Vinicius Junior ka shprehur publikisht vlerësimin dhe mirënjohjen për Neymarin, pasi ikona braziliane bëri të ditur se po i jep fund aventurës së tij me kombëtaren, pas daljes së Brazilit nga Kupa e Botës 2026.

Vendimi i Neymarit erdhi pas disfatës 2-1 përballë Norvegjisë në fazën eliminatore të turneut, rezultat që vulosi edhe mbylljen e një periudhe të rëndësishme të tij me fanellën e “Seleçaos”.

Ylli i ri i Brazilit nuk i fshehu emocionet teksa foli për futbollistin që e konsideron model, duke nënvizuar se të luante përkrah tij në përfaqësuese ishte një nga dëshirat më të mëdha që i ishte bërë realitet në karrierë.

“Neymari është idhulli im. Gjithmonë kam ëndërruar të luaja me të. Mundësia për të qenë bashkë me të në kombëtare ishte një moment i paharrueshëm. I uroj suksese këtë sezon dhe në jetën e tij. Ai është kujdesur gjithmonë shumë për mua”, deklaroi Vinicius.

Sulmuesi brazilian u ndal edhe te zhgënjimi i madh pas eliminimit nga Botërori, ndërsa u kërkoi ndjesë tifozëve për paraqitjen dhe rezultatin.

“Është shumë e vështirë ta pranojmë eliminimin nga Kupa e Botës. E kam të vështirë të gjej fjalët, sidomos për mënyrën se si shkoi ndeshja dhe sepse nuk arrita të jap më të mirën në një takim kaq të rëndësishëm. U kërkoj falje tifozëve tanë që besuan tek ne”.

Në përmbyllje, Vinicius theksoi se Brazili nuk do të ndalet dhe se skuadra synon të rikthehet sërish në elitën e futbollit botëror.

“Ne do të vazhdojmë përpara, nuk do të dorëzohemi. E dimë se duhet të punojmë shumë për ta rikthyer Brazilin në majat e futbollit botëror dhe ky është objektivi ynë më i madh”, përfundoi ylli brazilian.

The post Vinicius Junior emocionohet pas largimit të Neymarit: Ka qenë gjithmonë idhulli im appeared first on Albeu.com.

Edhe pse Brazili u eliminua me dhimbje pas humbjes 2-1 ndaj Norvegjisë në 1/8 e finales së Kupës së Botës, Carlo Ancelotti ka theksuar se nuk planifikon të largohet nga drejtimi i ekipit.

Trajneri italian e cilësoi këtë disfatë si “të hidhur”, por nënvizoi se dëshira për të vijuar punën mbetet e fortë dhe se synon të udhëheqë procesin e rindërtimit të “Seleçao”-s në vitet që vijnë.

“Për sa kohë që ndiej pasion, dua të vazhdoj ta bëj këtë punë. Duhet të mendojmë për gjithçka. Është e qartë se duhet të bëjmë ndryshime në mesfushë. Kemi nevojë për talente të reja dhe për lojtarë të nivelit të lartë që të mund ta ndihmojnë ekipin kombëtar në të ardhmen”, deklaroi Ancelotti.

Tekniku 67-vjeçar, që ka një kontratë me Brazilin deri në vitin 2030, pranoi se përfaqësuesja duhet të hyjë në një fazë të re, veçanërisht pas largimit të disa emrave të rëndësishëm, mes tyre edhe Casemiro, i cili luajti ndeshjen e fundit me fanellën e Brazilit.

“Ne do të vazhdojmë të bëjmë punën tonë dhe të kërkojmë ide të reja, ashtu siç bëmë këtë vit. Ky është futbolli, ky është sporti. Ndonjëherë duhet të përballesh me trishtimin dhe shijen e hidhur të humbjes. Jam mësuar me këtë. Do ta përdorim këtë humbje si karburant për një cikël të ri”, shtoi ai.

Pavarësisht zhgënjimit të thellë dhe daljes së parakohshme nga turneu, Ancelotti shfaqet i vendosur të mbetet në stolin e Brazilit dhe të formojë një skuadër të re, me objektivin për ta rikthyer “Seleçao”-n në majën e futbollit botëror.

The post Ancelotti vendos të qëndrojë te Brazili: Kjo disfatë do të shërbejë për nisjen e një cikli të ri appeared first on Albeu.com.

Carlo Ancelotti, trajneri i Brazilit, ka dhënë sqarime për mënyrën se si u përcaktuan ekzekutuesit e penalltive, duke bërë të ditur se Vinícius Junior nuk figuronte mes lojtarëve të caktuar për gjuajtjet nga pika e bardhë.

Pas daljes së Brazilit nga Kupa e Botës ndaj Norvegjisë, italiani tregoi se stafi teknik kishte realizuar analiza të hollësishme statistikore për të identifikuar lojtarët më efikasë të skuadrës në penallti.

Në pjesën e parë, Brazili humbi një penallti, teksa përgjegjësinë për ta ekzekutuar e mori Bruno Guimaraes.

“Ne bëmë disa statistika dhe më i miri ishte Raphinha. Nga lojtarët e disponueshëm, më i miri ishte Neymar, pastaj Igor Thiago, më pas Bruno Guimaraes dhe Gabriel Martinelli”, deklaroi Ancelotti.

Ai theksoi gjithashtu se Vinícius nuk ishte pjesë e pesëshes së parë të zgjedhur për penalltitë, edhe pse konsiderohet një nga figurat kryesore të ekipit.

“Ne zgjodhëm Brunon sepse menduam se ai ishte lojtari më i mirë për ta marrë atë përgjegjësi në atë moment”, shtoi trajneri i Brazilit.

Qëndrimi i Ancelottit ka hapur debat të fortë mes tifozëve brazilianë, ku shumë prej tyre kanë ngritur pikëpyetje se si një futbollist i nivelit të Vinicius Junior mbeti jashtë listës së ekzekutuesve të penalltive.

Eliminimi i Brazilit nga Kupa e Botës vijon të sjellë reagime dhe diskutime të shumta, ndërsa zgjedhjet e Ancelottit po shqyrtohen me imtësi pas mbylljes së rrugëtimit të “Seleçao”-s në turne.

The post Ancelotti shpjegon mungesën e Viniciusit te penalltitë: Nuk ishte pjesë e listës së përzgjedhur appeared first on Albeu.com.

Neymar ka bërë të ditur se nuk do të luajë më me Kombëtaren e Brazilit, duke mbyllur kështu një periudhë të jashtëzakonshme në futbollin ndërkombëtar me “Seleção”.

Vendimi i 34-vjeçarit u konfirmua menjëherë pas humbjes 2-1 ndaj Norvegjisë në 1/8 e finales së Kupës së Botës, sfidë e cila u kthye në ndeshjen e tij të fundit me fanellën e Brazilit.

Pas vërshëllimës përfundimtare, Neymar foli me emocione për momentin e ndarjes: “U përpoqa. U përpoqa. Filloi këtu në stadiumin MetLife dhe përfundova këtu. Tani ka mbaruar”.

Ndonëse Brazili u ndal në këtë fazë, sulmuesi arriti të shënonte në paraqitjen e tij të fundit, duke realizuar nga pika e bardhë në minutat e fundit të takimit.

Neymar largohet nga kombëtarja si shënuesi më i mirë në historinë e Brazilit, me 80 gola në 129 ndeshje. Ai e përfaqësoi vendin në katër edicione të Kupës së Botës dhe në shumë kompeticione madhore, duke u kthyer në një nga figurat më emblematike të futbollit brazilian.

Për Kupën e tij të katërt të Botës, Neymar ishte rikthyer në ekip nga trajneri Carlo Ancelotti pas një mungese trevjeçare nga kombëtarja, duke marrë edhe një mundësi të fundit për të synuar trofeun më të rëndësishëm të futbollit.

Por shpresa për t’u kurorëzuar kampion bote mori fund pas dy golave të Erling Haaland, që i siguruan Norvegjisë një fitore historike.

Me tërheqjen e Neymarit, Brazili ndahet nga një prej futbollistëve më të mëdhenj të historisë së vet, ndërsa zyrtarisht përfundon edhe një epokë e artë për “Seleçao”.

The post Neymar i jep fund rrugëtimit me Brazilin, mbyllet një kapitull historik appeared first on Albeu.com.

Pas vërshëllimës së fundit të gjyqtarit në humbjen 2-1 të Brazilit ndaj Norvegjisë, vëmendja e të gjithëve u përqendrua te Neymar. Sulmuesi brazilian qëndroi për disa çaste i ngrirë në qendër të fushës, përpara se të shpërthente në lot, në një prej skenave më prekëse të këtij Botërori.

Për 34-vjeçarin, ky kompeticion ishte larg të qenit i thjeshtë. Problemet me dëmtimet dhe pikëpyetjet mbi formën e tij fizike e mbajtën në dyshim pjesëmarrjen për muaj me radhë. Pavarësisht kësaj, trajneri Carlo Ancelotti vazhdoi t’i besonte, ndërsa Neymar u rikthye hap pas hapi, fillimisht me minuta nga stoli dhe më pas me mundësinë për të pasur peshë në fazën eliminatore.

Në minutat e fundit të kohës shtesë, ai realizoi nga pika e bardhë për ta çuar rezultatin në 2-1. Para ekzekutimit të penalltisë, Neymar pati edhe një debat verbal me portierin norvegjez Orjan Nyland, i cili u përpoq ta shpërqendronte.

Sidoqoftë, goli i tij erdhi tepër vonë për të ndryshuar rrjedhën e sfidës. Vetëm pak momente më pas, fishkëllima përmbyllëse vulosi eliminimin e Brazilit nga Kupa e Botës.

I pushtuar nga emocionet, Neymar u ul në fushë, ndërsa pranë tij mbërritën shokët e skuadrës për ta ngushëlluar, mes tyre edhe Raphinha.

Nëse kjo ishte ndeshja e fundit e Neymarit në një Kampionat Botëror, atëherë fundi i saj erdhi në mënyrën më të dhembshme të mundshme: me ëndrrën e Brazilit të shuar dhe me lotët e një legjende që mund të ketë zbritur për herë të fundit në skenën më të madhe të futbollit.

The post Neymar shpërthen në lot pas daljes së Brazilit, pamja që emocionon botën appeared first on Albeu.com.

Carlo Ancelotti, trajneri i përfaqësueses së Brazilit, ka reaguar me tone të forta ndaj komenteve kritike për mënyrën e lojës së skuadrës në Kupën e Botës, duke dalë në mbrojtje të punës dhe kompetencës së tij si teknik.

Italiani nënvizoi se rruga e gjatë që ka bërë në futboll vlen më shumë se gjykimet nga jashtë, teksa tha se ekziston vetëm një figurë në botën e futbollit që ka autoritet t’i japë këshilla: legjenda e Manchester United, Alex Ferguson.

“Në Itali thonë se të gjithë burrat duan të bëhen trajnerë dhe të gjitha gratë arkitekte. Nuk e di nëse e kuptoj futbollin apo jo, por askush nuk mund të më gjykojë për këtë”.

“E vetmja gjë që është e sigurt është se jam përgatitur për më shumë se 1.400 ndeshje. Ndoshta kjo nuk mjafton për ta kuptuar futbollin, por sigurisht që është një përvojë e madhe”.

“Vetëm një person është përgatitur për më shumë ndeshje se unë: Alex Ferguson, i cili ka drejtuar mbi 2.000 ndeshje”.

“Unë pranoj këshilla nga të gjithë, por i vetmi që mund të jetë personi i duhur për të më dhënë këshilla është Alex Ferguson”.

“Jam njëqind për qind i sigurt se nuk jam gjeni, por në të njëjtën kohë jam njëqind për qind i sigurt se nuk jam budalla”, ka deklaruar Ancelotti.

Edhe pse tifozët kanë shprehur pakënaqësi për faktin që Brazili nuk po paraqet një futboll më ofensiv dhe më spektakolar në këtë Kupë Bote, raportet tregojnë se Ancelotti vijon të ketë mbështetjen e plotë të lojtarëve në dhomat e zhveshjes.//

The post Ancelotti u përgjigjet kritikëve: Vetëm Alex Ferguson ka të drejtë të më këshillojë appeared first on Albeu.com.

Endrick ka ndarë disa detaje mbi raportin e afërt që po ndërton me Neymarin gjatë Kupës së Botës 2026, duke nënvizuar se synon të përfitojë maksimalisht nga eksperienca e një prej emrave më të mëdhenj në historinë e futbollit brazilian.

Talenti brazilian në sulm, që shihet si një nga premtimet më të mëdha të futbollit në botë, tha se gjatë grumbullimit me kombëtaren ai kalon shumë kohë në shoqërinë e Neymarit.

“Kam një marrëdhënie shumë të mirë me Ney. Bëjmë shaka pas stërvitjes, luajmë letra dhe bisedojmë. Në ditën tonë të pushimit ishim bashkë dhe folëm gjatë. Është shumë e rëndësishme të mësosh nga lojtarë si Neymari, Marquinhos, Casemiro dhe Alisson”, deklaroi Endrick.

19-vjeçari theksoi se po përpiqet të marrë çdo këshillë të mundshme nga kapitenët e Brazilit, pasi është i bindur se kjo do t’i vlejë shumë në vazhdim të karrierës.

Pas suksesit 2-1 të Brazilit përballë Japonisë në 1/16 e finales së Kupës së Botës, Endrick pati gjithashtu fjalë shumë të mira për Carlo Ancelottin. Sulmuesi u aktivizua në pjesën e dytë, la sinjale pozitive në fushë dhe vlerësimet për paraqitjen e tij ia atribuoi trajnerit italian.

“Nuk e prisja të hyja në atë moment. Në pushim më thanë se do të futesha në lojë dhe thjesht iu luta Zotit të më jepte qetësi. Ancelotti e di gjithmonë se çfarë është më e mira për ekipin”, tha ai.

Endrick u ndal edhe te periudha që ka kaluar nën urdhrat e italianit te Real Madridi, ndërsa e përshkroi Ancelottin si një prej trajnerëve më të mëdhenj në botë.

“Ai gjithmonë më thoshte se momenti im do të vinte. Jam shumë i lumtur që e kam sërish trajner te Brazili. Nuk mund të kishte një përshtatje më të mirë për mua”, u shpreh sulmuesi.

Futbollisti brazilian shtoi se Ancelotti vendos gjithmonë duke pasur parasysh interesin e skuadrës dhe jo atë individual, ndërsa theksoi se është i gatshëm të zbatojë çdo detyrë që i kërkohet në fushë.

“Kur ai më kërkon të bëj diçka, unë thjesht e bëj. Nuk shikoj prapa, vetëm dëgjoj zërin e tij dhe përpiqem ta ndihmoj ekipin”, përfundoi Endrick.

The post Endrick tregon lidhjen e veçantë me Neymarin dhe besimin e madh te Ancelotti appeared first on Albeu.com.

Norvegjia e ka prerë biletën për në fazën e 1/16-ës së finales në Kupën e Botës, pasi triumfoi 2-1 ndaj Bregut të Fildishtë me golat e Antonio Nusa dhe Erling Haaland.

Menjëherë pas këtij suksesi historik, përzgjedhësi Stale Solbakken mbajti një fjalim emocional në dhomat e zhveshjes, ku përgëzoi skuadrën dhe theksoi rëndësinë e arritjes së saj.

“Djema! Ju nuk po ndryshoni vetëm historinë e futbollit norvegjez, por historinë e Norvegjisë në përgjithësi. Kjo është diçka e madhe dhe nuk do të ndodhë më kurrë në këtë mënyrë”.

“Që tani e tutje do të kualifikohemi vazhdimisht, prandaj ato 28 vite të gjata që nga paraqitja jonë e fundit në Kupën e Botës gjithë ajo dhimbje në vend, gjithçka që ndiej unë këtu dhe gjithçka që ndieni ju nuk do të kthehet më. Kurrë”.

“Kjo është falë jush. Ju e bëtë të mundur. Ju bëtë që të gjithë në Norvegji të festojnë për 14 ditë rresht pa u habitur askush. Ju e krijuat këtë moment dhe do ta mbani me vete përgjithmonë. Sot shijojeni plotësisht”.

Në mbyllje të fjalës së tij, Solbakken hodhi sytë nga kundërshtari i ardhshëm dhe lëshoi një mesazh që ngjalli menjëherë entuziazëm te ekipi.

“Dhe prit Carlo Ancelotti. Po vijmë për ty”.

Këto fjalë u shoqëruan me duartrokitje dhe brohorima nga lojtarët norvegjezë, të cilët tashmë i pret përballja me Brazilin e drejtuar nga Carlo Ancelotti, në një prej ndeshjeve më të pritshme të fazës me eliminim direkt.

The post “Carlo Ancelotti, po vijmë” – Solbakken elektrizon Norvegjinë para duelit me Brazilin appeared first on Albeu.com.

Janë përcaktuar tri ndeshjet e para të fazës së 1/8 së finales në Kupën e Botës 2026, një etapë ku priten përballje tërheqëse dhe shumë spektakël mes përfaqësueseve të mëdha.

Takimi që merr më së shumti vëmendje është ai mes Brazilit dhe Norvegjisë, i cilësuar si dueli më i fortë i kësaj faze nga ndeshjet e konfirmuara deri në këtë moment.

Brazili hyn në këtë përballje me synimin e qartë për të vijuar rrugëtimin drejt trofeut, ndërsa Norvegjia, me Erling Haaland në krye, kërkon të mbajë gjallë ecurinë historike në këtë turne dhe të prodhojë një tjetër befasi.

Ndërkohë, në dy sfidat e tjera të konfirmuara, Kanadaja do të ndeshet me Marokun, teksa Franca do të ketë përballë Paraguain, duele që pritet të sjellin rivalitet të madh dhe emocione të forta në fazën me eliminim direkt.

Deritanë janë konfirmuar këto ndeshje: Francë – Paraguai, Brazil – Norvegji, Kanada – Maroku.

The post Tri sfidat e para të 1/8 së finales në Kupën e Botës tashmë janë zyrtarizuar appeared first on Albeu.com.

Joachim Klement, ekonomist nga Gjermania, është bërë mjaft i njohur në vitet e fundit sepse modeli i tij i ndërlikuar statistikor kishte parashikuar me saktësi fituesit e tre edicioneve të fundit të Kupës së Botës.

Strategu i investimeve kishte dalë në përfundimin, mbi bazën e një përzierjeje faktorësh sportivë, demografikë dhe financiarë, se Japonia do ta nxirrte Brazilin jashtë në fazën me eliminim direkt të Kupës së Botës.

Ky parashikim mori jehonë të madhe mediatike dhe, sipas raportimeve, mbërriti edhe në dhomat e zhveshjes së brazilianëve para sfidës së shumëpritur në Houston.

Por ajo që ndodhi në fushë ishte krejt ndryshe. Skuadra e Brazilit, e udhëhequr nga Carlo Ancelotti, arriti të përmbysë rezultatin dhe fitoi 2:1, duke prerë biletën për në fazën tjetër të turneut.

Menjëherë pas takimit, Neymar reagoi në rrjetet sociale dhe nuk e la pa e thumbuar ekonomistin gjerman. Ylli brazilian publikoi një foto të Joachim Klement dhe e shoqëroi me një mesazh ironik:

“Z. Joachim Klement… ju lutem, provoni përsëri në Kupën e Botës së ardhshme”.

Ky postim i shkurtër, por me tone therëse, u përhap menjëherë në internet, ndërsa triumfi i Brazilit tregoi se këtë herë llogaritjet algoritmike dhe parashikimet e ekonomistit gjerman kishin dalë të pasakta.

The post Neymar ironizon ekonomistin gjerman pas kualifikimit të Brazilit: Provoje sërish në Botërorin e ardhshëm appeared first on Albeu.com.