Adnan Rrustemi, deputet i Lëvizjes Vetëvendosje, ka deklaruar se konstituimi i Kuvendit nuk do të kishte dobi nëse paraprakisht nuk arrihet një marrëveshje për zgjedhjen e Presidentit.

Në emisionin Kosova Live në T7, ai vlerësoi se një hap i tillë do ta hapte menjëherë një “fushatë elektorale”.

“Nuk jep dobi ajo. Pastaj ajo është fushatë elektorale. Çdo ditë që kalon pastaj ti e di që je afër zgjedhjeve”, u shpreh ai.

Sipas Rrustemit, marrëveshja mund të arrihet, por kjo varet nga ekzistenca e vullnetit politik.

“Dy ditë më parë thanë jemi shumë afër, më pas thanë jemi shumë larg. Unë nuk e di sa afër e sa larg mund të jemi. Në pikëpamjen tonë është e mundur që shumë shpejt të kemi një marrëveshje nëse ka vullnet politik”, deklaroi deputeti i LVV-së.

Ai shtoi se palët duhet fillimisht të bien dakord për një President konsensual dhe më pas të diskutojnë mbi mënyrën e partneritetit ose të bashkëpunimit.

“Duhet të pajtohemi për President konsensual dhe të ulemi të flasim për formatin e partneritetit apo bashkëpunimit”, tha Rrustemi.

The post Rrustemi: Konstituimi i Kuvendit nuk sjell dobi pa marrëveshje për Presidentin appeared first on Albeu.com.

Deputeti i komunitetit egjiptian, Veton Berisha, deklaroi se do të marrë pjesë në seancë për të votuar kryesinë, me qëllim që të vijojnë procedurat e tjera.

Sipas tij, zhvillimet e fundit lidhen me përplasje politike mes aktorëve të caktuar.

“Të gjitha këto janë lojëra politike të akterëve të caktuar”, tha Berisha.

I pyetur nëse vlerëson se është tejkaluar afati kushtetues, ai u shpreh se interpretimi përfundimtar mund të jepet nga Gjykata Kushtetuese, nëse çështja i dërgohet asaj.

“Fatmirësisht kemi Kushtetuese që jep interpretimin, nëse dërgohet në gjykatë”, deklaroi ai.

Ndërkohë, në ambientet e Kuvendit janë parë të hyjnë edhe deputetë të tjerë nga komunitetet joshumicë. Seanca, e planifikuar të nisë në orën 11:00, ende nuk ka filluar.

The post Veton Berisha: Shpresoj që Kuvendi të konstituohet appeared first on Albeu.com.

Deputeti i Kuvendit të Kosovës, Dimal Basha, deklaroi se kërkesa për zgjedhjen vetëm të kryetarit të Kuvendit, pa u arritur një zgjidhje edhe për postin e presidentit, tregon synimin për ta çuar vendin drejt zgjedhjeve të reja.

Sipas tij, kryeministri Kurti po kërkon një qasje tjetër, pasi ka ftuar opozitën që të dakordohen për të gjitha pozitat.

Basha theksoi se ata që insistojnë për konstituimin e Kuvendit dhe zgjedhjen e kryetarit, ndërsa refuzojnë të qëndrojnë për një marrëveshje lidhur me presidentin, në të vërtetë po synojnë zgjedhjet.

“Kushdo që këmbëngul në këtë qëndrim, tregon se dëshiron të na dërgojë në zgjedhje. Ne po themi të kundërtën: ejani të merremi vesh për të gjitha pozitat”, ka deklaruar Basha.

The post Dimal Basha: Këmbëngulja për konstituimin e Kuvendit pa marrëveshje për presidentin nënkupton zgjedhje të reja appeared first on Albeu.com.

Nezir Kraki, deputet i Lëvizjes Vetëvendosje, vlerëson se periudha 30-ditore për konstituimin e Kuvendit të Kosovës ende nuk është mbyllur. Sipas tij, numërimi ka filluar vetëm të enjten, më 6 gusht, kur deputetët dhanë betimin dhe nisi seanca konstituive.

Ai i ka cilësuar të pasakta qëndrimet sipas të cilave afati për krijimin e legjislaturës së re përfundon tani. Kraki ka argumentuar se, përpara betimit, deputetët nuk kishin kompetenca për të ndërmarrë veprime në kuadër të këtij procesi.

“Të gjithë ata që mendojnë se afati për konstituimin e Kuvendit mbaron sonte gabojnë. Pavarësisht nëse këtë e bëjnë me vetëdije apo jo, çështja është krejtësisht e thjeshtë dhe bazike kur flitet për norma kushtetuese”, ka deklaruar Kraki.

Në interpretimin e tij, periudha prej 30 ditësh nuk mund të nisë në datën kur janë certifikuar rezultatet zgjedhore.

Përmes një videoparaqitjeje në Facebook, ai ka thënë se 30 ditët që u janë lënë deputetëve për konstituimin e Kuvendit nuk mund të llogariten nga certifikimi i rezultateve, pasi deri një ditë më parë nuk kishte deputetë të betuar. Për këtë arsye, sipas tij, para betimit ata nuk kishin asnjë mundësi për të vepruar.

Kraki ka theksuar gjithashtu se data e seancës konstituive nuk përcaktohet nga ligjvënësit, por caktohet prej Presidencës.

“Presidenca e cakton seancën, ndërsa jeta parlamentare nis në ditën kur hapet seanca konstituive. Për këtë arsye, afati 30-ditor mund të fillonte vetëm dje. Që nga dje, ne kemi mundësi të veprojmë, sepse jemi deputetë, kemi dhënë betimin dhe seanca ka nisur”, është shprehur ai.

Duke vënë në dyshim se çfarë mund të bënin deputetët para betimit, Kraki ka pyetur nëse ata kishin mundësi t’i impononin Presidencës një datë tjetër për seancën. Përgjigjja e tij ishte negative, ashtu si edhe për mundësinë e zhvillimit të bisedimeve për plotësimin e posteve apo konstituimin e Kuvendit përpara betimit.

Deputeti i VV-së u ka kërkuar përfaqësuesve të shoqërisë civile, mbështetësve të opozitës, kolegëve deputetë, mediave dhe analistëve që të mos nxitojnë në interpretimin e afatit.

“Nuk ka arsye të nguteni, qoftë ju të shoqërisë civile, dashamirët e opozitës, kolegët deputetë, mediat apo analistët. Nuk po flas për parti ose politika, por për norma kushtetuese”, ka deklaruar Kraki.

Sipas tij, në rast se çështja dërgohet në Gjykatën Kushtetuese, duhet të merret në konsideratë fakti se para betimit deputetët nuk ndodheshin në pozitë për të ndërmarrë veprime.

Kraki ka thënë se, nëse rasti përfundon në gjykatë, ajo nuk ka alternativë tjetër përveçse të konstatojë se ligjvënësit nuk kishin mundësi reale për të vepruar përpara betimit. Si rrjedhojë, sipas tij, ata nuk mund të fajësohen për moskryerjen e një detyre për të cilën u mungonin mjeti dhe autorizimi i domosdoshëm, përkatësisht statusi i deputetit të betuar.

Ai ka vlerësuar se Kuvendi dhe legjislatura aktuale nuk mund të mbahen përgjegjëse për faktin që konstituimi nuk ndodhi përpara hapjes së seancës konstituive, pasi deri dje kjo seancë nuk kishte filluar.

Bazuar në këtë interpretim, Kraki ka deklaruar se procesi i konstituimit të Kuvendit duhet të përfundojë jo më vonë se më 5 shtator.

“Seanca vazhdon nesër dhe ne kemi kohë deri më 5 shtator. Afati 30-ditor tashmë shtrihet deri në atë datë për përmbylljen e konstituimit”, ka thënë ai.

Në fund, Kraki ka sqaruar se Kushtetuta nuk përmban një afat të tillë. Sipas tij, periudha 30-ditore buron nga një aktgjykim i Gjykatës Kushtetuese, i nxjerrë gjatë bllokadës së parë institucionale.

The post Kraki: Kuvendi ka kohë për konstituim deri më 5 shtator, afati nisi më 6 gusht appeared first on Albeu.com.

Përplasja e radhës politike në Kosovë ka shpërthyer rreth çështjes së konstituimit të Kuvendit dhe respektimit të afateve ligjore. Kjo pas njoftimit se seanca konstituive do të vijojë të shtunën, më 8 gusht, edhe pse afati 30-ditor i vendosur nga Gjykata Kushtetuese për ta mbyllur këtë fazë skadon pikërisht sonte në mesnatë.

Ministri në detyrë i Financave dhe deputeti i Lëvizjes Vetëvendosje, Hekuran Murati, ka reaguar duke vënë në pikëpyetje qëndrimet e fundit të opozitës dhe të disa analistëve. Ai ka përdorur rrjetet sociale për të theksuar atë që e quan një kontradiktë të hapur në sjelljen e tyre.

Në një postim në Facebook, Murati solli në vëmendje precedentin e zgjedhjeve të 9 shkurtit 2025. Ai sqaroi se edhe në atë rast, Kuvendi nuk u formua brenda 30 ditëve nga çasti i certifikimit të rezultateve, por, sipas tij, asnjë zë nga radhët e opozitës apo nga rrethet analitike nuk e interpretoi atë vonesë si cenim të rendit kushtetues.

Duke iu referuar bllokadës së atëhershme, Murati sugjeroi se përgjegjësia për pezullimin e procesit qëndronte tek opozita. Ai shprehu habinë se si pikërisht të njëjtit protagonistë po e paraqesin tani situatën aktuale si një shqetësim madhor kushtetues, duke lënë të kuptohet për mungesë konsekuence në qëndrimet e tyre.

Në mesazhin e tij të plotë, ai shkroi se zgjedhjet e 9 shkurtit u certifikuan më 27 mars dhe se më 26 prill, pra pas 30 ditësh, Kuvendi ende nuk ishte themeluar për shkak të pengesave të ngritura nga opozita. Murati nënvizoi se në atë periudhë askush nuk e shihte vonesën si problematike dhe pyeti retorikisht opozitën dhe analistët se çfarë ka ndryshuar sot që e konsiderojnë këtë një shkelje kushtetuese.

The post Murati vë në dyshim qëndrimin e opozitës për afatet kushtetuese: Pse heshtën atëherë e flasin tani? appeared first on Albeu.com.

Lidhja Demokratike e Kosovës ka reaguar pasi Kuvendi i Kosovës njoftoi se seanca konstituive do të vazhdojë ditën e nesërme.

Në një postim në Facebook, kjo parti ka ngritur shqetësimin se Kuvendi i Republikës së Kosovës ende nuk është konstituuar, ndonëse afati është përcaktuar me Aktgjykimin e Gjykatës Kushtetuese.

LDK vlerëson se kjo gjendje mund ta çojë Republikën e Kosovës drejt paqartësisë kushtetuese dhe mungesës së plotë të legjitimitetit institucional. Sipas saj, pasojat për funksionimin e rregullt të institucioneve dhe për sigurinë juridike në vend mund të jenë të pariparueshme.

Partia thekson se gjatë tërë procesit ka mbajtur një qëndrim të qartë dhe të pandryshuar: Kuvendi duhet të konstituohet brenda afatit të caktuar nga Gjykata Kushtetuese.

Në reagimin e LDK-së thuhet gjithashtu se ky qëndrim është paraqitur në secilin takim konsultativ, përfshirë takimin e zhvilluar sot nga Kryetari i LDK-së.

The post LDK kërkon konstituimin e Kuvendit brenda afatit të vendosur nga Kushtetuesja appeared first on Albeu.com.

Deputetëve të rinj të Kuvendit të Kosovës u kanë mbetur vetëm pak orë për të përmbyllur seancën konstituive, pasi e premtja shënon ditën e fundit të afatit 30-ditor të përcaktuar nga Gjykata Kushtetuese.

Ekspertët e çështjeve juridike, Eugen Cakolli dhe Naim Jakaj, pajtohen se tejkalimi i këtij afati do të përbënte shkelje kushtetuese. Megjithatë, ata kanë qëndrime të ndryshme lidhur me veprimet që mund të ndërmerren më pas.

Eugen Cakolli, nga Instituti Demokratik i Kosovës, thotë se moskonstituimi i Kuvendit brenda afatit do ta vendoste vendin përballë një shkeljeje të rëndë kushtetuese.

Sipas tij, data 7 gusht përbën një afat absolut dhe nuk mund të shtyhet, edhe pse Kushtetuta e Kosovës nuk përcakton qartë pasojat juridike që do të prodhonte mosrespektimi i tij.

“Më shumë sesa zbrazëti kushtetuese, mungesa e këtij, le të themi, sanksioni, unë besoj që është fakti që nuk është supozuar kur është shkruar Kushtetuta që mund të arrijmë pikën ku Kuvendi nuk e konstituon as veten”, thotë Cakolli.

Më 6 gusht, kryetari i Lëvizjes Vetëvendosje, Albin Kurti, kërkoi shtyrjen e seancës konstituive, duke e arsyetuar këtë me nevojën për më shumë kohë për diskutimet rreth çështjes së presidentit. Ai nuk propozoi emër për kryeparlamentar, duke bërë që procesi i konstituimit të ndërpritej.

Cakolli vlerëson se, nëse Kuvendi nuk konstituohet deri në mesnatë, kryesuesi i seancës, Avni Dehari, nuk do të ketë më bazë kushtetuese për ta thirrur vazhdimin e saj.

“Unë besoj që është e qartë që deputetët, pas mesnatës së sotme, nuk kanë të drejtë të mblidhen as me vetiniciativë, e lëre më që t’i thërrasë zoti Dehari, në këtë rast, si kryesues i seancës, për shkak të moshës së tij”, shprehet ai.

Sipas Cakollit, bllokada nuk do të ndikonte vetëm në funksionimin e Kuvendit. Ai thotë se ministrat dhe zëvendësministrat që aktualisht janë në detyrë, pasi kanë bërë betimin si deputetë, nuk mund të vazhdojnë njëkohësisht të ushtrojnë edhe funksionet ekzekutive.

Për rrjedhojë, ai e cilëson Qeverinë në detyrë të Kosovës si “pa legalitet dhe pa legjitimitet”, ndërsa paralajmëron se vendimet e saj mund të kundërshtohen në gjykata.

Cakolli thotë se rruga e parë juridike pas moskonstituimit të Kuvendit brenda afatit do të ishte inicimi i një rasti në Gjykatën Kushtetuese. Në planin politik, megjithatë, ai e sheh përfundimin e krizës si pothuajse të paracaktuar.

“Zgjedhjet janë të pashmangshme, thjesht mbetet të gjendet rruga drejt tyre”, deklaron Cakolli.

Ai shton se Kosova ka humbur tashmë kohë për shkak të krizave institucionale dhe se zgjedhjet e reja do të ishin skenari më i pafavorshëm. Megjithatë, nëse Kuvendi nuk arrin të formohet, Cakolli nuk sheh alternativë tjetër kushtetuese për zgjidhjen e ngërçit.

Naim Jakaj, nga Instituti i Kosovës për Drejtësi, gjithashtu e konsideron shkelje kushtetuese mosrespektimin e afatit për konstituimin e Kuvendit, por ndryshon me Cakollin sa u përket hapave pas mesnatës së 7 gushtit.

Jakaj argumenton se, përderisa nuk është përcaktuar një sanksion i drejtpërdrejtë për moskonstituimin brenda afatit, mbetet e mundur që seanca konstituive të thirret edhe pas 7 gushtit.

“Normalisht, që edhe nëse kalon afati i sotëm, ai [kryesuesi Dehari] duhet ta thërrasë seancën konstitutive. Fatkeqësisht, nuk ka pasojë juridike. Sikur të kishte, do të vepronte në mënyrë të detyrueshme”.

Ai shfaq rezerva edhe për mundësinë që çështja t’i dërgohet sërish Gjykatës Kushtetuese.

Sipas Jakajt, një procedurë e re në Kushtetuese nuk do ta zgjidhte patjetër krizën politike, pasi kjo gjykatë nuk do të kishte çfarë të shtonte përtej konstatimit se “deputetët e Kuvendit të Kosovës janë të obliguar që të veprojnë në interesin më të mirë të vendit dhe që [Kuvendi] është dashur të konstituohet brenda 30 ditëve”.

Megjithatë, Jakaj paralajmëron se vazhdimi i bllokadës mund të sjellë pasoja të rënda.

Ai e lidh krizën e tanishme me afatin për zgjedhjen e presidentit, duke rikujtuar se ushtrimi i detyrës së presidentit nuk mund të zgjasë më shumë se 6 muaj, pra deri në fillim të tetorit.

Albulena Haxhiu, kryetare e legjislaturës së 10-të, u betua më 6 gusht si deputete e legjislaturës së 11-të. Ajo e ushtron detyrën e Presidentes që nga prilli 2026, kur Vjosa Osmanit i përfundoi mandati pesëvjeçar në krye të shtetit të Kosovës.

“Ne do të hyjmë në një situatë të cilën nuk e kemi shkelur asnjëherë… kjo do të prodhojë pasoja të cilat ne nuk i kemi parë më herët, dhe të cilat në rendin demokratik lirisht mund të quhen rrënim i demokracisë”, thotë Jakaj.

Ai paralajmëron se, nëse institucionet e reja nuk krijohen deri në përfundimin e mandatit të ushtruesit të detyrës së presidentit, Kosova mund të mbetet pa një autoritet që do të kishte mundësi të shpallte zgjedhjet ose t’ia jepte mandatin për formimin e Qeverisë kandidatit për kryeministër.

Jakaj u bën thirrje partive politike që të gjejnë sa më shpejt një marrëveshje për konstituimin e Kuvendit, krijimin e Qeverisë dhe zgjedhjen e presidentit, me qëllim që vendi të mos përballet me atë që ai e quan “anarki institucionale”.

Thirrje për përmbylljen e procesit brenda afatit kushtetues kanë bërë edhe përfaqësues të tjerë të shoqërisë civile në Kosovë.

Grupi për Studime Juridike dhe Politike (GLPS), përmes një reagimi publik, deklaroi “se interesat partiake kanë tejkaluar interesin publik duke bllokuar funksionimin e institucioneve dhe duke dëmtuar besimin e qytetarëve”.

“Sot nuk ka më hapësirë për justifikime, interpretime të gjëra politike apo shtyrje të mëtejshme. Ekziston vetëm një detyrim i qartë, konstituimi i Kuvendit brenda afatit kushtetues. Çdo dështim për ta përmbushur këtë obligim do të ishte shkelje e kushtetutës dhe një akt i papërgjegjshëm politik dhe institucional”, tha GLPS në reagimin e tij./REL

The post Çfarë pasojash sjell moskonstituimi i Kuvendit të Kosovës deri në mesnatë? appeared first on Albeu.com.

Deputetët e Kuvendit të Kosovës pritet të mblidhen sonte për të nisur konstituimin e legjislaturës së re.

Lajmi është bërë i ditur ekskluzivisht për KosovaPress nga burime brenda Kuvendit të Kosovës.

Seanca konstituive mund të nisë rreth orës 20:00 ose 21:00. Në këtë mbledhje, Lëvizja Vetëvendosje pritet të propozojë emrin e kandidatit për kryetar të Kuvendit.

Ndërkohë, kreu i VV-së, Albin Kurti, dhe kryetari i LDK-së, Lumir Abdixhiku, ndodhen në takim, ku po diskutojnë mundësinë e arritjes së një marrëveshjeje për çështjen e presidentit.

Para takimit me Kurtin, Abdixhiku deklaroi se Kuvendi duhet të konstituohet sot, duke theksuar se partia që ai drejton nuk do të nënshtrohet. Kurti, nga ana tjetër, tha se do të ketë lajme sapo të arrihet një marrëveshje.

Një ditë më parë, Kurti nuk paraqiti kandidat për postin e kryetarit të Kuvendit, pasi kërkoi më shumë kohë për të negociuar një marrëveshje politike me LDK-në.

The post Kuvendi i Kosovës pritet të konstituohet sonte appeared first on Albeu.com.

Sot përfundon periudha kushtetuese për themelimin e Kuvendit të Kosovës, teksa mbetet ende e paqartë se kur do të rifillojë sesioni inaugurues i Legjislaturës së XI-të, i pezulluar ditën e enjte.

Ndërprerja e seancës erdhi pas kërkesës së liderit të Lëvizjes Vetëvendosje, Albin Kurti, i cili kërkoi më shumë kohë për t’u konsultuar me përfaqësuesit e subjekteve politike, me qëllim gjetjen e një marrëveshjeje për zgjedhjen e kreut të shtetit.

Deputetët e Partisë Demokratike të Kosovës (PDK) e kundërshtuan këtë kërkesë, por Avni Dehari, që drejtonte seancën, vendosi ta pezullojë atë.

Para se punimet të ndaleshin, Kuvendi arriti të kryejë dy pikat e para të rendit të ditës: miratoi krijimin e Komisionit për Verifikimin e Mandateve dhe zhvilloi ceremoninë e betimit për ligjvënësit e rinj.

Pasi u konstatua se mandatet e deputetëve përputheshin me legjislacionin aktual, ata dhanë betimin solemn, përfshirë edhe anëtarët e Listës Serbe.

Deri në këto momente, nuk ka asnjë njoftim zyrtar për thirrjen e vazhdimit të seancës inauguruese. Nëse procesi i konstituimit nuk mbyllet brenda kornizës kushtetuese, vendi rrezikon të hyjë në një etapë të re të pasigurisë politike dhe procedurale.

The post Afati i fundit për formimin e Kuvendit të Kosovës përfundon sot appeared first on Albeu.com.