Takimi u hap me një rast premtues për Kongon, por më pas skuadra kolumbiane vendosi ritmin dhe dominoi lojën. Që në minutën e pestë, Daniel Munoz shpërdoroi një mundësi shumë të mirë, ndërsa në minutën e shtatë një gol i tij nuk u pranua për shkak të pozitës jashtë loje.

Edhe James Rodríguez me Luis Diaz tentuan disa herë me goditje nga largësia, por portieri Mpasi Nzau reagoi mjaft mirë dhe nuk lejoi ndryshimin e rezultatit gjatë pjesës së parë.

Epërsia e Kolumbisë në lojë vijoi edhe në pjesën e dytë. Në minutën e 50-të, Luis Diaz dhe Jefferson Lerma iu afruan golit, por edhe këtë herë Nzau ishte vendimtar. Në krahun tjetër, Kongo pati shumë pak momente kur arriti të vinte në vështirësi portën rivale.

Goli që vendosi ndeshjen erdhi në minutën e 76-të. Pas një aksioni të ndërtuar mirë, topi shkoi te Daniel Munoz, i cili nga ana e djathtë goditi saktë dhe mposhti portierin kundërshtar për 1:0.

Pak minuta më pas, Luis Diaz mendoi se kishte vulosur suksesin me dy realizime të shpejta, por të dyja u anuluan. Në minutën e 79-të, gjyqtari Maurizio Mariani akordoi faull në sulm, ndërsa vetëm një minutë më vonë sulmuesi kolumbian u kap në pozicion jashtë loje.

Pas këtij suksesi, Kolumbia renditet e para në Grupin K me gjashtë pikë dhe siguron kalimin në fazën e eliminimit direkt, ndërsa Kongo mbetet në pozitën e tretë me vetëm një pikë.

The post Kolumbia mposht edhe Kongon dhe siguron kualifikimin tutje appeared first on Albeu.com.

Figura qendrore e përballjes ishte Luis Diaz, i cili dha një asist dhe realizoi një gol, duke qenë vendimtar në sigurimin e tre pikëve të para për kolumbianët.

Takimi nisi me intensitet të madh dhe me disa duele të forta, ndërsa mundësia e parë e rrezikshme u regjistrua në minutën e 17-të, kur Arias tentoi nga largësia. Në minutën e 32-të, shumë pranë avantazhit ishte edhe Luis Diaz, por tentativa e tij u ndal nga shtylla.

Goli i parë i ndeshjes erdhi në minutën e 41-të. Ylli i Bayernit dërgoi një top mjaft të mirë në zonë, ndërsa Daniel Munoz u pozicionua saktë dhe dërgoi topin në rrjetë për 1-0.

Me nisjen e pjesës së dytë, trajneri i Uzbekistanit, Fabio Cannavaro, ndërhyri menjëherë me dy zëvendësime dhe lëvizjet e tij prodhuan efekt. Pas një ndërhyrjeje të Vargas ndaj goditjes së Shomurodovit, topi shkoi te Abbosbek Fayzulayev, i cili në minutën e 60-të barazoi në 1-1, duke elektrizuar tifozët uzbekë.

Sidoqoftë, festa e debutuesve në Kupën e Botës zgjati vetëm gjashtë minuta. Pas një kundërsulmi të shpejtë, Kevin Castano e gjeti Luis Diazin në krahun e majtë dhe sulmuesi i Kolumbisë shënoi me një goditje të saktë për 2-1.

Uzbekistani u përpoq të rikthehej sërish në ndeshje, por Kolumbia e menaxhoi mirë epërsinë. Në minutën e nëntë të kohës shtesë, Jaminton Campaz e vulosi suksesin me një gol me kokë, duke përcaktuar shifrat përfundimtare 3-1.

Në këtë mënyrë, Kolumbia e nis me fitore rrugëtimin në Botërorin 2026, ndërsa Uzbekistani, që po paraqitet për herë të parë në këtë kompeticion nën drejtimin e Fabio Cannavaros, la përshtypje të mira pavarësisht disfatës.

The post Luis Diaz shkëlqen me gol e asist, Kolumbia e nis me triumf ndaj Uzbekistanit appeared first on Albeu.com.