Kryetari i LDK-së, Lumir Abdixhiku, deklaroi pas takimit me kreun e Lëvizjes Vetëvendosje, Albin Kurti, se është shënuar përparim në bisedimet për presidentin e vendit.

Sipas Abdixhikut, gjatë takimit të sotëm janë shqyrtuar kandidatura konkrete, ndërsa shumica e emrave të propozuar përputhen me parimet për të cilat palët ishin pajtuar më herët.

“Kalimi i diskutimit te emrat përbën një hap përpara. Megjithatë, për shkak të ndjeshmërisë së këtij procesi, nuk mund të flas për kandidatura konkrete. Takimet do të vazhdojnë”, tha Abdixhiku.

Ai theksoi gjithashtu se LDK-ja i përcakton qëndrimet në mënyrë të pavarur dhe nuk është “vagon” i ndonjë force tjetër politike.

“LDK-ja i përket LDK-së dhe nuk është vagon i asnjë partie tjetër”, deklaroi Abdixhiku.

The post Abdixhiku pas takimit me Kurtin: Diskutimet për presidentin kanë avancuar, LDK-ja nuk është “vagon” i askujt appeared first on Albeu.com.