Gjenerallejtënant Bashkim Jashari, komandant i FSK-së, ka bërë thirrje që Kosova të anëtarësohet me të drejta të plota në Kartën e Adriatikut A5.

Ai e paraqiti këtë kërkesë në konferencën e Kartës së Adriatikut, e organizuar këtë vit në Zadar të Kroacisë.

Gjatë fjalimit të tij, Jashari vlerësoi se përfundimi me sukses i tranzicionit të FSK-së, së bashku me gatishmërinë për pjesëmarrje në misione ndërkombëtare, dëshmon se Kosova është një partnere e besueshme.

Sipas tij, Kosova e meriton përfshirjen e plotë në strukturat dhe nismat euroatlantike të sigurisë.

Konferenca u udhëhoq nga komandanti i Komandës Amerikane për Evropë (EUCOM), gjenerali Alexus G. Grynkewich, ndërsa pjesë e saj ishin edhe shefat e mbrojtjes të vendeve të Ballkanit Perëndimor.

Në këtë aktivitet u trajtuan sfidat e tanishme të sigurisë, si dhe domosdoshmëria për zgjerimin e bashkëpunimit në rajon, thuhet në njoftim, përcjell Sinjali.

Në kuadër të konferencës, Jashari pati takime edhe me përfaqësues të lartë ushtarakë ndërkombëtarë, përfshirë komandantin e EUCOM-it, gjeneralin Grynkewich, dhe zëvendëskomandantin e JFC Naples, gjeneralin Peter K. Scot.

Bisedimet me ta u përqendruan te bashkëpunimi ndërmjet forcave, bashkërendimi në aspektin operacional dhe përkrahja për ngritjen e kapaciteteve mbrojtëse.

Komandanti i FSK-së u takua gjithashtu me komandantin e Gardës Kombëtare të Ajovas, gjeneralmajorin Stephen Osborn, me të cilin shqyrtoi mundësitë për fuqizimin e partneritetit mes dy forcave.

The post Jashari kërkon anëtarësimin e Kosovës me të drejta të plota në Kartën e Adriatikut A5 appeared first on Albeu.com.

Ai ka lindur më 28 nëntor të vitit 1955 në Prekaz të Skenderajt. Ishte djali i tretë i Shaban  dhe Zahide Jasharit. Ka mbaruar shkollën e mesme teknike në Skenderaj.

Pas shuarjes së të gjitha institucioneve të Kosovës më 1990, ideja për t’u organizuar në aspektin ushtarak merr një dimension të ri, nga LPK-ja, e cila ende nuk vepronte krejtësisht publikisht. Me 3 nëntor të vitit 1991, në Shqipëri shkoi një grup veprimtarësh për t’i kryer ushtrimet e duhura ushtarake dhe për t’u stërvitur për luftën e armatosur.

Shërbimet sekrete serbe i bien në gjurmë formacionit të armatosur dhe policia serbe ia mësyn rrethimit dhe kapjes së tij. Më 30 dhjetor 1991 ekspedita policore – ushtarake serbe ndërmori aksion për zënien e grupit. Pas kësaj përleshjeje me forcat e policisë serbe, tërë grupi i Adem Jasharit kalon në ilegalitet, deri në fillimet e luftës çlirimtare në Kosovë.

Intensifikimi i aksioneve të armatosura të UÇK-së fillon me sulmin e shtatorit 1997 në 12 stacionet policore. Nga aksionet e armatosura kundër forcave policore që kryente UÇK-ja, pas shtimit të dhunës sistematike të forcave serbe nëpër Kosovë, kalohet në një fazë tjetër, të ndeshjes së drejtpërdrejtë me forcat serbe, pra në beteja, në fundin e nëntorit 1997, kur në Rezallë të Re luftohet me forcat e shumta të policisë serbe.

Në këtë betejë i ndërpritet rruga kolonës së armatosur rëndë të forcave serbe, që kishin mësyrë një sulm në fshatin Vojnik, ku një ditë më parë, patrullat e maskuara të policisë serbe ishin gjuajtur me armë zjarri nga njëri prej luftëtarëve të hershëm të UÇK-së, Abedin Rexha – Sandokani.

Në këtë betejë printe Adem Jashari dhe luftëtarë të tjerë si Mujë Krasniqi, Rexhep Selimi, Sylejman Selimi, Ilaz Kodra, Ilaz Dërguti etj. Kjo është beteja e parë dhe fitorja e njësitit të UÇK-së. Kjo betejë bëri jehonë të madhe në opinionin publik.

Policia serbe kishte shënjuar që moti shtëpinë e Jasharëve. Më 5 mars 1998, që në orët e hershme, forca të mëdha të policisë serbe kishin mësyrë Prekazin. Një pikë zjarri, e stacionuar që herët në lokacionin e fabrikës së municionit, që ishte në afërsi të shtëpisë së Jasharëve, ishte përforcuar me mjete të rënda artilerike.Përforcimet e forcave serbe kishin ardhur edhe nga drejtimi i Klinës, Mitrovicës dhe Gllogovcit. Sulmi mbi Jasharët nis rreth orës gjashtë të mëngjesit.

Në shtëpi ndodheshin pothuajse tërë anëtarët e familjes. Sulmi mbi Jasharët dhe qëndresa heroike e tyre zgjatë tri ditë: më 5, 6 dhe 7 mars 1998.Kjo luftë heroike, në historinë e re të Kosovës njihet me emrin Epopeja e Ushtrisë Çlirimtare të Kosovës. Për figurën e Adem Jasharit kanë shfaqur mendime edhe personalitete të rëndësishme.

Administratori i parë ndërkombëtar i Kosovës, Bernar Kushner ka deklaruar se po të kishte Çmim Nobel për sakrificë për liri, ai do t’i takonte Adem Jasharit dhe familjes së tij.

Me vendim të ish presidentit të Kosovës, Fatmir Sejdiu, Adem Jashari është nderuar me titullin Hero i Kosovës.

The post Ditëlindja e komandantit legjendar Adem Jashari (VIDEO) appeared first on Albeu.com.