Qeveria ka paralajmëruar ndërtimin e një spitali të ri në Kërçovë, investim që do të kushtojë 22 milionë euro. Objekti planifikohet të ngrihet në hyrje të qytetit, përgjatë rrugës magjistrale dhe në afërsi të Kazermës.

Megjithatë, historia e gjatë e spitalit që mbeti i papërfunduar ka ngritur pikëpyetje nëse banorët e Kërçovës vazhdojnë t’u besojnë premtimeve të reja.

Një qytetar u shpreh skeptik, duke theksuar se objekti po ndërtohet prej 30 vitesh dhe se gjatë kësaj kohe janë ndërruar “100 qeveri”.

Një tjetër banor tha se beson në realizimin e projektit, ndërsa vendndodhjen e propozuar e vlerësoi si më të mirë dhe më të gjerë.

Një qytetar tjetër u shpreh i bindur se spitali do të ndërtohet “100%”, duke shtuar se përgjegjësit tashmë duhet të jenë ngopur “me të vjedhur e me gjithçka”.

Banorë të tjerë thanë se shpresojnë dhe besojnë në përfundimin e projektit. Të pyetur nëse vendndodhja më e përshtatshme është ajo e objektit të vjetër apo zona pranë Kazermës, ata vlerësuan se një spital i ri do të ishte më mirë të ndërtohej te Kazerma.

Zëvendësministri i Shëndetësisë, Jovica Andovski, bëri të ditur se marrëveshja me Bankën Botërore për zbatimin e projektit pritet të nënshkruhet brenda tre deri në gjashtë muajve.

Andovski deklaroi se synimi është që problemi të trajtohet seriozisht dhe të marrë një zgjidhje të qëndrueshme e funksionale. Sipas tij, plani i investimit është përllogaritur në 22.5 milion euro dhe parashikon ngritjen e një objekti të ri spitalor me kapacitet nga 80 deri në 120 shtretër. Spitali do të pajiset me aparaturë moderne medicinale dhe do të ofrojë kushte bashkëkohore për diagnostikim, shërbime specialistike dhe trajtim spitalor.

Objekti aktual, i ndërtuar prej dekadash por që nuk u vu asnjëherë në funksion, do të marrë një destinim tjetër. Kryetari i Komunës së Kërçovës, Aleksandar Jovanovski, tha se ai do të përdoret si shtëpi për të moshuar dhe për fëmijë me nevoja të veçanta. /tv21

The post Kërçova pritet të bëhet me spital të ri pranë Kazermës, ndërsa qytetarët mbeten skeptikë pas 30 vitesh pritje appeared first on Albeu.com.

Koncepti për ngritjen e një objekti të ri spitalor në Kërçovë u shqyrtua gjatë një vizite në spitalin e qytetit nga zëvendësministri i Shëndetësisë, Jovica Andovski, kryetari i Komunës së Kërçovës, Aleksandar Jovanovski, drejtoresha e Spitalit të Përgjithshëm Kërçovë, Maja Cvetanovska Trajkovska, si dhe një delegacion i Bankës Botërore.

Vlera e projektit të parashikuar arrin në rreth 1,38 miliardë denarë, ose 22,5 milionë euro.

Andovski deklaroi se Kërçova prej disa dekadash përballet me kushte të papërshtatshme në spital dhe se tashmë është koha që kjo çështje të zgjidhet në mënyrë funksionale dhe afatgjatë. Sipas tij, synimi është që banorëve t’u mundësohet kujdes i sigurt shëndetësor në qytetin e tyre, ndërsa personelit mjekësor t’i krijohen kushte bashkëkohore për punë.

Në kompleksin e planifikuar do të përfshihen ambiente moderne për diagnostikim, trajtim spitalor dhe ndërhyrje urgjente, krahas sistemeve të gazrave mjekësorë dhe zgjidhjeve me efikasitet energjetik.

Shërbimet e spitalit do të jenë në dispozicion të qytetarëve të Komunës së Kërçovës dhe banorëve të zonave përreth. Në këtë mënyrë pritet të zvogëlohet nevoja që pacientët të udhëtojnë për trajtim në Shkup, Ohër ose Manastir.

Ministria e Shëndetësisë vlerëson se ndërtimi i objektit të ri do t’i japë fund pasigurisë së zgjatur ndër vite dhe do të mundësojë një zgjidhje të qëndrueshme për kujdesin shëndetësor në Kërçovë dhe në rajon.

The post Andovski: Kërçova do të bëhet me spital të ri, investimi vlerësohet në 22,5 milionë euro appeared first on Albeu.com.