Belgjika ka prerë biletën për në çerekfinalet e Kupës së Botës 2026, pasi triumfoi 4-1 ndaj Shteteve të Bashkuara në një prej sfidave më të komentuara të raundit të 16-të.

Figura kryesore e suksesit belg ishte Charles De Ketelaere, që shkëlqeu me dy gola të shënuar dhe një asistim në një mbrëmje të jashtëzakonshme.

Ai i dha avantazhin Belgjikës që në minutën e 9-të, ndërsa në të 33-tën realizoi sërish, duke regjistruar golin e tij të dytë personal.

Në fraksionin e dytë të lojës, De Ketelaere shërbeu për Hans Vanaken, i cili në minutën e 57-të dërgoi topin në rrjetë për rezultatin 3-1.

Golin që mbylli përfundimisht ndeshjen e realizoi Romelu Lukaku, i futur nga stoli, i cili shënoi të katërtin për Belgjikën në minutën e 93-të.

Nga ana e SHBA-së, i vetmi që gjeti rrugën e rrjetës ishte Malik Tillman, që në minutën e 31-të realizoi nga goditja e dënimit dhe rindezi përkohësisht shpresat e vendasve.

Kjo ndeshje tërhoqi shumë interes edhe përpara nisjes, për shkak të çështjes së Folarin Balogun. Komiteti disiplinor i FIFA-s miratoi ankesën e SHBA-së dhe hoqi pezullimin e sulmuesit, duke e bërë atë të gatshëm për këtë takim.

Balogun u aktivizua nga minuta e parë, por nuk ia doli të ndikojë në tentativën e amerikanëve për të nxjerrë jashtë Belgjikën.

Pas këtij suksesi, Belgjika shkon në çerekfinale të Kupës së Botës, aty ku e pret Spanja në një përballje që premton shumë spektakël.

The post Belgjika i jep leksion SHBA-së, De Ketelaere udhëheq “Djajtë e Kuq” drejt çerekfinales appeared first on Albeu.com.

Skuadra që del fituese nga kjo ndeshje do të kalojë në çerekfinale, aty ku tashmë pret Spanja, e cila siguroi kualifikimin pas triumfit 1-0 ndaj Portugalisë.

Para kësaj sfide, një nga çështjet më të komentuara ka qenë ajo e sulmuesit amerikan Folarin Balogun. FIFA vendosi t’i heqë kartonin e kuq të marrë në ndeshjen e kaluar, çka i mundëson të jetë në formacion që nga minuta e parë përballë Belgjikës.

Nga krahu tjetër, trajneri i Belgjikës, Rudy Garcia, ka zgjedhur të ndërhyjë në formacionin titullar me katër lëvizje në raport me ndeshjen e fundit.

Në mbrojtje, Ngoy aktivizohet në të majtë në vend të Theate. Në repartin e mesfushës, Onana dhe Raskin e nisin nga fillimi, duke zëvendësuar Vanaken dhe De Bruyne. Ndërkohë, Jeremy Doku nuk është titullar dhe qëndron në bankën rezervë, ndërsa Dodi Lukebakio e nis sfidën nga minuta e parë.

Formacionet zyrtare

SHBA: Freese, Freeman, Ream, Richards, Robinson, Tillman, Adams, Dest, McKennie, Pulisic, Balogun.

Belgjika: Courtois, Castagne, Ngoy, Mechele, De Cuyper, Onana, Tielemans, Lukebakio, Raskin, Trossard, De Ketelaere.

The post SHBA-Belgjikë për një vend në çerekfinale, ja formacionet zyrtare appeared first on Albeu.com.

Rudi Garcia ka shpërthyer kundër FIFA-s, pasi institucioni vendosi t’i japë mundësi Folarin Balogun të aktivizohet në ndeshjen e 1/8 së finales së Kupës së Botës përballë Belgjikës, edhe pse sulmuesi i SHBA-së ishte ndëshkuar me karton të kuq në takimin paraardhës.

Balogun u nxor me të kuq në triumfin 2-0 të Shteteve të Bashkuara të Amerikës ndaj Bosnjës dhe Hercegovinës, pasi arbitri, pas verifikimit me VAR, vendosi ta ndëshkonte direkt për një ndërhyrje ndaj Tarik Muharemovic. Në rrethana normale, rregullorja parashikon që lojtari të mungojë automatikisht në ndeshjen pasuese.

Por FIFA zgjodhi të zbatojë Nenin 27 të Kodit të saj Disiplinor, duke e pezulluar me kusht dënimin për një afat njëvjeçar. Kjo nënkupton se Balogun mund të luajë kundër Belgjikës, ndërsa pezullimi do të zbatohet vetëm në rast se ai përsërit një shkelje të ngjashme gjatë kësaj periudhe.

Ky zhvillim ka sjellë pakënaqësi të madhe te Belgjika. Gjatë konferencës për shtyp në Seattle, Garcia e komentoi vendimin me ironi: “Nuk e dija që ishte 1 prilli dita e gënjeshtrave më 5 korrik në Kupën e Botës”, tha Garcia me ironi.

Ai sqaroi se kundërshtimi i federatës belge nuk ka të bëjë thjesht me interesin sportiv të përfaqësueses së tij, por me vetë bazat mbi të cilat duhet të mbështetet futbolli.

“Ne nuk po mbrojmë ekipin kombëtar apo federatën. Ne po mbrojmë futbollin, integritetin dhe etikën e tij”, deklaroi ai.

Sipas Garcias, bëhet fjalë për një rast të paprecedentë në historinë e Kampionatit Botëror. Në të njëjtën linjë reagoi edhe Federata Belge e Futbollit, e cila në një komunikatë u shpreh e “habititur” nga veprimi i FIFA-s dhe solli në vëmendje Nenin 66.4 të Kodit Disiplinor, ku përcaktohet se një karton i kuq direkt sjell pezullim automatik për ndeshjen e ardhshme.

“Mendoj se kjo është hera e parë në historinë e Kupës së Botës që merret një vendim i tillë”, tha Garcia.

Ndërkohë, Belgjika ka bërë të ditur se po shqyrton të gjitha alternativat e mundshme për të mbrojtur të drejtat e ekipeve kombëtare dhe parimin e lojës së ndershme, teksa çështja Balogun pritet të vazhdojë të ndezë debat para përballjes mes Belgjikës dhe SHBA-së.

The post Rudi Garcia kritikon FIFA-n: Vendimi për Balogun krijon një precedent të rrezikshëm në futboll appeared first on Albeu.com.

Me fitoren 2:0 ndaj Bosnjës dhe Hercegovinës në ndeshjen e raundit të 16-të, të luajtur në Santa Clara, SHBA-ja ka prerë biletën për në 1/8 e finales të Kupës së Botës.

Ekipi amerikan vulosi suksesin falë golave të Folarin Balogun në minutën e 45-të dhe Malik Tillman në minutën e 82-të, duke siguruar kështu përballjen e radhës me Belgjikën më 7 korrik në orën 14:00.

Ndeshja nisi më mirë për Bosnjën dhe Hercegovinën, që fitoi një goditje nga këndi që në minutën e parë. Rasti më i mirë i pjesës së parë për boshnjakët erdhi në minutën e 11-të, kur Kerim Alajbegović provoi, por Matt Freese ndërhyri në mënyrë vendimtare.

SHBA-ja u shfaq e rrezikshme fillimisht me Christian Pulisic, ndërsa Balogun gjeti rrjetën në minutën e 31-të, por goli nuk u pranua për shkak të pozicionit jashtë loje. Sulmuesi amerikan nuk gaboi në fundin e pjesës së parë, kur realizoi pas një devijimi të pafavorshëm në mbrojtjen e Bosnjës dhe Hercegovinës.

Vështirësitë për Bosnjën dhe Hercegovinën u shtuan në pjesën e dytë, kur kapiteni Edin Dzeko u detyrua të largohej i dëmtuar në minutën e 51-të. Më pas, në minutën e 63-të, Balogun u ndëshkua me karton të kuq pas një ndërhyrjeje që u verifikua nga VAR-i, duke ndryshuar rrjedhën e takimit.

Edhe pse kishte epërsi numerike, Bosnja dhe Hercegovina nuk arriti të ndërtonte raste të pastra shënimi. Nga ana tjetër, SHBA-ja ruajti organizimin në mbrojtje dhe në minutën e 82-të goditi sërish, me Tillman që realizoi nga gjuajtja e lirë për 2-0.

Deri në fund, përpjekjet e Bosnjës dhe Hercegovinës për të ndryshuar fatin e ndeshjes mbetën të pasuksesshme, ndërsa SHBA-ja e mbylli takimin me një kualifikim të merituar në fazën tjetër të turneut.

The post SHBA mposht edhe Bosnjën dhe Hercegovinën, siguron kalimin në 1/8 e finales të Kupës së Botës appeared first on Albeu.com.

Mauricio Pochettino, përzgjedhësi i Shteteve të Bashkuara të Amerikës, ka përcjellë një mesazh të prerë për futbollistët e tij në prag të duelit me Bosnja dhe Hercegovinën në raundin e 1/16-ave të Kupës së Botës 2026.

Pasi kaluan pa vështirësi në fazën me eliminim direkt dhe e mbyllën Grupin D në krye falë fitoreve të qarta ndaj Paraguait (4-1) dhe Australisë (2-0), amerikanët tani përballen me një test që, sipas trajnerit të tyre, nuk lejon asnjë lëshim.

“Kjo është finalja e Kupës së Botës. Nëse nuk mendojmë kështu, mendoj se do të kemi vështirësi. E kemi parë tashmë në të gjitha ndeshjet pas fazës së grupeve sa e vështirë është. Asnjë ndeshje nuk ishte e lehtë për askënd dhe nuk kemi një shans tjetër nëse dështojmë. Nëse kalojmë tutje, ndeshja tjetër do të jetë një finale e re e Kupës së Botës. Kjo është mënyra jonë e të menduarit dhe mentaliteti ynë. Jemi në finale”, deklaroi Pochettino.

Argjentinasi refuzoi ta konsiderojë ekipin e tij si favorit të padiskutueshëm, duke kujtuar se ky turne ka prodhuar jo pak rezultate të papritura.

“Të gjithë thonë se Gjermania është favorite, por Paraguai e mundi. Shikoni sa e vështirë ishte për Brazilin kundër Japonisë. Në këtë Kupë Bote, duhet të jemi të kujdesshëm se kush është favorit dhe kush jo”, tha ai.

Sipas Pochettinos, fakti që SHBA-ja është vend organizator nuk i jep skuadrës asnjë garanci në fushë.

“E kuptoj që ne konsiderohemi favoritë sepse jemi SHBA-të dhe organizatorët e kampionatit. Mund t’i kemi tifozët në anën tonë, por kemi shumë respekt për Bosnjën dhe Hercegovinën. Nëse duam të fitojmë dhe të kalojmë në fazën tjetër, duhet të luajmë sa më mirë që mundemi”, shtoi ai.

Tekniku u ndal edhe te pesha emocionale që sjellin sfidat me eliminim direkt, duke u kërkuar lojtarëve të tij të mos lejojnë që ndjenjat të marrin kontrollin e lojës.

“Një ndeshje si kjo është 90 përqind, ndoshta 85 përqind, një ndeshje e luajtur me emocione. Nëse mund ta zvogëlojmë këtë në 70, 60 ose 50 përqind, nëse e zvogëlojmë ngarkesën emocionale dhe përqendrohemi më shumë te loja dhe i lëmë emocionet për në fund, mendoj se kjo është shumë më mirë”, vazhdoi ai.

Në përfundim, Pochettino theksoi se futbolli mbetet i mbushur me elemente të paparashikueshme dhe se skuadra e tij duhet të ruajë të njëjtën qasje që e ka çuar deri këtu.

“Gjëra të paparashikueshme mund të ndodhin në futboll. Ne përpiqemi t’i minimizojmë ato. Por duhet t’i qasemi kësaj si në ndeshjet e mëparshme. Bëhet fjalë për të dalë në fushë dhe për të provuar të luajmë pa ngarkesë.”

Përballja mes SHBA-së dhe Bosnjës e Hercegovinës, që vlen një vend në çerekfinale, është planifikuar të luhet të enjten në orën 02:00 të mëngjesit.

The post Pochettino paralajmëron SHBA-në para Bosnjës: Ta trajtojmë si një finale të Kupës së Botës appeared first on Albeu.com.