Edhe pse Serbia vijon të nxjerrë pengesa në procesin për sqarimin e fatit të personave të zhdukur, Kosova nuk do të heqë dorë nga kërkimi i së vërtetës dhe drejtësisë, ka deklaruar kryeministri në detyrë, Albin Kurti.

Duke shkruar në platformën X për fillimin e gërmimeve në një varrezë masive në fshatin Kalludër të Zubin Potokut, Kurti tha se aty dyshohet se ndodhen mbetjet mortore të 23 intelektualëve nga Mitrovica. Mes tyre kishte mjekë, profesorë dhe aktivistë të të drejtave të njeriut, të cilët u rrëmbyen dhe u zhdukën më 19 prill të vitit 1999.

“Pavarësisht se Serbia vazhdimisht i pengon përpjekjet për sqarimin e fatit të këtyre njerëzve të pafajshëm, Republika e Kosovës nuk do të ndalet së kërkuari të vërtetën dhe drejtësinë”, ka shkruar Kurti.

Ai theksoi se institucionet e Kosovës mbeten të vendosura për të gjetur secilin person të zhdukur, për të nxjerrë në dritë çdo varrezë të fshehur dhe për t’i sjellë para drejtësisë personat përgjegjës, në mënyrë që familjet e të zhdukurve të mund të gjejnë më në fund sadopak paqe dhe ngushëllim.

Sipas Kurtit, ndonëse ka kaluar më shumë se një çerek shekulli nga përfundimi i luftës së viteve 1998-1999, familjet e 1.565 personave të zhdukur me dhunë, mes të cilëve mbi 100 fëmijë, ende presin të mësojnë se çfarë ka ndodhur me të afërmit e tyre.

The post Kurti: Serbia nuk do ta pengojë Kosovën të zbardhë fatin e të zhdukurve appeared first on Albeu.com.

I Dërguari i Posaçëm i Bashkimit Evropian për dialogun midis Kosovës dhe Serbisë, Peter Sorensen, u prit sot në një takim nga kryeministri në detyrë i Kosovës, Albin Kurti.

Gjatë bisedimeve, palët trajtuan marrëdhëniet aktuale me Bashkimin Evropian, dinamikat në rajonin e Ballkanit Perëndimor dhe ecurinë e procesit të dialogut. Vëmendje e veçantë iu kushtua gjendjes së tanishme të këtij procesi dhe perspektivave për hapat e ardhshëm.

Në këtë kuadër, kryeministri Kurti nënvizoi përkushtimin e Kosovës për një qasje konstruktive, duke vënë në dukje synimin për paqe të qëndrueshme, siguri në kuadër euro-atlantik, stabilitet afatgjatë dhe fqinjësi të mirë sipas standardeve evropiane.

Kur u ndal te çështja e kthimit të gjyqtarëve dhe prokurorëve serbë që dhanë dorëheqje, e ngritur nga i dërguari Sorensen, kryeministri në detyrë deklaroi se Qeveria e Kosovës mbështetet fuqimisht në parimet kushtetuese dhe ligjore, duke kërkuar barazi për të gjithë qytetarët dhe përfshirje të komuniteteve. Ai theksoi se personeli në institucionet e Republikës duhet të pasqyrojë diversitetin etnik dhe të udhëhiqet nga aftësia profesionale dhe ndershmëria etike, qoftë në polici, në sistemin gjyqësor apo në prokurori.

Kurti kujtoi se dorëheqjet kolektive të ndodhura para katër vjetësh në veri të Ibrit kishin për qëllim të minonin karakterin shumetnik të sistemit demokratik të vendit. Sipas tij, zgjidhja përpara përcaktohet nga Kushtetuta dhe ligjet e Kosovës, të cilat për sistemin gjyqësor nënkuptojnë njëkohësisht ruajtjen e multietnicitetit dhe garantimin e pavarësisë e cilësisë së drejtësisë.

Gjithashtu, gjatë takimit u diskutuan edhe çështje të tjera aktuale të dialogut, me theks të posaçëm mbi domosdoshmërinë e respektimit të plotë të Marrëveshjes Bazike të Brukselit dhe të Aneksit të Zbatimit të Ohrit, pa asnjë shkelje.

The post Takimi Kurti-Sorensen: Në qendër dialogu, sundimi i ligjit dhe përbërja shumetnike e gjyqësorit appeared first on Albeu.com.

Takimet për konstituimin e institucioneve të reja të Kosovës, të dala nga zgjedhjet e parakohshme parlamentare të 7 qershorit, kanë nisur sot mes udhëheqësve politikë.

Në ambientet e Kuvendit, kryeministri në detyrë i Kosovës dhe njëkohësisht lideri i Lëvizjes Vetëvendosje, Albin Kurti, është duke zhvilluar fillimisht një takim me kryetarin e Partisë Demokratike të Kosovës, Bedri Hamza.

Më pas, në orën 18:00, është planifikuar edhe takimi me kreun e LDK-së, Lumir Abdixhiku.

Duke hyrë në Kuvend bashkë me ministrin në detyrë të Financave, Hekuran Murati, Kurti deklaroi: “Presim që takimi të jetë konstruktiv dhe t’i konstituojmë institucionet e legjislaturës së njëmbëdhjetë”.

Nga ana tjetër, Hamza u shpreh para gazetarëve se pret që ky takim të përmbyllet me sukses, në mënyrë që vendi të ketë “institucione, stabilitet institucional dhe përparim”.

Këto takime po mbahen dy ditë pasi u certifikua rezultati i zgjedhjeve të parakohshme parlamentare të qershorit, të zhvilluara pasi muaj më herët partitë nuk arritën pajtim për presidentin e ri të vendit.

Kurti kishte ftuar gjithashtu në takim edhe kreun e Aleancës, Ardian Gjini, por ky i fundit e refuzoi ftesën, me arsyetimin se partia e tij tashmë i ka paraqitur gjashtë kushte që Kurti do të duhej t’i përmbushte në këmbim të mbështetjes për krijimin e institucioneve.

Analisti politik Ilir Deda i ka cilësuar pozitive këto takime, por ka nënvizuar se ka mbërritur momenti i fundit “që me një apo dy takime maksimum” liderët politikë “të japin përgjigje për krijim të institucioneve”.

Në një deklaratë për Radion Evropa e Lirë, Deda tha se mbajtja e zgjedhjeve të reja do të ishte shumë e dëmshme për vendin. Sipas tij, “Kurti, Hamza dhe Abdixhiku, e kanë përgjegjësi të jashtëzakonshme që së bashku të merren vesh dhe t’i japin Kosovës një Qeveri funksionale, një president dhe një stabilitet politik në katër vjetët e ardhshëm”.

Sipas rezultatit përfundimtar të zgjedhjeve të 7 qershorit, LVV-ja e Kurtiti ka fituar 53 mandate, PDK-ja 22 ulëse, LDK-ja 18 dhe Aleanca shtatë.

Pas certifikimit të rezultateve, deputetët e legjislaturës së re duhet të konstituojnë Kuvendin, të formojnë Qeverinë dhe të zgjedhin presidentin.

Për konstituimin e Kuvendit dhe formimin e Qeverisë nevojiten 61 vota në Kuvendin me 120 ulëse. Partia e Kurtit i ka votat për dy proceset e para, pasi mbështetet edhe në votat e partive pakicë joserbe, të cilat kanë dhjetë mandate.

Megjithatë, për emrin e presidentit ende nuk ka një marrëveshje apo konsensus.

Që votimi për presidentin në dy rundet e para të jetë i vlefshëm, kërkohet prania e dy të tretave të deputetëve në Kuvend.

Nëse mungon një marrëveshje politike, kjo mbetet e pamundur për secilën parti parlamentare.

Kushtetuta përcakton se presidenti duhet të zgjidhet brenda 60 ditëve nga dita kur konstituohet Kuvendi.

Nëse kjo nuk ndodh, Kuvendi shpërndahet dhe vendi shkon në zgjedhje të reja. Nëse vendi shkon në zgjedhje sërish, atëherë ato do të ishin të katërtat parlamentare që nga shkurti i vitit 2025.

Qëndrimet e partive

Disa ditë më parë, zyrtarja e LVV-së, Arbërie Nagavci, deklaroi për Radion Evropa e Lirë se subjekti i saj i ka votat e nevojshme për krijimin e Qeverisë së re dhe se për zgjedhjen e presidentit do të kërkojë konsensus me partitë e tjera.

Sipas kësaj partie, presidenti duhet të jetë figurë konsensuale dhe jopartiake. Muaj më parë, LVV-ja kishte propozuar për këtë post dy emra nga shoqëria civile, Feride Rushitin dhe Hatixhe Hoxha, por nuk arriti marrëveshje me partitë opozitare dhe këto kandidatura nuk siguruan votat e nevojshme.

PDK-ja, LDK-ja dhe Aleanca, tri partitë opozitare, kanë paraqitur disa kushte për një bashkëpunim të mundshëm me partinë e Kurtit.

Hamza ka deklaruar se, përpara se të diskutohet për bashkëpunim të mundshëm qeverisës, duhet të trajtohen me LVV-në një varg çështjesh, si pagat dhe pensionet, kapacitetet energjetike, gazi amerikan dhe anëtarësimi i Kosovës në Bashkimin Evropian.

Për LDK-në, sipas Abdixhikut, “parakusht i ekzistencës politike” mbeten orientimi strategjik i Kosovës, përfshirë gazi amerikan.

Sa i përket Aleancës, ndër gjashtë kushtet e saj përfshihen pranimi nga Kosova i projektit të gazit amerikan, ndërtimi i një termocentrali me thëngjill dhe disa kërkesa të tjera të lidhura me ekonominë.

Njohësi i çështjeve politike, Ilir Deda, ka deklaruar për Radion Evropa e Lirë se të gjitha kërkesat e partive opozitare janë në interes të Kosovës dhe, sipas tij, synojnë rritjen e mirëqenies së qytetarëve si dhe thellimin e “partneritetit të Kosovës me Shtetet e Bashkuara”.

Odat ekonomike: Refuzimi i gazit rrezikon partneritetin e Kosovës me SHBA-në

Qeveria në detyrë e Kurtit po përballet me thirrje nga Ambasada amerikane, partitë opozitare dhe odat ekonomike që t’u bashkohet nismave rajonale për rrjetin e gazit të lëngshëm natyror (LNG), të mbështetura nga Shtetet e Bashkuara.

Dy ditë më parë, e ngarkuara me punë në Ambasadën amerikane në Prishtinë, Anu Prattipati, e përsëriti kërkesën që Kosova të furnizohet me LNG-në amerikane “për të siguruar investime amerikane në të ardhmen”.

Pavarësisht kësaj, deri tani ekzekutivi kosovar nuk ka dhënë sinjale se është i gatshëm të bëhet pjesë e këtyre nismave, ndërsa ministrja në detyrë e Ekonomisë, Artane Rizvanolli, dhe Kurti kanë përmendur idenë e gazifikimit të thëngjillit vendas.

The post Liderët politikë nisin bisedimet për ngritjen e institucioneve të reja appeared first on Albeu.com.

Pjesë e kësaj proteste janë bashkuar edhe shqiptarë nga Diaspora, teksa me flamuj dhe pankarta në duar, ata kërkojnë të plotësohen kërkesat e tyre.
Përpara Kryeministrisë, ata pritet të mbajnë fjalimet e tyre të përhershme dhe më pas të nisin marshimin në rrugët e kryeqytetit.

Gjithashtu, protestuesit kanë hapur flamurin shqiptar te Piramida, teksa të tjerët kanë hedhur tullumbace kuqezi në bulevard.
Në thirrjet e tyre, ata i japin afat kryeministrit Rama për të dhënë dorëheqjen deri të dielën.
Pjesë e kësaj proteste u bë edhe deputetja që u largua nga PS një javë më parë, Marjana Koçeku.

Pas fjalëve të protestuesve në podium, ata nisën marshimin rreth Kryeministrisë dhe Piramidës, ndërkohë i bënin thirrje Edi Ramës dhe Sali Berishës për dorëheqje.
Një nga protestuesit njoftoi se protesta mund te vazhdoje deri në oret e vona të mengjesit pasi diaspora ka vendosur ta “ gdhijmë” në shesh .

The post Protestuesit nisin rrethimin e Kryeministrisë: Sonte do ta gdhijmë këtu! Marshim gjithë natën appeared first on Albeu.com.

Ai tha se ata që kanë mision luftën me qeverinë, duhet të vijnë dhe të ngrenë çadrat. Lapaj kërkoi largimin e qeverisë, qeveri teknike dhe zgjedhje të reja.

Ai theksoi se halli i përbashkët i partive poltike është Rama dhe ligji zgjedhor. Sipas tij ai ligj është bërë me Berishën, ndaj kërkoi që PD dhe Berisha të distancohen nga ai ligj dhe të bashkohet me ta.

Fjala e Adriatik Lapajt:

Sot, në ditën e 90-të të protestës përballë qeverisë më të korruptuar të Evropës, ndaj lajmin me qytetarët paligjshmërinë totale të Policisë së Shtetit dhe protestën tonë legjitime për të protestuar. Ky është vendimi i mosfillimit që ka ardhur nga Prokuroria, ku na njohët mbrojtja e posaçme për të protestuar. Ne po e arrijmë duke u përballur pa frikë para qeverisë më të korruptuar të Evropës. Prokurori thotë se ka vendosur mosfillimin e procedimit penal për kallëzimin e bërë dhe kthimin e sendeve të sekuestruara sipas procesverbalit nga oficerët e policisë gjyqësore, si çadrat, ngrohëset, kartonët, karriget dhe sendet e tjera që na u morën dhunshëm. Ndaj ne na lind sot e drejta për të vendosur çadrat tona dhe të zbatojmë të drejtën tonë kushtetuese.

Nëse policia e shtetit, që ditët e fundit ka humbur drejtorin e Përgjithshëm dhe të Tiranës, nëse nuk zbatojnë ligjet dhe Kushtetutën, le të vijnë dhe të na sulmojnë dhe të na i sekuestrojnë, por ne do vazhdojmë, Ftoj aktivistët të montojnë çadrën. Është e drejta kushtetuese. Ata mund të zbatojnë ligjet e Ramës, mund të na sulmojnë, dhunojnë, arrestojnë, por ne do vijojmë. Kjo është çadra e parë simbolike dhe shpresoj të mbushet me sa më shumë çadra në betejën kundër pushtetit kleptokratik të qeverisë Rama.

Të gjitha partitë politike kanë një detyrë të përbashkët, të përballen me regjimin e Ramës, që vjedh qytetarët shqiptarë. Ata që kanë mision luftën me qeverinë le të vijnë këtu dhe të ngrenë çadrat. Beteja nuk bëhet në studio televizive apo banaqet televizive, atje duhet të rrinë analistët, politikanët le të vijnë këtu dhe të protestojnë. Halli ynë i përbashkët është Rama dhe ligji zgjedhor dhe ai ligj është bërë me Berishën ndaj PD dhe Berisha të distancohen nga ai ligj dhe le të vijnë të na bashkohen. Ne e ngritëm çadrën dhe jam i bindur se do vijnë përsëri këtu t’i heqin. Këta nuk pyesin as për ligj, as për prokurori, as për kushtetutë, por ne duhet të vazhdojmë pa diskutim dhe pa u ndalur.

The post Lapaj para Kryeministrisë: Të gjitha partitë politike kanë detyrë të përballen me regjimin e Ramës appeared first on Albeu.com.

Kreu i lëvizjes, Adriatik Lapaj, reagoi me tone të ashpra ndaj efektivëve të policisë, duke i akuzuar se po veprojnë nën ndikim politik. Gjatë deklaratës së tij, Lapaj sulmoi drejtpërdrejt zëvendëskryeministren Belinda Balluku, duke e quajtur atë “hajdute” dhe duke pretenduar se ndërhyrja e policisë është bërë me urdhër të saj.

“Merrni Belindën, se ajo ua fut juve. Doni Belinda Ballukun, hajdutja! Keni marrë sot një oficer që është doktor shkencash, se do Belinda Balluku,” deklaroi Lapaj para efektivëve, duke shtuar se policia po përdoret kundër protestuesve paqësorë.

Ai vijoi akuzat duke thënë se policia nuk dëshiron qytetarë që protestojnë paqësisht, por, sipas tij, u shërben personave që nxisin dhunë. Lapaj përmendi gjithashtu emra të tjerë zyrtarësh të lartë, duke i akuzuar për nënshtrimin e Policisë së Shtetit ndaj interesave politike.

“Nuk më doni mua që ju respektoj, doni ata që vijnë me molotovë,” u shpreh ai, duke theksuar se protesta e zhvilluar prej tij dhe mbështetësve ka qenë paqësore dhe pa incidente.

The post Përplasje para Kryeministrisë, Lapaj me tone të ashpra ndaj policisë pas heqjes së çadrave: Ju doni Belinda hajduten! appeared first on Albeu.com.

Zv/kryeministrja është njohur sot me masën e sigurisë së pezullimit nga detyra dhe heqjes së pasaportës nga GJKKO, teksa prej javësh ajo është marrë e pandehur nga SPAK.

Besohet se Balluku po zhvillon një takim me kryeministrin Rama, i cili është nisur pikërisht sot pas shpalljes së masave të sigurisë nga GJKKO.

The post Pas Ballukut edhe Ulsi Manja shkon në Kryeministri appeared first on Albeu.com.

Balluku, siç shihet nga pamjet ka hyrë në Kryeministri shumë qetësisht, ndërkohë nuk dihet nëse do të takojë apo jo kryeministrin Edi Rama.

Kujtojmë se masa e sotme e GJKKO vjen një ditë pas fjalimit të saj në Kuvend, ku iu kundërvu opozitës për akuzat, ndërsa theksoi se nuk do të komentonte veprimet e drejtësisë.

The post GJKKO e pezulloi nga detyra dhe i bllokoi daljen jashtë vendit, Balluku shkon në Kryeministri appeared first on Albeu.com.

Në këtë takim me përfaqësuesit diplomatikë të BE-së, përveç Ramës, janë të pranishme edhe ministrja për Marrëdhëniet me Parlamentin, Elisa Spiropali, dhe ministrja e Shtetit për Administratën Publike dhe Antikorrupsionin, Adea Pirdeni.

Ende nuk janë bërë publike detaje mbi temat e diskutimit, por takimi vjen në një moment të rëndësishëm për procesin e integrimit evropian të Shqipërisë dhe bashkëpunimin me vendet anëtare të BE-së.

The post Rama pret ambasadorët e BE-së në Kryeministri appeared first on Albeu.com.

Takimi do të mbahet në orën 18.00.

Ende nuk behet me dije arsyeja e këtij takimi, i cili vjen një ditë pas vendimit të këshillit bashkiak të Tiranës për të shkarkuar zyrtarisht nga detyra kryebashkiakun Erion Veliaj.

Këshilli Bashkiak i Tiranës, me një konsesus të plotë të të gjitha palëve, ka votuar pro kërkesës së socialistëve për shkarkimin nga detyra të kryetarit të Bashkisë së Tiranës, Erion Veliaj.

Në vendimmarrje, Këshilli Bashkiak iu referua pikës c të nenit 62 të ligjit “Për vetëqeverisjen vendore” që thotë se Kryetari i bashkisë shkarkohet me vendim të Këshillit të Ministrave kur propozohet për shkarkim nga këshilli bashkiak përkatës për mosparaqitje në detyrë për një periudhë 3-mujore të pandërprerë.

Pavarësisht konesusit të gjerë opozitë-mazhorancë, vetëm 50 këshilltarë kanë votuar pro shkarkimit, nga 61 këshilltarë gjithsej që ka Këshilli Bashkiak.

The post Rama thërret deputetët e Tiranës dhe ministrat në Kryeministri appeared first on Albeu.com.