Deputeti i Lëvizjes Vetëvendosje, Arbër Rexhaj, ka deklaruar se përpjekja për konstituimin e Kuvendit pa një dakordim për zgjedhjen e Presidentit do ta çonte automatikisht vendin në zgjedhje.

Sipas Rexhajt, nisma aktuale synon pikërisht shmangien e zgjedhjeve të reja.

“Nëse Kuvendi konstituohet pa një marrëveshje, vendi shkon automatikisht në zgjedhje”, u shpreh ai.

Rexhaj foli gjithashtu për reagimet ndaj Bekim Sejdiut, kandidatit të përbashkët të VV-së dhe LDK-së.

Ai vlerësoi se kundërshtimet ndaj Sejdiut nuk kanë të bëjnë me personalitetin e tij, por me kryeministrin në detyrë dhe kreun e VV-së, Albin Kurtin.

“Askush prej tyre nuk e vë në pikëpyetje figurën e Bekim Sejdiut. Kundërshtimi i tyre lidhet me Albin Kurtin. Por, nëse problemi është Kurti, atëherë pse ishit dakord për një diskutim politik me VV-në?”, deklaroi Rexhaj.

The post Rexhaj: Pa marrëveshje për Presidentin, konstituimi i Kuvendit çon vendin në zgjedhje appeared first on Albeu.com.

Deputetja e PDK-së, Vlora Çitaku, ka kritikuar ngërçin politik dhe moskonstituimin e Kuvendit, duke theksuar se marrëveshjet partiake nuk mund të qëndrojnë mbi Kushtetutën.

Sipas saj, në një demokraci parlamentare dialogu dhe debati janë normale, por shkelja e Kushtetutës nuk duhet të shndërrohet në normalitet. Ajo shtoi se marrëveshjet politike midis partive dhe palëve nuk i mbivendosen Kushtetutës, e cila është mbi çdo parti e lider dhe kërkon konstituimin e Kuvendit dhe themelimin e institucioneve.

Më tej, ajo kujtoi se kanë kaluar 555 ditë nga zgjedhjet e shkurtit të vitit 2025, ndërsa diskutimi po përqendrohet te pozita dhe poste të pushtetarëve, duke e pamundësuar trajtimin e brengave dhe halleve të qytetarëve.

Çitaku theksoi se Kosovës i duhen urgjentisht institucione funksionale dhe se vendi për konstituimin e Kuvendit është pikërisht salla e tij.

Ajo ftoi deputetët Kurti e Haxhiu, si dhe të gjithë të tjerët, të vijnë në sallë për të konstituuar Kuvendin dhe për të ecur përpara.

Deputetja reagoi gjithashtu ndaj kritikave dhe deklarimeve publike të pushtetit, duke i përshkruar ato si “leksione” që nuk i pranon.

Para gazetarëve, ajo tha se nuk pranojnë leksione publike e morale dhe se pushtetarët aktualë janë shkelës serikë të Kushtetutës, të cilët nuk brengosen fare. Sipas saj, aktvendimi i Gjykatës Kushtetuese është i qartë e i kristaltë dhe kërkon që procesi i konstituimit të përmbyllet brenda 30 ditësh.

The post Çitaku: Kushtetuta mbi çdo parti e lider, Kuvendi duhet të konstituohet appeared first on Albeu.com.

Glauk Konjufca, deputet i Lëvizjes Vetëvendosje, ka shprehur bindjen se vijimi i seancës konstituive të mbajtur të shtunën nuk përbën shkelje të Kushtetutës, pavarësisht pretendimeve se ajo u zhvillua jashtë afateve kushtetuese.

Ai solli në vëmendje edhe situatën e krijuar pas zgjedhjeve të 14 shkurtit për të ilustruar qëndrimin e tij.

Konjufca nuk dha ndonjë datë konkrete se kur do të mblidhet sërish Kuvendi për të vazhduar punimet konstituive.

Sipas tij, e gjithë kjo nuk është aspak dramatike dhe bën pjesë në formësimin e mëtejshëm kushtetues të vendit. Ai shtoi se nuk është në dorën e tij të caktojë se kur do të thirret seanca e radhës.

Duke iu referuar diskutimeve mbi kohëzgjatjen e seancës, Konjufca sqaroi se ka interpretime të ndryshme nga ekspertët, disa prej të cilëve mendojnë që një seancë mund të vazhdojë përtej 24 orëve, siç po ndodh aktualisht. “Ne nuk mendojmë që është shkelur kushtetuta,” deklaroi ai, duke nënvizuar se këto paqartësi janë të ngjashme me ato të vitit të kaluar.

Ai sqaroi gjithashtu se Vetëvendosja nuk ka mundësi t’i drejtohet Gjykatës Kushtetuese, por theksoi se qëndrimi i partisë së tij është i qartë: nuk ka pasur shkelje të ligjit themelor.

Për Konjufcën, dëmi i vërtetë nuk qëndron në vazhdimin e seancës, por në aktin e dhunës të ushtruar nga deputetja e Aleancës, Time Kadrijaj, e cila goditi me vezë kryeministrin në detyrë Albin Kurti. Ai e konsideroi këtë sjellje shumë më të rëndë se çdo problem procedural.

Konjufca theksoi se Lëvizja Vetëvendosje nuk do të heqë dorë nga dialogu politik dhe se përpjekjet për të gjetur një marrëveshje do të vazhdojnë me të gjitha partitë, përfshirë PDK-në, LDK-në dhe Aleancën.

Duke bërë një krahasim mes dëmeve të mundshme, ai argumentoi se një seancë e zgjatur është një e keqe më e vogël sesa shkuarja në zgjedhje të reja. “Nuk është duke u shkelur Kushtetuta,” përsëriti ai.

Të shtunën, seanca konstituive u ndërpre për herë të dytë. Kjo erdhi pasi kreu i VV-së, Albin Kurti, kërkoi më shumë kohë për të propozuar kandidatin për kryetar të Kuvendit, me arsyetimin se një marrëveshje politike ende nuk ishte arritur. Ai theksoi se takimet dhe komunikimi i tij me liderët e subjekteve të tjera parlamentare kanë vazhduar, por kërkesa për kohë shtesë synonte të shmangte zgjedhjet e jashtëzakonshme.

Menjëherë pas kësaj kërkese, situata në sallë degjeneroi kur deputetja Time Kadrijaj sulmoi fizikisht zotin Kurti me vezë. Për pasojë, kryesuesi i seancës, Dehari, urdhëroi hyrjen e sigurimit të Kuvendit në sallë për të qetësuar gjendjen.

Rezultatet e zgjedhjeve të 7 qershorit i dhanë Lëvizjes Vetëvendosje 53 mandate, Partisë Demokratike të Kosovës 22, Lidhjes Demokratike të Kosovës 18 dhe Aleancës për Ardhmërinë e Kosovës 7 deputetë.

The post Konjufca: Nuk besojmë se ka shkelje të Kushtetutës në procesin e konstituimit të Kuvendit appeared first on Albeu.com.

Edhe pse ora ka kaluar 12:00, Kuvendi ende nuk ka bërë të ditur nëse seanca konstituive e legjislaturës së 11-të do të vazhdojë këtë të premte.

Punimet u ndërprenë dje, pasi kreu i Lëvizjes Vetëvendosje, Albin Kurti, kërkoi më shumë kohë për bisedime me përfaqësuesit e partive, në përpjekje për të gjetur një marrëveshje lidhur me çështjen e presidentit.

Ndërkohë, mesnata vlerësohet si afati përfundimtar kushtetues për konstituimin e Kuvendit.

As Lëvizja Vetëvendosje dhe as Lidhja Demokratike e Kosovës nuk kanë njoftuar për ndonjë takim ndërmjet Kurtit dhe kryetarit të LDK-së, Lumir Abdixhiku. Të dy kishin shprehur më herët gatishmëri për arritjen e një marrëveshjeje politike.

Para ndërprerjes së seancës ishte përmbyllur verifikimi i mandateve të deputetëve, të cilët më pas dhanë edhe betimin.

The post Ende pa njoftim për vazhdimin e seancës konstituive të Kuvendit appeared first on Albeu.com.

Deputetët e Kuvendit të Kosovës do të mblidhen nesër në orën 10:00 në sallën plenare, për të bërë konstituimin e legjislaturës së njëmbëdhjetë. Seanca do të zhvillohet vetëm një ditë para skadimit të afatit kushtetues për përfundimin e këtij procesi.

Hapi i parë i procedurës do të jetë krijimi i Komisionit të Përkohshëm për Verifikimin e Mandateve të Deputetëve. Pasi komisioni të paraqesë raportin dhe ai të miratohet, deputetët do të japin betimin, ndërsa më pas pritet të procedohet me zgjedhjen e kryetarit të Kuvendit, ka bërë të ditur Vullnet Bugaqku nga KDI.

“Vetëm pas konstituimit të Kuvendit mund të fillojë procedura për formimin e Qeverisë, ndërsa më pas nisin edhe afatet kushtetuese për zgjedhjen e Presidentit të Republikës”, tha Vullnet Bugaqku nga KDI.

Megjithatë, përveç konstituimit të legjislaturës, situata paraqet edhe një problem tjetër kushtetues që lidhet me ushtruesin e detyrës së presidentit. Bugaqku thekson se neni 90 i Kushtetutës e përcakton në mënyrë të qartë se kjo detyrë nuk mund të ushtrohet përtej gjashtë muajve.

“Ky afat përfundon më 4 tetor dhe, nëse deri atëherë nuk zgjidhet Presidenti i ri, vendi mund të përballet me një situatë të paprecedentë, pasi Kushtetuta dhe Ligji për Presidentin nuk parashohin një mekanizëm për tejkalimin e këtij kufiri kohor”, tha Vullnet Bugaqku nga KDI.

Analisti politik Artan Muhaxhiri e lidh krizën e krijuar me mungesën e vullnetit politik për të siguruar 80 votat që nevojiten për zgjedhjen e presidentit.

“Në mungesë të kompromisit politik, vendi rrezikon të mbetet i bllokuar mes afateve kushtetuese, interpretimeve juridike dhe sfidave në Gjykatën Kushtetuese, ndërsa skenari më realist mbetet ai i zgjedhjeve të reja”, tha Artan Muhaxhiri, analist politik.

Legjislatura e re e Kuvendit u krijua pas zgjedhjeve të parakohshme parlamentare të 7 qershorit.

The post Kuvendi i Kosovës nis nesër procedurën për krijimin e legjislaturës së re appeared first on Albeu.com.

Pas takimit me kryeparlamentaren Albulena Haxhiu, deputetja e LDK-së, Lehona Lushaku, deklaroi se partia e saj kërkon që procesi i konstituimit të Kuvendit të përfundojë më 6 gusht.

Lushaku theksoi se mbajtja e seancës konstituive në këtë datë është e nevojshme për funksionalizimin e institucioneve dhe të shtetit të Kosovës. Ajo shtoi se, për të shmangur çdo vonesë, synohet që Kuvendi të konstituohet në ditën kur është thirrur seanca.

Deputetja e LDK-së bëri të ditur gjithashtu se partia nuk ka marrë ftesë nga LVV-ja për zhvillimin e takimeve të tjera.

Sipas saj, çdo bashkëpunim ndërmjet partive politike duhet të mbështetet në parime themelore. Lushaku tha se LDK-ja është e orientuar qartë drejt Perëndimit dhe se vlerat e saj bazë do të jenë pjesë e çdo marrëveshjeje apo partneriteti të mundshëm.

The post Lushaku: Synimi ynë është që Kuvendi të konstituohet më 6 gusht appeared first on Albeu.com.

Asnjë nga deputetët e komunitetit serb, nuk mori shumicën e nevojshme për të marrë postin e nënkryetarit.

Në rrethanat që u krijuan pas dështimit të zgjedhjes së njërit nga deputetët e komunitetit serb si nënkryetar i Kuvendit, Dimal Basha, theksoi se të gjitha opsionet për këtë proces ishin ezauruar.

Ai njoftoi se Kuvendi nuk ka mundësi tjetër, për të vazhduar me zgjedhjen e nënkryetarit të Kuvendit të pestë, që vjen nga komuniteti serb.

“Ne si Kuvend nuk kemi mundësi tjetër për të vazhduar, sa i përket nënkryetarit që vjen nga komuniteti jo shumicë serb. Prandaj, me këtë rast, konsideroj se kemi ezauruar edhe pikën e katërt të rendit të ditës të seancës konstituive. Dhe, meqenëse nuk ka mundësi tjetër për të proceduar tutje, konsideroj se kjo seancë konstituive përmbyllet. Në emër të funksionalizimit të Kuvendit dhe materializimit të rezultatit zgjedhor të 9 shkurtit, konsideroj se moszgjedhja e njërit nga 5 nënkryetarët apo njërit nga 6 anëtarët e kryesisë nuk mund të bëhet pengesë që bllokon konstituimin e Kuvendit të Kosovës. Pas përmbylljes së seancës konstituive, Kuvendi duhet të vazhdojë punën, siç parashihet me Kushtetutë. Sa i përket hapave të ardhshëm për punën tonë si Kuvend, do t’i konsultoj anëtarët tanë të zgjedhur si nënkryetarë të Kuvendit, mbledhje që do të mbahet të hënën në ora 13:00”, tha Basha.

Seanca konstituive e Kuvendit të Kosovës nisi më 15 prill, pas zgjedhjeve parlamentare të jashtëzakonshme të mbajtura më 9 shkurt.

Nga ajo kohë deri sot, janë bërë 61 tentativa për konstituimin e plotë të Kuvendit të Kosovës.

Në tentimin e 59, u zgjodh kryetari i Kuvendit, Dimal Basha, tre nënkryetarë nga PDK, LDK dhe LVV, si dhe nënkryetarja nga pakicat tjera joserbe.

The post Dimal Basha mbyll seancën për konstituimin e Kuvendit të Kosovës, çfarë ndodh më pas appeared first on Albeu.com.

Në tentativën e fundit për konstituim të Kuvendit të propozuar nga Lëvizja Vetëvendosje për kryetar të Kuvendit ishin Hekuran Murati, Arbërie Nagavci dhe Dimal Basha.

Asnjëri nga ta nuk mori votat e nevojshme për kryetar të Kuvendit.

Ditë më parë, Gjykata Kushtetuese ka publikuar aktgjykimin e plotë ku përcaktohet që legjislativi i ri duhet të konstituohet brenda 30 ditëve nga certifikimi i rezultateve, afat ky që përfundon më 18 shtator.

Gjashtë muaj pas mbajtjes së zgjedhjeve parlamentare vendi është pa institucione të reja, të dala nga zgjedhjet e 8 shkurtit.

Procesi i konstitutimit të Kuvendit të Kosovës ka mbetur në zgjedhjen e kryetarit të Kuvendit.

E lidhur me ngërçin politik që po zgjat tash e disa muaj ka shkruar Albert Krasniqi nga Demokracia Plus.

Ditë më parë, Krasniqi në një postim në Facebook shkruante se pasi askush nuk ka arritur të krijojë një shumicë parlamentare edhe gjashtë muaj pas zgjedhjeve, mandatet duhet t’i kthehen popullit.

Por, sipas tij, para se vendi të shkojë në zgjedhje të reja, partitë politike duhet të bien dakord mbi disa çështje themelore që do të shmangin bllokadat e së ardhmes dhe do të garantojnë funksionalitetin institucional. /Telegrafi/

The post Kosova që nga 8 shkurti pa institucione, sot tentativa e 58-të për konstituimin e Kuvendit appeared first on Albeu.com.

Konstituimi i Kuvendit, duhet të permbyllet brenda 30-ditësh. Në aktgjykimin e shpallur më 8 gusht, Kushtetuesja tha se kryesuesi i seancës, Avni Dehari, nuk ka vepruar në bazë të aktgjykimit të mëhershëm të kësaj gjykate të 26 qershorit, duke shtuar se të gjitha seancat e mbajtura nga 27 qershori deri më 26 korrik “të shpallen të pavlefshme”.

Gjykata Kushtetuese e Kosovës, ka urdhëruar kryesuesin e seancës konstituive të Kuvendit të Republikës së Kosovës të vazhdojë me pikën 3 të rendit të ditës së seancës lonstituive, të miratuar më 8 prill 2025, dhe të “ftojë përfaqësuesin e grupit më të madh parlamentar për të propozuar kandidatin/en për kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në tre herë për kandidatin/en e njëjtë”.

Gjithashtu, ka urdhëruar që gjatë procedurës së zgjedhjes së kryetarit/es dhe nënkryetarëve të Kuvendit të Republikës së Kosovës, të jenë të gjithë deputetët e zgjedhur të pranishëm dhe të votojnë.

Pas shpalljes së aktgjykimit, deputetja e LDK-së, Hymete Bajrami, tha se aktgjykimin e sotëm, Kushtetuesja vërtetoi se udhëheqësi i LVV-së, njëherësh kryeministri në detyrë, Albin Kurti, e ka “detyruar Deharin të shkelë Kushtetutën”.

“I njëjti kandidat nuk mund të votohet më shumë se tri herë – Albin Kurti më nuk mund ta bllokojë Kosovën për emrin e Albulena Haxhiut sepse shteti i është më i rëndësishëm se gjithçka tjetër”, shkroi ajo në Facebook.

Deputetët e dalë nga zgjedhjet e 9 shkurtit kishin shpërfillur një vendim të Kushtetueses, e cila u dha afat deri më 26 qershor të konstituonin organin ligjvënës.

Pas kësaj, Gjykata vendosi masë të përkohshme, deri në shqyrtimin e lëndëve të dërguara nga Partia Demokratike e Kosovës dhe Lidhja Demokratike e Kosovës, lëndë për të cilat shpalli aktvendimin të premten, më 8 gusht.

Nga 15 prilli deri më 26 korrik, deputetët mbajtën 54 vazhdime të seancës, por dështuan që ta konstituonin organin ligjvënës.

Nga 1 maji, kryesuesi i seancës, Avni Dehari, e ndryshoi rendin e ditës, duke shmangur votimin e hapur dhe duke kërkuar formimin e një komisioni që do të mbikëqyrte votimin e fshehtë për kryeparlamentar.

Kjo formë e votimit u kundërshtua nga PDK-ja, LDK-ja, Aleanca për Ardhmërinë e Kosovës dhe Lista Serbe, që refuzuan të propozonin anëtar për këtë komision.

Gjatë seancave para 1 majit – kur votimi ishte i hapur – e propozuara e LVV-së për kryeparlamentare, Albulena Haxhiu, në disa votime nuk kishte arritur që të merrte 61 votat e nevojshme.

Haxhiu është cilësuar nga PDK-ja dhe AAK-ja si “figurë përçarëse”, ndërkaq LDK-ja ka deklaruar se nuk voton për asnjë kandidat të LVV-së për postin e kryetarit të Kuvendit./ REL

The post Ngërçi me konstituimin në Kosovë/ Kushtetuesja: Kuvendi duhet të zgjedhë kreun e ri përmes votimit të hapur appeared first on Albeu.com.

Vazhdimi i radhës mbahet nga ora katërmbëdhjetë, për herë të parë në më pak se 48 orë pasi Gjykata Kushtetuese ka vendosur masë të përkohshme ndaj seancave të Kuvendit, që nga e diela e 27 korrikut, deri më 8 gusht.

Kuvendi sipas kësaj mase të përkohshme do t’i konsumojë ditët e mbetura të afatit 30 -ditor, por nuk do të mund të marrin asnjë vendim tjetër deri më 8 gusht.

Kjo masë ndërlidhet me kërkesat e parashtruara nga PDK dhe LDK.

Lëvizjes Vetëvendosje, si fituese e shumicës së votave në zgjedhjet e 9 shkurtit, i takon pozita e kryeparlamentarit, mirëpo partitë tjera politike, ose nuk pajtohen për emrin e propozuar për këtë pozitë, Albulena Haxhiu, ose për mënyrën e ndryshimit të votimit për të, nga të hapur në të fshehtë.

Lëvizja Vetëvendosje, Guxo e Alternativa në seancat e deritanishme kanë dështuar të sigurojnë votat për kryetar të Kuvendit.

Pas dështimit të tentativës së 52-të të premten, diplomatët perëndimorë, të pranishëm në seancë, shprehën shqetësim për krizën institucionale.

The post Sot, afati i fundit për konstituimin e Kuvendit të Kosovës appeared first on Albeu.com.