Stadiumi “Loro Boriçi” mirëpriti turneun “Kupa e Miqësisë”, ku u përfshinë katër skuadra veteranësh: Kombëtarja Shqiptare e Veteranëve, Vllaznia e Veteranëve, Flamurtari i Veteranëve dhe Michigan. Aktiviteti bashkoi ish-futbollistë me kontribut në futboll, duke vendosur në qendër sportin, respektin dhe miqësinë.

Ndeshja hapëse u zhvillua mes Vllaznisë së Veteranëve dhe Flamurtarit të Veteranëve. Skuadra shkodrane siguroi fitoren me rezultatin 1-0 dhe avancoi më tej në turne.

Gjysmëfinalja tjetër vuri përballë Kombëtaren Shqiptare të Veteranëve dhe Michigan. Koha e rregullt përfundoi në barazim 1-1, ndaj fituesi u përcaktua përmes penalltive. Kombëtarja Shqiptare e Veteranëve triumfoi 4-3, duke prerë biletën për në finale.

Aktin e fundit të turneut e luajtën Vllaznia e Veteranëve dhe Kombëtarja Shqiptare e Veteranëve. Pas një dueli me emocione, Vllaznia fitoi 2-1 dhe ngriti trofeun e “Kupës së Miqësisë”.

Ky organizim shërbeu gjithashtu si një rikthim në fushë për emra të njohur të futbollit shqiptar, ndërsa afroi skuadra dhe breza të ndryshëm përmes pasionit të përbashkët për sportin. “Kupa e Miqësisë” përcolli mesazhin se futbolli mbetet një mjet bashkimi, respekti dhe shoqërie, duke u dhënë veteranëve mundësinë të përjetojnë sërish emocionet e lojës në një aktivitet të veçantë sportiv.

The post Kupa e Miqësisë/ Veteranët përballen në “Loro Boriçi”, trofeu i shkon Vllaznisë appeared first on Albeu.com.

Alain Taho është vetëm 19 vjeç, por paraqitjet e tij kanë tërhequr vëmendjen e mediave italiane dhe jo vetëm. Portieri shqiptar është pjesë e Inter U23 dhe së fundmi është përfshirë mes 11 futbollistëve më të mirë të lindur në vitin 2007.

Paraqitjet e tij me Shqipërinë U21 kanë bërë që në Itali ta shohin si një prej kandidatëve për t’u shndërruar në portierin e së ardhmes për Interin. Nëse vazhdon të ruajë këtë nivel dhe arrin të debutojë me ekipin zikaltër, Taho do të shkruante historinë si futbollist i Shqipërisë duke arritur në nivele të tilla.

Trajneri Cristian Chivu e ka grumbulluar disa herë 19-vjeçarin me skuadrën e parë, edhe pse ai ende nuk e ka zhvilluar debutimin. Për shërbimet e tij kanë mbërritur oferta të shumta nga Zvicra dhe Portugalia, por dëshira e portierit është të vijojë karrierën te Interi.

Taho përshkruhet si një gardian modern, i sigurt dhe i guximshëm në daljet nga porta, ndërsa zotëron edhe një teknikë të lartë. Rrugëtimi i tij me ekipet e moshave të Interit nisi në vitin 2018 dhe që prej atëherë ai ka qëndruar besnik ndaj klubit zikaltër.

The post Alain Taho, portieri shqiptar 19-vjeçar dhe 193 centimetra i gjatë që po spikat te Interi appeared first on Albeu.com.

Kombëtarja shqiptare ka bërë një ndryshim në listën e futbollistëve të thirrur për takimet e UEFA Nations League.

Qazim Laçi është detyruar të largohet nga grumbullimi dhe nuk do të jetë në dispozicion të trajnerit Rolando Maran. Mesfushori pësoi një dëmtim në ndeshjen e djeshme, gjatë së cilës ndjeu dhimbje të forta në muskulin fleksor të kofshës.

Rezonanca magnetike, e kryer mëngjesin e sotëm, tregoi se Laçi ka një dëmtim të shkallës së parë në muskulin fleksor të kofshës së majtë. Lojtari do të rikthehet pranë klubit të tij për të nisur programin e rehabilitimit.

Vendin e tij në grupin kuqezi do ta zërë Feta Fetai. Ai pritet t’i bashkohet ekipit në vijim dhe të marrë pjesë në përgatitjet për sfidat e ardhshme të UEFA Nations League.

Kuqezinjtë e kanë nisur sot grumbullimin për katër ndeshjet e para të këtij kompeticioni. Shqipëria do të luajë kundër Bjellorusisë, Finlandës dhe San Marinos, me këtë të fundit që do të përballet në dy takime.

The post Maran ndryshon listën e Kombëtares pas dëmtimit të Qazim Laçit, zbulohet zëvendësuesi appeared first on Albeu.com.

Shqipëria nis të shtunën aventurën në Nations League me përballjen ndaj Bjellorusisë, ndeshje që do të zhvillohet në orën 20:45. Për këtë takim, nga salla e konferencave të stadiumit “Air Albania”, foli mesfushori Ylber Ramadani.

Ramadani e cilësoi sfidën të vështirë dhe kërkoi që skuadra të tregojë më shumë seriozitet, ndërsa theksoi nevojën për të ndryshuar mentalitetin me synimin për të ecur përpara.

Sipas tij, trajneri e ka bërë të qartë që në fillim se kërkon një lojë të bazuar në presion të lartë. Ai shtoi se tekniku e analizon dhe e përgatit gjithmonë ndeshjen në mënyrë që Shqipëria të arrijë të befasojë kundërshtarin.

I pyetur nëse e sheh veten titullar, mesfushori u shpreh se nuk ka asnjë problem, duke kujtuar se edhe kur ka qenë në formën më të mirë nuk ka luajtur. Ramadani nënvizoi se, pavarësisht nëse do të aktivizohet apo jo, do të mbështesë shokët e skuadrës për objektivin e përbashkët.

Ai theksoi gjithashtu se çdo futbollist dëshiron të përfaqësojë vendin e tij, por vendimet për formacionin i merr trajneri. Për Ramadanin, më e rëndësishmja është që ekipi të fitojë, pavarësisht nëse ai do të jetë në fushë.

Duke folur për katër ndeshjet radhazi dhe kundërshtarin më të vështirë, Ramadani tha se futbolli ka ndryshuar dhe se çdo skuadër mund të shkaktojë surpriza. Megjithatë, ai bëri të ditur se objektivi i Shqipërisë është ta mbyllë grupin në vendin e parë.

The post Çdo skuadër mund të na befasojë”, Ramadani para përballjes me Bjellorusinë: Vendos trajneri, unë do ta mbështes Shqipërinë edhe nëse nuk luaj appeared first on Albeu.com.

Ndeshja e parë e Kombëtares shqiptare në Nations League për këtë javë do të luhet të shtunën ndaj Bjellorusisë, me start në orën 20:45. Në konferencën për shtyp të zhvilluar në ambientet e stadiumit “Air Albania”, para gazetarëve doli sulmuesi Rey Manaj.

Në pyetjen se si e vlerësoi takimin e parë me trajnerin e ri gjatë sfidës kundër Polonisë, Manaj theksoi se ato përballje ishin krejt të ndryshme nga ato që vijnë tani. Ai shtoi se fundi i sezonit bën që lojtarët t’i kushtojnë vëmendje dhe pushimeve dhe shprehu keqardhjen për atë çfarë ndodhi me Ukrainën, megjithatë nënvizoi se ekipi i vërtetë do të jetë pikërisht ky në Nations League dhe se do të luftojnë për kryesimin e grupit.

Kur u ndal te shanset në këtë grup, sulmuesi pranoi se skuadra vjen në një moment të mirë, por zhvillimet në merkato kanë bërë që ajo të mos jetë në formën optimale. Objektivi real për të mbetet pjesëmarrja në Kampionatin Europian dhe këto takime shërbejnë si një ndihmesë e madhe për t’u përgatitur. Ai siguroi se të gjithë janë të përqendruar në të njëjtin qëllim dhe kanë motivimin e duhur për të dhënë gjithçka.

Lidhur me konkurrencën në repartin ofensiv, Manaj e konsideroi rivalitetin si një element pozitiv. Pavarësisht se kush luan mes tij, Dakut, Shpendit, Uzunit apo të tjerëve, roli në fushë nuk përbën problem, pasi secili prej tyre kalon një periudhë të mirë.

Për mungesat që ka grumbullimi, ai u shpreh i qetë, duke thënë se në futboll mund të aktivizohesh ose jo, gjithçka varet nga momenti dhe se detyra e çdo lojtari është të japë maksimumin e vet.

The post Forma e shkëlqyer në Turqi dhe synimi i qartë, Rey Manaj pas grumbullimit me Kombëtaren: Momente të tilla e përcaktojnë futbollin, duam vendin e parë për në… appeared first on Albeu.com.

Pas angazhimeve me klubet e tyre në ligat përkatëse, futbollistët e Kombëtares shqiptare rikthehen në grumbullim. Sipas njoftimit të FSHF-së, dy lojtarë të skuadrës do të dalin para mediave prej orës 12:00, ku do të flasin për përgatitjet, përshtypjet e tyre dhe përballjen e ardhshme me Bjellorusinë.

Programi i kuqezinjve vijon sot me seancën e parë stërvitore nën drejtimin e trajnerit Rolando Maran, e planifikuar të nisë në orën 16:00.

Për teknikun italian pritet të jenë ditë të ngarkuara, pasi do të ketë mundësinë të punojë më pranë me grupin e përbërë nga 29 lojtarët e përzgjedhur. Të shtunën e 26 shtatorit, Shqipëria do të luajë ndeshjen e parë zyrtare me Maran në stol, teksa në “Air Albania” do të përballet me Bjellorusinë prej orës 20:45.

Maran e ka nisur aventurën në drejtimin e Shqipërisë me dy miqësore, ndaj Izraelit dhe Luksemburgut, të cilat përfunduan me humbje. Tashmë, italiani synon të lërë pas këto rezultate dhe të nisë një cikël të ri, me objektiv rezultate pozitive dhe vendin e parë në Ligën B të Nations League.

The post Kuqezinjtë nisin grumbullimin, ja agjenda e Kombëtares shqiptare deri në sfidën me Bjellorusinë appeared first on Albeu.com.

Gazetari sportiv Gjergji Stefa, gjatë një lidhjeje direkte në emisionin “Mega Sport” të transmetuar nga “A2CNN”, analizoi numrin e ulët të futbollistëve të kampionatit shqiptar të përfshirë në listën e Kombëtares.

Në grumbullimet e përcaktuara nga trajneri Rolando Maran për ndeshjet e shtatorit dhe tetorit, nga kampionati vendas janë thirrur vetëm Naser Aliji i Dinamos dhe Mario Dajsinani i Egnatias.

Stefa deklaroi se futbolli shqiptar aktualisht nuk po prodhon lojtarë që mund të përballojnë nivelet e larta dhe të meritojnë një vend në përfaqësuese, duke theksuar se prania e tyre nuk mund të justifikohet thjesht për të bërë “qoka”.

Sipas tij, Shqipëria ka arritur rezultate të rëndësishme në edicionet e fundit, përfshirë fitoren 3-0 ndaj Çekisë, triumfin 2-0 kundër Polonisë, barazimin në Çeki, si edhe sukseset përballë Ukrainës, Gjeorgjisë dhe Serbisë në Serbi. Për këtë arsye, ai shtoi se lojtarët e kampionatit shqiptar duhet të jenë në gjendje të luajnë në ndeshje të këtij niveli për të merituar ftesën.

“Nëse vendosim që në ekipin kombëtar të bëjmë qoka, atëherë, siç tha edhe Dabi, pjesërisht me të drejtë, duhet të marrim futbollistë nga kampionati shqiptar. Por, për fatin tonë të keq, kampionati shqiptar sot nuk prodhon asnjë lojtar të denjë për nivele të larta, qoftë për U-21-shin, qoftë për Kombëtaren e madhe”, u shpreh Stefa.

Ai nënvizoi se mungesa e futbollistëve të tillë nuk është faji i vetë kampionatit, por rezultat i gjendjes së futbollit në Shqipëri. “Nëse më thoni se kampionati shqiptar ka lojtarë të denjë për t’i aktivizuar në këto ndeshje dhe për t’i fituar, atëherë jemi në rregull. Por nuk ka. Kampionati e meriton të mos ketë, sepse Shqipëria e futbollit nuk bën dot asgjë”, deklaroi gazetari.

The post Gjergji Stefa: Kampionati shqiptar nuk po nxjerr lojtarë për Kombëtaren, të denjët duhet të provohen appeared first on Albeu.com.

Edhe pse kontrata me Lazion përfundoi më 1 korrik, Elseid Hysaj vazhdon të jetë në kërkim të një klubi të ri. Mbrojtësi 32-vjeçar po e përgatit veten gjatë kësaj periudhe duke u stërvitur me Vllazninë.

Me 100 ndeshje të zhvilluara, Hysaj është një prej futbollistëve më të rëndësishëm të Kombëtares shqiptare. Ai vijon të jetë titullar i rregullt me kuqezinjtë, pavarësisht se ende nuk ka gjetur një skuadër në nivel klubesh.

Grumbullimi me Shqipërinë mund të shërbejë si një shtysë për shkodranin në prag të një aventure të re. Megjithatë, mbetet për t’u përcaktuar nëse ai do ta nisë nga minuta e parë në sfidat e Ligës së Kombeve.

Rikthimi i Ivan Balliut, i cili kishte menduar edhe të largohej nga Kombëtarja, mund të ndikojë në vendimin e trajnerit për formacionin.

The post Hysaj ende pa ekip, grumbullimi me Shqipërinë mund t’i hapë një kapitull të ri appeared first on Albeu.com.

Shqipëria do të nisë një etapë të re në UEFA Nations League, ku katër përballjet e para do t’i zhvillojë kundër Bjellorusisë, Finlandës dhe San Marinos. Me këtë të fundit, kuqezinjtë do të luajnë dy herë.

Trajneri Rolando Maran publikoi sot listën e futbollistëve të grumbulluar. Naser Aliji, i cili prej vitesh aktivizohet me Kombëtaren shqiptare, është i vetmi lojtar i thirrur nga Superiorja.

Pas ftesës së mbrojtësit në përfaqësuese, ka ardhur edhe reagimi i Dinamos. Klubi kryeqytetas është shprehur krenar që futbollisti i tij do të jetë pjesë e kuqezinjve për ndeshjet e Nations League.

“Naser Aliji grumbullohet nga Shqipëria. Mbrojtësi dinamovit do të jetë pjesë e grupit të Rolando Maran për ndeshjet e Ligës së Kombeve”, shkruan Dinamo.

The post Dinamo shpreh krenarinë për Naser Alijin, i vetmi lojtar nga Superiorja i ftuar në Kombëtare appeared first on Albeu.com.

Trajneri Rolando Maran bëri publike sot listën e futbollistëve të grumbulluar për përballjet e Kombëtares në Nations League, ku ra në sy mungesa e sulmuesit Jasir Asani.

Lënia jashtë përfaqësueses shqiptare nuk është pritur mirë nga Asani, i cili shprehu pakënaqësinë e tij përmes dy postimeve me tone ironike në rrjetet sociale.

“Po rri urtë, se e di veten. Historia nuk harrohet kurrë. Më mirë të mos flas më…”, shkroi sulmuesi, duke e shoqëruar reagimin edhe me disa emoji të qeshurash.

The post Mungoi në listën e Kombëtares, Jasir Asani reagon me ironi: Historia nuk harrohet kurrë appeared first on Albeu.com.