Një prej risive parashikon shtyrjen e së drejtës për t’u pajisur me leje drejtimi deri në 1 vit për personat që kapen duke drejtuar automjete pa patentë. Kur shkelja kryhet nga të mitur, kjo periudhë zgjatet deri në 2 vjet.

Për drejtuesit që rezultojnë me më shumë se 0,5 gram për litër alkool në gjak dhe që janë ndëshkuar më herët për drejtim mjeti nën ndikimin e alkoolit ose në gjendje të dehur, leja e drejtimit hiqet përgjithmonë.

Vatoci tha se ky ndryshim lidhet me nevojën për të frenuar aksidentet me pasoja të rënda që shkaktohen nga drejtimi i automjeteve nën efektin e alkoolit.

Ndryshimet e miratuara përmes Ligjit nr. 58/2026 “Për disa shtesa dhe ndryshime në Kodin Rrugor të Republikës së Shqipërisë” përfshijnë edhe masa më të ashpra ndaj sjelljeve të rrezikshme në rrugë.

Për drejtuesit që nuk përshtatin shpejtësinë në rrugë me fushëpamje të kufizuar, kryejnë manovra agresive, ndërrojnë shpesh korsinë pa sinjalizim ose kryejnë shkelje që rrezikojnë përdoruesit e tjerë të rrugës, në zona urbane, pranë shkollave, kryqëzimeve apo degëzimeve, masa administrative është rritur nga 20 000 deri në 60 000 lekë.

Sipas Policisë Rrugore, përcaktimi i sanksionit merr në konsideratë vendin ku ndodh shkelja dhe qartëson elementet e anës objektive të saj.

Rritja e masës është vlerësuar e arsyeshme për shkak të rrezikut të lartë që paraqesin këto veprime dhe shtimit të ngjarjeve rrugore në zonat urbane.

Përdorimi i telefonit celular gjatë drejtimit tashmë sanksionohet edhe për drejtuesit e biçikletave, motomjeteve deri në 50 cc dhe monopatinave me motor.

Gjithashtu, leja e drejtimit pezullohet kur një drejtues është ndëshkuar dy herë brenda të njëjtit vit për përdorim të telefonit celular. Më parë, pezullimi zbatohej pas tre shkeljesh.

Policia e konsideron përdorimin e telefonit gjatë drejtimit një ndër shkaqet kryesore të humbjes së kontrollit mbi mjetin dhe, rrjedhimisht, të aksidenteve rrugore.

Rregulla të posaçme janë përcaktuar edhe për drejtuesit e rinj, të cilët e kanë marrë lejen e drejtimit gjatë 24 muajve të fundit. Për këtë kategori parashikohen masa specifike lidhur me drejtimin nën ndikimin e alkoolit dhe kufizime të veçanta të shpejtësisë.

Një tjetër ndryshim heq mundësinë e konvertimit të pezullimit të lejes së drejtimit, të lëshuar nga shteti shqiptar, përmes pagesës së një shume sa dyfishi i masës administrative maksimale të parashikuar për shkeljen.

Para datës 7 gusht, drejtuesit e evidentuar për shkelje të Kodit Rrugor, ndaj të cilëve përveç gjobës parashikohej edhe pezullimi i lejes së drejtimit, mund të paguanin dyfishin e vlerës maksimale të gjobës për të shmangur masën plotësuese. Me ndryshimet e reja, kjo mundësi është hequr dhe leja e drejtimit pezullohet automatikisht.

Ndryshimet kryesore, të cilat kanë hyrë në fuqi më 07.08.2026, u bëjnë të ditur se personat e kapur pa leje drejtimi do ta kenë të shtyrë të drejtën për t’u pajisur me patentë deri në 1 vit, ndërsa për të miturit deri në 2 vjet. Për çdo rast, shërbimet e Policisë Rrugore në Policinë e Shtetit do të informojnë DSH­TRR-në, si institucionin përgjegjës për lëshimin e lejeve të drejtimit, në mënyrë që personat e konstatuar të regjistrohen në sistem dhe të ndiqen procedurat përkatëse.

Strukturat e Policisë Rrugore në të gjithë vendin janë informuar për ndryshimet e fundit dhe janë udhëzuar që t’i zbatojnë ato në mënyrë korrekte.

Policia e Shtetit u ka bërë thirrje drejtuesve të mos tejkalojnë shpejtësinë e lejuar, të mos drejtojnë automjete apo motomjete nën efektin e alkoolit dhe veçanërisht në gjendje të dehur, të mos përdorin telefonin gjatë drejtimit, si dhe të shmangin parakalimet e ndaluara dhe manovrat e rrezikshme ose agresive.

Apeli vjen edhe në kushtet e numrit të lartë të shkeljeve të evidentuara nga mjetet inteligjente dhe të forcimit të masave në funksion të mbrojtjes së jetës.

Sipas Policisë, ndëshkimi nuk përbën objektivin kryesor. Synimi është parandalimi i shkeljeve, shmangia e aksidenteve dhe mbrojtja e jetës.

Çdo drejtues mjeti duhet të sillet me përgjegjshmëri gjatë gjithë kohës që ndodhet në timon dhe të respektojë rregullat e qarkullimit rrugor.

Siguria në rrugë kërkon angazhimin e të gjithëve. Kontributi i çdo përdoruesi të rrugës ndihmon në krijimin e një qarkullimi më të sigurt dhe në shpëtimin e jetëve.

The post Kodi i ri Rrugor/ Nga heqja përfundimtare e patentës për alkoolin te gjobat deri në 60 mijë lekë, ja rregullat që kanë ndryshuar për qarkullimin appeared first on Albeu.com.

Ndryshimet parashikojnë pasoja edhe për personat madhorë që drejtojnë automjet pa pasur patentë. Krahas gjobës, atyre do t’u ndalohet për 1 vit mundësia për t’u pajisur me leje drejtimi, çka do të thotë se gjatë kësaj kohe nuk mund të regjistrohen në autoshkollë. Për të miturit masa është më e ashpër: nëse kapen në timon, ata nuk do të mund ta marrin patentën sapo të mbushin 18 vjeç, por duhet të presin të paktën edhe 2 vjet përpara se të paraqiten në autoshkollë.

Të dhënat mbi ngjarjet rrugore tregojnë se drejtuesit që sapo janë pajisur me leje drejtimi kanë mundësi më të lartë për t’u përfshirë në aksidente, tejkalime shpejtësie dhe shkelje të tjera. Për këtë arsye, gjatë 2 viteve të para pas marrjes së patentës, atyre u ndalohet plotësisht konsumimi i alkoolit kur drejtojnë mjetin. Gjithashtu, shpejtësia e lejuar për këtë kategori do të jetë maksimumi 90 km/h në autostradë dhe 80 km/h në rrugët e tjera jashtë qendrave të banuara.

Mosrespektimi i këtyre rregullave dënohet me gjobë nga 5 mijë deri në 15 mijë lekë, pezullim të patentës për 1 muaj dhe heqje pikësh. Nëse brenda periudhës 2-vjeçare drejtuesi kryen 2 shkelje gjatë 1 viti, kufizimet që lidhen me shpejtësinë ose qarkullimin sipas orareve do të shtyhen edhe për 1 vit, duke e çuar kohëzgjatjen totale në 3 vjet.

Një tjetër ndërhyrje e rëndësishme lidhet me pezullimin e lejes së drejtimit. Deri tani, si shtetasit shqiptarë ashtu edhe të huajt mund ta konvertonin pezullimin duke paguar dyfishin e shumës së gjobës. Kjo mundësi nuk do të ekzistojë më për patentat e lëshuara nga autoritetet shqiptare, pasi pezullimi do të zbatohet automatikisht.

Gjobat rriten edhe për tejkalimin e shpejtësisë në zonat e banuara dhe pranë shkollave, si dhe për personat që zhvillojnë gara me automjete ose kryejnë manovra agresive. Masa financiare, e cila deri tani varionte nga 10 deri në 40 mijë lekë, do të jetë nga 20 deri në 60 mijë lekë.

Leja e drejtimit do të pezullohet për 3 muaj nëse një shofer kapet 2 herë brenda 1 viti duke përdorur celularin në timon. Deri tani, Kodi Rrugor e parashikonte këtë masë pas 3 shkeljesh. Ndalimi i përdorimit të celularit nuk zbatohet vetëm për drejtuesit e makinave, por edhe për ata që përdorin biçikleta, motorë deri në 50 kubik dhe monopatina.

The post Kodi Rrugor ndryshon: Përsëritësit e dehur në timon humbasin patentën përgjithmonë appeared first on Albeu.com.

Një drejtues që kapet për herë të dytë me përqendrim alkooli në gjak mbi 0.5 gram për litër (g/l), pasi më parë është penalizuar për të njëjtën shkelje, do të humbasë përgjithmonë lejen e drejtimit.

Sanksione më të forta do të zbatohen edhe ndaj personave që zhvillojnë ose marrin pjesë në gara shpejtësie në rrugë. Në të njëjtën kategori përfshihen edhe manovrat e rrezikshme, ndërrimi i përsëritur i korsisë pa përdorur sinjalizuesin dhe sjelljet agresive që rrezikojnë përdoruesit e tjerë të rrugës. Për këto shkelje, gjobat do të jenë nga 20 mijë deri në 60 mijë lekë.

Rregullat e reja zgjerojnë gjithashtu ndalimin e përdorimit të telefonit celular në dorë gjatë lëvizjes. Ky kufizim nuk vlen vetëm për drejtuesit e automjeteve, por edhe për personat që drejtojnë biçikleta ose motomjete me kubikazh deri në 50 cc.

Dispozita të veçanta janë përcaktuar edhe për drejtuesit e rinj. Personat që e kanë marrë lejen e drejtimit të kategorisë B brenda dy viteve të fundit do t’i nënshtrohen tolerancës zero ndaj alkoolit. Për ta, kufiri maksimal i shpejtësisë është vendosur në 90 km/orë në autostrada dhe në rrugët interurbane kryesore, ndërsa jashtë qendrave të banuara nuk duhet të tejkalohet shpejtësia 80 km/orë.

The post Kodi Rrugor me masa më të ashpra: Heqje e përhershme e patentës, gjoba të rritura dhe kufizime për drejtuesit e rinj appeared first on Albeu.com.

Tejkalimi i shpejtësisë së lejuar tashmë dënohet penalisht me dënime të rënda.

Me zbatimin e dispozitave të reja nga Departamenti i Drejtësisë, drejtuesit e mjeteve që tejkalojnë shpejtësinë mund të përballen me dënime të rënda penale.

Konkretisht, masat e reja parashikojnë burgim deri në tre (3) vjet nëse vepra mund të rezultojë në “rrezik i përbashkët për sendet e huaja”.

Megjithatë, dënimet mund të bëhen edhe më të rënda. Nëse vepra rezulton me lëndim të rëndë trupor ose dëme të konsiderueshme në objektet publike, dënimi me burgim mund të arrijë deri në dhjetë (10) vjet.
Gjithashtu, nëse shpejtësia e madhe rezulton me vdekjen e dikujt, dënimi me burgim është së paku dhjetë (10) vjet.

Në rastet kur është shkaktuar vdekja e një numri të madh personash, gjykata ka mundësi të shqiptojë burgim të përjetshëm./Albeu.com/

The post Greqi: Deri në 10 vjet burg për tejkalim shpejtësie appeared first on Albeu.com.

Më herët drejtuesit e mjeteve që paguanin një masë administrative brenda 5 ditësh, përfitonin 20% ulje. Tashmë me rregullat e reja me ndryshimet e miratuara në Kodin Rrugor, nëse paguhet brenda 15 ditëve, vlera e gjobës do të paguhet me 50% ulje.

“Në të gjitha rastet e parashikuara me gjobë, nëse arkëtimi i vlerës së gjobës nga kundërvajtësi bëhet brenda 15 ditëve nga dita që gjoba regjistrohet ose vendimi ka marrë formë të prerë, gjoba ulet me 50% të vlerës”, përcaktohet në Kodin Rrugor të ndryshuar.

Rregullat e reja që nga përgjysmimi i masës së gjobës për makinat nëse paguhet brenda afatit deri te zgjatja e kohës së vlefshmërisë së patentave nga 10 vjeçare në 15 vjeçare, rritja e shpejtësisë maksimale për të qarkulluar në autostradë deri te ashpërsimi i gjobave nëse nuk zbatohet rregullat për fëmijët hynë në fuqi pas miratimit të ndryshimeve të Kodit Rrugor të Republikës së Shqipërisë.

Projektligji “Për disa ndryshime dhe shtesa në ligjin nr. 8378, datë 22.7.1998 “Kodi Rrugor i Republikës së Shqipërisë”, u miratua në Kuvend në seancën e 16 marsit. Ligji i ndryshuar u botua në Fletoren Zyrtare me 6 prill 2023 dhe sipas nenit 21 të tij, hyn në fuqi 15 ditë pas botimit në FZ, që do të thotë të gjitha rregullat e reja kanë hyrë në fuqi më datë 21 Prill 2023.

Gjithashtu edhe Drejtoria e Shërbimit të Transportit Rrugor konfirmon se të gjitha nenet e Kodit Rrugor që kanë të bëjnë me tagrin e DPSHTRR-së kanë nisur të zbatohen që ditën e parë të hyrjes në fuqi të ndryshimeve.

Për lejet e drejtimit afati i vlefshmërisë së tyre zgjatet me 5 vite. Konkretisht lejedrejtimet e mjeteve të kategorive AM, A1, A2, A, B1, B dhe BE, sipas grup-moshave, ishin të vlefshme për 10 vjet, nëse janë lëshuar për persona deri në moshën 50 vjeç; 5 vjet, për ata që e kanë kaluar moshën 50-vjeçare dhe 3 vjet, për ata që i kanë kaluar të 70-at.

Me rregullat e reja lejedrejtimet e mjeteve të kategorive AM, A1, A2, A, B1, B dhe BE sipas grupmoshave janë të vlefshme për 15 vjet nëse janë lëshuar apo konfirmuar për persona deri në moshën 70 vjeç. Për personat mbi 70 vjeç konfirmimi i vlefshmërisë së lejes së drejtimit bëhet duke dorëzuar certifikatë mjekësore të lëshuar nga një prej organeve mjekësore të parashikuara në pikën 2 të nenit 117 të këtij Kodi, nga e cila të rezultojë që zotëruesi i kësaj certifikate plotëson të gjitha kërkesat fizike e psikike të kërkuara.

Ndryshimet në Kodin Rrugor rrisin shpejtësinë maksimale të lejuar për të udhëtuar në autostradë nga 110 km/orë që ishte më përpara në 130 km/orë.

Ndryshimet e Kodit Rrugor

Neni 114 pika 2

Ishte

2. Cilido, që drejton mjete me motor, nuk duhet të ketë kaluar moshën: a) shtatëdhjetë vjeç, për të drejtuar mjete me motor për transport malli; b) gjashtëdhjetë e pesë vjeç, për të drejtuar autobusë, kamionë, kamionë me rimorkio, gjysmë rimorkiatorë dhe artikularë të tjerë, të caktuar për transport personash. Ky kufi mund të rritet çdo vit deri në shtatëdhjetë vjeç, kur drejtuesi paraqet një dëshmi të veçantë për kërkesat fizike dhe psikike, pas një vizite të specializuar mjekësore të përvitshme, sipas mënyrave të përcaktuara në aktet në zbatim.

Bëhet

“2. Cilido që drejton mjete me motor, nuk duhet të ketë kaluar moshën shtatëdhjetë vjeç për të drejtuar autobusë, kamionë, kamionë me rimorkio, gjysmërimorkiatorë, artikularë të tjerë, të caktuar për transport personash dhe mjete me motor për transport malli.”

Neni 117/1 Kufizime për drejtuesit e motomjeteve

Ishte

1. Zotëruesit e lejedrejtimeve vendase të grupit “A” për tre vitet e para pas marrjes së lejedrejtimit nuk u lejohet drejtimi i motomjeteve me fuqi prej 25kw specifike referuar ngarkesës, ose 0,16 kw/kg.

Neni 117/1 Kufizime për drejtuesit e mjeteve rrugore

Bëhet

Pas pikës 1 shtohet pika 1/1 me këtë përmbajtje: “1/1. Mbajtësve të lejeve të drejtimit të kategorisë B, në dy vjetët e para të lëshimit, nuk u lejohet të drejtojnë mjete motorike me fuqi specifike, referuar masës bosh të mjetit, më të madhe se 55 kë/tonë. Për makinat hibride elektrike ose plug-in, kufiri specifik i fuqisë është 65 kë/tonë, duke përfshirë peshën e baterisë. Kjo pikë zbatohet vetëm për lejet e drejtimit që lëshohen pas hyrjes në fuqi të këtij ligji.”

Neni 120 pika 2

Ushtrimet e drejtimit të mjetit

Ishte

Autorizimi i lejon kursantit të ushtrohet me mjete të asaj kategorie, për të cilën është kërkuar lejedrejtimi ose shtrirja e vlefshmërisë së tij, me kusht që në krah të ndodhet, në funksionin e instruktorit të miratuar, një person me moshë jo më të madhe se 65 vjeç dhe jo më i vogël se 30 vjeç, i pajisur me lejedrejtimi të vlefshëm për të njëjtën kategori mjeti, që e ka marrë qysh prej të paktën 10 vjetësh, ose me lejëdrejtimi të vlefshëm për një kategori më të lartë mjeti; instruktori duhet të jetë shumë i kujdesshëm gjatë lëvizjes së mjetit dhe të ndërhyjë në momentin e duhur dhe me efektshmëri.

Neni 120 pika 2

Ushtrimet e drejtimit të mjetit

Bëhet

Autorizimi i lejon kursantit të ushtrohet me mjete të asaj kategorie, për të cilën është kërkuar lejedrejtimi ose shtrirja e vlefshmërisë së tij, me kusht që në krah të ndodhet, në funksionin e instruktorit të miratuar, një person me moshë jo më të madhe se 70 vjeç dhe jo më i vogël se 30 vjeç, i pajisur me lejedrejtimi të vlefshëm për të njëjtën kategori mjeti, që e ka marrë qysh prej të paktën 10 vjetësh, ose me lejëdrejtimi të vlefshëm për një kategori më të lartë mjeti; instruktori duhet të jetë shumë i kujdesshëm gjatë lëvizjes së mjetit dhe të ndërhyjë në momentin e duhur dhe me efektshmëri.

Neni 124 Afati dhe konfirmimi i vlefshmërisë së lejedrejtimit të mjetit

Ishte

1. Lejedrejtimet e mjeteve të kategorive AM, A1, A2, A, B1, B dhe BE, sipas grup-moshave, janë të vlefshme për:-10 vjet, nëse janë lëshuar apo konfirmuar për persona deri në moshën 50 vjeç;-5 vjet, për ata që e kanë kaluar moshën 50-vjeçare; -3 vjet, për ata që i kanë kaluar të 70-at.
2. Lejedrejtimet e mjeteve të kategorive C1, C1E, C dhe CE, sipas grup-moshave, janë të vlefshme për:-5 vjet, nëse janë lëshuar apo konfirmuar për persona deri në moshën 65 vjeç; -2 vjet, për persona mbi 65 vjeç. Sipas parashikimit të shkronjës “a”, të pikës 2, të nenit 114, për personat mbi 65 vjeç, lejedrejtimi e kategorive C dhe CE lëshohet për drejtimin e mjeteve, masa e përgjithshme e të cilave, me ngarkesë të plotë, nuk është më shumë se 20 tonë.
3. Lejedrejtimet e mjeteve të kategorive D1, D1E, D dhe DE, sipasgrup-moshave, janë të vlefshme për:-5 vjet, nëse janë lëshuar apo konfirmuar për persona deri në moshën 65vjeç; -3 vjet, për persona nga 65vjeç e lart. Sipas parashikimit të shkronjës “b”, të pikës 2, të nenit 114, për personat mbi 65vjeç, lejedrejtimi e kategorive D1 ose D, apo D1E ose DE lëshohet vetëm për drejtimin e mjeteve, për të cilat kërkohet pajisja me lejedrejtimi përkatësisht të kategorisë B ose BE.
4. Lejedrejtimet e posaçme të mjeteve, lëshuar për personat me aftësi të kufizuara, të kategorive AM, A1, A2, A, B1, B dhe BE, janë të vlefshme për:-5 vjet, nëse janë lëshuar apo konfirmuar për persona deri moshën 60 vjeç;-3 vjet për persona mbi 60 vjeç.
5. Lejedrejtimet e posaçme të mjeteve, lëshuar për personat me aftësi të kufizuara, të kategorive C1, C1E, C dheCE, janë të vlefshme për:-5 vjet, nëse janë lëshuar apo konfirmuar për persona deri moshën 50 vjeç:-3 vjet, kur mbajtësi i saj është mbi 50 vjeç. Këto leje nuk rinovohen pas moshës 65 vjeç.
6. Mbajtësit e lejedrejtimit të automjetit, sipas pikave 2, 3, 4 dhe 5, kur mbushin 80 vjeç rifreskojnë vlefshmërinë e lejedrejtimit çdo vit pas verifikimit të ekzistencës së të dhënave fizike dhe mendore nga komisionet mjekësore përkatëse, duke u bazuar në pikën 5 të nenit 117.

Neni 124

Bëhet

1. Pikat 1, 2, 4 dhe 5 ndryshohen si më poshtë:

“1. Lejedrejtimet e mjeteve të kategorive AM, A1, A2, A, B1, B dhe BE sipas grupmoshave janë të vlefshme për: – 15 vjet nëse janë lëshuar apo konfirmuar për persona deri në moshën 70 vjeç; – për personat mbi 70 vjeç konfirmimi i vlefshmërisë së lejes së drejtimit bëhet duke dorëzuar certifikatë mjekësore të lëshuar nga një prej organeve mjekësore të parashikuara në pikën 2 të nenit 117 të këtij Kodi, nga e cila të rezultojë që zotëruesi i kësaj certifikate plotëson të gjitha kërkesat fizike e psikike të kërkuara.

2. Lejedrejtimet e mjeteve të kategorive C1, C1E, C, CE, D1, D1E, D dhe DE sipas grupmoshave janë të vlefshme për: – 5 vjet nëse janë lëshuar apo konfirmuar për persona deri në moshën 70 vjeç; Sipas parashikimit të pikës 2 të nenit 114 të këtij Kodi për personat mbi 65 vjeç, lejedrejtimi e kategorive C dhe CE lëshohet për drejtimin e mjeteve, masa e përgjithshme e të cilave me ngarkesë të plotë nuk është më shumë se 20 tonë. Sipas parashikimit të pikës 2 të nenit 114 të këtij Kodi për personat mbi 65 vjeç, lejedrejtimi e kategorive D1 ose D, apo D1E ose DE lëshohet vetëm për drejtimin e mjeteve për të cilat kërkohet pajisja me lejedrejtimi përkatësisht të kategorisë B ose BE.
3. Lejedrejtimet e posaçme të mjeteve, lëshuar për personat me aftësi të kufizuara, të kategorive AM, A1, A2, A, B1, B dhe BE, janë të vlefshme për: – 5 vjet nëse janë lëshuar apo konfirmuar për persona deri në moshën 65 vjeç; – 3 vjet për persona mbi 65 vjeç.
4. Lejedrejtimet e posaçme të mjeteve, lëshuar për personat me aftësi të kufizuara, të kategorive C1, C1E, C dhe CE janë të vlefshme për: – 5 vjet nëse janë lëshuar apo konfirmuar për persona deri në moshën 65 vjeç: Këto leje nuk rinovohen pas moshës 65 vjeç.”
5. b) Pikat 3 dhe 6 shfuqizohen.

Neni 132

Qarkullimi i automjeteve dhe motomjeteve që u përkasin qytetarëve shqiptarë me banim jashtë vendit ose të huajve.

Ishte

1. Për automjetet, motomjetet dhe rimorkiot e importuara përkohësisht ose të reja nga fabrika të blera për eksportim, që kanë përmbushur formalitetet doganore, kur duhet, dhe që i përkasin qytetarëve shqiptarë me banim jashtë shtetit ose të huajve që kalojnë nëpër Shqipëri, lëshohet një leje qarkullimi me një kohëzgjatje maksimale 15-ditore, duke përjashtuar ndonjë shtyrje të mundshme afati, si dhe një targë e veçantë njohjeje, siç përcaktohet në aktet në zbatim.

Neni 132

Qarkullimi i automjeteve dhe motomjeteve që u përkasin qytetarëve shqiptarë me banim jashtë vendit ose të huajve

Bëhet

1. Për automjetet, motomjetet dhe rimorkiot e importuara përkohësisht ose të reja nga fabrika të blera për eksportim, që kanë përmbushur formalitetet doganore, kur duhet, dhe që i përkasin qytetarëve shqiptarë me banim jashtë shtetit ose të huajve që kalojnë nëpër Shqipëri, lëshohet një leje qarkullimi me një kohëzgjatje maksimale 30-ditore, duke përjashtuar ndonjë shtyrje të mundshme afati, si dhe një targë e veçantë njohjeje, siç përcaktohet në aktet në zbatim.

Neni 140, pika 1 Kufizimet e shpejtësisë

Ishte

1.Për të siguruar qarkullimin dhe mbrojtur jetën e njerëzve, shpejtësia maksimale nuk mund të kalojë 110 km/orë për autostradat, 90 km/orë për rrugët interurbane kryesore, 80 km/orë për rrugët interurbane dytësore e rrugët lokale interurbane dhe 40 km/orë për rrugët në qendrat e banuara.

Bëhet

1.Për të siguruar qarkullimin dhe mbrojtur jetën e njerëzve, shpejtësia maksimale nuk mund të kalojë 130 km/orë për autostradat, 90 km/orë për rrugët interurbane kryesore, 80 km/orë për rrugët interurbane dytësore e rrugët lokale interurbane dhe 40 km/orë për rrugët në qendrat e banuara.

Neni 169, pika 5

Ishte

Drejtuesi i motomjeteve është i detyruar të bëhet i dallueshëm në trafik në kushtet e errësirës, duke mbajtur një jelek fosforeshent të homologuar. Kushdo që nuk zbaton këtë detyrim ndëshkohet me masë administrative me gjobë nga një mijë deri në tre mijë lekë.

Në nenin 169 pika 5

Bëhet

Drejtuesi i motomjeteve është i detyruar të bëhet i dallueshëm në rrugët interurbane nga gjysmë ore pas perëndimit të diellit deri gjysmë ore përpara lindjes së tij, si dhe ditën në raste mjegulle, kur ka borë, ka shira të fortë. Për ta bërë këtë, drejtuesi i motomjetit është i detyruar të përdorë jelek fluoreshent/fosforeshent të homologuar apo veshje teknike me elemente fosforeshente. Kushdo që nuk zbaton këtë detyrim, ndëshkohet me masë administrative me gjobë nga 1000 (një mijë) deri në 3 (tre mijë) lekë.

Neni 170, pikat 1,4,6 dhe 8 Përdorimi i rripave të sigurimit dhe sistemeve të fiksimit

Ishte

1.Drejtuesi i mjetit dhe pasagjerët që zënë vendet e përparme të mjeteve të kategorive M1, M2, M3 dhe N1, N2, N3 sipas klasifikimit të nenit 47, pika 2, të prodhuara nga janari 1978, janë të detyruar të vendosin rripat e sigurisë në çdo lloj lëvizjeje me mjet. Ky detyrim qëndron edhe për pasagjerët që rrinë në vendet e pasme, për mjetet e prodhuara nga maji 1990. Bëjnë përjashtim mjetet e kategorive M2 dhe M3, të cilat përdoren për transport urban ose ato mjete ku lejohet qëndrimi në këmbë.

4.Pasagjerët deri në moshën 12 vjeç mund të rrinë në vendet e përparme të mjeteve të kategorive M1, N1, N2 dhe N3 të klasifikuar në nenin 47, pika 2, vetëm kur mbahen nga sisteme të përshtatshme fiksuese. Fëmijët nuk duhen transportuar në sisteme fiksuese me fytyrë prapa në ndenjëset e pasagjerëve të mbrojtura me jastëk ajri, përveçse kur këto të fundit janë të çaktivizuara.

5. Pasagjerët deri në moshën 4 vjeç që rrinë në vendet e pasme të mjeteve të kategorisë M1, duhet të mbahen nëpërmjet sistemeve të posaçme të fiksimit.
6. Norma e pikës 5 nuk zbatohet për pasagjerët deri në moshën 4 vjeç që udhëtojnë me autovetura të shërbimit publik taksi për transport njerëzish ose të shërbimit me qiradhënie me drejtues mjeti gjatë shërbimit, kur qarkullojnë në qendrat e banuara a në itinerare nga ose për në stacionin e trenit, porte dhe aeroporte, me kusht që të jenë të shoqëruar të paktën nga një pasagjer me moshë jo më të vogël se 18 vjeç.
7. Cilido, që nuk përdor rripat e sigurisë dhe sistemet e fiksimit, të parashikuara për pasagjerët deri në 12 vjeç, ndëshkohet me masë administrative, me gjobë nga pesë mijë deri në pesëmbëdhjetë mijë lekë. Kur shkelja i takon një fëmije në moshë jomadhore, përgjegjësia bie mbi drejtuesin e mjetit ose, kur ndodhet në çastin e kryerjes së shkeljes, mbi atë që është ngarkuar me mbikëqyrjen e kësaj fëmije. Në rast se është drejtuesi i mjetit, përveç masës administrative të ndëshkimit me gjobë, merret edhe masa administrative plotësuese e pezullimit të lejedrejtimit për një periudhë nga 6 deri në 12 muaj.

Neni 170

Bëhet

Bëhen ndryshimet dhe shtesat e mëposhtme:

a) Pika 1 ndryshohet si më poshtë: “1. Drejtuesi i mjetit dhe pasagjerët e mjeteve të kategorisë L6, të pajisura me kabinë të mbyllur dhe të automjeteve të kategorive M1, M2, M3 dhe N1, N2, N3 sipas klasifikimit të nenit 47, pika 2, të këtij Kodi, të pajisura me rripa sigurie, janë të detyruar t’i vendosin ato në çdo lloj lëvizjeje me mjet. Bëjnë përjashtim mjetet e kategorive M2 dhe M3, të cilat përdoren për transport urban ose ato mjete ku lejohet qëndrimi në këmbë.”

b) Pika 4 ndryshohet si më poshtë: “4. Fëmijët deri në moshën 3 vjeç duhet të udhëtojnë të siguruar me sisteme të përshtatshme fiksuese të homologuara, të përshtatshme për peshën e tyre, në vendet e pasme të mjetit. Ata mund të udhëtojnë në vendet e përparme të mjeteve të kategorive M1, N1, N2 dhe N3 të klasifikuara në nenin 47, pika 2, të këtij Kodi, të siguruar me sisteme të përshtatshme fiksuese, me fytyre prapa, vetëm kur jastëkët e ajrit janë të çaktivizuar. Sistemet fiksuese të fëmijëve duhet të instalohen në mjet në përputhje me udhëzimet e dhëna nga prodhuesi.”.

c) Pas pikës 4 shtohen pika 4/1 dhe 4/2 me këtë përmbajtje: “4/1. Në mjetet e kategorive M1, N1, N2 dhe N3 pa sisteme të përshtatshme fiksuese fëmijët me moshë deri në tre vjeç nuk mund të udhëtojnë. 4/2. Fëmijët me moshë mbi tre vjeç nuk lejohet të qëndrojnë në vendet e përparme kur gjatësia e tyre nuk kalon 1,50 m.”

ç) Në pikat 5 dhe 6 fjalët “në moshën 4 vjeç” zëvendësohen me fjalët “në moshën 3 vjeç”.

d) Në pikën 8 paragrafi i parë ndryshohet si më poshtë: “Cilido që nuk përdor rripat e sigurisë dhe sistemet e fiksimit për fëmijë, ndëshkohet me masë administrative me gjobë nga 5,000 (pesë mijë) deri në 15.000 (pesëmbëdhjetë mijë) lekë. Kur shkelja i takon një fëmije në moshë jomadhore, përgjegjësia bie mbi drejtuesin e mjetit ose, kur ndodhet në çastin e kryerjes së shkeljes, mbi atë që është ngarkuar me mbikëqyrjen e këtij fëmije. Në rast se është drejtuesi i mjetit, përveç masës administrative të ndëshkimit me gjobë, merret edhe masa administrative plotësuese e pezullimit të lejedrejtimit për një periudhë nga 6 deri në 12 muaj.”.

Neni 203 pikat 1 dhe 2

Ishte

1.Të ardhurat nga masat administrative me gjobë për shkeljet e parashikuara nga nenet e këtij Kodi, paguhen nga kundërvajtësi brenda 5 ditëve nga dita që vendimi ka marrë formën e prerë me përjashtim të rasteve kur ky Kod parashikon gjobë në vend. Pas kalimit të këtij afati, për çdo ditë vonesë, paguhet 2 për qind kamatë deri në një muaj. Kur gjoba nuk paguhet ose nuk nxirret dot nga të ardhurat e shkelësit, për rastet e drejtuesit të mjetit me motor, bëhet ndalimi i mjetit deri në tre muaj dhe pas këtij afati bëhet shitja e mjetit me ankand, duke i dhënë diferencën në lekë shkelësit.

2.Në të gjitha rastet e parashikuara me gjobë, nëse arkëtimi i vlerës së gjobës nga kundërvajtësi bëhet brenda 5 ditëve nga dita që vendimi ka marrë formë të prerë, gjoba ulet me 20 për qind të vlerës.

Neni 203 pikat 1 dhe 2

Bëhet

1. Të ardhurat nga masat administrative me gjobë për shkeljet e parashikuara nga nenet e këtij Kodi paguhen nga kundërvajtësi brenda 15 ditëve nga dita që gjoba regjistrohet ose vendimi ka marrë formën e prerë me përjashtim të rasteve kur ky Kod parashikon gjobë në vend. Pas kalimit të këtij afati, për çdo ditë vonesë, paguhet 2 për qind kamatë deri në një muaj. Kur gjoba nuk paguhet ose nuk nxirret dot nga të ardhurat e shkelësit, për rastet e drejtuesit të mjetit me motor, bëhet ndalimi i mjetit deri në tre muaj dhe pas këtij afati bëhet shitja e mjetit me ankand, duke i dhënë diferencën në lekë shkelësit.
2. Në të gjitha rastet e parashikuara me gjobë, nëse arkëtimi i vlerës së gjobës nga kundërvajtësi bëhet brenda 15 ditëve nga dita që gjoba regjistrohet ose vendimi ka marrë formë të prerë, gjoba ulet me 50 për qind të vlerës./monitor

The post Shërbimi postar dhe transportet nisin zbatimin e rregullave të reja të Kodit Rrugor appeared first on Albeu.com.

Balluku: “Padyshim ky është një projektligj shumë i rëndësishëm për të gjithë ne. Është një projektligj që duhet të gjejë një konsensus të gjerë, pasi Shqipëria tashmë ka infrastrukturën e duhur për të pasur një Kod Rrugor modern, i cili duhet ti përgjigjet të gjitha zhvillimeve që tashmë ne kemi në vendin tonë.

Në fjalën e saj në Kuvend, Belinda Balluku renditi disa nga nyjet e infrastrukturës rrugore, që janë ndërtuar me standarde të larta.

Balluku: Sot, ashtu siç të gjithë e dini, kemi ndërtuar një infrastrukturë të denjë për çdo vend europian. Bypass-i Fierit, Vlorës, Shkodrës, Tepelenës, rruga Kardhiq-Delvinë, Unaza e Madhe, e cila një pjesë e mirë tashmë ka përfunduar dhe vazhdojmë me lotet e tjera për ta përmbyllur të gjithë këtë proces në 2024, por edhe korridoret e rëndësishme, sapo vij nga një takim me Komisionerin Varhelyi, i cili sapo më ka konfirmuar edhe një herë se Korridori VIII tashmë është i miratuar nga Bashkimi Europian, nga Komisioni dhe nga të gjitha forumet e tjera dhe është thjesht çështje ditësh për t’u bërë publik dhe me miratimin e këtij Korridori, pra më në fund si pjesë e Ten10, ne do të kemi mundësi që të gjitha projektet tona, qoftë ato infrastrukturore, siç janë bypass-i i Elbasanit, apo bypass-i i Librazhdit apo hekurudha që do të lidhë Durrësin me Rrogozhinën dhe Rrogozhinën më pas me Pogradecin për t’u lidhur me Maqedoninë e Veriut, janë të gjitha projekte europiane të cilat do të mbështeten edhe me fondet e Bashkimit Europian.

Ajo u shpreh se krahas zhvillimeve në infrastrukturë janë kryer investime në qendrat e monitorimit, të cilat kanë në fokus survejimin e përdoruesve të rrugës, me qëllim respektimin e rregullave të qarkullimit.

Balluku: Sigurisht të gjitha këto zhvillime infrastrukturore, që janë mbështetur nga Qeveria Shqiptare dhe puna që është bërë nga Ministria e Infrastrukturës dhe Energjisë, si dhe nga ARRSH-ja, nuk mbeten vetëm tek ndërtimet e rrugëve, por edhe tek zhvillimet e tyre teknologjike, ashtu siç është dhe rasti i ngritjes së Qendrës së Monitorimit, e cila do të nisë me 200 kilometrat e parë për të monitoruar të gjithë lëvizjet e trafikut ku komponentët do ti ofrohen edhe Policisë së Shtetit për sigurinë, por edhe urgjencës, edhe zjarrfikësve dhe sigurisht do të jetë një qendër ku do të kontrollohet trafiku, fluksi i tij dhe ndarja nëpër autostradat moderne që ne tashmë kemi./Albeu.com/

The post Balluku: Shqipëria ka infrastrukturën për të pasur një Kod Rrugor modern appeared first on Albeu.com.

Deputeti Lefter Gështenja ka bërë një sërë propozimesh të cilat përfshijnë heqjen e postblloqeve policore nga rrugët, rritjen me 50% të posteve për parking në akset rrugore të bashkive dhe revokimin e pezullimit të patentës kundrejt pagesës.

Gjithashtu Gështenja ka kërkuar që të ulet me 50% vlera e gjobave, për tu afruar me standarded evropiane.

Sipas tij, gjobat maksimale që vendosen sot në bazë të Kodit Rrugor janë sa 6-fishi i pagës minimale.

Në emër të Partisë Demokratike, deputeti Lefter Gështenja ka thënë se të gjitha këto ndryshime janë në interes të qytetarëve dhe i shkojnë në ndihmë jo vetëm sigurisë rrugore, por edhe drejtuesve të automjeteve.

Propozimet e deputeti Lefter Gështenja:

• Propozohet ulja e vleres se gjobave me 50%  te vleres se percaktuar  ne KODIN RRUGOR aktual. Kjo per e qene ne perputhje me standartet Europinane. Sot kemi gjoba maksimale sa 6 fishi i pages minimale.
• Propozohet heqja e sherbimeve policore stacionare (POSTOBLLOQET) ne te gjitha akset kombetare.
• Propozohet sanksionim ne KODIN RRUGOR qe minimalisht 50 % e e posteve  per parking ne akset rrugore te bashkive  te jene PUBLIKE pa pagese. Gjithashtu  bashkitë marrin masa për të garantuar zona parkimi pa pagesë për të gjithë banorët rezidentë pranë banesës së tyre.
• Për te gjithe  qytetarët shqiptarë me banim jashtë shtetit ose të huajve që kalojnë nëpër Shqipëri me automjetet, motomjetet dhe rimorkiot e importuara përkohësisht ose të reja nga fabrika të blera për eksportim, që kanë përmbushur formalitetet doganore, u lëshohet një leje qarkullimi me një kohëzgjatje maksimale 30-ditore nga 15 dite qe eshte aktualisht.
• Pezullimi i lejedrejtimit, në rastet kur kundërvajtësi jep pëlqimin, konvertohet me pagesën e një shume që është sa dyfishi i masës administrative maksimale të parashikuar për normën e shkelur.
• Shpejtesia maksimale e qarkullimit ne autostrada te jete jo me shume se 130 km/ore  por duke ju referuar standarteve europiane dhe ne perputhje me standartet e projektimit te miratuar qe jane ne fuqi.
• Propozohet rritja e afatit te kohes se pageses se gjobes pa penalitet nga 5 dite behet 15 dite./Albeu.com/

The post Propozon heqjen e policëve nga rrugët, Lefter Gështenja: Shpejtësia maksimale jo më shumë se 130 km/h, vlera e gjobave të përgjysmohet appeared first on Albeu.com.

Po ashtu nga kamerat, është fiskuar që drejtuesi i mjetit ka hedhur një shishe buzë rruge. Këto dy shkelje përveç gjobës i ka kushuar dhe minus 8 pikë nga patenta.

Njoftimi i Policisë:

Kontrolle intensive për të ndëshkuar shkelësit e kodit rrugor që janë burim potencial për përfshirje në ngjarje rrugore apo që rrezikojnë për përfshirje në ngjarje rrugore, përdoruesit e tjerë të rrugës. Hedhja e sendeve nga mjeti dënohet me gjobë 2500-10.000 lekë të rinj, sipas nenit 15/1, germa f, të Kodit Rrugor. Respekto rregullat e qarkullimit rrugor dhe mjedisin!

The post Hedh shishen nga xhami dhe shkel kodin rrugor, gjobitet mbi 1 milion lekë shoferi appeared first on Albeu.com.

Në draftin e paraqitur në Kuvend dhe që pritet të shqyrtohet nga komisionet parlamentare, parashikohet që shoferët deri në 70 vjeç, do të kenë patentë me vlefshmëri 5 vjet më shumë se ajo aktualja.

“Lejedrejtimet e mjeteve të kategorive AM, A1, A2, A, B1, B dhe BE, sipas grup moshave, janë të vlefshme për: 15 vjet, nëse janë lëshuar apo konfirmuar për persona deri në moshën 70 vjeç. Për personat mbi 70 vjeç konfirmimi i vlefshmërisë së lejes së drejtimit bëhet duke dorëzuar certifikatë mjekësore të lëshuar nga një prej organeve mjekësore të përmendura në pikën 2 të nenit 117, jo më shumë se gjashtë muaj përpara, nga e cila të rezultojë që zotëruesi i kësaj certifikate plotëson të gjitha kërkesat fizike e psikike të kërkuara”, thuhet në draftin e propozuar nga kreu i grupit të PS-së.

Neni 124 pika 1 është

Lejedrejtimet e mjeteve të kategorive AM, A1, A2, A, B1, B dhe BE, sipas grup moshave, janë të vlefshme për:

– 10 vjet, nëse janë lëshuar apo konfirmuar për personat deri në moshën 50 vjeç;

– 5 vjet, për ata që kanë kaluar moshën 50 vjeç

– 3 vjet, për ata që kanë kaluar të 70-tat.

Neni 124 pika 1 propozohet të bëhet

Lejedrejtimet e mjeteve të kategorive AM, A1, A2, A, B1, B dhe BE, sipas grup moshave, janë të vlefshme për:

– 15 vjet, nëse janë lëshuar apo konfirmuar për persona deri në moshën 70 vjeç;

– Për personat mbi 70 vjeç konfirmimi I vlefshmërisë së lejes së drejtimit bëhet duke dorëzuar certifikatë mjekësore të lëshuar nga një prej organeve mjekësore të përmendura në pikën 2 të nenit 117, jo më shumë se gjashtë muaj përpara, nga e cila të rezultojë që zotëruesi I kësaj certifikate plotëson të gjitha kërkesat fizike e psikike të kërkuara./albeu.com

The post Balla bën propozim për Kodin Rrugor: Të rritet deri në 15 vjet vlefshmëria e patentave appeared first on Albeu.com.

Gjithashtu një tjetër person është prangosur për dhënie ryshfeti kundrejt policisë.

Ndërkohë nuk kanë munguar edhe gjobat për drejtuesit e pabindur të automjeteve.

Lajmin e ka bërë të ditur Policia e Shtetit përmes një njoftimi në faqen zyrtare.

 Njoftimi i Policisë:

Tiranë/Kontrolle të shtuara në të gjitha rrugët e kryeqytetit dhe në rrugët interurbane që lidhen me Tiranën, me qëllim rritjen e parametrave të sigurisë rrugore.

Në vijim të punës permanente për evidentimin dhe ndëshkimin e shkelësve të Kodit Rrugor, nisur nga fakti se në fundjavë në drejtim të kryeqytetit, ka fluks të shtuar të automjeteve, Policia Rrugore e Tiranës ka intensifikuar akoma më shumë kontrollet, duke përdorur radarë, dragera, patrulla në lëvizje me mjete të paloguara, kamera e aparate fotografike.

Si rezultat i kontrolleve, gjatë fundjavës janë arrestuar 16 drejtues mjetesh që drejtonin mjetet në gjendje të dehur.

Gjithashtu është vënë në pranga, për mitëdhënie, një tjetër drejtues mjeti në gjendje të dehur, i cili për të shmangur testin e alkoolit, i ofroi punonjësve të Policisë Rrugore 5.000 lekë të rinj.

Janë ndëshkuar me masë administrative nga 10.000 deri në 20.000 lekë të rinj secili, 12 drejtues mjetesh, për drift në sheshin “Nënë Tereza” dhe tek TEG-u.

Si dhe 9 drejtues të tjerë mjetesh, me nga 20.000 deri 40.000 lekë të rinj secili, për gara shpejtësie në Unazë të Re, në segmentin Liqeni i Thatë – TEG.

Njëkohësisht, janë ndëshkuar me nga 20.000 deri në 30.000 lekë të rinj, për shkelje të semaforit 18 drejtues mjetesh;

14 drejtues mjetesh luksoze, me nga 5.000 deri në 20.000 lekë të rinj secili, për xhama të zinj, modifikim targash dhe mangësi të theksuara në dokumentacion.

Janë pezulluar 35 leje drejtimi, për shpejtësi dhe për drejtim mjeti nën efektin e alkoolit.

Janë vendosur 256 masa administrative, për parakalime të gabuara dhe parkime mbi trotuar apo në vija të bardha.

Policia Rrugore e Tiranës apelon për të gjithë drejtuesit e automjeteve, që të zbatojnë me rigorozitet rregullat e qarkullimit rrugor, pasi shërbimet e Policisë Rrugore janë në monitorim të plotë të qarkullimit dhe shkelësit e Kodit Rrugor nuk do munden t’i shpëtojnë ndëshkimit administrativ e penal.

Policia Rrugore e Tiranës fton qytetarët që të denoncojnë në numrin pa pagesë 112 e në Komisariatin Dixhital, çdo shkelje të Kodit Rrugor, për të kontribuar në rritjen e parametrave të sigurisë së jetës në rrugë./albeu.com/

The post Burg, gjoba dhe konfiskim mjeti, policia ndëshkon ashpër të pabindurit (VIDEO) appeared first on Albeu.com.