Lëvizja e qytetarëve në trotuaret e Tetovës po vështirësohet nga hapësirat e zëna prej bizneseve dhe kafeneve. Tavolina, karrige, frigoriferë, mallra për shitje dhe materiale të tjera vendosen në këto zona, duke bllokuar kalimin e lirë.

Me pengesat më të mëdha përballen personat me nevoja të veçanta dhe prindërit që përdorin karroca për fëmijë. Krahas pajisjeve të nxjerra nga subjektet afariste, ata ankohen edhe për automjetet që parkohen mbi trotuare.

Situata paraqitet veçanërisht problematike në segmentin që nis nga rrethrrotullimi pranë vendit të njohur si Ëmbëltorja Taksi dhe vazhdon deri te Xhamia e Pashës. Në këtë pjesë të qytetit, pothuajse çdo biznes ka zënë në një formë ose tjetër një pjesë të trotuarit.

Autoritetet e Komunës së Tetovës janë të informuara për këtë dukuri dhe kanë bërë të ditur se kontrollet do të shtohen duke filluar nga dita e hënë. Gjithashtu është paralajmëruar zhvillimi i një fushate sensibilizuese.

Kryetari i Komunës së Tetovës, Bilall Kasami, deklaroi se do të bashkëpunojë me inspektoratin komunal për heqjen e çdo pengese që kufizon lëvizjen e lirë të qytetarëve. Sipas tij, komuna merr masa në vazhdimësi dhe inspektorët ndodhen çdo ditë në terren për t’u përballur me këtë problem.

Kasami theksoi se gjatë lëvizjes së përditshme në Tetovë vërehet se qytetarët nxjerrin lloje të ndryshme mallrash dhe pajisjesh, me të cilat bllokohet kalimi. Ai shtoi se inspektorati ndërhyn për largimin e tyre, ndërsa në raste të caktuara konfiskon si mallrat, ashtu edhe pajisjet që pengojnë rrugën.

Kur trotuari zihet pa leje ose kur tejkalohen kufijtë e hapësirës së miratuar, inspektorati mund të urdhërojë heqjen e pajisjeve dhe të vendosë sanksione. Janë dokumentuar edhe raste kur lokaleve u është caktuar një afat për të larguar tavolinat dhe karriget e vendosura në mënyrë të paligjshme mbi trotuar. /tv21

The post Tetovarët kërkojnë çlirimin e trotuareve dhe hapësirave publike appeared first on Albeu.com.

Sipas të dhënave më të reja nga Instituti i Shëndetit Publik (ISHP), Komuna e Tetovës ka bërë të ditur se banorët mund ta përdorin ujin e rrjetit pa asnjë shqetësim për të pirë dhe për të gjitha aktivitetet shtëpiake.

“Të gjithë qytetarët e Tetovës informohen se, duke u mbështetur në analizat më të fundit të realizuara nga Instituti i Shëndetit Publik, cilësia e ujit në qytet lejon konsumimin e tij të lirë për çdo nevojë të përditshme”, thuhet në njoftim.

Ndërkohë, për zonën e Kodrës së Diellit, rekomandimi është i ndryshëm. Komuna sqaron se uji që furnizon këtë pjesë duhet trajtuar si ujë teknik dhe nuk këshillohet për t’u pirë, për shkak se nuk kalon në procesin e dezinfektimit me klor, çka e bën të papërshtatshëm për konsum njerëzor.

The post Njoftim nga Komuna e Tetovës: Uji i qytetit i sigurt për konsum appeared first on Albeu.com.

Vala e të nxehtit dhe punimet në fushat e korrura kanë sjellë një fluks të shtuar thirrjesh për Njësinë Territoriale kundër Zjarrit në Tetovë. Sipas këtij institucioni, në 90 për qind të rasteve, flakët ndizen nga fermerët që pastrojnë parcelat duke djegur kashtën dhe mbetjet e tjera bimore.

Avni Ameti, shefi i njësisë, bën të ditur se vetëm ekipi i Tetovës kryen mesatarisht dhjetë ndërhyrje çdo ditë. “Kjo periudhë e korrjeve të grurit sjell detyrimisht një ngarkesë të madhe pune, pasi bujqit i vënë zjarrin arave dhe ne përballemi me një numër të lartë zjarresh. Stafi ynë nuk lejohet të marrë pushime gjatë korrikut e gushtit, që për ne është ‘sezoni’ i zjarreve, dhe e gjithë skuadra mbahet në gatishmëri të plotë. Një kontribut të çmuar marrim edhe nga nënstacionet në Tearcë dhe Bogovinë,” theksoi ai.

Përtej problemeve me vatrat e zjarrit, banorët e rajonit po përballen së fundmi edhe me një shqetësim tjetër: shtimin e pranisë së gjarpërinjve. Bashkim Sulejmani nga e njëjta njësi tregon se ka pasur raste kur ekipet janë thirrur për të larguar zvarranikë nga banesat dhe oborret. Megjithatë, ai siguroi qytetarët se shumica e specieve që hasen në Pollog nuk përbëjnë kërcënim për jetën e njeriut, megjithëse u bëri thirrje të gjithëve të tregojnë vigjilencë.

Ndërkohë, në repartin kirurgjik të spitalit të Tetovës, ditët e fundit janë regjistruar dy pacientë të kafshuar nga gjarpërinjtë.

The post Vala e të nxehtit dhe djegia e mbetjeve bujqësore rrisin angazhimet e zjarrfikësve në Tetovë appeared first on Albeu.com.

Këshilli Komunal i Tetovës ka vendosur të heqë nga rendi i ditës pikën që parashikonte emërtimin e 67 rrugëve. Propozimi u tërhoq me 20 vota pro, ndërsa nuk pati asnjë votim kundër apo abstenim.

Seanca u braktis fillimisht nga grupi i këshilltarëve të BDI-së, por në momentin e vazhdimit të mbledhjes, në sallë u paraqit vetëm koordinatori i tyre, Berat Murati.

Pas një diskutimi të zgjatur, përfaqësuesit e Këshillit arritën në përfundimin që kjo çështje të rikthehet për vlerësim në Komisionin përgjegjës për emërtimin e rrugëve.

Ky komision e ka filluar aktivitetin e tij disa vite më parë dhe, bazuar në informacionet e dhëna gjatë seancës, deri tani janë realizuar dy diskutime me publikun rreth kësaj teme.

Kryetari i Komunës së Tetovës, Bilall Kasami, e cilësoi të gabuar propozimin e ardhur nga BDI, duke theksuar se procedurat për riemërtimin e rrugëve tashmë kanë nisur.

The post Hiqet nga axhenda propozimi për emrat e rrugëve në Tetovë, mungojnë këshilltarët e BDI-së appeared first on Albeu.com.

Seanca e 15-të e Këshillit të Komunës së Tetovës u shoqërua me tensione dhe u deshën katër orë diskutime e dy pauza koordinuese për të miratuar rendin e ditës. Pavarësisht se u pranua kërkesa e tyre për të shtuar në axhendë një pikë për riemërtimin e 67 rrugëve, këshilltarët e BDI-së vendosën të largohen nga mbledhja.

Propozimi i BDI-së për riemërtimin e rrugëve mori mbështetje jo vetëm nga anëtarët e kësaj partie, por edhe nga këshilltarët e koalicionit VLEN. Grupet e tjera politike në këshill e kundërshtuan ose abstenuan gjatë procesit të votimit.

Pakënaqësia e përfaqësuesve të BDI-së buronte nga fakti që pika e propozuar prej tyre do të trajtohej e fundit, pas 25 çështjeve të tjera të parashikuara në rendin e ditës. Pas një pauze të dytë koordinuese, ata zgjodhën të braktisnin seancën.

Berat Murati, që drejton grupin këshillimor të BDI-së, shpjegoi arsyet e këtij veprimi: “Ne e lamë mbledhjen sepse, edhe pse disa herë insistuam që çështja jonë të ishte e para në axhendë, kolegët e VLEN-it dhe kryetari e refuzuan vazhdimisht. Patëm tri apo katër konsultime, por sërish u mor vendimi që pika jonë të mos ishte prioritare.”

Nga ana tjetër, nënkryetari i komunës, Albi Qamili, i cili bën pjesë në radhët e VLEN-it, i interpretoi veprimet e BDI-së si një tentativë për të krijuar përçarje artificiale. Sipas tij, qëllimi ishte që të errësoheshin arritjet e pushtetit vendor, si fillimi i punimeve në aksin rrugor Tetovë-Prizren.

“Sot dëshmuam një qëndrim të çuditshëm nga këshilltarët e BDI-së, të cilët, duke u përpjekur të vënë në skenë një shfaqje politike, kërkuan që emrat e rrugëve të rivotoheshin. Pasi ua miratuam kërkesën, ata thjesht u larguan,” deklaroi Qamili. Ai njoftoi gjithashtu se Komisioni për Riemërtimin e Rrugëve do të mblidhet të nesërmen për të filluar zgjidhjen e problematikës në përputhje me procedurat ligjore.

Çështja e emërtimit të rrugëve u rikthye në fokus pasi më 17 qershor Gjykata Kushtetuese e shfuqizoi vendimin e mëparshëm të Këshillit të Komunës së Tetovës, të marrë në vitin 2007.

The post Përplasje në Këshillin e Komunës së Tetovës, këshilltarët e BDI-së braktisin mbledhjen appeared first on Albeu.com.

Në Tetovë, Bashkimi Demokratik për Integrim (BDI) organizoi edhe sot një protestë kundër vendimit të Gjykatës Kushtetuese, e cila shfuqizoi emrat në shqip të rrugëve dhe shesheve të qytetit.

Marshi i protestuesve nisi nga sheshi “Iliria” dhe përfundoi para ndërtesës së Komunës së Tetovës. Aty u vendosën pankarta me thirrjet “Edhe rrugët flasin shqip” dhe “Historia nuk abrogohet”, ndërsa pjesëmarrësit kërkuan edhe dorëheqjen e kryetarit të Komunës së Tetovës, Bilall Kasami.

Para nisjes së protestës, kryetari i degës së BDI-së në Tetovë, Bajram Rexhepi, deklaroi se Komuna e Tetovës ka penguar qytetarët për të marrë pjesë në këtë protestë të dytë.

Sipas Rexhepit, veprimet e tyre të mëtejshme do të varen nga mënyra se si do të reagojë Komuna e Tetovës lidhur me këtë çështje.

“Shihni një mal me njerëz të cilët janë duke treguar mllefin ndaj kthimit të emrave të vjetër të rrugëve të Komunës së Tetovës. Ajo që na ka befasuar është se si Komuna e Tetovës po mundohet të pengojë pjesëmarrjen e qytetarëve në protestë. Kemi njoftuar policinë për protestën. Por edhe korin diplomatik në Shkup, të cilët janë duke monitoruar protestën. Protestat do të vazhdojnë dhe ato varen nga reflektimi të cilin do të tregojë Komuna e Tetovës”, tha Rexhepi.

Kjo shënon protestën e dytë të organizuar nga BDI në Tetovë për të kundërshtuar vendimin e Gjykatës Kushtetuese për heqjen e emrave të rrugëve dhe shesheve.

Disa ditë më parë, Gjykata Kushtetuese e shfuqizoi vendimin e Komunës së Tetovës të vitit 2007 për riemërtimin e rrugëve dhe shesheve, me arsyetimin se për këtë nuk ishte marrë pëlqimi i Qeverisë.

The post BDI proteston sërish në Tetovë: “Historia nuk abrogohet” dhe “Edhe rrugët flasin shqip” appeared first on Albeu.com.

Në protestën e zhvilluar sot, kryetari i degës së BDI-së në Tetovë, Bajram Rexhepi, deklaroi se Komuna e Tetovës ka penguar qytetarët të marrin pjesë në protestën e dytë.

Sipas tij, hapat që do të ndërmarrin më tej do të varen nga mënyra se si do të reagojë Komuna e Tetovës ndaj kësaj çështjeje.

“Shihni një mal me njerëz të cilët janë duke treguar mllefin ndaj kthimit të emrave të vjetër të rrugëve të Komunës së Tetovës. Ajo që na ka befasuar është se si Komuna e Tetovës po mundohet të pengojë pjesëmarrjen e qytetarëve në protestë. Kemi njoftuar policinë për protestën. Por edhe korin diplomatik në Shkup, të cilët janë duke monitoruar protestën. Protestat do të vazhdojnë dhe ato varen nga reflektimi të cilin do të tregojë Komuna e Tetovës”, tha Rexhepi.

I pyetur për mundësinë që në Tetovë të mbahen zgjedhje për këshilltarë, Rexhepi u shpreh se janë të përgatitur për zgjedhje, por theksoi se propozimi i tyre nuk është i njëjtë me atë që është shfuqizuar nga Gjykata Kushtetuese.

The post BDI mban sërish protestë në Tetovë, Rexhepi: Ka një numër të madh pjesëmarrësish, komuna ka penguar ardhjen e qytetarëve appeared first on Albeu.com.

Bashkimi Demokratik për Integrim ka dalë sërish me reagim ndaj qasjes politike të kryetarit të Komunës së Tetovës, Bilall Kasami.

Sipas BDI-së, Kasami edhe një herë ka treguar para qytetarëve mungesë fuqie politike dhe institucionale.

Në komunikatën e saj, kjo parti vlerëson se, duke mos qenë në gjendje të marrë përgjegjësi dhe të japë zgjidhje për problemet e Tetovës, ai po përpiqet ta mbulojë dështimin përmes tezave për zgjedhje të reja për Këshillin e Komunës së Tetovës.

Në reagimin e plotë, BDI shprehet se Bilall Kasami, i njohur që në rini për vargjet e lavdisë kushtuar Josip Broz Titos, më pas pjesë e koalicionit parazgjedhor “Mozheme”, ndërsa sot pjesë e një Qeverie pa legjitimitetin e shqiptarëve, e ka shfaqur në disa raste pafuqinë e tij politike para opinionit.

Sipas tyre, kjo është parë kur Kryeministri ia ndërpreu fjalën publikisht, në raportet e tij me ministra të Qeverisë, si dhe edhe tani, kur, sipas BDI-së, ai nuk po tregon guxim politik për të mbrojtur emrat e rrugëve dhe shesheve të Tetovës.

BDI thekson se në vend të hapave konkretë, Kasami po nxjerr teori juridike të paqena, ndërsa në vend të përgjegjësisë po kërkon alibi. Po ashtu, sipas kësaj partie, në vend të bashkëpunimit për zgjidhjen e çështjes, ai po përpiqet të prodhojë një krizë artificiale dhe më pas ta përdorë si arsye për zgjedhje të reja.

Në komunikatë thuhet edhe se, për hir të së vërtetës, BDI nuk e ka propozuar si pikë të rendit të ditës të njëjtën listë emrash që është abroguar nga Gjykata Kushtetuese. Sipas tyre, lista e propozuar përmban gjithsej 67 emra dhe, për këtë arsye, kjo çështje nuk mund të shërbejë as si shkak dhe as si pretekst për shpërbërjen e Këshillit të Komunës së Tetovës.

Më tej, BDI vlerëson se Bilall Kasami duhet të heqë dorë nga shmangia e përgjegjësisë dhe të punojë me këshilltarët dhe forcat politike për ta zgjidhur këtë problem në dobi të Tetovës dhe banorëve të saj.

Megjithatë, sipas kësaj partie, duket se ai ende nuk ka marrë leje nga OBRM-PDUKM-ja për të votuar nismën e shqiptarëve për rikthimin e emrave të rrugëve dhe shesheve, të cilët, sipas reagimit, janë abroguar në mënyrë antikushtetuese nga Gjykata Kushtetuese.

BDI ngre pyetjen nëse Bilall Kasami ka marrë ose jo leje nga OBRM-PDUKM për ta votuar nismën e shqiptarëve. Sipas saj, nëse ekziston vullneti, ai duhet ta votojë, ndërsa nëse nuk guxon, duhet ta deklarojë publikisht se është në pritje të lejes nga partnerët e tij qeveritarë.

Në fund, BDI deklaron se nëse Bilall Kasami dhe partnerët e tij kërkojnë zgjedhje, atëherë ai nuk duhet të fshihet pas shpërbërjes së Këshillit Komunal. Sipas partisë, ai duhet të japë menjëherë dorëheqje nga posti i Kryetarit të Komunës së Tetovës dhe më pas të shkohet në zgjedhje.

Në reagim thuhet gjithashtu se një kryetar komune që nuk arrin të zgjidhë asnjë problem të vetëm të Tetovës, që për çdo dështim kërkon justifikime, që përgjegjësinë ua hedh të tjerëve dhe që për çdo vendim pret sinjal nga partnerët e tij në Qeveri, nuk mund të mbajë peng as Këshillin Komunal dhe as qytetarët e Tetovës.

BDI përmbyll duke theksuar se, nëse Bilall Kasami dëshiron zgjedhje, ai nuk duhet ta sakrifikojë Këshillin për të shpëtuar veten, por duhet të japë dorëheqje dhe të përballet vetë me qytetarët e Tetovës.

The post BDI kërkon largimin e menjëhershëm të Bilall Kasamit, kundërshton shpërbërjen e Këshillit të Komunës së Tetovës appeared first on Albeu.com.

Nisma e BDI-së për rivotimin e vendimit të vitit 2007 lidhur me riemërimin e rrugëve në Tetovë është pranuar nga Këshilli Komunal i Tetovës, njofton TV21.

Kryetari i Këshillit Komunal, Jusuf Abduli, deklaroi se nga pikëpamja ligjore, nëse hidhet sërish në votim një vendim që më herët është shfuqizuar nga Gjykata Kushtetuese, atëherë Këshilli Komunal shpërndahet automatikisht dhe vendi shkon në zgjedhje të parakohshme.

“Vlen të sqarohet se në rast të votimit të të njëjtës pikë, janë mundësitë që Këshilli edhe të shpërndahet, nëse marrim për bazë edhe vendimin e Gjykatës Kushtetuese…Në rast po të njëjtit vendim, mundësitë janë shumë të mëdha që Këshilli i Komunës së Tetovë të shpërndahet”, theksoi Abduli.

Mbledhja e këshillit është planifikuar të mbahet të hënën, më 13 korrik, ndërsa në rendin e ditës është përfshirë edhe pika për rivotimin e vendimit të vitit 2007 për emërtimin e rrugëve në Tetovë.

The post Jusuf Abduli paralajmëron mundësinë e shpërndarjes së Këshillit të Komunës së Tetovës appeared first on Albeu.com.

BDI – Dega Tetovë ka bërë të ditur se më 11 korrik do të mbajë një protestë qytetare, në reagim ndaj vendimit të Gjykatës Kushtetuese për shfuqizimin e emrave të rrugëve dhe të sheshit në Tetovë.

Sipas kumtesës së kësaj dege, Komuna e Tetovës nuk e ka paraqitur dokumentacionin që ishte kërkuar nga Gjykata Kushtetuese, dhe kjo, sipas BDI-së, ka ndikuar që të anulohet vendimi për emërtimin e rrugëve dhe të rikthehen emërtimet e mëparshme.

“Prandaj, për ne është më se e qartë se Bilall Kasami mban përgjegjësi të drejtpërdrejtë politike për këtë vendim skandaloz. Heshtja dhe mosveprimi i tij ndaj kërkesave të Gjykatës Kushtetuese përbëjnë përgjegjësi të rëndë ndaj interesit, historisë dhe dinjitetit të qytetarëve të Tetovës”, thuhet në kumtesën e BDI-së.

Nga Dega e BDI-së në Tetovë u është bërë thirrje të gjithë qytetarëve që të marrin pjesë në këtë protestë, të cilën ata e përshkruajnë si një reagim për mbrojtjen e dinjitetit, historisë dhe identitetit të qytetit.

The post BDI në Tetovë paralajmëron protestë më 11 korrik pas vendimit për emrat e rrugëve appeared first on Albeu.com.