UEFA ka miratuar një format të ri për eliminatoret e Euro 2028, sipas të cilit vendet organizatore nuk do të kualifikohen automatikisht në fazën finale, por do të duhet të garojnë në kualifikuese.

Ky ndryshim ka hapur debat, veçanërisht për shkak të dallimit me qasjen e FIFA-s, e cila u ka siguruar Argjentinës, Paraguait dhe Uruguait nga një vend në Kupën e Botës 2030.

Anglia, Skocia, Uellsi dhe Republika e Irlandës do ta organizojnë së bashku Kampionatin Evropian të vitit 2028, por asnjëra prej tyre nuk e ka të garantuar drejtpërdrejt pjesëmarrjen në turne.

Në rastin e Kupës së Botës 2030, Argjentina e ka siguruar tashmë praninë, pasi në territorin e saj do të zhvillohet një prej ndeshjeve festive të turneut, të planifikuara në kuadër të 100-vjetorit të Kampionatit Botëror.

Sipas raportimeve të The Sun, vendimi i marrë nga FIFA ka shkaktuar polemika, ndërsa shumë tifozë kanë kundërshtuar përfitimin e Argjentinës nga kualifikimi automatik.

Në bazë të sistemit të ri të UEFA-s, të 55 përfaqësueset evropiane do të hyjnë në eliminatore, përfshirë edhe kombëtaret e katër shteteve pritëse.

Pjesëmarrëset do të ndahen në 12 grupe, secili me katër ose pesë skuadra. Në fazën finale do të kalojnë drejtpërdrejt fituesit e grupeve dhe tetë kombëtaret më të mira që renditen në vendin e dytë, duke u plotësuar kështu 20 nga 24 vendet e Euro 2028.

Avantazhi i vetëm që u jepet vendeve organizatore është se ato nuk mund të përfundojnë së bashku në të njëjtin grup gjatë shortit të kualifikueseve.

Megjithatë, UEFA ka përfshirë në format edhe një mekanizëm sigurie për pritësit. Nga katër vendet që mbeten për t’u plotësuar, dy do të mbahen të rezervuara për organizatorët që nuk arrijnë të kualifikohen nëpërmjet eliminatoreve.

Nëse një ose disa prej shteteve pritëse e sigurojnë pjesëmarrjen përmes rrugës së zakonshme, dy biletat rezervë mund t’u kalojnë organizatorëve që kanë dështuar gjatë kualifikueseve.

Në rast se tre ose të katër vendet organizatore nuk kualifikohen normalisht, dy vendet e rezervuara do t’u jepen dy kombëtareve pritëse që kanë renditjen më të mirë.

Ndeshjet e Euro 2028 do të shpërndahen mes Anglisë, Skocisë, Uellsit dhe Republikës së Irlandës.

Në Angli, takimet do të zhvillohen në Wembley, Tottenham Hotspur Stadium, Etihad Stadium, stadiumin e ri të Evertonit, St James’ Park dhe Villa Park.

Rregulli i miratuar nga UEFA ndryshon ndjeshëm nga praktika e mëparshme, kur organizatorët merrnin automatikisht një vend në turne. Ky sistem e veçon gjithashtu modelin evropian nga ai i FIFA-s, që u ka garantuar pjesëmarrjen vendeve pritëse të Kupës së Botës 2030.

The post Euro 2028 me format të ri, katër shtetet pritëse duhet të luajnë në kualifikuese appeared first on Albeu.com.