Megjithatë, zyrtarët kanë thënë se numri mund të jetë rritur për shkak të vonesave në raportime në kohën e Krishtlindjes. Franca ndërkohë ka bërë të ditur shifrën më të lartë të të infektuarve në Evropë në periudhë 24-orëshe.

Autoritetet franceze kanë regjistruar 179,807 infektime të reja të martën, derisa ministri francez i Shëndetësisë, Olivier Veran, ka paralajmëruar se “gjithçka tregon” se Franca mund të përballet me mbi 250,000 të infektuar brenda ditës në fillim të muajit janar.

Sipas tij, javët më të vështira “nuk kanë ardhur ende”.

Kryeministri francez, Jean Castex ka bërë të ditura kufizimet e reja më herët gjatë javës, duke përfshirë të paktën tri ditë të punës nga shtëpitë – për ata që munden – që nga janari.  Italia, Greqia, Portugalia dhe Anglia kanë raportuar po ashtu shifra rekorde të infektimit të martën.

Ky lajm vjen teksa Organizata Botërore e Shëndetësisë (OBSH) ka paralajmëruar se rreziku nga varianti Omicron “mbetet shumë i lartë”. Sipas të dhënave të publikuara të martën, numri i rasteve të reja me koronavirus është rritur për 57 për qind në Evropë këtë javë, dhe 30 për qind në kontinentin amerikan.

Studimet kanë sugjeruar se varianti Omicron është më i butë sesa Delta, pasi ka 30 deri në 70 për qind më pak mundësi që njerëzit të përfundojnë nëpër spitale. Mirëpo numri i madh i personave të infektuar rrit shqetësimet se spitalet mund të stërngarkohen me pacientë.

Sipas të dhënave të CDC-së, mesatarja shtatëditore e personave të infektuar në SHBA është në nivelet më të larta ndonjëherë. Megjithatë, zyrtarët kanë thënë se 59 për qind e rasteve besohet se janë të lidhura me variantin Omicron dhe jo 73 për qind sa ishte raportuar më parë.

Eksperti për politika mjekësore, Scott Gottlieb, ka thënë se vlerësimet e reja sugjerojnë se “një pjesë e madhe e hospitalizimeve” janë të nxitura ende nga varianti Delta.

Përveç Francës, edhe shtete tjera evropiane kanë regjistruar shifra rekorde të infektimit të martën: Numri i të infektuarve në Itali ka arritur në 78,000, duke regjistruar rekord prej shpërthimit të pandemisë. Ky vend ka regjistruar edhe 202 viktima, duke e çuar totalin në 136,753.

Portugalia ka regjistruar 17,172 raste të reja

Ministri grek i Shëndetësisë, Thanos Plevris ka bërë thirrje për qetësi pasi ky shtet ka regjistruar 21,657 raste të reja

Qiproja po ashtu ka regjistruar rekord ditor me 2,241 raste

Në Angli, autoritetet shëndetësore kanë regjistruar 117,093 raste të reja. Për shkak të situatës epidemiologjike, qytetet si Parisi, Londra dhe Berlini kanë anuluar festimet për Vitin e Ri, ndonëse disa qeveri kanë pasur më pak gatishmëri për të vendosur kufizime në këtë periudhë.

Zyrtarët në kryeqytetin spanjoll, Madrid kanë thënë se do të festojnë me njerëzit në Sheshin Puerta del Sol. Italia, në anën tjetër, ka ndaluar mbajtjen e organizimeve të jashtme dhe ka mbyllur klubet e natës, mirëpo nuk ka vendosur kufizime në organizime private. /REL/

The post Perëndimi regjistron rekord të rasteve me koronavirus appeared first on Albeu.com.

Filipçe në deklaratën e tij nënvizoi edhe gjendjen epidemiologjike në Tetovë, ku theksoi se për momentin në këtë spital nga Kovid 19 po kurohen 90 pacient, kundrejt 120 sa ishin më parë.

“Të mërkurën përfundon rekomandimi për mësim online në Strugë dhe Kërçovë, mbetet edhe një javë për Tetovën dhe Gostivarin. Do të mbahet një mbledhje e Komisionit për Sëmundje Infektive (KSI) ku do të vendoset nëse ka nevojë për vazhdimin e kësaj mase. Por është me rëndësi që të theksohet se ulja e numrit të të infektuarve po shënon rënie. Dje kishim diku 490 raste që do të thotë, nën 500″.

“Po ulet edhe numri i kontrolleve nëpër spitale. Një nga indikatorët më të mëdhenj janë kontrollet në Klinikën Infektive. Nuk kemi numër të madh të pacientëve të hospitalizuar as në Spitalin e Tetovës, momentalisht kemi 90 pacientë përkundër 120 sa ishin më herët. Ashtu që të gjitha këto parametra flasin se situata po përmirësohet dhe këto janë shenja të mira”, tha Filipçe.

The post Filipçe: Situata me koronavirusin po përmirësohet appeared first on Albeu.com.

Drejtori i Përgjithshëm i OBSH-së Tedros Adhanom Ghebreyesus tha se garantimi i qasjes tek të dhënat e papërpunuara ishte një sfidë për ekipin ndërkombëtar që udhëtoi në Kinë në fillim të këtij viti për të hetuar origjinën e COVID-19-s. Rastet e para të infektimit tek njerëzit u identifikuan në qytetin kinez të Wuhanit.

Zoti Tedros u tha gazetarëve se agjencia e OKB-së me qendër në Gjenevë “po kërkon që Kina të jetë transparente e hapur dhe të bashkëpunojë veçanërisht mbi të dhënat e papërpunuara”, që siç ai tha “organizata i kërkoi që në ditët e para të pandemisë”.

Kreu i OBSH-së tha se kishte pasur një “nxitje të parakohshme” për të përjashtuar teorinë se virusi mund të kishte shpëtuar nga një laborator i qeverisë kineze në Wuhan, duke minuar raportin e vetë OBSH-së së muajit mars, i cili arriti në përfundimin se një rrjedhje laboratorike ishte “jashtëzakonisht e pamundur”.

“Unë kam qenë vetë teknik laboratori, kam punuar në laborator dhe aksidente laboratorike ndodhin” tha zoti Tedros. “Është e zakonshme”, shtoi ai.

Në muajt e fundit, teoria se pandemia mund të ketë nisur në një farë mënyre në laborator, e që ndoshta përfshinte edhe një virus të modifikuar, po merr mbështetje, veçanërisht pasi në muajin maj Presidenti Joe Biden urdhëroi zbulimin amerikan për shqyrtimin edhe të kësaj mundësie.

Kina është kundërpërgjigjur në mënyrë agresive, duke argumentuar se përpjekjet për të lidhur origjinën e COVID-19-s me rrjedhjen nga laboratori janë të motivuara politikisht dhe ka sugjeruar se shpërthimi i virusit mund të ketë nisur jashtë territorit te saj. Në takimin vjetor të ministrave të shëndetësisë të vendeve anëtare të OBSH-së në pranverë, Kina tha se kërkimet e ardhshme mbi origjinën e COVID-19-s, duhet të vazhdojnë në vende të tjera.

Shumica e shkencëtarëve dyshojnë se koronavirusi e ka origjinën tek lakuriqët e natës, por nuk dihet me saktësi se si ai kaloi tek njerëzit, nëse kjo ndodhi përmes një kafshe ndërmjetëse ose në ndonjë tjetër mënyrë. Zakonisht duhen dekada për ngushtuar numrin e burimeve natyrore të mundshme të një virusi që vjen nga kafshët, si në rastin e Ebolës apo SARS-it.

Zoti Tedros tha se “shqyrtimi i asaj që ndodhi, veçanërisht në laboratorët tanë, është i rëndësishëm” për të përcaktuar nëse pandemia kishte ndonjë lidhje me laboratorin.

“Ne kemi nevojë për informacion të drejtpërdrejtë mbi atë se si ishte gjendja e këtij laboratori para dhe në fillim të pandemisë”, tha shefi i OBSH-së, duke shtuar se bashkëpunimi i Kinës ishte jetësor. “Nëse marrim informacion të plotë, mund ta përjashtojmë lidhjen me laboratorin”, tha ai.

Gjatë gjithë pandemisë zoti Tedros e ka vlerësuar vazhdimisht Kinën për shpejtësinë dhe transparencën e saj, pavarësisht ankesave të zyrtarëve të lartë të OBSH-së mbi paqartësitë e ofruara nga homologët e tyre kinezë.

Vitin e kaluar, Associated Press zbuloi se OBSH-ja ishte zhgënjyer nga mungesa e detajeve nga ana e autoriteteve kineze gjatë fazave të hershme të përhapjes së koronavirusit dhe tregoi se Kina po merrte masa për ta mbyllur çështjen e origjinës së pandemisë.

Ekspertë të shumtë të shëndetit publik kanë bërë thirrje gjithashtu për një shqyrtim të pavarur të origjinës së COVID-19-s, duke argumentuar se OBSH-ja nuk ka pushtet politik për të kryer një analizë të tillë mjeko-ligjore dhe se agjencia e OKB ka dështuar pas më shumë se një viti të nxjerrë detaje vendimtare nga Kina.

Jamie Metzl, i cili ka udhëhequr një grup shkencëtarësh që bëjnë thirrje për një hetim më të gjerë të origjinës së pandemisë, i mirëpriti komentet e zoti Tedros, por tha se ishte “thellësisht për të ardhur keq dhe e rrezikshme” që nuk kishte plane aktuale për një hetim të udhëhequr nga ekspertë përtej kësaj agjencie të OKB, duke thënë se Kina ka bllokuar në mënyrë të përsëritur kërkesat për të gjitha të dhënat e duhura dhe mostrat përkatëse.

Profesori i Drejtës në Universitetin Georgetown Lawrence Gostin, një ekspert i ligjin të shëndetit publik, tha se justifikimi i pazakontë i zotit Tedros për bashkëpunimin kinez, nënvizon se sa e dobët është OBSH-ja.

“OBSH-ja nuk ka kompetenca apo peshë politik për të kërkuar qasje tek informacioni jetik për shëndetin global”, tha ai.

The post Shefi i OBSH-së: E përjashtuam para kohe teorinë se koronavirusi mund të ketë rrjedhur nga laboratori appeared first on Albeu.com.