Presidentja e RMV-së, Gordana Siljanovska-Davkova, vlerëson se qytetarëve që jetojnë jashtë vendit duhet t’u krijohen mundësi për të votuar, duke theksuar se dispozitat aktuale të Kodit Zgjedhor prodhojnë pabarazi në trajtimin e diasporës.

Sipas saj, diaspora ndodhet në pozitë diskriminuese, ndërsa e drejta e votës përcaktohet qartë edhe në Kushtetutë.

“Kur bëhet fjalë për diasporën, ndonjëherë shokohem nga ajo që dëgjoj. Sipas Kushtetutës sonë, e drejta e votës është e lidhur në mënyrë aktive dhe pasive me shtetësinë. Është e pamundur të dërgohen në qendrat e votimit, kjo është shumë, ne nuk kemi asnjë, dhe i kemi vetëm në konsullata dhe ambasada, gjë që është e pamundur në disa vende. Pra, çfarë po bëhet atëherë? Ose me votim postar ose me votim elektronik e kështu me radhë”, deklaroi Siljanovska-Davkova.

Duke iu përgjigjur kritikave të opozitës, e cila ka vlerësuar se propozimi i qeverisë për votim fillimisht elektronik e më pas përmes postës nuk përmban mekanizma mbrojtës dhe mund të krijojë hapësirë për manipulime zgjedhore, Siljanovska tha se regjistrimi elektronik ishte realizuar pikërisht prej tyre.

Ajo preku edhe tema të tjera që mbeten të pazgjidhura, përfshirë modelin me një njësi zgjedhore dhe çështjen e financimit të partive gjatë zgjedhjeve.

“Sa i përket vërejtjeve të tjera, një njësi zgjedhore është një zgjidhje e mirë, ndërsa për të tjerat në lidhje me reklamat politike e kështu me radhë, duhet të arrihet edhe një konsensus, ka vende në të cilat nuk ka reklama politike të paguara”, tha Siljanovska-Davkova./Telegrafi/

The post Siljanovska-Davkova kërkon lehtësim të votimit për diasporën, mbështet idenë e një njësie zgjedhore appeared first on Albeu.com.

Përfaqësuesi i Bashkimit Evropian në vend, Michalis Rokas, u shpreh optimist se ditën e sotme forcat politike do të gjejnë gjuhën e përbashkët për ndryshimet në Kodin Zgjedhor, një angazhim ky që buron nga Agjenda e Reformave. Ai theksoi se kjo e premte shënon afatin përfundimtar për arritjen e një marrëveshjeje dhe se takimet e përditshme mes partive e bëjnë të besueshëm një kompromis.

Duke iu referuar rëndësisë së këtij hapi, Rokas solli në vëmendje edhe aspektin financiar, duke përmendur se bëhet fjalë për një shumë prej rreth 4.2 milionë eurosh që do të vihen në shërbim të qytetarëve të Maqedonisë së Veriut. Deklaratat ai i bëri pas një ceremonie ku u prezantuan mjetet e reja për Inspektoratin Shtetëror të Transportit, të siguruara falë një granti të BE-së.

I pyetur më pas për sinjalin që vjen nga Brukseli në një kohë kur katër vende aspirante po përparojnë me hapjen dhe mbylljen e kapitujve negociues, ambasadori e cilësoi procesin e zgjerimit si një investim të drejtpërdrejtë në arkitekturën e sigurisë, mbrojtjes, mirëqenies dhe aftësisë konkurruese të Unionit. Ai vuri në dukje se ritmi është përshpejtuar ndjeshëm dhe se shpreson sinqerisht që Shkupi zyrtar të jetë në gjendje të kapë këtë moment dhe të nisë pa vonesë bisedimet e anëtarësimit.

Rokas shtoi se është thelbësore që vendi ta shfrytëzojë këtë dritare mundësie për të ecur përpara në rrugën e integrimit. Ai zbuloi se një sasi e konsiderueshme pune po zhvillohet tashmë në prapaskenë, larg vëmendjes së publikut, me synimin për të finalizuar çështjet e hapura. “Shpresoj që shumë shpejt të gjendet një zgjidhje e cila do t’i hapë rrugën fillimit të negociatave me Bashkimin Evropian,” përfundoi ambasadori.

The post Rokas shpreh besimin se do të gjendet kompromisi për reformën zgjedhore appeared first on Albeu.com.

Bisedimet për ndryshimet në Kodin Zgjedhor kanë hyrë në një qorrsokak, teksa partitë politike vijojnë të akuzojnë njëra-tjetrën për bllokadë, ndërkohë që afati i vendosur nga agjenda reformuese skadon gjatë kësaj jave.

Deputeti i OBRM-PDUKM-së, Bojan Stojanoski, deklaroi se opozita nuk synon një Kod të ri Zgjedhor, por bllokadë të plotë. Ai vuri në dukje se, pas më shumë se katër muaj negociatash intensive, kërkesa e opozitës për rifillimin e debateve eksperte tregon qartë se ekziston një marrëveshje e heshtur mes partive opozitare për të refuzuar projektligjet. “Kemi negociuar për një periudhë të gjatë, mbi katër muaj, dhe në momentin kur ligji duhej të depozitohej, ata u zmbrapsën. Ky veprim të çon natyrshëm në konkluzionin se opozita thjesht nuk ka vullnet që ta miratojmë këtë ligj dhe të plotësojmë kriterin e fundit që na imponohet nga agjenda e reformave,” u shpreh Stojanoski.

Nga ana tjetër, LSDM-ja e ktheu akuzën duke e lidhur insistimin e OBRM-PDUKM-së për votim të pakontrolluar të diasporës me frikën nga përgjegjësia personale. Sipas LSDM-së, këta të ashtuquajtur “patriotë të mëdhenj”, të pajisur me nënshtetësi bullgare, dokumente evropiane dhe firma në Bullgari, janë të shqetësuar për fatin e tyre individual dhe jo për ardhmërinë e Maqedonisë. “Ata duan të manipulojnë procesin e ardhshëm zgjedhor, në mënyrë që të vonojnë përballjen e pashmangshme me drejtësinë. Qytetarët nuk mashtrohen dot. Epoka e gënjeshtrave, manipulimeve dhe vjedhjes së zgjedhjeve ka marrë fund,” theksuan nga LSDM-ja.

Ndërkohë, partia “E Majta” sulmoi ashpër Lidhjen Socialdemokrate të Maqedonisë (LSDM) pasi kjo e fundit vendosi të mos marrë pjesë në takimin koordinues që “E Majta” kishte paralajmëruar se do të thërriste midis forcave opozitare për të unifikuar qëndrimet rreth reformës zgjedhore. Sipas kësaj partie, qëndrimi i LSDM-së është një refuzim i pastër për hir të interesave të ngushta partiake. “Është tregues domethënës fakti që pikërisht partia e cila për vite të tëra propagandonte idenë e njësisë së vetme zgjedhore, sot nuk pranon as të ulet në tryezën e bisedimeve për këtë temë. Nëse ata vërtet qëndrojnë ende pas këtij koncepti, çfarë i pengon të dialogojnë? Në rast se kanë ndryshuar mendim, atëherë le të tregojnë integritet dhe ta pranojnë hapur para anëtarësisë së tyre,” deklaruan nga “E Majta”.

Sa u përket subjekteve politike shqiptare, deputetja e BDI-së, Arbana Pasholli, sqaroi se nuk kanë marrë asnjë ftesë zyrtare për një takim të tillë, por nënvizoi se Bashkimi Demokratik për Integrim (BDI) është gjithmonë i hapur ndaj dialogut institucional. Qëndrimi i përbashkët i partive shqiptare mbetet i qartë: e drejta e votës për diasporën duhet të garantohet. I gjithë ky debat zhvillohet në një moment kritik, pasi afati për miratimin e ndryshimeve në Kodin Zgjedhor, i parashikuar si kusht në agjendën reformuese, skadon ditën e mërkurë.

The post Reforma zgjedhore në ngërç, afati përfundimtar është e mërkura appeared first on Albeu.com.

Edhe një përpjekje e partive politike për të afruar qëndrimet rreth Kodit Zgjedhor ka përfunduar pa rezultat. Palët kanë mbetur në pozicionet e mëparshme dhe, të paktën për momentin, arritja e një konsensusi duket ende e largët. Nga pushteti është lënë e hapur një tjetër mundësi për opozitën, që të ulet dhe të gjejë marrëveshje për dallimet që ka sa u përket njësive zgjedhore, financimit dhe formës së votimit të diasporës.

“Të merren vesh mes vete për të gjitha dallimet që i kanë për 4 çështje kyçe, sepse e shohim se platformat i kanë të njëjta por kanë dallime në detaje, të ulen të merren vesh për një njësi zgjedhore, për modelin e financimit, për ankesat dhe mënyrën që do të ishin të pranueshme dhe të ulen të merren vesh edhe për modelin e prononcimit të diasporës. Gjithçka për të cilën partitë opozitare do ta ofrojnë te ne përmes një teksti ligji ne do ta pranojmë”- tha Bojan Stojanovski, nga OBRM-PDUKM.

Nga VLEN, Bekim Qoku theksoi se për këtë subjekt është e rëndësishme që mërgata të ketë të drejtën e votës, qoftë në mënyrë elektronike, qoftë përmes postës, por me kusht që procesi të jetë i sigurt, transparent dhe i besueshëm, në përputhje me standardet ndërkombëtare.

Megjithatë, opozita kundërshton vlerësimin se mes partive të saj ka afërsi në qëndrime. Mospajtimet shfaqen si te modeli zgjedhor, ku njëra palë kërkon një njësi zgjedhore ose një njësi zgjedhore me lista të hapura dhe prag, ndërsa pala tjetër insiston në 8 njësi zgjedhore, ashtu edhe te mënyra e votimit të diasporës, nëse ai duhet të zhvillohet online apo me postë. Për këtë arsye, partitë opozitare shfaqen pesimiste për mundësinë e gjetjes së një gjuhe të përbashkët.

“OBRM-PDUKM u tërhoq nga dy pika thelbësore të marrëveshjes, së pari nga votimi elektronik i diasporës, duke kërkuar që votimi të bëhet me postë. Dhe së dyti nga dakordimi që aktet nënligjore të KSHZ-së që lidhen me votimin elektronik të diasporës të miratohen me konsensus duke kërkuar që ato të miratohen me shumicë votash. 40:36 Sinqerisht kemi dyshimet tona se kjo është një lojë që në prapaskenë luhet dhe që sinqerisht më duhet ta them se edhe qëllimi përfundimtarë ka qenë që asnjëherë të mos arrihet marrëveshje, asnjëherë të mos arrihet konsensus dhe të vazhdohet me kodin e vjetër zgjedhor”, u shpreh Rina Ajdari nga BDI.

Ziadin Sela nga Lidhja për Shqiptarët deklaroi se LSDM dhe E majta janë kundër votimit elektronik të diasporës, ndërsa ata mbështesin që diaspora të votojë në mënyrë elektronike në zgjedhjet presidenciale, parlamentare dhe lokale. Sipas tij, në zgjedhjet parlamentare mërgata duhet të votojë për njësi zgjedhore këtu, ndërsa shtoi se këto nuk janë dallime të vogla, por qëndrime diametralisht të kundërta dhe, sipas tij, bëhet fjalë për taktizime për t’ia hedhur fajin dikujt tjetër.

Nga ana tjetër, Borisllav Krmov nga e Majta tha se, sipas tyre, nëse duhet të diskutohet për diçka, atëherë fokusi duhet të jetë te një njësi zgjedhore dhe jo te avancimi i sistemit për votimin e diasporës. Ai theksoi se kjo çështje u shfaq papritur, diku në 3 mbledhjet e fundit, gjë që sipas tij nënkupton se është futur si “tabletë helmuese” në gjithë situatën për ta bllokuar të gjithë procesin.

Deputetja e LSDM-së, Jovanka Trençevska, tha se e vërteta është se gjithçka është gënjeshtër e Mickoskit dhe OBRM-PDUKM-së, duke shtuar se sipas saj ata nuk kanë as kapacitet për konsensus dhe as synim të sinqertë për dialog politik. Ajo theksoi se LSDM nuk ka çfarë të merret vesh me opozitën, pasi, sipas saj, problemi qëndron te pushteti, te Mickoski, i cili dëshiron të manipulojë me 200 mijë vota.

Nuk përjashtohet mundësia që të ketë takime të tjera, por për momentin partitë ende nuk kanë caktuar një datë konkrete. Përpjekjet për të arritur konsensus mes pushtetit dhe opozitës synojnë miratimin e Kodit Zgjedhor dhe zhbllokimin e tij, pas mijëra amendamenteve që janë propozuar nga opozita. /Alsat/

The post Përplasjet mbeten të thella për Kodin Zgjedhor, bisedimet mes partive dështojnë sërish appeared first on Albeu.com.

Nesër, koordinatorët e grupeve parlamentare do të mblidhen sërish në një tryezë të përbashkët, në një përpjekje të re për të gjetur dakordësi për Kodin e ri Zgjedhor. Synimi është që zgjidhja ligjore të miratohet përpara afatit të ri të vendosur nga Bashkimi Evropian, si pjesë e përparimit në agjendën e reformave.

Në takimin informues të sotëm me gazetarët, kryetari i Kuvendit, Afrim Gashi, deklaroi se ai e mbështet votimin e diasporës, me kusht që shteti të garantojë fshehtësinë e votës.

“Në parim, unë jam për votimin elektronik të diasporës, madje jam që kjo të mundësohet edhe brenda vendit. Me mundësimin e votimit elektronik të diasporës, do ta arrijmë parimin që çdo qytetar të ketë të drejtë vote, por nëse shteti është i gatshëm të sigurojë fshehtësinë e votimit. Duhet të ketë vullnet të mirë dhe mirëkuptim, sepse për këtë ligj nevojitet konsensus i partive dhe nuk është mirë të qëndrohet në llogore apo në vizatim vijash të kuqe”, tha Afrim Gashi, kryetar i Kuvendit.

Ndërkohë, puna e Komisionit për Sistem Politik është ndërprerë për momentin, pasi LSDM-ja dhe Levica dorëzuan 13.500 amendamente. Të gjitha këto amendamente duhet të përkthehen, ndërsa ende nuk ka asnjë njoftim se kur Komisioni mund ta rifillojë punën dhe nëse më herët do të ketë ndonjë marrëveshje të mundshme mes partive për Kodin Zgjedhor.

Nga LSDM-ja thonë se Mickoski dhe OBRM-PDUKM nuk kanë ndërmend të heqin dorë nga, siç pretendojnë ata, manipulimet dhe keqpërdorimet me mbi 200 mijë vota nga diaspora.

“Është e rrezikshme dhe shqetësuese që VMRO refuzon kategorikisht që KSHZ-ja, me konsensus, t’i rregullojë procedurat për votimin e diasporës. Nga çfarë ka frikë pushteti? Nëse vërtet qëllimi i tyre është proces zgjedhor i drejtë dhe demokratik, atëherë përse ikin nga një mekanizëm që siguron kontroll, besim dhe pëlqim mes gjithë faktorëve politikë? Por, e vërteta është se qëllimi i tyre nuk është proces zgjedhor më i mirë, por hapja e hapësirës për inxhiniering dhe manipulim zgjedhor”, shtoi Bogdanka Kuzeska, zëdhënëse e LSDM-së.

Dje, kryeministri Mickoski i bëri një ofertë të hapur opozitës, duke thënë se është i gatshëm të pranojë një njësi zgjedhore dhe gjithashtu kërkesën e Levicës për financim më të madh të fushatës për partitë e vogla, nëse miratohet Kodi Zgjedhor ku do të përfshihet votimi elektronik i diasporës. Edhe sot, nga OBRM-PDUKM vazhduan kritikat ndaj opozitës, duke e akuzuar se po e bllokon qëllimisht miratimin e Kodit Zgjedhor.

“Venko Zaev dhe LSD kundërshtojnë zgjidhjen që diaspora e Maqedonisë të votojë në numër sa më të madh. Ne si VMRO-DPMNE propozuam që kjo të bëhet në rrugë elektronike ose me postë. Ky propozim u refuzua nga ana e Venko Zaevit dhe LSD-së, sepse tek ata mbizotëron frika se qytetarët që e braktisën shtetin gjatë periudhës së qeverisjes së tyre, nuk do ta mbështesin politikën e tyre”, u shpreh Valentin Manasievski.

The post Nesër raund i ri bisedimesh për Kodin Zgjedhor, Gashi mbështet votimin elektronik të diasporës appeared first on Albeu.com.

Kryeministri i RMV-së, Hristijan Mickoski, deklaroi sot se pret që raporti i BE-së për muajin qershor të jetë më i miri, ashtu siç ishte edhe ai i dhjetorit.

Ai ripërsëriti thirrjen drejtuar opozitës për të zhvilluar bisedime rreth Kodit Zgjedhor, duke theksuar se ende ekziston mundësia që ai të miratohet dhe të realizohet edhe hapi i dhjetë brenda afatit të përcaktuar.

Nga kazermja “Ilinden”, ku mori pjesë në promovimin e pajisjeve të reja ushtarake, Mickoski u shpreh se pret që vendi të renditet sërish ndër më të mirët në raportin e qershorit, njësoj si në raportin e dhjetorit. Ai tha se është i kënaqur dhe i inkurajuar nga informacioni i publikuar dje nga një media evropiane, sipas të cilit po shtohen deklaratat e politikanëve të lartë evropianë për një shtesë të shumës për tre vende nga grupi 6 i Ballkanit Perëndimor, të cilat janë më të avancuara në zbatimin e axhendës së reformave. Sipas tij, prioritetet tashmë po përcaktohen dhe, nëse vendi përfshihet në ato tre vende, gjë që ai tha se e pret, atëherë do të paraqiten këto prioritete.

Lidhur me ndryshimet dhe plotësimet në Kodin Zgjedhor, Kryeministri vlerësoi se teksti është tërësisht në përputhje me rekomandimet e OSBE-së dhe ODIHR-it, por shtoi se, sipas tij, nga opozita po shfaqet një qasje e papërgjegjshme.

Ai shprehu sërish gatishmëri për të diskutuar për çështjen e votimit të diasporës dhe për mënyrën se si mund të përmirësohet ky proces.

Mickoski tha se është i gatshëm të ulet sërish për bisedime për votimin e diasporës, me synimin që të gjendet një zgjidhje për ta përfshirë më shumë diasporën. Ai theksoi se, edhe pse dhjetëra vende në botë po zbatojnë votimin elektronik dhe se ai e ka modelin estonez të zhvilluar plotësisht, është i pranueshëm që kjo të mos mbetet si opsion nga zgjedhjet presidenciale të vitit 2029 e tutje. Sipas tij, kundërshtimet vijnë nga frika se më pas do të jenë në opozitë dhe se zgjedhjet mund t’u vidhen sërish, duke shtuar se ata mendojnë se të gjithë sillen njësoj siç janë sjellë vetë ata. Megjithatë, ai tha se është i gatshëm të bisedojë përsëri për të gjetur një modalitet që do ta zgjeronte ndjeshëm votimin e diasporës dhe njëkohësisht do të kursente para.

Ai shtoi se mund të shqyrtohet çdo formë, qoftë me fletë, qoftë me postë, apo çdo mënyrë tjetër, vetëm që të gjendet një zgjidhje për ta bërë votimin e diasporës më intensiv dhe më të qasshëm. Ndërsa për të gjitha kërkesat e tjera të opozitës, Mickoski deklaroi se ata, si partia më e madhe politike, do t’i pranojnë pa diskutim.

The post Mickoski: Ka ende hapësirë për marrëveshje për mënyrën e votimit të diasporës appeared first on Albeu.com.

Venko Filipçe, kryetar i LSDM-së, tha se partia nuk lëviz nga qëndrimet e saj parimore sa u përket ndryshimeve në Kodin Zgjedhor dhe se nuk do të japë mbështetje për zgjidhje që, sipas tij, krijojnë mundësi për manipulim dhe “grabitje zgjedhore”.

Ai theksoi se LSDM-ja do të mbetet gjithmonë konstruktive për ligje të këtij lloji, por jo nëse kjo nënkupton, siç u shpreh ai, hapjen e derës për grabitje zgjedhore.

Filipçe vuri në pikëpyetje modelin e propozuar të votimit për diasporën, duke thënë se ai nuk garanton kushte të njëjta për të gjithë votuesit.

“Pse duhet të ketë votim të ndryshëm për diasporën dhe për njerëzit që jetojnë në vend? Pse duhet të lëmë gjurmë gishtash këtu, dhe dikush duhet të votojë elektronikisht ose me postë? Le të votojnë në mënyrë të barabartë siç votojmë të gjithë”, tha ai.

Sipas Filipçes, me propozime të tilla Qeveria në mënyrë të padrejtë i vendos qytetarët në diasporë përballë dyshimeve se mund të lidhen me parregullsi të mundshme zgjedhore.

Ai shprehu rezerva edhe për ndryshimet e propozuara në kompetencat e Komisionit Shtetëror Zgjedhor, duke thënë se nuk ka logjikë që KSHZ-ja të kufizohet në marrjen e vendimeve vetëm për ankesat e futura në procesverbal.

Po ashtu, Filipçe ngriti dyshime edhe për ndryshimet e propozuara në mënyrën e shënimit të fletëvotimit, me vlerësimin se ato mund të hapin hapësirë për interpretime të ndryshme dhe për abuzime të mundshme.

The post Filipçe: LSDM nuk do të përkrahë zgjidhje që hapin rrugë për manipulime zgjedhore appeared first on Albeu.com.

Analisti politik Petar Arsovski vlerëson se çështja e votimit elektronik duhet parë e ndarë mes interesit politik dhe atij shtetëror.

Duke folur për Kodin e ri Zgjedhor, i cili po hyn në procedurë parlamentare, Arsovski thekson se arsyeja shtetërore për t’i lejuar diasporës votimin elektronik lidhet me faktin se një pjesë e qytetarëve jetojnë larg misioneve diplomatike dhe konsullore. Sipas tij, nëse atyre nuk u jepet kjo mundësi, praktikisht do t’u pamundësohet ushtrimi i së drejtës së votës, edhe pse kjo e drejtë u takon si shtetas.

Pika që po kundërshtohet më së shumti nga një segment i opozitës është pikërisht përfshirja e votimit elektronik për qytetarët që ndodhen jashtë vendit. Zgjidhja e propozuar parasheh që diaspora të mos votojë më fizikisht në përfaqësitë diplomatike dhe konsullore, por të mund ta realizojë votën përmes sistemit elektronik të Komisionit Shtetëror të Zgjedhjeve.

Në një deklaratë për “Lokalno”, Arsovski shprehet se motivi politik në këtë rast qëndron te fakti se partia që aktualisht është në pushtet ka marrë tradicionalisht shumë më tepër vota nga diaspora sesa opozita e tanishme.

Ai shton se, nëse kjo e drejtë u njihet qytetarëve që jetojnë jashtë vendit, atëherë ajo duhet t’u garantohet edhe qytetarëve që jetojnë brenda vendit. Sipas Arsovskit, Maqedonia është mjaftueshëm e vogël për ta zbatuar votimin elektronik për të gjithë banorët e saj, qoftë edhe nëse ai zhvillohet elektronikisht në qendrat e votimit, duke pasur parasysh se sot votimi në distancë mund të realizohet pa vështirësi./Telegrafi/

The post Arsovski: Votimi elektronik duhet t’u mundësohet edhe qytetarëve që jetojnë në vend appeared first on Albeu.com.

Me 59 vota “pro”, tre “kundër” dhe asnjë “të përmbajtur”, Kuvendi miratoi nevojën që projektligji për ndryshimin dhe plotësimin e Kodit Zgjedhor të procedohet me procedurë të shkurtuar. Ky projektligj bën pjesë në agjendën e reformave.

Nënkryetari i Kuvendit, Antonijo Miloshoski, ngarkoi Komisionin për Sistem Politik dhe Marrëdhënie Ndërmjet Komuniteteve si trupin kryesor punues, ndërsa edhe Komisioni Ligjor dhe Juridik do të mblidhet për shqyrtimin e projektligjit.

Nisma i është dorëzuar Kuvendit nga deputetët Antonijo Miloshoski, Zeqirija Tairi, Daniel Stojçevski, Blerim Bexheti dhe Ivanka Vasilevska. Mes zgjidhjeve të parashikuara në ndryshime janë votimi elektronik për diasporën, si edhe ndërhyrje në segmentin e financimit shtetëror të partive.

Duke arsyetuar pse Kodi Zgjedhor duhet të miratohet me procedurë të shkurtuar, propozuesi theksoi se përmbajtja e tij është diskutuar për katër muaj në kuadër të Ministrisë së Drejtësisë. Në këto bisedime kanë marrë pjesë përfaqësues të partive politike, me përjashtim të LSDM-së, e cila fillimisht u përfshi dhe më pas u tërhoq.

Miloshoski deklaroi se gjatë këtyre diskutimeve është arritur dakordim për 28 rekomandime të ODIHR-it, të cilat janë pranuar me konsensus. Sipas tij, në grupin e punës pranë Ministrisë së Drejtësisë nuk ka pasur mbivotim për asnjë çështje dhe vendimmarrja është bërë gjithmonë me pajtim të përbashkët. Ai shtoi se këto tema do të mund të diskutohen edhe në seancat parlamentare dhe në komisione.

Sa i takon modelit zgjedhor, Miloshoski tha se pjesa më e madhe e partive politike janë shprehur në favor të një njësie zgjedhore, ndërsa dy parti kanë mbështetur modelin me tetë dhe tre njësi. Meqë për këtë nuk u arrit konsensus, në fuqi mbetet zgjidhja aktuale me gjashtë njësi zgjedhore.

Për votimin e diasporës, Miloshoski sqaroi se është arritur pajtim që ai të mundësohet sipas praktikës së Francës dhe Estonisë, përmes votimit elektronik, të sigurt dhe të mbrojtur.

Ai theksoi gjithashtu se një ndihmë e madhe në këtë proces ka ardhur nga përfaqësuesit e KSHZ-së, Zyrës Shtetërore të Auditimit, ASHMAA-së dhe Komisionit Kundër Korrupsionit. Sipas tij, këto institucione paraqitën propozimet e tyre, të cilat në pjesën më të madhe u pranuan, për mënyrën se si të ndryshohet Kodi Zgjedhor në funksion të zhvillimit të zgjedhjeve demokratike, të drejta, transparente dhe efikase.

Lidhur me modelin e përdorimit të fondeve për reklamat zgjedhore, Miloshoski tha se për këtë çështje është arritur konsensus unanim.

Ai vlerësoi se në këtë proces nuk ka pasur asnjë rast kur një parti të ketë mbivotuar një tjetër, apo që përfaqësues të caktuar të partive politike të kenë injoruar propozimet e kolegëve të tyre. Sipas Miloshoskit, konsensusi i arritur nga shumica e partive që morën pjesë në Grupin e Punës në Ministrinë e Drejtësisë duhet të konsiderohet një arritje e rëndësishme dhe përparim në normat e Kodit Zgjedhor.

The post Kuvendi jep dritën jeshile për ndryshimet në Kodin Zgjedhor me procedurë të shkurtuar appeared first on Albeu.com.

Ndryshimet e propozuara në Kodin Zgjedhor kanë mbërritur në Kuvend. Sipas zgjidhjes së paraqitur, numri i zonave zgjedhore mbetet i pandryshuar, pra gjashtë, ndërsa nuk parashikohen as lista të hapura. Diaspora do të trajtohet si zonë e shtatë dhe votimi i saj do të realizohet online përmes KSHZ-së, e jo nëpërmjet ambasadave.

Këto dispozita, megjithatë, do të hyjnë në fuqi nga zgjedhjet e ardhshme presidenciale në vitin 2029. Propozimet janë firmosur nga OBRM-PDUKM, VLEN, ZNAM dhe BDI.

Në një konferencë për shtyp të mbajtur sot, kryetari i LSDM-së, Venko Filipçe, bëri të ditur se partia e tij do ta pengojë miratimin e Kodit Zgjedhor të propozuar. Sipas tij, ai përmban zgjidhje të rënda që nuk janë as evropiane dhe as demokratike, ndërsa lënë hapësirë për keqpërdorime në procesin zgjedhor.

“Ky Kuvend nuk duhet të miratojë një ligj të tillë. Ne do ta bllokojmë atë sepse qytetarët meritojnë të kenë një proces zgjedhor të drejtë dhe demokratik, dhe jo atë të kontrolluar që Hristijan Mickoski nisi ta vendoste duke ndjekur shembullin e mentorit të tij, padyshim një idhull, Nikolla Gruevski. Ne do ta bllokojmë këtë ligj në Kuvend”, tha Filipçe.

The post Propozim-ndryshimet për Kodin Zgjedhor dorëzohen në Kuvend, LSDM paralajmëron bllokadë appeared first on Albeu.com.