Kreu i shtetit, theksoi se shumë shpejt do të publikohet një plan i ri për zhvillimin e bregdetit, ku do të diskutohet me çdo bashki se cilat plazhe do t’i administrojnë ato në mënyrë të drejtpërdrejtë.

Në një deklaratë të tij, Rama ka theksuar se dy plazhe të sigurt janë Ksamil dhe Dhërmiu, duke shtuar se ata që njihen si dhunues plazhi, nuk do të lejohen të aplikojnë për t’u angazhuar më tej në këtë sektor.

Edi Rama: Uroj të ketë dëgjuar kush duhet të dëgjojë, por do t’i ripërsërisim disa herë këto në mënyrë që ata të cilët janë mësuar të dhunojnë plazhet me shezlongë ngjitur me njëri-tjetrin dhe bishta çadrash, të mos marrin më mundimin të aplikojnë fare.

Shumë shpejt do të nxjerrim të gjithë planin e ri për bregdetin dhe në bashkëpunim me të gjitha bashkitë do të kuptojmë se cilat plazhe bashkitë do t’i marrin tërësisht, por dy janë të sigurta Ksamili dhe Dhërmiu.

The post Paralajmërimi i Ramës: Plazhet e Ksamili dhe Dhërmiut do i marrin në menaxhim Bashkitë, kush është mësuar të dhunojë, as mos marrë guximin… appeared first on Albeu.com.

Ne ju rekomandojmë të zbuloni Ksamilin, plazhin më të bukur në Shqipëri. Me pamje nga ishulli grek i Korfuzit, plazhi i bukur i Ksamilit është një nga destinacionet më të njohura bregdetare në vend.

Me 300 ditë diell në vit, Shqipëria është shumë tërheqëse. Ky xhevahir i Rivierës Shqiptare, i kufizuar nga deti Jon, është një vend i paharrueshëm.

Ksamili ofron restorante, shezlone, madje edhe varka të vogla për të eksploruar brigjet. Një cep i vërtetë i vogël i parajsës në zemër të Ballkanit!

Ksamili, një plazh me bukuri mahnitëse!

Në jug të Shqipërisë, Ksamili është një destinacion mjaft i preferuar për shqiptarët dhe turistët e huaj!

I vendosur përballë Korfuzit, vetëm 2 kilometra nga kufiri grek, ky fshat i vogël bregdetar është një vend që nuk duhet humbur!

Ksamili ofron një peizazh që ngjason me një kartolinë: një plazh me ujëra të kristalta, rërë të imët, masivë shkëmborë të rrethuar nga bimësia …

Në distancë mund të shihni edhe ishuj të vegjël të shpërndarë në detin Jon.

Ka një atmosferë të butë dhe paqësore që frymëzon qetësinë. Një destinacion perfekt për pushime në bregdet!

Aty do të gjeni shumë restorante ku mund të shijoni specialitete lokale, kryesisht peshk ose produkte deti.

Për aktivitete si zhytje, Ksamili është vendi ideal: shtrati i detit është plot mrekulli për t’u zbuluar!

Gjiri i Ksamilit është gjithashtu shtëpia e vendeve të shumta të zhytjes!

Zbuloni zonat përreth Ksamilit…

Gjatë vizitës tuaj në Ksamil mund të eksploroni disa vende tërheqëse në zonën përreth:

Ishujt e Ksamilit

Këta ishuj të vegjël të pabanuar, të cilët mund të shihen nga plazhi, janë shumë afër. Në varësi të ishujve, ju mund të arrini atje me varkë ose kajak.

Qyteti i Sarandës

E vendosur rreth 20 kilometra nga Ksamili, Saranda është gjithashtu një destinacion i njohur bregdetar.

Parku Kombëtar i Butrintit

Ky park 9400 hektarësh ndodhet afërsisht 20 kilometra nga Saranda.

Është një vend arkeologjik, i listuar si një sit i Trashëgimisë Botërore të UNESCO-s, i cili është shtëpia e një qyteti antik të populluar nga grekët dhe më pas romakët.

Ju mund të shihni mbetjet e një teatri romak, një tempull, një akropol, etj.

Plazhet rreth Ksamilit

Përveç plazhit të Ksamilit, i cili është më i bukuri në Shqipëri, ka edhe pika të tjera për t’u zbuluar.

Mund të përmendim disa: Plazhi i Manastirit – i rrethuar nga kodra të gjelbëruara, Plazhi i Pasqyrës -uji i të cilit është aq transparent sa i ngjan një pasqyre, Plazhi i Pemës së Thatë – 6 kilometra nga Ksamili.

Syri i Kaltër

Ky vend ofron një spektakël natyror magjepsës: një burim uji blu që buron nga një shpellë dhe që të sjell imazhin e syrit të njeriut.

The post Media franceze “EnVols”: Zbuloni Ksamilin, plazhin më të bukur në Shqipëri appeared first on Albeu.com.

Në një renditje të 15 plazheve më të tërheqës të kontinentit ku bien në sy emra mjaft të njohur të turizmit bën pjesë edhe vendi ynë me plazhin e vogël të rivierës së jugut.

“Katër ishujt e Ksamilit të Shqipërisë, me disa nga plazhet më të bukura dhe më sekrete në vend, admirohen për bimësinë e tyre të harlisur dhe të gjelbër gjatë gjithë vitit dhe mund të arrihen vetëm me varka të vogla”, thuhet në shkrimin e “Forbes”.

Revista e njohur citon se ky vend gjendet vetëm 20 minuta me makinë nga qendra e Sarandës.

“Ksamili është një fshat në rivierën e Shqipërisë së Jugut, pjesë e Parkut Kombëtar të Butrintit, por një nga kryeqytetet evropiane të të rinjve. Ishujt janë ndër destinacionet më të njohura në rajon dhe zona është e njohur për rritjen e ullinjve, limonëve dhe mandarinave”, shkruan Forbs që përmend edhe midhjet që kultivohen në Lagunën e Butrintit pranë Ksamilit.

Ksamili renditet mes plazheve të njohur Italisë, Spanjës, Greqisë, Maltës, etj.

The post Forbes: Ksamili, kryeqytet i rinisë. Mes plazheve më të mira në Europë appeared first on Albeu.com.

Nëse në ditët e para të verës apo gjatë muajit korrik mediat i bënë jehonë Ksamilit duke e krahasuar madje dhe me Maldivet, dhe vlerësimi ishte 5 nga 5, tashmë ky vlerësim ëhstë zbehur shumë.

Platforma ndërkombëtare “TripAdvisor”, tregon se vlerësimi për Ksamilin ka rënë në 2, duke e humbur shkëlqimin e e fillimit, pasi turistët që kanë vizituar vendin tonë kanë mbetur të pakënaqur, raporton AlbEu.com.

Ndërkohë ndryshe nga sa u shit në fillim si parajsa e vogël e tokës, apo Maldivet shqiptare etc etc, turistët e huaj vunë re se në Ksamil, por dhe në pjesën tjetër të Shqipërisë, nuk ishte ashtu siç reklamohej në agjensitë turistike, realiteti ishte krejt ndryshe, çmime të kripura, shërbim arrogant, madje shpesh janë ndier edhe të fyer.

Më poshtë keni disa nga reagimet e turistëve të huaj:

“Shumë i shtrenjtë dhe sjellje arrogante nga vendasit. Po, uji është i pastër, por vetëm nëse shkoje herët në mëngjes. Nuk ka plazh publik dhe më është kërkuar të paguaj mbi 100 euro për dy shezlonge. Çmimi që kam paguar për taksi është i krahasueshëm me një shërbim premium në Londër dhe shpesh të ndryshojnë çmimin ndërkohë që ju jeni brenda në taksi. Udhëtimi më i mirë… të mos shkosh”, shkruan Ivana nga Britania e Madhe.

“Njerëz të pasjellshëm. 10 euro parkimi dhe duhet të ecësh 30 minuta të gjesh një plazh që nuk është rezervuar plotësisht. Mbipopullim”, shkruan Fjore nga Britania e Madhe.

“Ne erdhëm, qëndruam një natë dhe u larguam përsëri. Vend i mbipopulluar me hotele dhe apartamente të ndërtuara ngado jashtë çdo logjike. Çdo gjë është ndërtuar për biznes pa respekt për natyrën e bukur”, shkruan Ivana nga Italia.

“Hera ime e parë në Ksamil dhe e fundit. Përvoja më e keqe që kam pasur në Shqipëri. Banorët vendas dhe bizneset kanë zero mikpritje, thjesht rendin pas parasë”, shkruan Sofia.

“Ata na anuluan dhomën që kishim rezervuar dy muaj më parë sepse dikush tjetër iu kishte dhënë një çmim më të mirë. Vendi është krejt ndryshe nga fotot. Rrugët janë plot trafik dhe plzhet shumë të shtrenjta pa arsye. Është i vetmi vend në Shqipëri ku nuk do të shkojë më. Ky vend është një makth”, shkruan një pushues tjetër.

“Mos shpenzoni kohë të vini këtu. Ata pothuajse të shesin edhe ajrin që ju thithni. Tregtarët janë hileqarë dhe të pasjellshëm. Zero mikpritje! Çdo gjë është e mbivlerësuar. Rëra në plazh nuk është reale (natyrale)”, shkruan Murati, një tjetër turist që ka qënë në Ksamil teksa poston edhe faturën në një restorant, i cili i ka marrë pagesë edhe për përdorimin e salcës ketchup.

“Mos iu besoni videove në internet. Do të humbisni shumë para në “restorante” që në fakt janë zgara me ushqim të shpejtë. Pothuajse të gjithë këtu do përpiqen t’ju mashtrojnë, veçanërisht tregtarët dhe shoferët e taksive. Vijnë njerëz te stacioni i autobusit dhe iu thonë turistëve që autobusi është anuluar, në mënyrë që ata të detyrohen të paguajnë taksi mbi 30 euro për një udhëtim 15 apo 20 minuta. Plazhet janë të mbipopulluar dhe nëse nuk paguani 25 euro për shezlong, do t’ju vijnë rojet e sigurisë megjithëse asnjë plazh nuk është privat”, shkruan një komentues tjetër.

The post Ksamili humbet pikë në vlerësim, turistët e huaj nxijnë Shqipërinë appeared first on Albeu.com.

Unë dhe Dua e duam Ksamilin, ndaj po investojmë aty! Dua Lipa e ka më të lehtë, për shkak te famës dhe llogarisë bankare!

Ajo ndoshta ka një këndvështrim më idilik të “Maldiveve të Evropës”, sesa unë dhe polaku Pawel, lëre pastaj operatorin e jetskive, Peco, “cepellsi”nga Ksamili apo Iliri nga Kreta, që lë shtëpitë me qera!

Përveç Duas, të gjithë të tjerët nuk e kanë të lehtë të jetojnë dhe punojnë në “Maldivet” e Shqipërisë!

Për faj edhe të tyre, por edhe të atyre që do duhet të menaxhojnë “makroprincipatën e jugut”!

Ksamili rrezikon të jetë një flluskë sapuni dhe ashtu si kjo verë që thuhet se mund të jetë më e freskëta deri më sot edhe ky resort mund të jetë më i mbushuri me të huaj se në vitet në vazhdim!

Fatkeqësia e neokapitalistëve shqiptarë është sotpërsotshmëria e fitimit, mundësisht brenda 24 orëve dhe dështimi për një vizion më të qëndrueshëm ne biznesbërje!

Oferta dhe më sakte çmimet, veçanërisht të çadrave dhe shezlongëve apo disa shërbimeve të tjera, janë në shpërpjesëtim me bukurinë ujore dhe atë çka Ksamili e ka prej Zotit dhe deri diku edhe të atyre që kanë vendosur të jetojnë aty, duke investuar gjithçka kanë fituar e fitojnë ata dhe fëmijët e tyre nëpër Evropë!

Këto çmime sidomos nëpër plazhe, po dëmtojnë skalionet e tjera te atyre që mundësojnë pushimet në resort si hotelerinë private, restorantet, aktivitet ujore, shërbimet e qiradhënies se makinave, me përjashtim të supermarketeve që po bëjnë “kërdinë”, pasi aty po e gjejnë shpëtimin pushuesit e huaj dhe ata vendas!

Për një familje me dy fëmijë minimalisht shkon 40 mijë lekë dy çadra që me kursin aktual plus-minus janë 40 euro, sa gjysma afërsisht e akomodimit, plus shpenzimet e ushqimit ku një dreke minimalisht shkon 60 euro, mëngjesi dhe darka e duan po aq të dyja bashkë, pa përfshirë argëtime të tjera, nëse e përzgjedh si opsion, sepse karburanti dhe udhëtimet neper resorte të tjera nuk i përfshij!

Por në Ksamil ka edhe çadra deri në 1 mijë euro me një Dom Perignon, si me qenë në Mikonos!

Kundërargumenti është kërkesë-oferta dhe nëse s’ta mban xhepi shko gjetkë!
Por Ksamili dhe si ofrohet në mediat botërore është shumë më i lirë se kaq dhe zhgënjimi do përplaset si bumerang në vitin e ardhshëm dhe ne vijim!

Transporti mbetet një tmerr i vërtetë, bashkë me parkimin kur tërë pushuesit e Sarandës i mbivendosen Ksamilit dhe pa makine private mos u nis fare!

Nëpër portale, polak, ukrainas, spanjoll a italian, letonez a anglez, pyesin sa kushton ardhja nga aeroporti në Ksamil dhe përgjigjja e vetme mbetet në shumicën e rasteve taksitë që të kripin kokën, siç mund ta imagjinosh 30 euro nga Saranda në Ksamil!

Ndërkohë që ka autobus dhe fugon ndërqytetës nga Tirana në Sarandë a Përmet, Shkodër a Kukës, përse të mos ketë të paktën një terminal nga Rinasi drejt Velipojës, Durrësit, Vlorës, Dhërmiut a Sarandës e Ksamilit për të huajt!

Kaq e vështirë qenka krahasuar me linjat e trenave apo aeroporteve me afër resorteve apo linjave te trageteve që kurrë nuk kanë operuar në Shqipëri, aq më tepër atë post-komunisten, siç shikon kur rri ulur në Ksamil nëpër ngushticën e Korfuzit!

Kaq e vështirë është të ketë me shumë autobusë urban Sarandë-Ksamil apo furgona nga Ksamili te Pema e Thatë tërë pluhur dhe gropa apo në plazhe të tjera si Arameras apo gjetkë mes Sarandës e Ksamilit!

Abuzimi me çmimet e çadrave dhe plazheve po dëmtojnë plot arrogancë bizneset e tjera e nëse hoteleritë në një rast fatlum, bien dakord (gjë qe ka pak gjasa, sepse nuk ka shoqata që të mbrojnë interesat e tyre) e këta te vendosin çmime 200 euro për dhomë psh, peshqit e linguinet apo rizotot me fruta deti t’i hanë vetë pronarët e kamerierët se pushuesit ose do jenë më të pakët ose do gjejnë alternativa më sekrete të ushqyeri!

Madje, edhe vendasit do duhet të jetojnë dhe nëse pushojnë te paguajnë si turistët dhe u rrofshin investimet se edhe ushqimet i blejnë si ata!

Kur me një kartë të posaçme identiteti ata të mos paguanin siç ndodh në ishujt grekë ku një frape apo ushqimi janë mjaftueshëm për çadra dhe shezlong, pa pagese shtese!
Pas plazhit, Ksamili ofron shëtitje nëpër rrugë jo perfekte dhe shpesh me mbeturina, kakofoni muzikore e te gjitha zhanreve nga një klub te tjetri, që shijohet më shumë nga një promenadë ende e pashtruar as edhe me atë shtrese si te rrugët e Liqenit në Tirane dhe tezga ambulantësh!

Asnjë mini-amfiteatër për koncerte e shfaqe muzikantësh shqiptare që i fundit show u daton më 21 korrikun përvëlues!

Siç është Ksamili dhe turizmi shqiptar momentalisht do rezultojë zhgënjyes përballe ofertave të tjera rajonale, pavarësisht mitit te krijuar si “Maldivet e Evropës”, nga një fushate sensibilizuese e paprecedentë që mbart në vetvete riskun e dështimit dhe bumerangut!

Si ksamiljot do doja dhe besoj te vizioni i kryetarit të ri të Bashkisë së Sarandës dhe përbetimit kryeministror të surprizuar nga vota e ksamiljotëve në zgjedhjet e fundit lokale se do investoj në atë resort!

Por nëse Rama do t’u besojë videove që bashkëpunëtorët e tij i ofrojnë në 3D apo nga dronët, pa folur dhe kuvenduar me ata që bëjnë biznes turistik në Ksamil, do i shkojë dëm edhe merita e tij personale në promovimin, qoftë edhe të Ksamilit, ku unë dhe Dua Lipa kemi vendosur të investojmë si shqiptarë krenarë dhe besimplotë se kur shqiptarët orientohen drejt janë super të suksesshëm, që të mos zhgënjejnë polakun Pawel apo ata që lexojnë shtypin perëndimor për Ksamilin!

The post Çmenduri shqiptare: Ksamili mes Dua Lipës dhe polakut Pawel! appeared first on Albeu.com.

Qeparoja m’u duk një nga plazhet më të bukura në Shqipëri. Shtrihet dhe zgjerohet buzë detit pa shumë lakmi dhe ethe ndërtimore, krahasuar me betonizimin e frikshëm të Dhërmisë, Drimadhesit, që i ka aq afër.

Fshati lart në mal i qëndron mbi krye si hije këtij tjetrit buzë Jonit dhe ndërtesat e reja që janë ndërtuar për turistët (banorët e përkohshëm të verës) nuk të bëjnë ta harrosh atë mbi mal dhe as të pengojnë ta shohësh për çdo çast të ditës.

Pamja që merr për të dyja pjesët e fshatit, të vjetrit dhe të riut, kur ke ndaluar notin pak në thellësi dhe pluskon në qetësi, të magjeps. Historikja dhe e reja ndërthuren mirë me njëra-tjetrën, edhe pse pak larg. Lungomarja apo pedonalja, apo shëtitorja buzë detit, është punuar aq mirë.

Njerëzit shëtisin mëngjeseve dhe mbrëmjeve dhe bimësinë e Mesdheut: lulen e akshamit, serdenin, fikun, rrushin, fikun e detit, fikun e egër kinez, borzilokun t’i kap syri kudo. Mbrëmjeve lulja e akshamit ose lulja e natës (italianët e quajnë Bella di Note) përhap një aromë të mrekullueshme.

Njerëzit që shërbejnë janë të qetë dhe të sjellshëm, çmimet më se të pranueshme. Në Elbasan ka restorante me çmime edhe më të larta.

Dy probleme që duhen ndrequr: fundi i pedonales, në drejtim nga Jugu, ka mbetur pa përfunduar (si çdo punë publike në Shqipëri), dhe mbaron me një gropë të hatashme në fund të së cilës rrjedh një nga burimet e shumta të Qeparosë që dalin nga shkëmbi.

Nuk ka asnjë tabelë lajmëruese që të mbron nga rreziku i rrëzimit (më e pakta do thyesh brinjët e këmbët; më e keqja, ruajna Zot), dhe asnjë gur e tra pengues.

Në mbrëmje fëmijët me biçikleta e monopatina, apo ndonjë turist që s’e njeh Qeparonë mund të përfundojë poshtë nja 5 metra. Sa pa frikë për jetën jetojnë njerëzit në Shqipëri!

Dhe problemi tjetër janë koshat e plehrave. Nuk gjenden gjëkundi. Në pedonale jo e jo. Duhet të ecja 1 km në këmbë për të shkuar të koshat (të vetmit e Qeparosë, ndoshta).

E megjithatë, dua të kthehem prapë në Qeparo. Aq më tepër që rruga e re nga Vlora të nxjerr pikërisht në qendër të fshatit poshtë. Nga hyrja e Vlorës deri në Qeparo 1 orë e 20 minuta, me makinën time.

The post Përtej babëzisë, tangërllekut dhe vrasjeve me skaf, jugu nuk është vetëm Dhërmiu, Ksamili dhe Jala appeared first on Albeu.com.

Mësohet se i riu po lundronte në një zonë të ndaluar kështu policia ka ndërhyrë duke bllokuar dhe shoqëruar në Port, mjetin lundrues, së bashku me drejtuesin e tij.

Gjatë kontrollit E.T nuk kishte dokumente për mjetin lundrues. Policia Kufitare bllokoi mjetin lundrues dhe i vendosi të riut një gjobë prej 10.000 lekë të rinj.

Njoftohet se nga Ksamili në Velipojë, janë verifikuar 31 mjete lundruese, kryesisht “Jet ski” dhe skafe, për dokumentacionin që duhet të kenë, si dhe për t’u bërë me dije sanksionet, drejtuesve të tyre, në rast shkeljeje të perimetrit të sigurisë së pushuesve./albeu.com

Njoftimi i Plotë:

Kreu manovra të rrezikshme me një mjet lundrues “Jet ski”, në zonën e ndaluar për mjetet lundruese, në plazh, Durrës, duke rrezikuar pushuesit, Policia Kufitare e Durrësit ka ndërhyrë menjëherë duke bllokuar dhe shoqëruar në Port, mjetin lundrues, së bashku me drejtuesin e tij.

Gjatë kontrollit, u konstatua se drejtuesi, shtetasi E. T., 25 vjeç, banues në Durrës, nuk kishte dokumente për mjetin lundrues. Policia Kufitare bllokoi mjetin lundrues dhe ndëshkoi me masë administrative në vlerën 10.000 lekë të rinj, shtetasin E. T.

Gjatë kësaj jave, në të gjithë zonën bregdetare, janë zhvilluar kontrolle të hërëpashershme për mjetet lundruese dhe për zbatimin e detyrimeve për të mos lundruar në zonat e mbrojtura me bova.
Si rezultat i kontrolleve, nga Ksamili në Velipojë, janë verifikuar 31 mjete lundruese, kryesisht “Jet ski” dhe skafe, për dokumentacionin që duhet të kenë, si dhe për t’u bërë me dije sanksionet, drejtuesve të tyre, në rast shkeljeje të perimetrit të sigurisë së pushuesve.

Policia Kufitare do të vijojë intensivisht kontrollet në të gjithë vijën bregdetare dhe apelon për të gjthë ata shtetas që kanë në përdorim apo japin me qira për përdorim mjete argëtuese lundruese, të tregojnë kujdes maksimal për të respektuar detyrimet, me qëllim rritjen e sigurisë së jetës së pushuesve në plazhe.

The post Manovra të rrezikshme me “Jet ski” pranë pushuesve, gjobitet me 10.000 lekë i riu nga Durrësi (VIDEO) appeared first on Albeu.com.