Drejtori i Drejtorisë për Mbrojtje dhe Shpëtim, Stojançe Angellov, deklaroi se po komunikon me autoritetet lokale lidhur me ndalimin e përdorimit të ujit në Krushevë. Ai sqaroi se pajisja për klorimin e ujit nuk kishte funksionuar për një orë si pasojë e ndërprerjes së energjisë elektrike.

Angellov bëri të ditur se gjendja është e qëndrueshme dhe se ngjarja nuk mund të krahasohet me rastin në Gostivar, sepse në Krushevë nuk është raportuar asnjë person me simptoma helmimi.

“Sapo u njoftova se edhe uji në ujësjellësin e Krushevës nuk ishte i rregullt, kontaktova menjëherë kryetarin e komunës. Prej tij mora informacionin se, për shkak të ndërprerjes së energjisë elektrike, instrumenti i klorit kishte qëndruar jashtë funksionit për jo më shumë se një orë, që do të thotë se gjatë asaj kohe uji nuk ishte kloruar. Për këtë arsye, situata në Krushevë nuk i ngjan aspak asaj që ndodhi në Gostivar.

Pas një ore, pajisja që furnizon me klor ujësjellësin e qytetit rifilloi funksionimin dhe pres që gjendja atje të stabilizohet plotësisht”, deklaroi Stojançe Angellov, drejtor i Drejtorisë për Mbrojtje dhe Shpëtim.

The post Krushevë, ndërprerja e energjisë nxori për një orë jashtë funksionit pajisjen e klorimit appeared first on Albeu.com.