do të ketë njoftim më të detajuar.

Njoftimi i Policisë 

Në zbatim të vendimit të Gjykatës së Posaçme kundër Korrupsionit dhe Krimit të Organizuar dhe të urdhrit të ekzekutimit të Prokurorisë pranë kësaj Gjykate, për kontrollin e të gjitha ambienteve dhe zyrave ku  banojnë për qëllime humanitare, Policia e Shtetit, në kuadër të një plani operacional, ka filluar kontrollin e të gjitha ambienteve dhe zyrave në kampin MEK, në Manëz, Durrës.

Në zbatim të urdhër-kontrolleve të nxjerra nga Gjykata, Policia e Shtetit ka marrë masa për zbatimin e tyre, me planin e kontrollit të ambienteve në territorin e kampit MEK, duke zbatuar me rigorozitet etikën dhe komunikimin e duke respektuar të drejtat dhe liritë themelore të të gjithë qytetarëve dhe komunitetit që banon në këtë kamp.

Grupet e kontrollit të Policisë po vijojnë kontrollet në territorin e kampit MEK dhe në ambientet e brendshme të tij.

Si u strehuan në Shqipëri muxhahedinët?

Muxhahedinët u morën nën mbrojtjen e SHBA-ve  pas ndërhyrjes së tyre të armatosur në Irak në vitin 2003 dhe mbështetjes që ata u dhanë operacioneve ushtarake amerikane në Lindjen e Mesme dhe luftën kundër terrorizmit

Pasi ushtria e SHBA-ve mori në kontroll gjithë territorin, ky grupim filloi zhvendosjen nga kampi i krijuar në Irak. Në vitin 2013, qeveria shqiptare ra dakord me sekretaren e Shtetit Hillari Klinton, që nga Iraku të mbërrinin në Tiranë 270 muxhahedinë. Këta të fundit morën të gjithë dokumentacionin e nevojshëm dhe u trajtuan me statusin e azilantit politik.

Rotacioni i pushtetit nga qeveria e PD-së tek PS nuk e ndryshoi marrëveshjen e arritur më 2013 për pranimin e muxhahedinëve në Shqipëri.

Kryeministri Edi Rama ra dakord me autoritetet amerikane që në Shqipëri të strehoheshin një numër rreth 3 mijë muxhahedinësh iranianë. Me ardhjen e këtij kontingjenti të dytë të opozitës iraniane, u ngrit edhe kampi “Ashraf” në zonën e Manzës në periferi të Tiranës. Këtë hap të tij, në reagimet publike, Rama e konsideroi si një vendim humanitar dhe jo politik.

Edhe pse nuk ka të dhëna të sakta zyrtare, numri i muxhahedinëve që strehohen në kampin e Manzës mendohet se është 3500.

Si qeveria e PD, ashtu edhe ajo e PS, kanë ofruar shumë pak informacion në lidhje me marrëveshjen me SHBA dhe numrin e saktë të muxhahedinëve të strehuar në Tiranë.

Por kush janë muxhahedinët?

Në Iran janë të shpallur si grup terrorist dhe të padëshiruar, ndërsa kanë mbështetjen e SHBA dhe të Perëndimit.

Ishte viti 1965 kur u krijua ky grupim dhe që në fillimet e tyre e deri në vitin 70’ kanë qenë në opozitë me ish liderin e Iranit Mohammad Reza Shah. Pas përmbysjes së regjimit të tij dhe triumfit të revolucionit islamik, kjo organizatë sërish mbeti në opozitë, dhe u shpall si “terroriste” nga Ajetullahu Ruhollah Homeini. Kjo bëri që të detyrohen të largohen nga vendi i tyre, ku një  pjesë emigruan në Perëndim dhe një pjesë shumë e madhe u strehuan në Irak, ku ngritën kampin “Ashraf”.

Në Irak ata u përfshinë në organizimin e aksioneve terroriste dhe destabilizuese kundër regjimit iranian, të mbështetur nga diktatori Husein. Për këtë arsye ata u caktuan si organizatë terroriste nga shumë vende perëndimore përfshi edhe SHBA-të.

Pas konfliktit të SHBA-ve në Irak dhe hyrjes së ushtrisë amerikane në këtë vend për të rrëzuar regjimin e Sadam Husein, muxhahedinët iranianë dolën në krah të SHBA dhe ushtrive të NATO-s.

Për këtë arsye ata u morën në mbrojtje nga ushtria amerikane

/albeu.com/

The post Me blinda dhe forca speciale, policia në kampin e MEK në Manzë pas urdhrit të GJKKO-së appeared first on Albeu.com.