Esat Bushati, një prej figurave të njohura të futbollit shkodran, është ndarë nga jeta në moshën 97-vjeçare. Lajmi u bë i ditur në rrjetet sociale nga Vllaznia, klubi me të cilin ish-mbrojtësi la një trashëgimi të rëndësishme sportive. Gjatë karrierës së tij, ai përfaqësoi gjithashtu Partizanin dhe Kombëtaren shqiptare.

Në mesazhin e ngushëllimit, KF Vllaznia vlerësoi kontributin e madh që Bushati dha me fanellën kuqeblu gjatë viteve ’40-’60. Klubi kujtoi se ai luajti me sukses edhe për Partizanin dhe përfaqësuesen shqiptare, duke u renditur mes mbrojtësve më të mirë të asaj periudhe.

Homazhet për nder të Esat Bushatit do të mbahen të premten, nga ora 10:00 deri në 12:00, në hollin e stadiumit “Loro Boriçi”. Vllaznia e mbylli reagimin me urimin që kujtimi i tij të mbetet i përjetshëm.

Për humbjen që ka prekur futbollin shkodran dhe më gjerë reagoi edhe kryetari i Bashkisë, Benet Beci. Ai e cilësoi Esat Bushatin si një nga emrat e respektuar të futbollit të qytetit dhe përmendi karrierën e tij te Vllaznia, Partizani dhe Kombëtarja shqiptare.

Sipas Becit, jeta e Bushatit ishte e pandashme nga futbolli dhe fanella kuqeblu, të cilën ai e veshi që në vitin 1947. Kryetari i Bashkisë theksoi se Shkodra i çmon njerëzit që kanë shkruar historinë e sportit të saj dhe se Esat Bushati do të mbetet një prej tyre.

Në fund të mesazhit, Benet Beci u përcolli ngushëllimet më të sinqerta familjes Bushati, të afërmve dhe gjithë familjes së madhe të futbollit shkodran, duke i uruar Esat Bushatit prehje në paqe.

The post Ndahet nga jeta në moshën 97-vjeçare legjenda shkodrane Esat Bushati, mesazhe nga Vllaznia dhe Benet Beci appeared first on Albeu.com.