Hapja e zyrave konsullore në Bujanoc dhe Shkodër është pjesë e një dakordësie parimore të arritur mes Shqipërisë dhe Serbisë për shtimin e pranisë diplomatike në të dyja vendet. Njoftimi u dha nga ministri i Jashtëm serb, Marko Gjuriç, duke nxitur menjëherë reagime në opinionin publik dhe në politikën shqiptare.

Gjatë një interviste për Radio Beogradin, Gjuriç deklaroi se kjo mirëkuptim ishte arritur në takimet me ministrin e ri të Jashtëm të Shqipërisë, Ferit Hoxha. Ai u shpreh i kënaqur me bisedimet dhe tha se palët kishin rënë dakord në parim për ngritjen e zyrave konsullore në Shkodër dhe Bujanoc, ndërsa nga Tirana ende nuk ishte bërë publik ndonjë njoftim zyrtar.

Ministria për Evropën dhe Punët e Jashtme e Shqipërisë dha një version më të rezervuar, duke sqaruar se diskutimet vazhdojnë dhe se ende nuk është arritur marrëveshja përfundimtare. Ferit Hoxha theksoi se procesi po zhvillohet duke u mbështetur në reciprocitet dhe kujtoi se Shqipëria ishte pala që kishte kërkuar fillimisht hapjen e një konsullate të përgjithshme në Luginën e Preshevës.

Në reagimin e tij, Hoxha e përkufizoi reciprocitetin si një parim bazë të raporteve ndërshtetërore dhe si mjet të politikës së jashtme për çuarjen përpara të interesave kombëtare. Sipas tij, ky parim nuk do të thotë domosdoshmërisht që palët të kenë përmbajtje, synime apo interesa të njëjta.

Ministri shqiptar shtoi se procedurat e nevojshme institucionale do të nisin sapo të arrihet mirëkuptimi përfundimtar. Ai vlerësoi gjithashtu se prania konsullore e Shqipërisë në Luginën e Preshevës është vonuar.

Analisti shqiptar nga Presheva, Refik Hasani, e konsideron të dëmshme nismën për hapjen e një konsullate serbe në Shkodër. Sipas tij, një përfaqësi e tillë nuk është e nevojshme, veçanërisht duke pasur parasysh rolin dhe synimet historike të Serbisë për pushtimin e Shkodrës.

Në një prononcim për “Bota sot”, Hasani tha se deklarata e ministrit të Jashtëm serb, Marko Gjuriq, për mundësinë e krijimit të konsullatës në Shkodër lidhet me qëllime, prapavija, predispozita dhe tendenca të njohura. Ai argumentoi se në Shkodër dhe në të gjithë Shqipërinë nuk ekziston fare minoritet serb, madje as në një numër të mjaftueshëm për të përbërë stafin e kësaj konsullate.

Hasani kujtoi se ngritja e një përfaqësie konsullore zakonisht arsyetohet nga prania e një numri të konsiderueshëm shtetasish të vendit dërgues. Sipas tij, nevoja konsullore në Shkodër mungon edhe për faktin se Serbia e ka tashmë ambasadën e saj në Tiranë. Ai vlerësoi se Beogradi vazhdon të shfaqë objektiva të tjera, me natyrë politike, diplomatike dhe qëllime të tjera.

Ndryshe e sheh Hasani mundësinë e hapjes së Konsullatës së Përgjithshme shqiptare në Bujanoc dhe ndikimin që ajo mund të ketë për shqiptarët e Preshevës, Bujanocit dhe Medvegjës. Ai e cilëson këtë hap shumë të vonuar, por kërkon që përfaqësia të mos mbetet vetëm simbolike dhe të ndërtohet mbi një qasje strategjike, pasi rëndësia e saj është e jashtëzakonshme.

Sipas analistit, konkretizimi duhet të ndodhë sa më shpejt dhe të mos paraqitet si përfundimi i një procesi, por si nisja e një strategjie të re. Ai theksoi se vetëm prania diplomatike nuk mjafton nëse nuk shoqërohet nga politika të koordinuara, të qarta dhe afatgjata për avancimin dhe mbrojtjen e të drejtave të shqiptarëve në Serbia.

Hasani tha se kjo konsullatë do të ofronte ndihmë përballë sfidave të shumta të mbijetesës dhe ruajtjes së substancës, si dhe për mbrojtjen e sakrificës e të kontributit të luftës së armatosur në raport me sfidat e së ardhmes. Sipas tij, çështja duhet të ndërkombëtarizohet në nivelin më të lartë.

Ai vlerësoi se Shqipëria amë ka detyrim moral, kombëtar dhe kushtetues për të ndërtuar një qëndrim të artikuluar, të drejtë, objektiv dhe institucional. Ky pozicion i Republikës së Shqipërisë, sipas Hasanit, duhet të përfshijë Referendumin e 1-2 marsit 1992, kryengritjen e armatosur të UÇPMB-së, e cila mbrojti varret e të parëve, pragun, dinjitetin dhe identitetin e kësaj krahine, si dhe Marrëveshjen e Konçulit.

Nga Shqipëria amë, Hasani pret përkrahje dhe veprime edhe për ngritjen e një zyre ndërlidhëse në Tiranë, të cilën e konsideron më se të domosdoshme. Ai kërkon gjithashtu që Tirana të avokojë dhe të lobojë pranë mekanizmave dhe instancave më të larta të BE-së dhe OKB-së.

Sipas tij, Shqipëria amë mund ta mbrojë më mirë frymën shqiptare pikërisht në këtë krahinë, e cila përbëhet nga një grup etnik autokton. Hasani e sheh këtë angazhim edhe si kontribut për garantimin e një të ardhmeje më të sigurt dhe më të ndritur për shqiptarët kudo.

Analisti deklaroi se institucionet përkatëse të Kosovës mund të reagojnë në përputhje me të drejtën ndërkombëtare, duke u mbështetur te të gjitha aktet, konventat dhe traktatet që shërbejnë si instrumente për rregullimin e këtyre çështjeve.

Ai shtoi se edhe partitë politike të përfaqësuara në Parlament kanë mundësi që, përmes rrugëve institucionale, të paraqesin fakte dhe dëshmi kundër hapjes së konsullatës në Shkodër, në mënyrë që çështja të dërgohet në instancat përkatëse, përfshirë ato ndërkombëtare.

Në përfundim, Hasani kërkoi që Shqipëria të realizojë fillimisht hapjen e Konsullatës së Përgjithshme në Bujanoc. Sipas tij, ky proces nuk duhet në asnjë rrethanë të kushtëzohet me ngritjen e një konsullate serbe në Shkodër.

Ai e mbështeti këtë kërkesë te përbërja e popullsisë së krahinës, duke theksuar se në Preshevë mbi 95% e banorëve janë shqiptarë etnikë dhe autoktonë, ndërsa në Bujanoc kjo përqindje është mbi 62%. Vetëm në Medvegjë, sipas tij, shqiptarët etnikë dhe autoktonë përbëjnë më pak se 50% të popullsisë.

Hasani tha se bëhet fjalë për një krahinë që duhet trajtuar vetëm në këtë mënyrë, pasi rajoni përbën një trup të vetëm, unitar, si shprehje gjeografike e pandashme. Përballë kësaj, ai përsëriti se propozimi për konsullatën serbe në Shkodër, ku nuk ka fare minoritet serb, pasqyron vazhdimin e objektivave të tjera politike, diplomatike dhe të qëllimeve të tjera.

The post Nga Presheva thirrje Tiranës: Konsullata në Bujanoc të hapet pa asnjë kusht appeared first on Albeu.com.

Muhamet Kelmendi ka kërkuar të dijë se çfarë veprimtarie konkrete diplomatike ose konsullore do të ushtrojë konsullata serbe në Shkodër.

Në një prononcim për “Bota sot”, ai kundërshtoi vendimin për lejimin e hapjes së kësaj përfaqësie, duke vlerësuar se prania e saj nuk mbështetet në ndonjë nevojë të qartë juridike apo praktike.

Sipas Kelmendit, fakti që në zonën e Shkodrës nuk jeton një komunitet i konsiderueshëm serb krijon dyshime se konsullata mund t’u shërbejë më tepër interesave të Serbisë sesa atyre të Shqipërisë.

Ai iu drejtua kryeministrit Edi Rama me pyetjen se përse Tirana i dha miratimin Serbisë për hapjen e konsullatës së saj pikërisht në Shkodër.

Kelmendi tha se arsyet e këtij pëlqimi nuk janë bërë të ditura, ndërsa ngriti pyetjen se çfarë e justifikon zgjedhjen e Shkodrës.

Nga pikëpamja ligjore dhe ajo praktike, sipas tij, nuk vërehet ndonjë domosdoshmëri për një konsullatë serbe në këtë qytet. Ai argumentoi se në qarkun e Shkodrës nuk ka aq shumë shtetas serbë sa të përligjet ngritja e një përfaqësie të tillë konsullore.

Kelmendi shtroi sërish pyetjen se përse është përzgjedhur Shkodra, duke theksuar se qyteti nuk përbën një qendër të marrëdhënieve të drejtpërdrejta diplomatike me Serbinë. Po ashtu, sipas tij, aty nuk ndodhet ndonjë komunitet i rëndësishëm serb që të ketë nevojë për shërbime konsullore.

Për këtë arsye, ai tha se lind natyrshëm dyshimi që kjo përfaqësi mund të jetë më e dobishme për interesat e shtetit serb sesa për ato të shtetit shqiptar. Nga këndvështrimi i Shqipërisë, Kelmendi deklaroi se nuk shihet ndonjë përfitim konkret.

Ai u ndal edhe te mungesa e reciprocitetit real, duke vlerësuar se Shqipëria do të kishte arsye shumë më të forta për të ngritur një konsullatë në Preshevë, për shkak të komunitetit të madh shqiptar që jeton atje.

Sipas Kelmendit, një marrëveshje mund të kuptohej deri diku në aspektin e reciprocitetit nëse, për shembull, Shqipëria do të hapte një konsullatë në Preshevë, ku ka një popullsi të konsiderueshme shqiptare.

Ai theksoi se shteti shqiptar ka interesa të drejtpërdrejta për t’u ofruar mbrojtje dhe shërbime rreth 100 mijë shqiptarëve në Luginën e Preshevës, ndërkohë që numri i banorëve serbë në Shkodër është jashtëzakonisht i vogël.

Në këto rrethana, sipas tij, nuk mund të flitet as për barazi reale dhe as për reciprocitet me peshë të mirëfilltë diplomatike.

Kelmendi tha se paqartësia thellohet edhe më shumë kur shtrohet pyetja se cili do të jetë funksioni real i konsullatës.

Nëse shërbimet konsullore duhet t’u përgjigjen interesave të qytetarëve, ai vlerësoi se në Shkodër nuk ka ndonjë kërkesë konkrete nga shtetasit serbë që ta arsyetojë këtë përfaqësi.

Ai kujtoi se lëvizja e njerëzve, mallrave dhe financave mes Shqipërisë dhe Serbisë kryhet tashmë pa qenë e nevojshme prania e një konsullate serbe në Shkodër. Kelmendi shtoi gjithashtu se qytetarët e të dyja vendeve udhëtojnë pa viza.

Në përmbyllje të reagimit të tij, Kelmendi i kërkoi kryeministrit Edi Rama të sqarojë përse u lejua hapja e konsullatës së Serbisë në Shkodër, pasi deri tani nuk është paraqitur ndonjë interes konkret i Shqipërisë që ta mbështesë këtë vendim.

Ai pyeti se çfarë detyrash të përcaktuara diplomatike ose konsullore do të përmbushë kjo konsullatë, duke shtuar se nuk duket të ketë një përgjigje bindëse.

Pikërisht mungesa e një shpjegimi të tillë, sipas Kelmendit, ushqen dyshimin se kjo lëvizje mund të lidhet me interesa të tjera, përtej arsyeve që zakonisht përdoren për të justifikuar hapjen e një konsullate.

Nëse ekzistojnë interesa të tilla, ai paralajmëroi se Shqipëria duhet të tregohet shumë e kujdesshme. Përfaqësitë diplomatike dhe konsullore, sipas tij, nuk duhet të përdoren si mjete për qëllime të ndryshme nga ato për të cilat janë themeluar.

Kelmendi e mbylli prononcimin për “Bota sot” duke pyetur sërish Ramën se përse Shqipëria e miratoi kërkesën e Serbisë për një konsullatë në Shkodër dhe cili interes konkret shqiptar e përligj këtë vendim. Ai theksoi se deri në këtë moment një interes i tillë nuk është bërë i qartë.

The post Konsullata e Serbisë në Shkodër, Kelmendi pyet Ramën: Cili interes shqiptar e arsyeton? appeared first on Albeu.com.

Hysamedin Feraj, njohës i zhvillimeve politike, ka shprehur shqetësimin e tij për nismën e vendosjes së një Konsullate të Serbisë në qytetin e Shkodrës.

Sipas analizës së tij, misioni i kësaj zyre diplomatike nuk do të përqendrohet tek numri i vogël i serbëve që jetojnë atje, por do të orientohet drejt popullsisë shqiptare me qëllim përhapjen e asaj që ai e quan “serbizim i mendimit”.

Ai paralajmëroi gjithashtu se një funksion të ngjashëm pritet të luajë edhe zyra konsullore e Shqipërisë në Bujanoc.

“Konsullata e Serbisë nuk ka për qëllim t’u shërbejë 54 serbëve të Shkodrës, por të punojë me shqiptarët për të shtrirë serbizimin e mendimit në Shqipëri. As Miladini e as Dushani nuk e përqendruan veprimtarinë e tyre te serbët apo malazezët në Shqipëri, por te shqiptarët. E njëjta prirje pritet të ndiqet edhe nga konsullata shqiptare në Bujanoc”, deklaroi Feraj.

The post Alarm nga Feraj: Konsullata serbe në Shkodër synon ndikimin mbi shqiptarët appeared first on Albeu.com.

Avokati Spartak Ngjela është shprehur kundër nismës për hapjen e Konsullatës së Serbisë në Shkodër, të cilën e ka përkufizuar si një veprim antikombëtar.

Ai deklaroi se kjo kërkesë mund të mbështetet vetëm nga “agjentët e Beogradit” dhe kërkoi reagimin e institucioneve shqiptare dhe të SPAK-ut.

Në postimin e tij të plotë, Ngjela shkruan:

“Kërkesa për ngritjen në Shkodër të institucionit ndërkombëtar, Konsullatës së Serbisë, mund të pranohet në Shqipëri vetëm nga agjentët e Beogradit, por në asnjë rast nga ligji dhe Parlamenti i Shqipërisë.

Dihet se kush është personi që po e propozon.

Atëherë?

Mbetet të shihet se si do të veprojnë shqiptarët dhe SPAK-u përballë një akti të tillë antikombëtar.”

The post Ngjela kundërshton konsullatën serbe në Shkodër: Akt antikombëtar appeared first on Albeu.com.

Lajmi për arritjen e një dakordësie paraprake mes Shqipërisë dhe Serbisë për hapjen e zyrave konsullore në Shkodër dhe Bujanoc u bë publik të enjten.

Njoftimin e dha shefi i diplomacisë serbe, Marko Gjuriç, i cili bëri të ditur se marrëveshja u arrit gjatë bisedimeve me ministrin e Jashtëm shqiptar, Ferit Hoxha.

Në një deklaratë për Radio Beogradin, Gjuriç theksoi se ky zhvillim shënon një avancim në forcimin e lidhjeve dypalëshe.

Ai u shpreh i kënaqur për diskutimet konstruktive me homologun e ri shqiptar, duke shtuar se palët ranë dakord në parim për të ngritur konsullata në të dyja shtetet.

Ndërkohë, pala shqiptare ende nuk ka konfirmuar zyrtarisht këtë marrëveshje. Deputetja Marjana Koçeku reagoi ashpër, duke e quajtur të pazakontë vendimin për një konsullatë serbe në Shkodër dhe ngriti pyetjen se interesave të kujt i shërben kjo lëvizje. Ajo kërkoi që ministri Hoxha të japë shpjegime të shpejta nëse lajmi konfirmohet.

Koçeku theksoi gjithashtu se Beogradi nuk mund të shihet si një aleat i ngushtë politik, për sa kohë vijon të mbajë qëndrime dhe të ndjekë politika që përplasen me interesat e shqiptarëve dhe të Kosovës.

Ajo argumentoi se Serbia ka ende shumë probleme të pazgjidhura me Kosovën, veçanërisht pas deklaratave të fundit të ministres Paunoviq, të cilat provokuan reagime të ashpra. Sipas saj, Tirana duhej të kishte mbajtur një qëndrim më të prerë, por zgjodhi një politikë të butë ndaj Serbisë, çka ajo e konsideron të habitshme.

Duke iu referuar eksperiencës historike, Koçeku theksoi se çdo zhvillim në raportet me Serbinë kërkon kujdes maksimal dhe vlerësim të thellë të pasojave. Për këtë arsye, ajo këmbënguli se një hap i tillë diplomatik meriton transparencë të plotë, debat publik dhe analizë serioze në funksion të interesit kombëtar.

Sipas saj, një konsullatë serbe në Shkodër nuk do t’u shërbente interesave shqiptare, por do t’i forconte pozitat rajonale të Serbisë, në kundërshtim me interesat kombëtare dhe aspiratat euroatlantike të Shqipërisë.

Deputetja përsëriti se Serbia nuk mund të trajtohet si partnere e besueshme derisa vazhdon të mbështesë politika në dëm të shqiptarëve dhe Kosovës. Ajo apeloi që Shqipëria të veprojë me maturi në çdo hap që prek balancat rajonale, duke u udhëhequr gjithmonë nga interesi kombëtar dhe mbështetja për Kosovën.

Nga ana tjetër, analistët në Shqipëri e shohin me shqetësim këtë zhvillim, duke vlerësuar se Tirana po tregohet dorëlëshuar me Beogradin dhe se Prishtina duhet të rishikojë komunikimin me Partinë Socialiste. Ata e konsiderojnë pozitive hapjen e konsullatës në Bujanoc, e cila do t’u hapte rrugën shqiptarëve të atjeshëm të përfitojnë fonde nga buxheti i shtetit shqiptar.

Analisti politik Milaim Nela e cilësoi si një lajm negativ për shqiptarët vendosjen e një konsullate serbe në Shkodër. Sipas tij, në vend që të distancohet nga një Serbi me qasje militariste që kërcënon vazhdimisht Kosovën, Tirana po bën koncesione për një numër të vogël familjesh në Vrakë, që ai i identifikon si malazeze dhe jo serbe.

Nela argumenton se Shqipëria mund të kishte një rol tjetër në rajon duke ushtruar trysni mbi Serbinë për të njohur Kosovën dhe për të braktisur ambiciet për rianeksim. Ai shkoi më tej duke sugjeruar që institucionet e Kosovës të ndërpresin çdo marrëdhënie me Partinë Socialiste dhe t’i trajtojnë përfaqësuesit e saj si zyrtarë serbë, madje të shkojnë deri në dëbimin e ambasadorit shqiptar derisa të revokohet ky vendim që ai e quan skandaloz.

Analisti Ilir Vata e konsideron konsullatën serbe në Shkodër si një avantazh taktik për Serbinë në veri të Shqipërisë, me më shumë ndikim drejt Malit të Zi sesa për numrin e kufizuar të serbëve atje. Sipas tij, qëllimi kryesor i diplomacisë shqiptare ka qenë hapja e konsullatës në Bujanoc dhe për këtë i ofroi Serbisë mundësinë për të pasur një zyrë në Shqipëri.

Vata thekson se prania zyrtare e Tiranës në Luginën e Preshevës është e rëndësishme dhe qeveria duhet të financojë shqiptarët e asaj zone nga buxheti i shtetit. Ai e sheh marrëveshjen si një veprim pozitiv diplomatik, por thekson se efekti i saj do të matet nga angazhimi konkret.

I pyetur nëse Serbia duhej të mbyllte çështjet me Kosovën përpara kësaj marrëveshjeje dhe nëse Shqipëria mund ta kishte bllokuar procesin, Vata ra dakord, duke shtuar se Beogradi përfiton më shumë nga kjo lëvizje, pasi largon fokusin nga problemi kryesor që është Kosova. Sipas tij, me këtë veprim, presidenti Vuçiç synon të zbusë qëndrimin e aleatëve ndërkombëtarë dhe të fitojë kohë për të mbajtur kontrollin mbi çështjen e Kosovës, ndërsa thekson mungesën e koordinimit mes shqiptarëve të Tiranës dhe Prishtinës.

The post Marrëveshja për konsullata në Shkodër dhe Bujanoc, kritika në Tiranë e Prishtinë: Tirana akuzohet për lëshime ndaj Beogradit appeared first on Albeu.com.

Sipas saj sekretarja në Stamboll Juna Harka është e martuar me shtetasin turk Ramazan Keskin, është kreu i një organizate kriminale aktive në narko-trafik. Për të ka një urdhër-arrest europian që në vitin 2020.

Garo u shpreh se në fillim të shkurtit të këtij viti, dy javë përpara se Juna Harka të emërohej në Stamboll, SPAK vendosi vënien në sekuestro të pasurive në Shqipëri të bashkëshortit të saj Keskin. Megjithëatë, Harka-Keskin, u emërua në Ambasadë dhe  pajis shumë shpejt me pasaportë diplomatike.

Deklarata e plotë:

Në fund të shkurtit, ‘ministrja e investimeve strategjike të brendshme’ dhe ‘punëve të pista të jashtme’, Olta Xhaçka, ka emëruar Sekretare të Dytë në Konsullatën shqiptare në Stamboll zonjën Juna Harka. Emërimi në vetevete nuk është gjë e re, sepse është vazhdim i repertorit të njohur të degradimit të pamëshirshëm të shërbimit të Jashtëm.
Si shumë të tjerë e të tjera, znj. Harka nuk ka punuar as edhe një ditë në diplomaci.

Lajmi, dhe bëhet fjalë për lajm të keq, qëndron te fakti se bashkëshorti i Juna Harkës, shtetasi turk Ramazan Keskin, është kreu i një organizate kriminale aktive në narko-trafik. Për të ka një urdhër-arrest europian që në vitin 2020.
Në fillim të shkurtit të këtij viti, dy javë përpara se Juna Harka të emërohej në Stamboll, SPAK vendosi vënien në sekuestro të pasurive në Shqipëri të bashkëshortit të saj Keskin. Megjithëkëtë, znj. Harka-Keskin, jo vetëm u emërua në Ambasadë, por u pajis shumë shpejt me pasaportë diplomatike.
Në datën 5 prill 2023, kur kishin përfunduar të gjitha procedurat për emërimin në Stamboll të znj. Harka-Keskin, disa media shqiptare njoftuan se u vunë në sekuestro pasuritë e bashkëshortit të saj turk.
Të njëtën ditë ka ardhur reagimi i autoriteteve turke për emërimim e znj. Harka dhe asaj i është kërkuar dorëzimi i pasaportës diplomatike nga MPJ.
Kjo ndodhi nga frika e skandalit dhe zhurmës që do pasonte. Pëndryshe Xhaçka do të vijonte e qetë, gjë që e dëshmon fakti se, që nga emërimi deri te botimi në media i lajmit të sekuestros, kaluan 6 javë. Eshtë e pamundur që një institucion i lartë si MPJ, me shefe një ish-Ministre të Mbrojtjes, të mos ketë patur të dhëna nga shërbimet inteligjente se kush është Ramazan Keskin dhe kush bashkëshortja e tij.

Emërim i zonjës Harka është pjesë e një cikli të qartë korruptiv ku përfshihen lidhjet familjare; ajo është kushërirë e Skënder Gjinushit. Më shumë se farefisnia, bie në sy fakti që ajo emërohet pikërisht në Stamboll, atdheun e bashkëshortit të saj narko-trafikant, në kërkim nga autoritet europiane dhe në sekuestro nga ato shqiptare.

Nota Verbale për Ambasadën turke në Tiranë, për emërimin e znj. Harka në Stamboll është përgatitur në fillim të prillit. Kjo praktikë nuk gjendet, pasi është dhënë urdhër nga lart që të zhduket çdo provë që lidhet me këtë skandal.
Por, gjurmë që mbetet është fakti se më 4 prill znj. Harka-Keskin ishte në Minstrinë e Jashtme dhe tërhoqi pasaportën diplomatike. Ndërsa një ditë më pas shumica e medias përcollën njoftimin per vënien nën sekuestro të pasurive në Shqipëri të bashkëshortit të saj.
Kjo është spaleta e radhës në supet ngarkuar me skandale të Olta Xhackës.
Lista është për record Guinnes në skandalistikë dh vijon si më poshtë:
dhënie e statusit investitor strategjik bashkëshortit të saj, privatizim i bazës ushtarake të Limionit në Sarandë, punësim si këshilltar të mashtruesit ndërkombëtar Amant Josifi, punësim në Ministrinë e Jashtme të motrës së vrasësit me pagesë Nuredin Dumani, përdorimit të helikopterit ushtarak për fushatën zgjedhore në Dibër, vendosje e automjetit të Ministrisë së Jashtme në shërbim të nënës së saj.

The post Akuza e fortë: Olta Xhaçka emëroi gruan e trafikantit, Juna Harka-n në Konsullatën Shqiptare në Stamboll appeared first on Albeu.com.