Ekipi i drejtuar nga Zlatko Dalic hasi vështirësi që në nisje të takimit. Në pjesën e parë, loja e kroatëve ishte e ngadalshme dhe pa shumë zgjidhje, ndërsa mesfusha me Luka Modric dhe Mateo Kovacic nuk arriti të diktonte ritmin përballë presionit të Panamasë.

Në fakt, gjatë 45 minutave të para, më kërcënues u shfaqën kundërshtarët, të cilët ndërtuan disa raste të mira për të kaluar në avantazh.

Dominik Livakovic ishte vendimtar për të mbajtur skuadrën e tij në lojë, teksa realizoi disa pritje të rëndësishme. Mes tyre spikati ndërhyrja ndaj Jose Luis Rodríguez në minutën e 23-të, në një nga momentet më delikate të pjesës së parë.

Për të ndryshuar rrjedhën e ndeshjes, Dalic ndërhyri shpejt me dy zëvendësime, duke aktivizuar Ante Budimirin dhe Andrej Kramaric, ndërsa Ivan Perisic kaloi në krahun e majtë të mbrojtjes. Pikërisht këto lëvizje rezultuan vendimtare për fatin e sfidës.

Goli që përcaktoi fituesin erdhi në minutën e 55-të, kur Marco Pasalic dha një asist të saktë për Budimirin në shtyllën e dytë, me këtë të fundit që realizoi nga afërsia për 1:0.

Vetëm dy minuta më pas, Kroacia pati mundësinë të vuloste përfundimisht ndeshjen, por fillimisht Martin Baturina dhe më pas Pašalić nuk arritën të shfrytëzonin një rast të pastër përpara portës së zbrazët.

Panamaja nuk u dorëzua dhe u hodh përpara në kërkim të barazimit, duke krijuar sërish situata të rrezikshme. Megjithatë, përballë gjeti një Livakovic në formë të shkëlqyer, i cili ndali dy tentativa të Murillos dhe një goditje me kokë të Harvey.

Deri në vërshëllimën e fundit, Kroacia e administroi me kujdes epërsinë minimale dhe mori tre pikë shumë të vlefshme. Me këtë fitore, kroatët vazhdojnë të kenë shpresa për kalimin në fazën e 16-shes, ndërsa Panamaja mbetet pothuajse pa mundësi për të avancuar më tej në turne.

The post Kroacia fiton ngushtë ndaj Panamasë dhe ruan shanset për kualifikim në fazën eliminatore appeared first on Albeu.com.

Vendimi i sfidës erdhi vetëm në çastet e fundit. Në minutën e pestë të kohës shtesë, Caleb Yirenkyi finalizoi një kundërsulm të shpejtë dhe i dhuroi skuadrës së tij tri pikë me shumë vlerë.

Ndonëse rezultati përfundimtar buzëqeshi për Ganën, ishte Panamaja ajo që u duk më kërcënuese gjatë pjesës së parë. Që në minutën e dytë, Waterman pati një mundësi shumë të mirë, por Lawrence Ati-Zigi reagoi në mënyrë të shkëlqyer dhe e shmangu golin.

Ekipi amerikanolatin vazhdoi të diktonte posedimin dhe ritmin e takimit. Në minutën e 33-të, panamezët pretenduan për penallti pasi Martinez u rrëzua në zonë, por arbitri vendosi të mos sinjalizonte asgjë.

Pak çaste para fundit të pjesës së parë, Ati-Zigi pësoi një dëmtim në kofshë dhe nuk mundi të vazhdonte më lojën, duke ia lënë vendin Asares në portë.

Pas pushimit, Gana u shfaq më e guximshme dhe më e rrezikshme në fazën sulmuese. Adjetey provoi me kokë, ndërsa Panamaja shpërdoroi rastin më të pastër të ndeshjes në minutën e 60-të, kur Martinez nuk arriti të shënonte nga një pozicion ideal.

Më vonë, Jordan Ayew iu afrua golit për Ganën, por Ramos ndërhyri në çastin e fundit dhe e largoi rrezikun. Në aksionin pasues, i njëjti futbollist i Panamasë krijoi një mundësi të mirë në krahun tjetër, por tentativa e tij përfundoi pranë shtyllës.

Kur gjithçka po shkonte drejt një barazimi pa gola, ganezët goditën në shtesë. Në minutën e 95-të, Brandon Thomas-Asante depërtoi nga e majta dhe dërgoi topin në shtyllën e dytë, ku Caleb Yirenkyi e shtyu pa vështirësi në rrjetën e boshatisur për 1-0.

Panamaja reagoi menjëherë dhe iu afrua barazimit në sekondat e fundit, por një goditje me kokë pas një rrëmuje në zonë nuk shkoi në kuadrat. Pas bilbilit përfundimtar, pati edhe tension mes futbollistëve të të dy përfaqësueseve, duke mbyllur një duel dramatik.

Kështu, Gana merr tri pikët e para në Grupin L, ndërsa Panamaja mbetet pa asnjë pikë, pavarësisht paraqitjes pozitive.

The post Gana e nis me fitore Kupën e Botës 2026, Yirenkyi ndëshkon Panamanë në minutën e 95-të appeared first on Albeu.com.