Ministria e Punëve të Brendshme e Maqedonisë së Veriut bëri të ditur se, sipas të dhënave që disponon, niveli i kriminalitetit në vend ka arritur pikën më të ulët në 20 vitet e fundit, ndërsa gjatë dy viteve të fundit kriminaliteti i përgjithshëm është ulur me 30 për qind.

Sipas njoftimit, është përmirësuar edhe efikasiteti në zbulimin e veprave penale dhe të autorëve të tyre, duke arritur në 69 për qind. MPB thekson se në këtë periudhë janë goditur më shumë se 30 grupe të organizuara kriminale, ndërsa numri i grupeve të zbuluara që lidhen me korrupsionin është rritur me 50 për qind.

Në luftën kundër trafikimit të drogës, sipas MPB-së, janë zbuluar mbi 1.600 vepra penale, janë kallëzuar rreth 1.900 persona, janë sekuestruar 6,2 tonë lëndë narkotike dhe janë parandaluar nëntë transporte ndërkombëtare të marihuanës dhe kokainës. Po ashtu, sekuestrimet e kokainës janë rritur për më shumë se 300 për qind.

Ministria thekson gjithashtu se kriminaliteti pasuror ka shënuar rënie me më shumë se 30 për qind, ndërsa grabitjet dhe vjedhjet me dhunë janë ulur për mbi 40 për qind.

“Këta nuk janë vetëm tregues statistikorë. Pas çdo shifre qëndron një vepër penale e parandaluar, një rrjet kriminal i shkatërruar, një jetë e shpëtuar, pronë e mbrojtur dhe siguri më e madhe për qytetarët”, thuhet në njoftimin e Ministrisë së Punëve të Brendshme.

The post MPB: Në Maqedoninë e Veriut kriminaliteti ka rënë me 30%, shënohet niveli më i ulët në dy dekadat e fundit appeared first on Albeu.com.