Tre ditë pasi lideri i Lëvizjes Vetëvendosje, Albin Kurti, dhe kryetari i Lidhjes Demokratike të Kosovës, Lumir Abdixhiku, arritën një marrëveshje për të mbështetur kandidaturën e Bekim Sejdiut për president, situata ka pësuar një kthesë të papritur. Gjashtë deputetë të LDK-së kanë shprehur kundërshtinë e tyre ndaj marrëveshjes, duke e bërë të pamundur sigurimin e 80 deputetëve të nevojshëm për të zhvilluar votimin në Kuvend. Pavarësisht kësaj, kryeministri në detyrë, Albin Kurti, mbetet i bindur se marrëveshja politike me LDK-në për zgjedhjen e kreut të shtetit ende nuk ka rënë. Ai mendon se bisedimet do të vijojnë, ndonëse vetë Lumir Abdixhiku e ka paralajmëruar se me këtë përçarje të brendshme, vendi po shkon drejt zgjedhjeve të reja.

Kurti: Optimizmi nuk ka humbur

Albin Kurti u shpreh se është informuar nga kryetari i LDK-së për gjendjen brenda partisë së tij dhe se ai vetë e ka vënë në dijeni Abdixhikun për diskutimet në grupin parlamentar të VV-së. Sipas Kurtit, duhet një takim i ri i Kryesisë për të vlerësuar alternativat e mbetura. “Vazhdojmë të jemi optimistë, ndonëse situata është më e vështirë se më parë”, theksoi ai, duke fajësuar gjashtë deputetët e LDK-së se synojnë që vendi të shkojë sërish në zgjedhje.

Për çështjen e presidentit, Kurti gëzon edhe mbështetjen e pakicave joserbe, me përfaqësuesit e të cilave pati një takim në mbrëmjen e së mërkurës. Ai bëri të ditur se në mbledhje ishin dhjetë persona, pesë anëtarë të qeverisë dhe pesë përfaqësues në legjislaturën e ardhshme. Grupi përbëhej nga dy boshnjakë, dy turq, dy egjiptianë dhe nga një serb, ashkali e rom. Kurti i falënderoi për ndihmesën e tyre dhe shtoi se do të përpiqen bashkërisht të shmangin zgjedhjet, tashmë që ekziston një marrëveshje. Megjithatë, ai pranoi se “situata politike është bërë më e vështirë”, veçanërisht pas zhvillimeve të fundit në LDK.

Ndërkaq, Lumir Abdixhiku e ka cilësuar të pabazuar argumentimin e gjashtë deputetëve “rebelë” se nuk duan t’i zgjasin jetën pushtetit të Albin Kurtit.

Abdixhiku kritikon gjashtë deputetët

Në një reagim të tij, Abdixhiku shkroi se një ditë më parë nuk u hodh poshtë asnjë marrëveshje qeverisëse me VV-në, sepse një gjë e tillë nuk ka ekzistuar fare. Ai kujtoi se LDK-ja kishte vendosur të mbetej në opozitë dhe të gjithë deputetët e saj e kishin miratuar këtë qëndrim. “Për çfarë po rrahin gjoks? Çfarë paskan shpëtuar?” pyeti Abdixhiku, duke shtuar se ajo që u refuzua në të vërtetë ishte zgjidhja e çështjes së presidentit të Kosovës dhe votimi i kandidatit të propozuar nga vetë LDK-ja. Sipas tij, ky refuzim vulosi fatin e vendit: zgjedhje të reja.

Dy partitë e tjera shqiptare, Partia Demokratike e Kosovës dhe Aleanca, kanë refuzuar të përfshihen në bisedimet për presidentin, duke deklaruar se preferojnë të qëndrojnë në opozitë.

Analisti Blerim Burjani, duke analizuar paqëndrueshmërinë e marrëveshjes VV-LDK për kreun e shtetit, vlerësoi se nëse një marrëveshje shmang vetëm përkohësisht bllokadën, por gjeneron një raport të pabarabartë politik, ajo mund të jetë një zgjidhje teknike, por jo demokratike. Sipas Burjanit, problemi qëndron në mënyrën se si partitë e trajtojnë shtetin si pronë të tyre për të zgjidhur krizat politike, gjë që dobëson autonominë e institucioneve dhe minon besimin e qytetarëve. Ai theksoi se Kosova nuk ka nevojë për kuazi-zgjidhje, por për një marrëveshje politike që respekton Kushtetutën, institucionet dhe vullnetin e popullit, përndryshe kriza nuk zgjidhet, por thjesht shtyhet për një ditë tjetër.

Vetëm 74 vota të siguruara

Deri në këtë moment, nga 120 ulëset në Parlamentin e Kosovës, vetëm 74 vota janë të siguruara për zgjedhjen e Bekim Sejdiut në postin e presidentit. Janë të domosdoshme të paktën 80 vota, çka tregon se numri aktual nuk i shmang dot zgjedhjet e reja të jashtëzakonshme. Marrëveshja e tre ditëve më parë midis Vetëvendosjes dhe LDK-së për presidentin dukej se kishte hapur rrugën për konstituimin e Kuvendit dhe formimin e Qeverisë, por tani perspektiva mbetet e paqartë.

Nuk dihet ende se kur do të thirret seanca për konstituimin e Parlamentit, e cila më pas do të mundësonte zgjedhjen e qeverisë së re dhe tentimin për të zgjedhur presidentin. Për vetë zgjedhjen e kreut të shtetit mjaftojnë 61 vota, por prania në sallë e minimalisht 80 deputetëve është kusht i domosdoshëm që procesi të konsiderohet legjitim.

Kjo është hera e dytë gjatë këtij viti dhe e treta në më pak se dy vjet që Kosova provon të krijojë institucione të qëndrueshme pas zgjedhjeve parlamentare. Zgjedhjet e jashtëzakonshme të 8 qershorit u zhvilluan pikërisht sepse Kuvendi u shpërnda pasi nuk arriti të zgjidhte presidentin e ri. Ky cikël zgjedhjesh mund të përsëritet nëse, brenda 60 ditëve pas konstituimit të Kuvendit, nuk zgjidhet presidenti i ri i Kosovës.

The post Kriza e marrëveshjes për presidentin, përçarje brenda LDK-së appeared first on Albeu.com.

Përpjekjet për krijimin e institucioneve të reja kanë hasur në refuzimet e para të qarta. Ndryshe nga Lidhja Demokratike, Partia Demokratike e Kosovës nuk e ka pranuar ftesën e kryeministrit në detyrë, Albin Kurti, ndërsa një takim i ngjashëm nuk është zhvilluar as me Aleancën.

PDK-ja e konfirmoi qëndrimin e saj përmes një letre zyrtare, duke argumentuar se dallimet e thella konceptuale dhe programore e përcaktojnë pozicionimin e saj në opozitë. Kjo parti bëri të ditur se përgjegjësitë opozitare do t’i ushtrojë në Kuvendin e Republikës së Kosovës.

Lidhur me moskonstituimin e Kuvendit ka reaguar edhe deputeti Burim Ramadani. Ai shkroi se procesi po mbetet i bllokuar për shkak se Vetëvendosje nuk i ka 61 vota të nevojshme.

Përgjegjësinë për situatën politike, e cila po zgjat prej gati 2 vjetësh, njohësit e zhvillimeve politike ia adresojnë të gjithë spektrit partiak. Adrian Zeqiri e cilësoi këtë gjendje si dëshmi të mungesës së plotë të kulturës politike, duke theksuar se pasojat po i bart populli, i cili ndodhet në bllokadë prej gati dy vitesh.

Qëndrimet e pandryshuara të subjekteve politike, sipas analistëve, lënë shumë pak hapësirë për një marrëveshje të shpejtë rreth postit të presidentit. Ekspertët vlerësojnë se pozicionet e forta të opozitës dhe të partnerëve të mundshëm të koalicionit mund ta fusin Kosovën në një tjetër bllokadë politike të gjatë.

Afrim Kasolli tha se kërkesat e Aleancës për Ardhmërinë e Kosovës nuk dallojnë nga ato të Lidhjes Demokratike të Kosovës. Sipas tij, Aleanca po i ofron Lëvizjes Vetëvendosje vota blanko pa kërkuar asnjë post ministror, ndërsa ai është i bindur se LDK-ja do të paraqesë kërkesa të tilla dhe, njëkohësisht, do të synojë pozita politike në ndarjen e pushtetit.

Kasolli vlerësoi se bëhet fjalë për dinamika shumë më të gjera ndërmjet këtyre dy subjekteve politike, të cilat nuk pritet të kapërcehen lehtë dhe për këtë arsye ofrojnë pak shpresë për zgjidhje.

Nëse partitë vazhdojnë të mos tërhiqen nga pozicionet fillestare, analistët paralajmërojnë se mundësia e vetme që mbetet është një skenar i padëshiruar nga të gjithë: zhvillimi i një cikli tjetër zgjedhjesh të parakohshme.

Mungesa e institucioneve tashmë i ka kushtuar Kosovës dhjetëra miliona euro nga fondet e Bashkimit Evropian. Krahas kësaj humbjeje, paralajmërohen pasoja edhe për zhvillimin ekonomik të vendit dhe për pozitën e Kosovës në arenën ndërkombëtare.

The post Bllokada politike vijon, analistët shohin rrezik për zgjedhje të parakohshme appeared first on Albeu.com.

Analisti politik Blerim Burjani ka shprehur kritika ndaj mënyrës se si po vepron Lidhja Demokratike e Kosovës (LDK). Ai vlerëson se kjo parti po merret më shumë me zhvillimet e saj të brendshme sesa me konstituimin e institucioneve shtetërore, përcjell “Bota sot”.

Sipas Burjanit, përparësia që LDK-ja po i jep zgjedhjes së kryetarit, në vend të krijimit të institucioneve të shtetit, tregon se ajo nuk po sillet si parti shtetformuese. Ai paralajmëron se kriza politike brenda saj do të vazhdonte edhe në rast se Lumir Abdixhiku do të shkarkohej.

Burjani pohon se në radhët e LDK-së nuk gjendet një figurë politike me cilësitë e domosdoshme për të drejtuar njëkohësisht partinë dhe shtetin. Sipas tij, partia mund të organizojë zgjedhje të brendshme, por një proces i tillë nuk garanton se do të gjendet zgjidhja për problemet me të cilat ajo përballet.

The post Burjani: Edhe largimi i Lumir Abdixhikut nuk do ta zgjidhte krizën në LDK appeared first on Albeu.com.

Në një deklaratë për “Bota sot”, veprimtari shqiptar në SHBA, Agim Aliçkaj, u shpreh se votimi i 7 qershorit e ka konfirmuar për herë të tretë radhazi fituesin dhe legjitimitetin e qeverisjes së LVV-së bashkë me partnerët e saj.

Sipas tij, opozita doli humbëse dhe mori më pak vota sesa koalicioni fitues, ndërsa çdo tentativë për të ardhur në pushtet me ndihmën e Listës Serbe do të ishte, në vlerësimin e tij, e dëmshme për interesat shtetërore.

“Zgjedhjet e panevojshme të 7 qershorit, të shkaktuara nga opozita e Kosovës, u zhvilluan me sukses. Rezultatet zgjedhore e konfirmuan për të tretën herë me radhë vullnetin e popullit të Kosovës që Kryeministri Albin Kurti dhe koalicioni i tij LVV, Guxo, Alternativa dhe PSHDK të udhëheqin Kosovën edhe për një mandat të plotë. Ata janë fituesit e vërtetë dhe nuk ka tjetër.

Humbësit e vërtetë janë PDK-ja, LDK-ja dhe AAK-ja, të cilat së bashku kanë më pak vota se LVV-ja me koalicionin e saj. U shuan edhe shpresat e disa politikanëve të lajthitur të opozitës për ta marrë pushtetin me ndihmën e organizatës armiqësore Lista Srpska. Populli u bëri favor, sepse një gjë e tillë do të ishte tradhti ndaj interesave shtetërore dhe kombëtare”, ka thënë ai.

Aliçkaj ka vlerësuar më tej se ngritja e institucioneve të reja mund të zhvillohet pa vështirësi, por ka ngritur shqetësimin se pengesa mund të shfaqet sërish te procesi i zgjedhjes së Presidentit.

“Bazuar në numrin e deputetëve, pritet që konstituimi i Parlamentit dhe i Qeverisë të realizohet pa problem nga fituesi i zgjedhjeve, së bashku me minoritetet, përveç Listës Serbe. Megjithatë, çështja mund të ngecë përsëri te zgjedhja e Presidentit, për të cilin, bazuar në një vendim të gabuar të Gjykatës Kushtetuese, kërkohet që edhe në raundin e tretë të votimit të jenë të pranishëm në sallë 80 deputetë. Kjo krijon mundësinë e një bllokimi të pafund të shtetit nga humbësit e zgjedhjeve.

Kryeministri Kurti deklaroi pas zgjedhjeve se është i gatshëm për bashkëpunim me partitë opozitare, gjë që është një fillim i mirë. Duke qenë se, si fitues, ndodhet në një pozitë më të favorshme se të tjerët, do të ishte mirë që ai të ndërmarrë edhe hapa shtesë për afrimin me opozitën në interes të shtetit, sidomos për çështjen e zgjedhjes së Presidentit.

Edhe pse ai është viktima kryesore e sulmeve të ulëta politike, një kërkesë publike nga ana e tij, drejtuar të gjithëve për ndalimin e retorikës nënçmuese, shpifjeve, linçimeve dhe ofendimeve ndaj kundërshtarëve politikë, do t’ia shtonte edhe më shumë autoritetin në popull”, ka theksuar ai.

Sipas Aliçkajt, mesazhi kryesor që opozita duhet të marrë nga këto zgjedhje është se vullneti i qytetarëve duhet respektuar, ndërsa çdo bllokadë që ai e cilëson si të dëmshme do të marrë ndëshkim nga vota e popullit.

“Mësimi kryesor nga këto zgjedhje për opozitën ishte i qartë, nëse ajo ka veshë për të dëgjuar, sy për të parë dhe mendje për të kuptuar: mos luani me vullnetin e popullit, sepse populli ju ndëshkon. Nëse vazhdoni me bllokada të dëmshme dhe të pakuptimta, kurrë nuk do ta merrni pushtetin nga populli.

Mjerisht, deklaratat e disa përfaqësuesve të partive humbëse pas zgjedhjeve nuk janë shumë inkurajuese. Ato janë të përqendruara në fajësimin e të tjerëve për humbjen e merituar. Pretendimet se populli shumicë dhe mërgata shembullore e Kosovës janë të paedukuar dhe të mashtruar, duke u bërë kështu fajtorë për humbjen e tyre, janë të gabuara, të padrejta dhe të mjera. Në realitet, ata po mashtrojnë vetveten.

Ata duhet ta kuptojnë më në fund se vetëm populli i Kosovës mund të vendosë për fatin e tyre politik. Shpresat e tyre se për ta mundur Kurtin do t’i ndihmonin ish-ambasadori endacak amerikan, lobisti serb Grenell, kryeministri në largim i Shqipërisë, Edi Rama, dhe ish-presidentja e disorientuar Vjosa Osmani, dolën të kota”, ka shtuar ai.

Veprimtari nga SHBA ka kundërshtuar edhe narrativat që, sipas tij, synojnë ta paraqesin kryeministrin Kurti si problematik në raport me ndërkombëtarët dhe çështjet strategjike, duke i quajtur ato të pabazuara.

Ai është ndalur edhe te çështja e Presidentit, duke theksuar se zgjedhja e tij duhet të shihet si përgjegjësi e përbashkët e subjekteve politike dhe jo si instrument për bllokim institucional.

“Tentimet e tyre për ta portretizuar Kurtin si anti-amerikan janë po ashtu të kota dhe pa kurrfarë baze. Paraqitja e pranimit të investimit në “gazin amerikan” si kusht për zgjedhjen e Presidentit është një përpjekje e mjerë për ta arsyetuar vazhdimin e bllokadave. Investimet duhet të bazohen në interes ekonomik dhe jo në dashurinë për Amerikën.

Gjetja e një kandidati të përshtatshëm për President të Kosovës është detyrë e të gjitha partive politike dhe nuk guxon të përdoret më për bllokimin e funksionimit të shtetit nga askush. Kosovës i duhet një President unifikues, që nuk i takon asnjë partie, i aftë, i edukuar dhe përfaqësues dinjitoz në nivelet ndërkombëtare. Propozimi i tre kandidatëve nga opozita dhe votimi i njërit prej tyre nga shumica parlamentare paraqet një kompromis real”, ka vlerësuar ai.

Në fund, Aliçkaj i ka bërë thirrje opozitës që të heqë dorë nga qasja bllokuese dhe të marrë një rol më konstruktiv në jetën politike të vendit.

“Është koha e fundit që opozita të largohet nga bllokadat, të bëhet opozitë konstruktive dhe ta lejojë fituesin të udhëheqë me shtetin. Pastaj të përgatitet për zgjedhjet e rregullta duke ofruar propozime konkrete për zhvillimin e shtetit, të deklarohet kundër korrupsionit të vet nga e kaluara, kundër asociacionit serb dhe kërkesave për ndarjen e Kosovës, kundër Listës Serbe si organizatë terroriste, të kërkojë dënimin e kriminelëve serbë dhe të pushojë me servilizmin ndaj të huajve.

Nëse duan ta fitojnë votën e popullit për pushtet, duhet ta bindin popullin e Kosovës se kanë ndryshuar dhe se janë bërë më të mirë se Kryeministri Kurti. Nuk ka rrugë tjetër. Nëse vazhdojnë me bllokada dhe bojkote, do të përfundojnë në murin e turpit të historisë së Kosovës. Populli i mençur dhe i ndritur i Kosovës nuk frikësohet dhe nuk mund të mashtrohet”, ka përfunduar Aliçkaj për “Bota sot”.

The post Agim Aliçkaj nga SHBA paralajmëron: Ngecja mund të rikthehet te votimi për Presidentin appeared first on Albeu.com.