Një valë lamtumirash ka përfshirë botën e futbollit, teksa emra të rëndësishëm kanë vendosur të mbyllin kapitullin e tyre me fanellat përfaqësuese pas këtij Botërori. Nga portierë legjendarë deri te sulmues ikonë, plot 11 yje kanë konfirmuar largimin nga skena ndërkombëtare.

Manuel Neuer, gardiani gjerman 40-vjeçar, ka vendosur t’i japë fund rrugëtimit me “Die Mannschaft”. Ai shkëlqeu në vitin 2010 në debutimin e tij në Kupën e Botës dhe preku majat katër vjet më vonë, duke u kurorëzuar kampion bote në Brazil. Fatkeqësisht, periudha e fundit nuk ka qenë po aq e ndritur për Gjermaninë dhe eliminimi me penallti kundër Paraguait shënoi ndeshjen e tij të fundit me përfaqësuesen.

Sulmuesi çek Patrik Schick, 30 vjeç, që mahniti publikun në Euro 2020, pati rastin të debutojë në një Botëror pikërisht këtë verë. Megjithatë, ai nuk arriti të lërë gjurmë në këtë turne, duke mbetur pa shënuar dhe Çekia u përshëndet që në fazën e grupeve.

Meksikani Guillermo Ochoa, 41 vjeç, mbetet një figurë emblematike për vendin e tij, sidomos pas paraqitjes monumentale në Botërorin 2014, kur neutralizoi të gjithë sulmin brazilian. Në këtë edicion, minuta e tij ishin të pakta, por ato 12 minuta në fushë ndaj Çekisë u shoqëruan me një përshëndetje prekëse nga bashkëlojtarët.

Për Riyad Mahrez, 35 vjeç, rrugëtimi në Kupat e Botës ishte i veçantë. Pasi kishte luajtur vetëm një herë në vitin 2014, atij iu desh të priste 12 vite për të shtuar minutat në këtë garë. Dy golat e tij kundër Austrisë nuk mjaftuan, pasi Algjeria u eliminua nga Zvicra në raundin e parë, në atë që ishte ndeshja e tij e fundit me kombëtaren.

Enner Valencia, 36 vjeç, ka qenë për vite një pikë referimi për Ekuadorin, duke realizuar gjashtë gola në gjashtë sfida gjatë turneve të 2014-s dhe 2022-shit. Në këtë Botëror, megjithatë, ai nuk arriti të tundte rrjetën dhe rrugëtimi u ndal përpara Meksikës në të njëjtin raund eliminimi.

Argjentinasi Nicolas Otamendi, 38 vjeç, ishte protagonist absolut në triumfin e Katarit 2022, duke luajtur çdo minutë të mundshme. Edhe pse debutimi i tij në Botëror datonte në vitin 2010, në Amerikën e Veriut hapësirat ishin më të reduktuara. Ai kishte paralajmëruar që në mars se ky do të ishte turneu i tij i fundit, dhe lamtumira në “La Bombonera” u bë edhe më e veçantë kur Lionel Messi i dorëzoi atij një penallti për ta ekzekutuar.

Për Marko Arnautovic, 37 vjeç, Kupa e Botës ishte njëkohësisht debutim dhe lamtumirë. Ai shënoi dy herë për Austrinë, por ekipi i tij u ndal në raundin e 1/32-ve nga Spanja, duke i dhënë fund historisë së tij me përfaqësuesen.

Senegalezi Sadio Mane, 34 vjeç, kishte marrë pjesë në Botërorin 2018, por një dëmtim e la jashtë katër vite më vonë. Pas daljes nga ky turne, ai dha njoftimin zyrtar me fjalë prekëse: “E dhashë gjithçka për këtë fanellë, sakrifikova maksimalisht. Gjithmonë kam luftuar për vendin tim”.

Portieri skocez Craig Gordon, 43 vjeç, përmbylli një karrierë kombëtare me 84 ndeshje, të nisur në vitin 2004. Edhe pse nuk zbriti në fushë në Botërorin e tij të parë, ai e pranoi fundin me emocion: “Asnjëherë nuk doja që të mbaronte, por kështu duhet”.

Mesfushori Jean Michaël Seri, 35 vjeç, debutoi në Kupën e Botës në fitoren 2-0 ndaj Curaçaos, në paraqitjen e tij të 64-t për Bregun e Fildishtë. Më pas, ish-lojtari i Fulham deklaroi: “Pas 11 vitesh me kombëtaren dhe një Botërori të luajtur, sot njoftoj mbylljen e karrierës ndërkombëtare”.

Neymar, 34 vjeç, u shfaq për herë të parë në një Kupë Bote në vitin 2014, duke realizuar dy gola në ndeshjen hyrëse. Problemet fizike e penguan të shkëlqejë në këtë edicion, ku luajti vetëm 55 minuta para se Brazili të eliminohej nga Norvegjia. Vetë ai e përmblodhi me një fjali: “Gjithçka filloi këtu në MetLife Stadium dhe këtu mori fund. Tani ka mbaruar”, duke evokuar debutimin e tij me “Seleçaon” në 2010-ën. Legjenda Zlatan Ibrahimovic, në rolin e analistit, e komentoi me respekt: “Një lojtar i jashtëzakonshëm, me aftësi marramendëse. Ky është një moment i hidhur për futbollin brazilian”.

The post Lamtumira e një epoke: 11 emrat e mëdhenj që mbyllën ciklin me kombëtaret pas Kupës së Botës appeared first on Albeu.com.

Federata Meksikane e Futbollit e ka zyrtarizuar Rafael Marquez si trajner të përfaqësueses së Meksikës për ciklin e Kupës së Botës 2030.

Legjenda e Barcelonës, i cili në karrierën e tij luajti si mbrojtës, do të vendoset në krye të kombëtares pasi të përfundojë mandati i Javier Aguirre. Gjatë Kupës së Botës 2026, Marquez ishte pjesë e stafit të tij në rolin e ndihmëstrajnerit.

Bëhet fjalë për një lëvizje të menduar prej kohësh nga federata. Më 1 gusht 2024, Federata Meksikane kishte njoftuar se Aguirre do ta udhëhiqte ekipin në Kupën e Botës 2026 dhe se më pas drejtimin do ta merrte Rafael Márquez.

Dalja e Meksikës nga Botërori 2026 në fazën e 1/8 së finales i hapi rrugë zbatimit të planit të trashëgimisë, i cili ishte hartuar dy vite më parë.

Tani, Marquez do të ngarkohet me misionin për të ndërtuar një skuadër konkurruese dhe për ta përgatitur Meksikën për Kupën e Botës 2030, me objektivin që ta rikthejë kombëtaren mes ekipeve më të forta në arenën ndërkombëtare.

Marquez vlerësohet si një nga emrat më të mëdhenj në historinë e futbollit meksikan. Në periudhën e tij si futbollist, ai pati sukses të madh me Barcelonën, fitoi shumë trofe dhe për shumë vite ishte lider i kombëtares së Meksikës.

The post Rafael Márquez merr drejtimin e Meksikës pas Aguirre, federata zyrtarizon planin për Botërorin 2030 appeared first on Albeu.com.

Anglia ka prerë biletën për në çerekfinalet e Kupës së Botës, pasi mposhti Meksikën me rezultatin 3-2 në stadiumin legjendar “Azteca”.

Në një sfidë me shumë tension, episode vendimtare dhe përmbysje emocionesh, emri që spikati më shumë ishte ai i Jude Bellingham, autor i dy golave.

Takimi për anglezët nisi me vështirësi, teksa Declan Rice u ndëshkua me karton të verdhë që në minutën e parë.

Në fazën hapëse, Meksika pati më shumë kontroll të lojës dhe regjistroi rastin e parë të pastër në minutën e 15-të, por Jordan Pickford ndali goditjen me kokë të Raul Jiménez. Edhe pse vendasit ushtronin presion, ishte Anglia që gjeti avantazhin në minutën e 36-të, kur Bukayo Saka shërbeu për Bellingham dhe ai realizoi me kokë.

Vetëm dy minuta më pas, skuadra angleze goditi sërish. Pas një lëvizjeje të shpejtë dhe një kombinimi me Harry Kane, Bellingham realizoi edhe golin e tij të dytë, duke çuar shifrat në 2-0.

Reagimi i Meksikës erdhi përpara intervalit. Në minutën e 42-të, Julian Quinones shfrytëzoi një top të kthyer dobët nga mbrojtja angleze pas një goditjeje standarde dhe shënoi nga brenda zonës për të ngushtuar diferencën. Deri në mbyllje të pjesës së parë, vendasit krijuan edhe situata të tjera të rrezikshme, por Pickford dhe prapavija angleze ruajtën epërsinë.

Fraksioni i dytë u hap me intensitet dhe me mundësi për Anglinë, por kthesa kryesore e sfidës ndodhi në minutën e 53-të. Jarell Quansah u ndëshkua me karton të kuq direkt për një ndërhyrje të rrezikshme, ndërsa vendimi u la në fuqi edhe pas verifikimit nga VAR-i. Megjithatë, edhe me një lojtar më pak, Anglia fitoi penallti në minutën e 58-të, pasi Anthony Gordon u pengua në zonë. Harry Kane ekzekutoi saktë dhe shënoi për 3-1.

Meksika nuk hoqi dorë dhe u fut sërish në ndeshje në minutën e 68-të, kur Raul Jimenez realizoi nga penalltia pas një tjetër rasti të kontrolluar nga VAR.

Në minutat e mbetura, vendasit shtuan trysninë dhe e mbajtën të rrethuar portën e Pickford, por Anglia ia doli të qëndrojë deri në fund, duke përballuar edhe 11 minuta shtesë.

Pas këtij suksesi, Anglia avancon në çerekfinale, ku do të ndeshet me Norvegjinë, skuadër që më herët nxori jashtë Brazilin. Kjo sfidë është caktuar të luhet më 11 korrik në Miami.

The post Anglia kalon në çerekfinale pas thrillerit në “Azteca”, Meksika mposhtet 3-2 dhe Bellingham shkëlqen appeared first on Albeu.com.

Ndeshja e shumëpritur e 1/8 së finales së Kupës së Botës ndërmjet Meksikës dhe Anglisë është shtyrë zyrtarisht për shkak të kushteve të pafavorshme atmosferike.

Mediet britanike raportojnë se organizatorët kanë vendosur ta vonojnë fillimin e takimit me një orë. Sfida, që ishte parashikuar të niste në ora 02:00 me kohën tonë lokale, tashmë do të luhet në orën 03:00 pas mesnate sipas kohës sonë.

Kjo përballje do të zhvillohet në stadiumin legjendar Azteca në Mexico City, një prej impianteve më të njohura të futbollit botëror, ku pritet një atmosferë e jashtëzakonshme në duelin mes dy përfaqësueseve me histori të pasur në Kupën e Botës.

Takimi mes Meksikës dhe Anglisë konsiderohet një nga ndeshjet më tërheqëse të fazës së eliminimit direkt, ndërsa skuadra fituese do të sigurojë kualifikimin në çerekfinale. Tifozëve të të dyja kombëtareve u mbetet të presin pak më gjatë, teksa organizatorët shpresojnë që kushtet atmosferike të përmirësohen dhe ndeshja të zhvillohet pa probleme.

The post Meksikë – Angli nis me vonesë, konfirmohet shtyrja për shkak të motit appeared first on Albeu.com.

Në stadiumin legjendar Azteca, Meksika dhe Anglia përballen në fazën e 1/8 së finales të Kupës së Botës.

Ndeshja nis në orën 02:00 sipas kohës sonë lokale dhe parashikohet të jetë shumë e luftuar.

Meksika, që është një nga vendet organizatore, vazhdon të mbetet pa humbje në këtë Kupë Bote dhe deri në këtë fazë nuk ka pësuar asnjë gol.

Nga krahu tjetër, Anglia hyn në këtë takim me synimin për ta fituar këtë sfidë të fortë dhe për të siguruar kalimin në çerekfinale.

Ja formacionet zyrtare të të dyja kombëtareve:

Meksika: Rangel, Sanchez, Montes, Vasquez, Gallardo, Lira, Romo, Mora, Quinones, Alvarado, Jimenez.

Anglia: Pickford, Quansah, Konsa, Guehi, O’Reilly, Anderson, Rice, Saka, Bellingham, Gordon, Kane.

The post Meksika dhe Anglia luajnë për një biletë në çerekfinale, publikohen formacionet zyrtare appeared first on Albeu.com.

Meksika ka prerë biletën për në 1/8 e finales të Kupës së Botës 2026, pasi mundi Ekuadorin me shifrat 2-0 në stadiumin historik Estadio Azteca.

Takimi u shoqërua edhe me një ndërprerje të pazakontë para fillimit, për shkak të një stuhie në Mexico City. Ndeshja, e parashikuar të niste në orën 03:00 sipas kohës lokale, filloi me një orë vonesë. FIFA mori në shqyrtim edhe heqjen e pushimeve për hidratim për të rikuperuar kohën e humbur, por më pas u tërhoq nga kjo mundësi.

Që në start, vendasit u shfaqën më kërkues dhe morën kontrollin e lojës. Raul Jimenez rrezikoi i pari me një goditje me kokë që shkoi ngjitur me shtyllën, ndërsa edhe 17-vjeçari Mora iu afrua avantazhit me një provë nga një pozicion i vështirë.

Përgjigjja e Ekuadorit erdhi në minutën e 18-të, kur Yeboah depërtoi përtej prapavijës meksikane dhe goditi fort, por topi përfundoi në shtyllë.

Epërsia për Meksikën erdhi në minutën e 22-të, pas një kundërsulmi model. Julian Quinones e mori topin në gjysmën e tij të fushës, përshkoi rreth 40 metra dhe shënoi me një goditje të shkëlqyer për 1-0. Fillimisht pati kontroll në VAR, por goli u quajt i rregullt pasi sulmuesi meksikan nuk ishte në pozicion jashtë loje.

Nëntë minuta më pas, skuadra vendase dyfishoi shifrat. Pas një presioni të lartë dhe rikuperimit të topit në një zonë të rrezikshme, Quinones dhe Raul Jimenez ndërtuan bukur aksionin, ndërsa ky i fundit finalizoi fuqishëm për rezultatin 2-0.

Në fundin e pjesës së parë, Yeboah vuri në provë Raul Rangel, i cili bëri një pritje shumë të mirë, teksa në krahun tjetër Jimenez shpërdoroi një tjetër rast me kokë.

Pas pushimit, Ekuadori ndërhyri me dy zëvendësime dhe pati më shumë zotërim topi, por nuk arriti të krijonte mundësi të pastra për të rihapur sfidën. Rasti i vetëm më i rrezikshëm ishte një goditje e Enner Valencias, por ajo erdhi nga një pozicion jashtë loje.

Meksika mbeti kërcënuese edhe në vazhdim dhe në minutën e 67-të iu afrua golit të tretë me Cesar Montes, por Hernan Galindez reagoi në mënyrë të shkëlqyer.

Deri në vërshëllimën e fundit, Ekuadori nuk arriti të ushtrojë presion të vërtetë mbi portën e vendasve, ndërsa Meksika e menaxhoi me qetësi avantazhin për të vulosur një fitore të rëndësishme dhe kualifikimin mes 16 përfaqësueseve më të mira të botës.

Në 1/8 e finales, Meksika do të ndeshet me fituesin e përballjes Angli – Kongo.

The post Meksika triumfon 2-0 ndaj Ekuadorit dhe kalon në 1/8 e finales të Kupës së Botës appeared first on Albeu.com.

Përballja e shtatë e raundit të 1/16-ave në Kupën e Botës FIFA 2026 mes Meksikës dhe Ekuadorit është shtyrë, pasi kushtet atmosferike në Mexico City nuk kanë lejuar nisjen normale të takimit.

Ndeshja ishte parashikuar të fillonte në orën 03:00 sipas kohës lokale, por një stuhi që ka përfshirë zonën përreth stadiumit legjendar Estadio Azteca ka penguar zhvillimin e saj në orarin e caktuar.

Njoftimet zyrtare bëjnë të ditur se sfida është spostuar me një orë dhe tashmë pritet të startojë në orën 04:00 sipas kohës lokale në Kososvë.

Ndërkohë, organizatorët vijojnë të ndjekin nga afër zhvillimet e motit, ndërsa të dyja përfaqësueset mbeten të gatshme të zbresin në fushë sapo të sigurohen kushtet e nevojshme për zhvillimin e ndeshjes.

The post Stuhiya në Mexico City vonon për një orë duelin Meksikë – Ekuador në “Azteca” appeared first on Albeu.com.

Meksika dhe Ekuadori do të përplasen sonte në një sfidë vendimtare të fazës së 1/16-ave në Kupën e Botës FIFA 2026, teksa të dyja përfaqësueset luftojnë për të siguruar një vend mes 16 skuadrave më të mira në botë.

Si një nga bashkë-organizatoret e këtij turneu, Meksika synon të realizojë një moment historik, duke kërkuar fitoren e parë në fazat me eliminim pas 40 vitesh pritje. Nga ana tjetër, Ekuadori ka për objektiv të shkruajë historinë e vet me suksesin e parë në një ndeshje eliminatore në Kupën e Botës.

Pritshmëritë janë për një takim të fortë dhe me ritëm të lartë, ku çdo episod i vogël mund të ketë ndikim vendimtar në garën për kualifikim.

Të dy ekipet paraqiten në këtë përballje me motivim të madh dhe me një synim të vetëm: kalimin në 1/8 e finales dhe vijimin e rrugëtimit në Botëror.

Ndërkohë, trajnerët e të dyja kombëtareve kanë zyrtarizuar tashmë formacionet për këtë ndeshje shumë të rëndësishme.

Meksika: Raul Angel, Gallardo, Montes, Vasquez, Sanchez, Romo, Lira, Mora, Jimenez, Alvarado, Quinones.

Ekuadori: Galindez, Franco, Hincapie, Pacho, Ordonez, Angulo, Yeboah, Vite, Caicedo, Plata, Valencia.

The post Meksika dhe Ekuadori luajnë sonte për një vend në 1/8 e finales, publikohen formacionet zyrtare appeared first on Albeu.com.

Që në start, Republika Çeke u shfaq më kërkuese, pasi vetëm fitorja e mbante ende në lojë për kualifikimin. Denis Visinsky ishte elementi më i rrezikshëm në 45 minutat e para, duke ndërtuar disa raste të mira, por pa mundur të shënojë.

Nga ana tjetër, Meksika e kaloi pjesën e parë me qasje më të kujdesshme, e përqendruar kryesisht te mbrojtja dhe te pritja e mundësive për kundërsulm. Një episod shqetësues ndodhi pas një ndërhyrjeje ndaj Ladislav Krejči, i cili u godit me bërryl në kokë, megjithatë fatmirësisht pa pasoja serioze.

Pas rikthimit nga pushimi, meksikanët ngritën ndjeshëm nivelin dhe treguan pse konsideroheshin favoritë të grupit. Në minutën e 54-të, Luis Romo realizoi një veprim të bukur individual dhe shërbeu për Luis Chávez García, i cili zhbllokoi rezultatin për 1-0.

Vetëm gjashtë minuta më pas, Julian Quinones shfrytëzoi një top të kthyer dhe e çoi epërsinë në 2-0, duke i dhënë Meksikës kontroll të plotë mbi takimin.

Goditja e fundit për çekët erdhi në kohën shtesë, kur Alvaro Fidalgo dërgoi topin në rrjetë për 3-0, pasi portieri kishte ndalur më herët tentativën e Raul Jimenez.

Falë kësaj fitoreje, Meksika siguron tre pikë të plota, ndërsa Republika Çeke largohet e zhgënjyer nga një ndeshje ku nuk arriti të shfrytëzonte mundësitë e krijuara në pjesën e parë.

Meksikanët e mbyllin Grupin A në vendin e parë me nëntë pikë.

The post Meksika shpërthen pas pushimit, mund Republikën Çeke 3-0 dhe mbyll Grupin A në krye appeared first on Albeu.com.

Chavez, 64 vjeç, e shoqëron “El Tri” që prej vitit 1986, vit kur Meksika ishte organizatore e fundit e Kupës së Botës. Sipas kujtimeve të tij, takimi i parë i kombëtares që pa nga afër ishte ai i 19 shkurtit të atij viti kundër Bashkimit Sovjetik, ndërsa ndeshjen e tij të parë në një Botëror e përjetoi më 3 qershor, në sfidën ndaj Belgjikës.

Në këtë turne, “Caramelo” nuk po e jeton i vetëm eksperiencën. Përkrah tij ndodhet edhe i biri 21-vjeçar, Hector Chavez Jr., i cili njihet si “Caramelo Jr.”. Të dy bien në sy në tribunë për shkak të sombrerove të tyre të mëdhenj me ngjyrë të zezë, ku nofkat janë shkruar me germa të mëdha.

“Meksika ka një nga bazat më të mira të tifozëve në botë. Jemi ndër ata që udhëtojmë më shumë për të ndjekur ekipin dhe kemi traditë, identitet dhe krenari”, u shpreh Chavez për Associated Press.

Ndonëse tashmë është bërë një personazh i njohur në stadiume në mbarë botën, ai pranon se kjo Kupë Bote ka qenë më e vështira për t’u përballuar në aspektin financiar.

“Ky ishte Kupa e Botës më e shtrenjtë në histori. Disa nga miqtë e mi që zakonisht më shoqërojnë nuk mundën të vinin”, tha Chavez, teksa bëri të ditur se arriti ta realizonte udhëtimin falë ndihmës së familjes.

Fama e tij ka sjellë edhe reagime kundërshtuese. Një pjesë e tifozëve meksikanë mendojnë se ai merr më shumë vëmendje seç duhet dhe e kanë kritikuar pas episodit kur hodhi kapelen në fushë gjatë ndeshjes Kolumbi-Uzbekistan në Mexico City.

Sidoqoftë, Chavez shpreh edhe një shqetësim më të gjerë për futbollin e ditëve të sotme. Ai vlerëson se rritja e vazhdueshme e çmimeve të biletave po i mban larg tifozët më pasionantë, duke ndryshuar atmosferën tradicionale që ka karakterizuar stadiumet.

Me 543 ndeshje të ndjekura nga tribuna dhe 11 Kupa Bote të përjetuara nga afër, “Caramelo” vazhdon të mbetet një figurë që mishëron pasionin dhe përkushtimin e tifozëve meksikanë për ekipin e tyre kombëtar.

The post “Caramelo”, simboli i tribunave meksikane: 543 ndeshje me Meksikën dhe 11 Kupa Bote nga afër appeared first on Albeu.com.