Trajneri i Kosovës U21, Hekuran Kryeziu, ka bërë të ditur emrat e futbollistëve të grumbulluar për takimet e ardhshme kualifikuese të Kampionatit Evropian 2027.

Përfaqësuesja e re e Kosovës do të luajë tri ndeshje në fund të shtatorit dhe në fillim të tetorit. Fillimisht, “Dardanët” do të udhëtojnë për t’u përballur me San Marinon, ndërsa dy sfidat pasuese kundër Qipros dhe Finlandës do t’i zhvillojnë në stadiumin “Fadil Vokrri”.

Kryeziu ka përzgjedhur tre portierë, gjashtë mbrojtës dhe 13 lojtarë për repartet e mesfushës dhe sulmit.

Portierët e ftuar janë Laurent Sejdi, Altin Gjokaj dhe Amar Emini.

Në mbrojtje janë grumbulluar Andi Veliqi, Fuad Ajvazi, Ledjan Sahitaja, Lendrit Shala, Leon Parduzi dhe Luan Lleshi.

Në listën e mesfushorëve dhe sulmuesve bëjnë pjesë Faton Ademi, Dardan Morina, Arjanit Fazlija, Arjol Bllaca, Dren Zeqiri, Blerton Isufi, Lirim Jashari, Arianit Hasani, Erion Sadriu, Laurent Xhylani, Elvir Gashjani, Iqball Jashari, Hekuran Berisha dhe Medin Gashi.

Seria e ndeshjeve nis më 24 shtator në Serravalle. Kosova U21 do të takohet me San Marinon në “San Marino Stadium”, duke filluar nga ora 20:30.

Pesë ditë më vonë, më 30 shtator, skuadra kosovare do të kthehet në Prishtinë për ta pritur Qipron në stadiumin “Fadil Vokrri”. Takimi është planifikuar të nisë në orën 19:00.

Përballja e tretë është caktuar për 6 tetor. Edhe kjo ndeshje do të luhet në stadiumin “Fadil Vokrri”, ku Kosova U21 do të përballet me Finlandën nga ora 19:00.

The post Hekuran Kryeziu shpall listën e Kosovës U21 për tri ndeshjet e ardhshme appeared first on Albeu.com.

Arjanit Fazlija e ka nisur në mënyrën më të mirë të mundshme aventurën me Prishtinën, duke shënuar që në paraqitjen e tij të parë me fanellën bardhekaltër.

Mesfushori i ri kosovar, 21 vjeç, hyri në fushë në minutën e 75-të të ndeshjes kundër Llapit. Vetëm pak çaste pas inkuadrimit, ai tregoi menjëherë potencialin e tij dhe la gjurmë në debutimin në futbollin kosovar.

Fazlija e gjeti rrjetën pas një goditjeje të fortë nga afërsisht 20 metra, duke e çuar rezultatin në 4-0 dhe duke i dhënë vulën suksesit bindës të Prishtinës.

I lindur në Gjermani dhe i rritur atje, Fazlija vendosi që këtë verë të transferohej te klubi më i madh kosovar. Për të, Prishtina përfaqëson një hap të rëndësishëm dhe një mundësi të përshtatshme për ta zhvilluar më tej karrierën.

Rrugëtimin e tij në futboll e ka ndërtuar përmes akademive të njohura gjermane. Ai ka qenë pjesë e grupmoshave të Bayer Leverkusenit dhe Greuther Fürthit, ku ka fituar përvojë që ka ndihmuar në formimin e tij si futbollist.

Megjithatë, raporti i Fazlijës me Kosovën ka qenë i vazhdueshëm. Ai ka përfaqësuar vendin në pothuajse të gjitha kategoritë, duke nisur nga Kosova U15, për të vazhduar me U17 dhe U19, ndërsa më pas është përfshirë edhe në Kosovën U21.

Fazlija është një mesfushor modern, i cili karakterizohet nga qetësia dhe kontrolli i mirë i topit. Përveç kontributit në organizimin e lojës, ai mund të jetë i dobishëm edhe në fazën mbrojtëse e atë sulmuese. Goli ndaj Llapit dëshmoi gjithashtu se posedon cilësi të rëndësishme në goditjet nga distanca.

Gjatë përgatitjeve, 18-vjeçari iu bashkua skuadrës me vonesë dhe pati edhe një dëmtim të lehtë në kyçin e këmbës. Tash, megjithatë, duket se kjo pengesë është lënë pas, ndërsa paraqitja dhe goli në ndeshjen ndaj Llapit japin shpresë se ai po i afrohet formës së tij më të mirë.

Trajneri Orges Shehi duket se i beson futbollistit të ri. Debutimi i shoqëruar me gol mund të jetë vetëm kapitulli i parë i një rrugëtimi të gjatë të Fazlijës me Prishtinën.

Ndërkohë, kryeqytetasit e kanë filluar edicionin e ri në mënyrë të përsosur. Prishtina ka regjistruar dy fitore në po aq ndeshje dhe deri tani ka shënuar plot tetë gola.

Assane Diatta dhe Albin Krasniqi kanë realizuar nga tri gola, ndërsa pas suksesit ndaj Llapit në listën e golashënuesve është përfshirë edhe Arjanit Fazlija.

Prishtina po ndërton një skuadër me shumë cilësi dhe Fazlija mund të jetë një prej lojtarëve që do të marrë vëmendje të veçantë gjatë këtij sezoni. Ai e shënoi me gol debutimin e parë në futbollin kosovar, duke dhënë sinjale të qarta për potencialin e tij dhe për atë që mund të sjellë në të ardhmen.

The post Arjanit Fazlija nis aventurën te Prishtina me gol që në debutim appeared first on Albeu.com.