Në një bisedë në studion e ABC Live me gazetaren Sibora Bitrin, gazetari i SCAN TV Roel Korkuti, i cili ka kryer vëzhgimin theksoi që më e rëndësishme se kosto ekonomike, është kosto e shëndetit, por gjithsesi janë domethënëse shumat e mëdha që shqiptarët harxhojnë për të konsumuar duhan.

Kështu sipas përllogaritjeve ekonomike shqiptarët konsumojnë rreth 249 milionë paketa në vit, ose shpenzojnë 200 mijë euro në ditë për konsum cigareje. Nga ana shëndetësore, vetë Organizata Botërore e Shëndetësisë ka llogaritur që një fije cigare shkurton jetën me 11 minuta, dhe në rastin e Shqipërisë janë 95 mijë vite jetë të humbura në një vit.

Megjithëse edhe për shkak të kulturës, janë meshkujt ata që shpenzojnë më shumë për duhan, është rreth 35përqind e popullsisë adulte e cila konsumon rregullisht duhanin ndërkohë që mesatarja kudo nëpër botë është 12 përqind.

Sipas gazetarit Korkuti, Shqipëria është ndër vendet e para që konsumojnë më shumë duhan, dhe është gjithashtu ndër vendet e para në rajonin e Ballkanit. Për të dekurajuar këtë trend, duhet të rritet akciza e duhanit, të rritet çmimi në mënyrë që të konsumohet më pak.

Gjithsesi gazetari Korkuti theksoi që ‘perceptimi jonë në përditshmërinë tonë, aspekti ekonomik, është i dytë i treti apo i katërti, duhet të shkosh te mjeku, apo të kesh probleme shëndetësore, që ti themi jo duhanit’.

The post Shqiptarët “djegin” 200 mijë euro në ditë për konsum duhani appeared first on Albeu.com.