Federata belge e futbollit po shqyrton emrin e Mark Van Bommel si pasardhësin e mundshëm të Rudi Garcias në krye të ekipit kombëtar. Ish-mbrojtësi i njohur holandez, që ka luajtur për klube si Barcelona dhe Bayern Munich, shihet si kandidati kryesor për marrjen e detyrës.

Trajneri francez Garcia e mori drejtimin e skuadrës në fillim të vitit 2025 dhe gjatë qëndrimit të tij në pankinë, Belgjika zhvilloi 20 ndeshje, duke fituar 12 prej tyre, barazuar në gjashtë raste dhe pësuar vetëm dy disfata. Pavarësisht këtij bilanci pozitiv, 62-vjeçari ka vendosur të largohet sapo përfundoi Botërori.

Në atë turne, rruga e belgëve u ndal në çerekfinale, ku ata u mundën nga Spanja, e cila më pas triumfoi në kompeticion duke u shpallur kampione bote. Lajmin për kandidaturën e Van Bommel e ka konfirmuar gazetari i specializuar i transferimeve, Fabrizio Romano.

Tekniku holandez 49-vjeçar ka mbetur pa punë që prej fundit të sezonit të kaluar, konkretisht që nga qershori i vitit 2024, kur u nda me Royal Antwerp. Gjatë më shumë se dy vjetësh në krye të kësaj skuadre, ai arriti t’i dhurojë asaj kampionatin belg dhe dy Kupa të Belgjikës, një periudhë e shënuar nga suksese të rëndësishme.

Që nga largimi nga Antwerp, Van Bommel nuk ka marrë asnjë drejtim të ri, megjithëse spekulimet e kanë lidhur vazhdimisht me shumë ekipe në Belgjikë dhe në liga të tjera evropiane.

The post Mark Van Bommel, favorit për të pasuar Rudi Garcian në stolin e Belgjikës appeared first on Albeu.com.

Spanja e fitoi titullin e kampiones së botës për herë të dytë në historinë e saj, me qëndrueshmërinë e jashtëzakonshme në mbrojtje që u shndërrua në një prej faktorëve vendimtarë të triumfit.

Ekipi i drejtuar nga Luis de la Fuente u tregua thuajse i pakalueshëm gjatë Kupës së Botës 2026, pasi e mbylli të gjithë turneun me vetëm një gol të pësuar.

Një rol kryesor në këtë arritje pati Unai Simón. Portieri spanjoll nuk pësoi gol për 650 minuta radhazi, duke regjistruar serinë më të gjatë pa u mposhtur ndonjëherë në historinë e Kupës së Botës.

Paraqitjet e tij u vlerësuan me çmimin “Doreza e Artë”, që iu dha si portieri më i mirë i turneut.

Rekordi i Unai Simónit u ndërpre në çerekfinalen kundër Belgjikës. Charles De Ketelaere shënoi me kokë dhe barazoi përkohësisht rezultatin, duke u bërë i vetmi lojtar që depërtoi mbrojtjen spanjolle gjatë gjithë Botërorit.

Spanja e dha menjëherë përgjigjen dhe e fitoi takimin me rezultatin 2-1, për të vijuar më pas marshimin drejt trofeut të kampionit të botës.

Forca e repartit defensiv mbështetej te organizimi i shkëlqyer i skuadrës. Pau Cubarsí, i cili u shpall “Lojtari më i mirë i ri” i turneut, formoi së bashku me Aymeric Laporte një dyshe mbresëlënëse në qendër të mbrojtjes.

Kontributi i tyre, i kombinuar me ndërhyrjet vendimtare të Unai Simónit, bëri që kundërshtarët të krijonin shumë pak mundësi gjatë të gjithë garës.

Kështu, De Ketelaere përfundoi Botërorin si i vetmi futbollist që gjeti rrjetën përballë Spanjës. Lionel Messi, Kylian Mbappe, Cristiano Ronaldo, Ousmane Dembele, Romelu Lukaku dhe Julián Álvarez ishin mes emrave të mëdhenj që nuk arritën ta mposhtnin portierin spanjoll gjatë rrugës së kampionëve drejt titullit.

The post Futbollisti i vetëm që mposhti prapavijën e pathyeshme të Spanjës në Botëror appeared first on Albeu.com.

Pas përfundimit të Kupës së Botës 2026, FIFA ka nxjerrë klasifikimin e përditësuar të kombëtareve, ku kampionia e botës, Spanja, është ngjitur zyrtarisht në vendin e parë. Suksesi në turne e ka çuar “La Rojan” në krye, ndërsa Argjentina ka kaluar në pozitën e dytë.

Spanja udhëheq renditjen botërore me 1995.88 pikë. Kampionët e botës rezultojnë gjithashtu përfituesit më të mëdhenj të këtij përditësimi, pasi kanë shtuar 121.17 pikë, më shumë se çdo përfaqësuese tjetër.

Pas dy vendeve të para, Franca pozicionohet e treta, Anglia renditet e katërta dhe Brazili mban vendin e pestë.

Një arritje historike ka regjistruar Maroku, i cili është ngjitur në pozitën e gjashtë, më e larta në historinë e tij. Në dhjetëshen e parë përfshihen gjithashtu Portugalia, Belgjika, Holanda dhe Meksika.

Të dhënat e publikuara nga FIFA tregojnë se Norvegjia ka realizuar avancimin më të madh në renditje, me një ngjitje prej 12 pozicionesh. Në kahun e kundërt, Tunizia ka shënuar rënien më të thellë, duke humbur 12 vende.

Sa u përket pikëve, dëmin më të madh e ka pësuar Panamaja. Kombëtarja ka humbur 60.74 pikë, duke qenë skuadra më e prekur në klasifikimin e ri.

Përditësimi evidenton efektin e rezultateve të Kupës së Botës 2026 në hierarkinë ndërkombëtare. Spanja është rikthyer në majën e futbollit botëror, ndërsa paraqitjet në turne u kanë mundësuar disa kombëtareve të shënojnë lëvizje historike.

The post Spanja merr kreun e FIFA-s pas Botërorit 2026, Maroku arrin pozicionin më të mirë historik appeared first on Albeu.com.

Hans Vanaken ka zënë vendin e parë falë një goli të jashtëzakonshëm nga 32.45 metra. Në listën e pesë realizimeve më të largëta të turneut bëjnë pjesë edhe argjentinasit Julian Alvarez dhe Enzo Fernandez.

Kupa e Botës 2026 është karakterizuar nga shumë gola të bukur, por disa kanë tërhequr vëmendje të veçantë për largësinë prej së cilës janë goditur. Të dhënat e siguruara nga topi zyrtar Trionda kanë përcaktuar pesë golat e realizuar nga distancat më të mëdha gjatë kompeticionit.

Rekordi i këtij Botërori i takon mesfushorit belg Hans Vanaken. Ai gjeti rrugën e rrjetës nga 32.45 metra në ndeshjen kundër Shteteve të Bashkuara të Amerikës, duke firmosur goditjen më të largët që ka përfunduar gol në turneun e këtij viti.

Julian Alvarez renditet i dyti, pasi shënoi nga 28.18 metra në përballjen e Argjentinës me Zvicrën. Pozita e tretë i përket Sidny Lopes Cabral, autor i një goli nga 25.52 metra në ndeshjen mes Argjentinës dhe Kepit të Gjelbër.

Malik Tillman i Shteteve të Bashkuara mban vendin e katërt me realizimin e tij nga 23.52 metra kundër Belgjikës. Listën e pesë golave më të largët e plotëson Enzo Fernandez, i cili shënoi nga 23.14 metra në gjysmëfinalen ndaj Anglisë.

Goditjet nga distanca janë shndërruar në një prej elementeve më tërheqëse të Kupës së Botës 2026, duke nxjerrë në pah aftësinë teknike dhe guximin e futbollistëve për të kërkuar golin edhe nga largësi që rrallë shpërblehen me realizim.

The post Pesë goditjet nga më larg që përfunduan në gol në Kupën e Botës 2026 appeared first on Albeu.com.

Zlatan Ibrahimovic reagoi ashpër në Fox Sports pas eliminimit surprizë të Belgjikës nga Kupa e Botës 2026.

Ish-sulmuesi suedez, që tani mban rolin e analistit te transmetuesi amerikan, e drejtoi gishtin nga përzgjedhësi Rudi Garcia, të cilin e konsideroi përgjegjësin kryesor për humbjen në çerekfinale kundër Spanjës.

Sipas tij, gjithçka lidhej me zgjedhjen e bërë në portë. Pas dëmtimit të Thibaut Courtois, tekniku belg vendosi të aktivizonte Senne Lammens, i cili më pas kreu një gabim vendimtar që ndikoi në largimin e Belgjikës.

Vendimi i Garcias mori edhe më shumë kritika pas komenteve të mëvonshme të portierit të Real Madridit, i cili bëri të ditur se ishte i gatshëm të qëndronte në fushë pavarësisht shqetësimit fizik.

“Kjo humbje është faji i trajnerit. Ishte vendimi i tij që i kushtoi Belgjikës ndeshjen. Pse e futi Lammensin kur në stol ishte Penders?”

“Vetëm sepse njëri luan për Manchester Unitedin dhe tjetri për Strasbourgun? Nuk mund ta zgjedhësh kështu portierin e një kombëtareje”, u shpreh Ibrahimovic.

Më tej, ai vijoi me vlerësime më të larta për portierin tjetër belg.

“Penders është shumë më i mirë. Lammens është i mbivlerësuar në këtë nivel. Të gjithë e panë këtë. Është turp. Trajneri kryesor dhe trajneri i portierëve duhet të kenë turp”, përfundoi ai.

Belgjika u eliminua nga Spanja pas humbjes 2-1 në çerekfinale, ndërsa goli vendimtar u shënua nga Mikel Merino në minutat e fundit të takimit.//

The post Ibrahimovic pas daljes së Belgjikës: Trajneri duhet të turpërohet, ai futbollist nuk e meritonte aktivizimin appeared first on Albeu.com.

Çerekfinalja e Kupës së Botës 2026 mes Spanjës dhe Belgjikës u mbyll në barazim 1-1 pas 45 minutave të para, në një pjesë me intensitet të lartë dhe mundësi shënimi për të dyja skuadrat.

Në fillim të takimit, spanjollët pretenduan për një penallti pas një prekjeje të dyshimtë me dorë nga një lojtar belg brenda zonës, por arbitri Michael Oliver vendosi që loja të vazhdonte.

Pas disa përpjekjeve, Spanja arriti të zhbllokonte rezultatin në minutën e 30-të.

Dani Olmo tentoi i pari me një goditje nga pranë, por Thibaut Courtois reagoi saktë dhe ndali topin. Sidoqoftë, në vazhdim të aksionit, sfera shkoi te Fabian Ruiz, i cili e dërgoi në rrjetë dhe kaloi spanjollët në epërsi 1-0.

Belgjika nuk vonoi të përgjigjej dhe e rivendosi ekuilibrin katër minuta para përfundimit të pjesës së parë.

Nga krahu i djathtë, Timothy Castagne dërgoi një harkim të saktë në zonë, ku Charles De Ketelaere u pozicionua mirë dhe me kokë mposhti portierin e Spanjës për rezultatin 1-1.

Pas pjesës së parë, kjo çerekfinale mbetet plotësisht e hapur, ndërsa të dyja përfaqësueset do të kërkojnë golin e kualifikimit në 45 minutat e dyta.

The post Spanja kaloi e para në avantazh, Belgjika u kundërpërgjigj – 1-1 në fund të pjesës së parë appeared first on Albeu.com.

Romelu Lukaku ka dhënë një deklaratë të prerë në prag të duelit të Belgjikës ndaj Spanjës në çerekfinalen e Kupës së Botës 2026, duke nënvizuar se “Djajtë e Kuq” nuk kanë mbërritur deri në këtë pikë për t’u dorëzuar.

Sipas sulmuesit belg, ekipi i tij zotëron cilësitë dhe forcën psikologjike të nevojshme për t’u përballur me një prej skuadrave favorite të këtij turneu, ndërsa kërkon që Belgjika të zhvillojë një ndeshje të përsosur në stadiumin e Los Angeles.

“Nëse e kemi arritur këtë nivel, nuk do të luajmë vetëm për të humbur dhe për të shkuar në shtëpi. Kjo është një fazë vendimtare, kemi talentin e nevojshëm dhe duhet të jemi perfekt nesër”, deklaroi Lukaku në konferencën për shtyp.

Duke folur për kundërshtarin, ai tregoi vlerësim për Spanjën, duke theksuar identitetin e saj të qartë në lojë dhe nivelin e lartë të futbollistëve që ka në përbërje.

“Spanja është një ekip shumë i fortë që ka luajtur me të njëjtën formulë që nga viti 2018. Lojtarë si Ferran Torres u japin atyre shumë thellësi në lojë”, tha sulmuesi belg.

Lukaku u shpreh më tej se Belgjika e pret këtë përballje e përgatitur në maksimum dhe me bindjen se ka armët e duhura për të synuar një vend në gjysmëfinale.

“Spanja është një ekip shumë i kompletuar, me lojtarë shumë inteligjentë. Prandaj duhet të zhvillojmë një ndeshje perfekte. Ne jemi shumë mirë të përgatitur dhe kemi asetet për t’u përballur me ta. Jemi në një gjendje të shkëlqyer, si fizikisht ashtu edhe mendërisht”, theksoi ai.

Sulmuesi ndaloi edhe te përgjegjësia e tij në kombëtare, duke treguar se kohët e fundit ka zhvilluar një bisedë me trajnerin Rudi Garcia për mënyrën se si mund të jetë edhe më i dobishëm për skuadrën.

“Dua të kontribuoj sa më shumë, brenda dhe jashtë fushës. Mund të kem ndikim në lojë, të qetësoj frustrimet dhe të ndihmoj ekipin. Gjithçka ka të bëjë me kolektivin e kombëtares”, u shpreh ai.

Në përfundim, Lukaku theksoi se prej vitesh e vendos ekipin përpara çdo interesi personal.

“Ky ka qenë burimi im i motivimit gjatë viteve të fundit. Gjithmonë mendoj së pari për ekipin kombëtar dhe vetëm pastaj për veten time”, përfundoi Lukaku.

The post Lukaku para ndeshjes me Spanjën: Belgjika nuk është në çerekfinale për t’u larguar pa luftë appeared first on Albeu.com.

Gjatë viteve, Kupa e Botës ka sjellë episode të rëndësishme edhe për futbollistët me prejardhje shqiptare. Ndonëse kanë luajtur për përfaqësuese të ndryshme, disa prej tyre kanë qenë pjesë e skuadrave që kanë mbërritur në mesin e katër më të mirave në botë, madje edhe kanë zënë vend në podiumin e kompeticionit më të madh të futbollit.

Edhe pse Kosova dhe Shqipëria mungojnë në Kupën e Botës 2026, ndonëse të dyja ishin pranë kualifikimit në eventin e fundit, futbollistët me origjinë shqiptare nuk mungojnë në këtë turne.

Tashmë, Granit Xhaka dhe Ardon Jashari kanë mundësinë që me Zvicrën të vazhdojnë këtë traditë. Ata ndodhen në çerekfinale kundër Argjentinës dhe janë vetëm pak hapa larg një kapitulli tjetër të rëndësishëm për futbollistët shqiptarë në skenën më të madhe të futbollit botëror.

Xhaka, në rolin e kapitenit dhe liderit të padiskutueshëm të Zvicrës, mban barrën e përvojës dhe të përgjegjësisë në një skuadër që synon të tejkalojë arritjet e saj të deritanishme. Nga ana tjetër, Jashari mishëron gjeneratën e re, si një lojtar që kërkon të ndërtojë historinë e vet me fanellën helvetike.

Nëse Zvicra kalon çerekfinalen dhe siguron një vend në podium, atëherë Xhaka dhe Jashari do t’i shtohen listës së futbollistëve me prejardhje shqiptare që kanë lënë gjurmë në Kupën e Botës.

Ky rrugëtim e ka zanafillën te Ardian Kozniku në Francë, në vitin 1998. Ish-sulmuesi kosovar bënte pjesë te Kroacia në një Botëror historik për atë shtet, që po luante për herë të parë në Kupën e Botës si vend i pavarur.

Kroacia, e drejtuar nga emra të tillë si Davor Suker, Zvonimir Boban, Robert Prosinecki dhe Robert Jarni, e kaloi fazën e grupeve falë fitoreve ndaj Xhamajkës dhe Japonisë. Më pas eliminoi Rumaninë në 1/8 e finales, ndërsa në çerekfinale surprizoi Gjermaninë me shifrat e thella 3-0.

Në gjysmëfinale, kroatët u ndeshën me Francën nikoqire. Skuadra kaloi e para në avantazh me Sukerin, por vendasit e kthyen rezultatin falë dy golave të Lilian Thuram dhe prenë biletën për në finale. Kroacia u kundërpërgjigj në takimin për vendin e tretë, ku mposhti Holandën 2-1 dhe fitoi medaljen e bronztë.

Edhe pse Kozniku nuk mori minuta në atë Botëror, ai ishte pjesë e skuadrës që arriti një prej sukseseve më të mëdha në historinë e futbollit kroat.

Pas gjashtëmbëdhjetë vjetësh, Shkodran Mustafi preku kulmin e mundshëm në futboll. Mbrojtësi me prejardhje shqiptare ishte pjesë e Gjermanisë që në vitin 2014, në Brazil, u kurorëzua kampione e botës.

Skuadra e Joachim Löwit e hapi turneun me një fitore të thellë 4-0 ndaj Portugalisë, më pas barazoi me Ganën dhe fitoi ndaj SHBA-së për ta mbyllur grupin në vendin e parë. Në fazën me eliminim direkt, gjermanët kaluan me vështirësi Algjerinë vetëm pas vazhdimeve, më tej nxorën jashtë Francën në çerekfinale dhe më pas shkruan histori në gjysmëfinale.

Përballë Brazilit vendas, Gjermania regjistroi një nga fitoret më tronditëse në historinë e Kupës së Botës, duke triumfuar 7-1. Në finalen ndaj Argjentinës, ishte goli i Mario Götzes në vazhdime që i dha Gjermanisë titullin e katërt botëror.

Mustafi pati një rol aktiv në fazën e grupeve dhe luajti edhe në 1/8 e finales kundër Algjerisë, përpara se një lëndim ta nxirrte jashtë për pjesën e mbetur të turneut. Sidoqoftë, ai mbetet futbollisti i vetëm me prejardhje shqiptare që e ka fituar Kupën e Botës.

Në Botërorin e Rusisë më 2018, në podium arriti edhe Adnan Januzaj me Belgjikën. “Djajtë e Kuq” e nisën garën me fitore ndaj Panamasë dhe Tunizisë, ndërsa Januzaj u kthye në protagonist në ndeshjen e fundit të grupit përballë Anglisë.

Lojtari me origjinë shqiptare realizoi golin e vetëm të sfidës, duke i dhënë Belgjikës suksesin 1-0 dhe vendin e parë në grup. Ai realizim e veçoi Januzajn si një nga figurat karakteristike të rrugëtimit belg në atë Botëror.

Më pas, Belgjika eliminoi Japoninë në një ndeshje dramatike të 1/8 së finales, ku përmbysi humbjen 2-0 për të fituar 3-2. Në çerekfinale erdhi edhe fitorja e madhe 2-1 kundër Brazilit, rezultat që e çoi Belgjikën në gjysmëfinale për herë të parë që nga viti 1986.

Në gjysmëfinale, Belgjika u ndal nga Franca pas golit të Samuel Umtitit, por ekipi i Roberto Martinez reagoi në ndeshjen për vendin e tretë. Fitorja 2-0 ndaj Anglisë i solli Belgjikës medaljen e bronztë dhe arritjen më të mirë në historinë e saj në Kupën e Botës. Januzaj nuk luajti as në gjysmëfinale dhe as në ndeshjen për vendin e tretë, por mbeti pjesë e skuadrës që u ngjit në podium.

Historia që nisi me bronzin e Koznikut në vitin 1998, vijoi me titullin botëror të Mustafit në vitin 2014 dhe me medaljen e Januzajt në vitin 2018, tani mund të marrë një vazhdim të ri me Granit Xhakën dhe Ardon Jasharin.

The post Xhaka e Jashari synojnë të hyjnë në gjurmët e Mustafit, Koznikut dhe Januzajt appeared first on Albeu.com.

Los Angeles do të presë sonte një nga përballjet më të forta të Kupës së Botës 2026, teksa Spanja dhe Belgjika matin forcat në çerekfinale për të hyrë mes katër ekipeve më të mira të turneut.

Ndeshja do të startojë në ora 21:00 sipas kohës sonë dhe parashikohet të sjellë futboll të klasit të lartë, duke pasur parasysh formën shumë të mirë që të dyja përfaqësueset kanë shfaqur në këtë edicion të Botërorit.

Rëndësia e kësaj sfide është maksimale. Skuadra që del fituese do të avancojë në gjysmëfinale, aty ku e pret Franca, ndërsa për humbësin do të mbyllet rrugëtimi në Kupën e Botës 2026.

Spanja i qëndron besnike identitetit të saj në lojë, duke u mbështetur te mbajtja e topit, qarkullimi i shpejtë i pasimeve dhe niveli i lartë teknik. Mesfusha e saj është shquar si një nga repartet më të forta të këtij turneu, pasi ka diktuar ritmin e ndeshjeve, ndërsa futbollistët e krahëve kanë krijuar vazhdimisht probleme për mbrojtjet rivale.

Nga ana tjetër, Belgjika është paraqitur me një grup të rinovuar dhe shumë energjik, duke treguar elasticitet taktik dhe kalime tepër të shpejta nga faza mbrojtëse në sulm. “Djajtë e Kuq” kanë mjaft potencial në ofensivë për të ndëshkuar çdo lëshim, megjithëse përballë do të kenë një prapavijë spanjolle që deri tani u ka lënë shumë pak hapësira kundërshtarëve.

Me një vend në gjysmëfinale që vihet në diskutim dhe me Francën që pret fituesin, të gjithë elementët janë gati për një tjetër mbrëmje të madhe futbolli në Botërorin 2026.

Takimi Spanjë – Belgjikë luhet sonte në stadiumin e Los Angeles, duke nisur nga ora 21:00.

The post Spanja dhe Belgjika luajnë sonte në Los Angeles për biletën e gjysmëfinales appeared first on Albeu.com.

Rrugëtimi i Kombëtares së SHBA-së në Kupën e Botës 2026 u mbyll në mënyrë zhgënjyese, pasi amerikanoqët u mundën 1-4 nga Belgjika në fazën e 1/16-tës së finales.

Por vëmendja nuk mbeti vetëm te disfata në fushë. Dalja e SHBA-së nga turneu u shoqërua edhe me debat të fortë jashtë saj, sidomos për çështjen e sulmuesit Folarin Balogun.

Më herët, pezullimi i Balogun për sfidën me Belgjikën ishte hequr, pasi u raportua se presidenti amerikan Donald Trump kishte zhvilluar një telefonatë me presidentin e FIFA-s, Gianni Infantino. Sipas raportimeve, ai kishte argumentuar se ndëshkimi ishte i padrejtë dhe se lojtari i duhej ekipit për fazën me eliminim direkt.

Ky vendim solli reagime të shumta, ndërsa kritikët ngritën shqetësimin se një ndërhyrje politike mund të krijonte një precedent të rrezikshëm për vendimet disiplinore në futboll.

Pas eliminimit të amerikanëve, ironitë nuk munguan nga komentatorë të vendeve të ndryshme për gjithë këtë situatë.

Komentatori turk:

“Nëse nuk ka ndonjë ndryshim rregullash në minutën e fundit, SHBA-ja tashmë i ka dhënë lamtumirën Kupës së Botës”.

Komentatori holandez:

“Sot nuk do të jetë Amerika që fiton. Vetëm një mrekulli mund t’i shpëtonte, dikush me një shkop magjik… ose ndoshta dikush nga Shtëpia e Bardhë. Ky duket opsioni më i mundshëm”.

Këto komente ironike u përhapën me shpejtësi në rrjetet sociale, ku tifozë nga mbarë bota iu bashkuan humorit pas eliminimit të SHBA-së nga turneu.

The post Ironi edhe nga komentatorët turk e holandez për rastin Balogun pas daljes së SHBA-së nga Kupa e Botës appeared first on Albeu.com.