Deputeti kroat në Parlamentin Evropian, Davor Ivo Stier, i përket radhëve të HDZ-së dhe së fundmi në emisionin “Romano Bolkoviq – 1 na 1” në HRT deklaroi se që prej nisjes së agresionit rus në Ukrainë në muajin shkurt 2022, Serbia nuk ka shënuar asnjë progres në rrugën e saj drejt Bashkimit Evropian. Ai argumentoi se strategjia e Beogradit për të mbajtur ekuilibër mes Perëndimit dhe Moskës nuk mund të rezistojë në planin afatgjatë.

Në analizën e tij, Stier e vuri Serbinë përballë Turqisë duke sqaruar se Ankaraja ka më shumë fleksibilitet për shkak të anëtarësimit në NATO, kurse Beogradi e ka hapësirën e manovrimit tejet të kufizuar sepse ekonomia e tij është e lidhur ngushtë me Evropën Perëndimore dhe shtetet fqinje. Prej më shumë se dy vjetësh, theksoi ai, asnjë kapitull negociatash nuk është as hapur e as mbyllur, çka reflekton mungesën e reformave thelbësore dhe orientimin gjeopolitik të zgjedhur nga autoritetet serbe.

Deputeti evropian vuri në shënjestër edhe qëndrimin e fuqive të mëdha perëndimore, duke veçuar Gjermaninë dhe Francën. Sipas tij, ish-kancelarja Angela Merkel, të cilën e përshkroi si lideren më me peshë të Evropës në shekullin XXI, mban përgjegjësi direkte për ngjitjen politike të Aleksandar Vuçiqit, dhe kjo ndodhi në periudhën kur Berlini po thellonte bashkëpunimin energjetik dhe tregtar me Rusinë përmes gazsjellësit “Nord Stream”.

Për sa u përket raporteve aktuale të presidentit francez Emmanuel Macron me Beogradin, Stier vlerësoi se Parisi synon të ruajë influencën e vet në Ballkan nëpërmjet partneriteteve në fushën ushtarake, ekonomike dhe politike. Megjithatë, ai shtoi se rivaliteti mes Berlinit, Parisit dhe Londrës për kontroll në rajon nuk do të thotë që Franca do të kërkojë rrugë të përshpejtuara për anëtarësimin e Serbisë në BE.

Pikë kyçe në deklaratat e tij mbetet çështja e Kosovës. Eurodeputeti kroat nënvizoi se integrimi evropian i Serbisë është i pamundur pa arritjen e një normalizimi të plotë të marrëdhënieve me Prishtinën. Ai sqaroi se Bashkimi Evropian nuk kërkon domosdoshmërisht njohje zyrtare, por një normalizim faktik që nënkupton respektimin e detyrimeve të dala nga Marrëveshja e Brukselit dhe ajo e Ohrit. Kjo do të thotë që pala serbe të mos pengojë anëtarësimin e Kosovës në organizma ndërkombëtarë, ndërkohë që Prishtina është e detyruar të krijojë Asociacionin e Komunave me Shumicë Serbe.

Stier e cilësoi politikën e deritanishme të BE-së si jofrytdhënëse, duke ia atribuar dështimin interesave individuale të disa vendeve anëtare në vend të një qasjeje të unifikuar. Ai bëri thirrje për një presion evropian më të sinkronizuar dhe më të vendosur ndaj Beogradit.

Në lidhje me procesin e zgjerimit, ai e identifikoi Malin e Zi si vendin me shanset më të mëdha për të mbyllur negociatat deri në vitin 2029, por paralajmëroi se prova më e madhe për Podgoricën do të jetë qëndresa ndaj influencës së “botës serbe”.

Duke e shtrirë analizën në rrafshin global, Stier vuri në dukje se SHBA-ja, qoftë nën administratën e Bidenit apo të Trumpit, nuk e konsideron më Rusinë si rrezikun kryesor botëror, pasi fokusi strategjik amerikan po zhvendoset drejt Kinës dhe hapësirës Indo-Paqësore. Rrjedhimisht, Uashingtoni pret që Evropa të marrë përsipër një barrë më të madhe për sigurinë e kontinentit të saj.

Eurodeputeti propozoi gjithashtu një model të integrimit gradual për vendet e Ballkanit Perëndimor, duke i përfshirë ato në politika të veçanta evropiane siç është eliminimi i tarifave të roamingut edhe para se të bëhen anëtare me të drejta të plota. Megjithatë, ai përsëriti se me qasjen aktuale të Beogradit, nuk sheh asnjë perspektivë për avancimin e Serbisë drejt Bashkimit Evropian.

The post Stier fajëson Merkelin për fuqizimin e Vuçiqit: Pa marrëveshje me Kosovën, Serbia nuk hyn në BE appeared first on Albeu.com.

Prokuroria e Qarkut në Split ka përfunduar ngritjen e aktakuzës për spiunazh ndaj shtetasit kroat J.I., ish-pilot ushtarak në Forcat Ajrore të Kroacisë, dhe partneres së tij shumëvjeçare, shtetases serbe nga Kosova A.M. Të dy u arrestuan në gusht të vitit të kaluar, nën dyshimet për përfshirje në veprimtari spiunazhi, raportoi Index.

Sipas aktakuzës, piloti, gjatë shërbimit në Forcat e Armatosura të Kroacisë, nga shkurti deri në dhjetor të vitit 2022, i ka dorëzuar në mënyrë të përsëritur partneres së tij informacione të klasifikuara. Këto të dhëna ai i kishte siguruar ose i ishin vënë në dispozicion gjatë ushtrimit të detyrës.

Prokuroria kroate pretendon se J.I. ishte në dijeni që A.M. po i grumbullonte informacionet për llogari të një shteti të huaj. Më pas, shtetasja serbe dyshohet se ua përcolli materialet e marra disa adresave jashtë vendit.

Një pjesë e dyshimeve ka të bëjë me informacionet për gjendjen në Kosovë. Gjatë kohës kur shërbente në KFOR, piloti kroat dyshohet se i transmetoi partneres së tij të dhëna për lëvizjet e trupave të KFOR-it. Sipas dyshimeve, ajo më pas ia dorëzoi këto informacione Listës Serbe.

Gjithashtu, ai dyshohet se i zbuloi asaj të dhëna të rëndësishme lidhur me lëvizjet e serbëve në veri të Kosovës, duke nisur nga fundi i vitit 2022. Informacionet, sipas aktakuzës, përfshinin edhe lëvizjet e trupave të KFOR-it dhe zhvillimet e përgjithshme në pjesën veriore të Kosovës.

Prokuroria e Qarkut në Split i ka kërkuar Gjykatës së Qarkut që ndaj të akuzuarës të vazhdojnë masat paraprake, për shkak të rrezikut se ajo mund të arratiset.

Ndërkaq, piloti ishte liruar nga paraburgimi në fund të tetorit të vitit të kaluar. Atij iu caktuan masa paraprake, përfshirë ndalimin e kontaktit me një prej dëshmitarëve, ndërsa për shkak të këtij rasti u shkarkua nga shërbimi ushtarak.

Me ngritjen e aktakuzës, hetimi konsiderohet i përfunduar dhe çështja kalon në një fazë të re të procedurës penale.

The post Aktakuzë për spiunazh ndaj pilotit kroat dhe partneres së tij serbe për informacionet mbi Kosovën appeared first on Albeu.com.

Ndryshe Kroacia, Shqipëria dhe Kosova nënshkruan deklaratën për forcimin e bashkëpunimit mbrojtës, kurse Serbia më pas njoftoi se do të kërkonte një shpjegim urgjent nga Ministritë e Jashtme të Kroacisë dhe Shqipërisë lidhur me dokumentin e nënshkruar.

Vëmendje e madhe dhe reagime të furishme në Serbi shkaktoi deklarata për forcimin e bashkëpunimit në mbrojtje, e cila u nënshkrua nga të tre vendet.

Ministri serb i Mbrojtjes, Bratislav Gashiq e quajti iniciativën “provokative”, ndërsa autoritetet në Beograd njoftuan se Serbia ishte e gatshme të shqyrtojë bashkëpunimin në mirëbesim me Kroacinë dhe Shqipërinë.

Siç ka thënë Ministria e Punëve të Jashtme të Serbisë, “kjo iniciativë e cila bëhet pa Serbinë, por me Prishtinën, paraqet një provokim të hapur dhe injorim të rëndë të realitetit në terren”.

Autoritetet serbe shtuan se presin një përgjigje urgjente nga Zagrebi dhe Tirana për qëllimet reale dhe qëllimet përfundimtare të kësaj “loje të rrezikshme ushtarako-sigurie”, duke theksuar se Serbia nuk do të lejojë asnjë veprim të njëanshëm që mund të kërcënojë integritetin e tyre territorial, sigurinë e qytetarëve dhe paqen në rajon.

Vuçiq më vonë deklaroi se nënshkrimi i kësaj marrëveshjeje ishte shkelje e të ashtuquajturës marrëveshje nënrajonale për kontrollin e armëve nga viti 1996, dhe se Kroacia dhe Shqipëria pothuajse me siguri nuk e informuan NATO-n për gjithçka.

“Ata hapën një garë armatimesh në rajonin tonë, është një situatë e vështirë për ne, por ne e kuptuam mesazhin e tyre. Dhe ne do ta ruajmë vendin tonë, do t’i pengojmë ata dhe gjithmonë do të mbrohemi me sukses kundër çdo agresori të mundshëm, qoftë edhe një agresori kaq të fuqishëm”, u tha Vuçiç gazetarëve serbë pas bisedimeve në NATO me Sekretarin e Përgjithshëm, Mark Rutte.

E sot iu përgjigj kryeministri kroat Plenkoviq.

“Shpresoj se dikush do të marrë pesë minuta për të lexuar tekstin e marrëveshjes ndërmjet Kroacisë, Shqipërisë dhe Kosovës”, tha Plenkoviq, duke shtuar se këto janë “marrëveshje të zakonshme” dhe se Kroacia nuk ka pasur qëllim armiqësor.

“Ne ishim në gjendje të krijonim një dokument që ndihmon përpjekjet e tyre për reforma. Ai nuk është i një natyre armiqësore. Unë e kuptoj se duhet kërkuar një armik, por kjo nuk është e natyrës armiqësore. Kroacia nuk ka nevojë të kërkojë leje për këtë, as Serbisë dhe as NATO-s”, tha Plenkoviq nga Brukseli.

I pyetur nga gazetarët për situatën në Ballkanin jugperëndimor, Plenkoviq njoftoi se do të përdorte seancën e Këshillit Evropian për të tërhequr vëmendjen për situatën aktuale në rajon.

“Ne duhet të monitorojmë stabilitetin e Bosnje-Hercegovinës dhe situatën në Serbi. Është koha që një pjesë e vëmendjes ta përqendrojmë në zonën që është dëshmuar si ndezëse vitet e fundit”, përfundoi kryeministri kroat

The post Kryeministri kroat i reagon Vuçiçit: Nuk kemi nevojë të marrim leje nga NATO e as Serbia, për bashkëpunim me Kosovën dhe Shqipërinë appeared first on Albeu.com.

Gazetari shkruan se protesta e fundit kundër qeverisë, është më e madhja në historinë e Serbisë, e cila mblodhi më shumë se 100,000 mijë njerëz. Ai thotë se madje, kjo protestë kishte më shumë njerëz se në përmbysjen e Sllobodan Millosheviçit.

Salvia thekson se kjo situatë ka frikësuar Vuçiç, por jo aq sa ta shkatërrojnë atë. Gazetari thotë se Vuçiç nuk do të bjerë, por do ta çmitizojnë atë. Sipas tij, në fakt vetë protestat nuk synojnë ta shkatërrojnë Vuçiç.

“Vucic nuk do të bjerë, por këto protesta do ta çmitizojnë. Që kur është bërë president, ai sillet si president, kryeminister dhe çdo ministër individualisht. Protestat jane nje shok per te, prandaj eshte i hutuar personalisht bashke me ata qe mendonin se ai ishte Zoti”, tha Salvia.

Gazetari shton më tej se protesta e studentëve nuk ka një lider dhe se nuk udhëhiqet nga opozita. Salvia thekson se studentët janë aq të zgjuar për të mos lejuar ndërhrjen e opozitës në protestat e tyre.

Megjithatë, Salvia thotë se këto protesta nuk do t’i kushojnë qeverisë, megjithëse Vuçiç po bën gabime të vazhdueshme për shkak se nuk i ka rrethanat në favor të tij.

“Nuk është njësoj si kur opozita organizonte protesta dhe pastaj terhiqej pas me pisllëk. Studentet nuk mund ta bëjë këtë. Ata nuk kanë liderë, kjo është shumë interesante, nuk besoj se është e qëllimshme, por dihet nga teoria guerile që më të fortët janë ata që nuk njohin udhëheqje dhe strukturë. Ata janë gjithashtu shumë të zgjuar për të lejuar që opozita t’i marrë ne patronazh”, theksoi Salvia.

Sipas gazetarit, Vuçiç këtë herë e ka të vështirë të reagojë ndaj këtyre protestave, pasi ky është një rebelim kulturor dhe jo politik. Sipas tij, sado të pakënaqur të jenë ndjekësit e presidentit, ata nuk dinë të bëjnë asgjë pa Vuçiç.

“Sado të pakënaqur të jenë ndjekësit e Vucicit, ata nuk dinë të bëjnë asgjë pa të. Këto protesta sigurisht që janë shumë të pakëndshme për presidentin serb. Ky është një rebelim kulturor, jo politik. Prandaj është kaq e vështirë për Vuçiqin qe të reagojë”, shpjegoi Salvia.

The post “Ka frikë për herë të parë!” Gazetari kroat: Vuçiç po shkon nga gabimi në gabim, megjithatë protestat nuk do ta prekin qeverinë appeared first on Albeu.com.

Tifozët shqiptarë dhe kroatë kanë pushtuar qytetin gjerman Hamburg, derisa atmosfera mes dy tifozërive është fantastike.

Në fakt bëhet fjalë për dy shtete mike dhe natyrisht se edhe tifozët po kalojnë momente të mira së bashku.

Mediumi kroat Index.hr ka biseduar me një familje, ku babai Karlo është kroat dhe nëna Arta është shqiptare.

Karla shtatë vjeçare dhe Noa 10 vjeç kanë parashikuar ndeshjen mes Kroacisë dhe Shqipërisë.

Karla na tha se mbështet Shqipërinë dhe na tha me buzëqeshje se Shqipëria do të fitojë. Por Karlo i mbështet të dyja skuadrat, ndaj ai u përgjigj diplomatikisht se rezultati do të ishte barazim (2:2).

Meqë ra fjala, familja jeton prej 10 vitesh në Frankfurt, por pas një muaji do të shpërngulen në Kroaci.

The post VIDEO/ Babai i tyre është kroat, dhe nëna shqiptare: Karla dhe Noah parashikojnë rezultatin e ndeshjes appeared first on Albeu.com.

Zeljko Badza, që tani është në moshën 63-vjeçare akuzohet për krime lufte dhe vrasjen e shtatë civilëve në territorin kroat të pushtuar nga rebelët serbë në vitin 1991. Pikërisht një nga ato viktima ka qenë edhe gjyshi i yllit të Real Madrid.

Vetë Modric nuk ka folur për këtë aktakuzë. Por në të kaluarën, fituesi i “Topit të Artë” në vitin 2018 ka treguar se sa shumë ka ndikuar vdekja e gjyshit.

“Isha shumë i lidhur emocionalisht me gjyshin tim. Unë trashëgova emrin e tij. Nuk është e lehtë kur i ndodh një të riu një fatkeqësi e tillë, nuk mund ta kuptosh”, ka thënë Modric asokohe. /newsport.al/

The post Vrasja e gjyshit të Luka Modric, ish-ushtari serb paditet nga shteti kroat appeared first on Albeu.com.