Një total prej 160 kërkesash për dëmshpërblim janë dorëzuar nga qytetarë dhe subjekte juridike në Kumanovë, pas motit të keq që përfshiu rajonin pak kohë më parë.

Kërkesat lidhen kryesisht me dëmtimin e çative dhe fasadave të ndërtesave, automjeteve, si dhe me pasojat e përmbytjeve të shkaktuara nga ujërat atmosferike.

Komisioni për Vlerësimin e Dëmeve do t’i shqyrtojë kërkesat dhe do të kryejë vlerësimet në terren. Në përfundim të këtij procesi, ai do të hartojë një elaborat që do t’i përcillet komisionit përkatës në Qeveri.

Kryetari i Komunës së Kumanovës, Maksim Dimitrievski, bëri të ditur se stuhia nuk ka shkaktuar vetëm dëme materiale, por ka prekur edhe infrastrukturën rrugore dhe sinjalistikën e komunikacionit.

Sipas Dimitrievskit, në zonat rurale po punohet bashkë me N.P. “Pyjet Nacionale” për zgjidhjen e problemeve të krijuara. Ai tha se janë rrëzuar tre semaforë sinjalizues, ndërsa dëmi më i rëndë ka qenë shembja e kutisë kryesore të kontrollit, ku ndodhet automati i të gjithë semaforëve sinjalizues në Bulevardin “Treta MUB”. Ky defekt është eliminuar, ndërsa ende mbetet për t’u zgjidhur problemi në udhëkryqin pranë Tregut të Gjelbër.

Komuna duhet të sigurojë fondet e nevojshme për blerjen dhe instalimin e sinjalistikës së re. Dëme nga stuhia kanë pësuar edhe institucionet komunale, përveç qytetarëve dhe subjekteve private.

Aleksandar Kërstevski, drejtor i Shtëpisë për të Moshuar në Kumanovë, deklaroi se objekti i institucionit është dëmtuar në disa pjesë.

Ai njoftoi se janë thyer dhe shkulur disa drunj, janë dëmtuar instalime e dritare, ndërsa probleme janë shfaqur edhe në çatinë e objektit dhe në pjesë të tjera. Sipas Kërstevskit, dëmet janë riparuar përmes donacioneve.

Edhe pse ka kaluar më shumë se një muaj nga moti i lig, në Kumanovë dhe në rrethinë vijojnë punimet për riparimin dhe largimin e pasojave të stuhisë.

Punonjësit e ndërmarrjeve komunale dhe ekipet e N.P. “Pyjet Nacionale” po largojnë drunjtë e rrëzuar e të shkulur, ndërsa paralelisht po punohet për rikthimin e rrjetit elektrik shpërndarës.

The post Kumanovë, 160 kërkesa për kompensim pas dëmeve nga stuhia appeared first on Albeu.com.

Rezultatet e deritanishme të kontrolleve të kryera nga Qendra për Shëndet Publik, laboratori i Stacionit filtrues dhe Instituti për Shëndet Publik dëshmojnë se uji nga ujësjellësi i Kumanovës është i sigurt për pije. Këtë e bëri të ditur Toni Jonçevski, udhëheqës i Stacionit filtrues Kumanovë.

Sipas tij, cilësia e ujit në Kumanovë mbikëqyret në 11 pika matëse, përfshirë edhe Stacionin filtrues. Krahas kontrolleve të rregullta, çdo tre muaj realizohen edhe analiza periodike të zgjeruara.

“Uji në Kumanovë kontrollohet nga 11 vende matëse, mes të cilave është edhe Stacioni filtrues, ndërsa bëhet edhe analiza periodike, të zgjeruara në çdo tre muaj. Uji nga sistemi ujësjellës në Kumanovë është i sigurt për shfrytëzim sipas rezultateve të deritanishme. Analizat merren edhe nga Qendra pëlr shëndet publik, nga laboratoria e jonë dhe nga Instituti për shëndet publik. Të gjitha analizat deri tani tregojnë se uji është i sigurt për pije”, deklaron Jovçevski.

Jovçevski sqaroi gjithashtu funksionin e klorit rezidual, i cili hidhet në ujë pasi përfundon procesi i pastrimit. Ky klor shërben si masë shtesë sigurie brenda rrjetit të furnizimit.

“Klori rezidual është klori që i shtohet ujit pas pastrimit dhe në fakt është mbrojtësi i ujit të pijshëm, domethënë shërben si mbrojtje kundër ndotjes së mundshme sekondare dhe për shkatërrimin e mikroorganizmave që mund të jenë të pranishëm në ujë”, shprehet Jovçevski.

Sa i përket furnizimit gjatë temperaturave të larta të verës, deri tani nuk janë regjistruar defekte apo ndërprerje të mëdha. Rezervuarët kanë qenë të mbushur këtë vit, ndërsa “Ekonomia e ujërave” siguron rregullisht sasi shtesë përmes bajpasit. Në përdorim janë edhe sasitë që vijnë nga “Mitev Most” dhe “Bedinje”.

“Duke marrë parasysh që rezervuarët ishin plot këtë vit, ‘Ekonomia e ujërave’ lëshon rregullisht sasi shtesë uji përmes bajpasit, ndërsa përdoren edhe sasitë nga ‘Mitev Most’ dhe ‘Bedinje’. Deri tani, nuk kemi vërejtur ndonjë ndërprerje të madhe të furnizimit me ujë”, thotë Jovçevski.

Pavarësisht furnizimit të qëndrueshëm, në mbrëmje dhe veçanërisht gjatë intervaleve kur kërkesa rritet, pjesët më të larta të Kumanovës mund të përballen me rënie të presionit. Jovçevski e lidh këtë situatë me përdorimin joracional në zonat e poshtme të qytetit, ku tërhiqen sasi të mëdha uji dhe, si rrjedhojë, dobësohet presioni në zonat më të larta.

“Ekonomia e Ujërave” u bën thirrje qytetarëve që ta përdorin me kujdes dhe në mënyrë racionale ujin e rrjetit, sidomos në periudhat me konsum të shtuar. Kjo do të ndihmonte në ruajtjen e presionit të qëndrueshëm dhe në garantimin e furnizimit pa pengesa për të gjithë shfrytëzuesit.

The post Analizat konfirmojnë se uji në Kumanovë mund të pihet pa rrezik appeared first on Albeu.com.

Komuna e Kumanovës ka njoftuar se faza e dytë e spërkatjes ajrore kundër mushkonjave të rritura do të zhvillohet të mërkurën, më 5 gusht, duke nisur në orën 05:00.

Trajtimi do të mbulojë gjithsej 1,270 hektarë. Në të do të përfshihen rrjedhat e lumenjve Kumanovka, Lipkovka dhe Kojnarka, bashkësitë lokale Babin Dol, Goce Delçev dhe Tode Mendol, pjesa qendrore e qytetit, si edhe hapësira rreth impiantit të trajtimit të NP “Ujësjellësi” në fshatin Dobrashan.

Sipas autoriteteve komunale, gjatë ndërhyrjes do të aplikohet preparati Aqua Perm-X 30-30. Komuna u kërkon bletarëve të ndërmarrin masat e nevojshme për mbrojtjen e kolonive të bletëve gjatë trajtimit. Në rast se moti pengon realizimin e spërkatjes në orarin e parashikuar, ajo do të zhvendoset për ditën pasuese, sapo kushtet atmosferike të jenë të përshtatshme.

The post Kumanova më 5 gusht realizon spërkatjen e dytë ajrore kundër mushkonjave appeared first on Albeu.com.