Pas triumfit 4-0 kundër Audas, rezultat që i siguroi kalimin në fazën “play-off” të Conference League, Dinamo e shikon vazhdimin me besim dhe optimizëm.

Një nga futbollistët që kontribuoi drejtpërdrejt në këtë sukses të rëndësishëm të dinamovitëve, Klevi Qefalija, foli pas takimit në një intervistë për “Newsport.al”.

Mesfushori tregoi se si u përjetua brenda ekipit çasti vendimtar i ndeshjes, ndërsa u ndal edhe te rivali i turit të fundit dhe objektivat e Dinamos në Superiore.

Goli juaj i dytë, i realizuar në mbyllje të pjesës së parë, ia shtroi rrugën Dinamos për fitoren 4-0. Si e përjetoi skuadra këtë moment historik?

Për ne kishte peshë të jashtëzakonshme, veçanërisht për faktin se goli u shënua në fund të 45 minutave të para. Ai na shtoi ndjeshëm sigurinë dhe, kur hymë në dhomat e zhveshjes, besonim se mund ta ruanim të njëjtin ritëm edhe në vazhdim. Arritëm një sukses të madh, por mbi të gjitha mendoj se dëshmuam forcën e karakterit të skuadrës.

Që nga fillimi i kualifikueseve, rezultatet e punës së trajnerit duken qartë. Cili është plani për përpjekjen e fundit në “play-off”?

Nuk ka dyshim se trajneri dhe pjesëtarët e stafit kanë punuar shumë mirë, ndërsa ne përpiqemi t’i përmbushim sa më saktë kërkesat e tyre. Na pret edhe një pengesë dhe do të bëjmë maksimumin që ta kapërcejmë. Nevojitet përqendrim i plotë dhe akoma më shumë punë.

Pafos është kundërshtari i fundit në këtë etapë vendimtare dhe sezonin e kaluar u kualifikua në grupet e Champions League. A ka nisur skuadra ta studiojë rivalin?

Po, sigurisht. Përballë do të kemi një ekip shumë të fortë, që zotëron përvojë në Europë, ndaj jemi të vetëdijshëm për vështirësinë e madhe të kësaj sfide. Do ta shqyrtojmë me kujdes lojën e tyre, duke evidentuar si pikat e forta, ashtu edhe dobësitë, në mënyrë që të paraqitemi në fushë sa më të përgatitur.

Dinamon e ndan vetëm një hap nga grupet e Conference League. A besoni se kjo gjeneratë mund të shkruajë historinë pikërisht tani, apo zgjidhni të mbeteni me këmbë në tokë?

Natyrisht që e kemi në mendje dhe e duam një arritje historike, pasi ky është qëllimi për të cilin punojmë. Megjithatë, duhet të ruajmë realizmin. Përpara kemi dy ndeshje me rëndësi shumë të madhe dhe duhet të mendojmë për secilën veçmas. Besoj se mund ta realizojmë nëse vazhdojmë të punojmë të bashkuar dhe japim gjithçka.

Nga paraqitjet tuaja kuptohet se, përveç golave, jepni një kontribut të madh edhe në fazën sulmuese. A lidhet kjo me mënyrën se si ju pozicionon trajneri Daja, apo ka edhe faktorë të tjerë?

Është fryt i disa elementeve së bashku. Trajneri më ka shfaqur besim të madh dhe më ka orientuar që të kuptoj më qartë rolin tim në fushë, si edhe detyrat që pret të kryej. Pa dyshim, ndikim ka edhe mbështetja e të gjithë shokëve, sepse funksionimi i mirë i skuadrës u krijon individëve më tepër hapësirë për të treguar cilësitë.

Superiore nis sërish pas një jave dhe ndeshjen e parë e luani ndaj Vorës. Krahas përqendrimit të plotë në Conference League, çfarë synon “Nëndetësja” në sezonin e ri?

Objektivat tanë janë padyshim të mëdhenj. Dinamo është një klub që kërkon gjithmonë majat, prandaj duam të zhvillojmë një sezon sa më pozitiv në kampionat dhe do të luftojmë me forcë për titullin kampion. Sipas meje, kemi ndërtuar një grup shumë cilësor dhe këtë sezon mund të realizojmë gjëra të bukura.

Ermal SPAHIU

The post Klevi Qefalija: Goli i dytë na rriti besimin, ndaj Pafos do të japim gjithçka! Dinamo kërkon majat edhe në Superiore appeared first on Albeu.com.

Dinamo siguroi me shumë klas kualifikimin ndaj Aluminij, pasi triumfoi 3-0 në ndeshjen e kthimit. Në përfundim të takimit të luajtur në “Elbasan Arena”, mesfushori Klevi Qefalija foli për suksesin dhe paraqitjen e tij.

“Mbi të gjitha ka rëndësi kualifikimi, ndërsa sigurisht që edhe goli ka vlerën e vet.

Si ndihem kur luaj më pranë portës? Jam i kënaqur, sepse më pëlqen të jem afër saj. Për mua mjafton të luaj përpara.

Natyrisht, është kënaqësi edhe prania ime në konferencën për shtyp.

Të them të drejtën, kam pasur shumë frikë. Edhe gjatë stërvitjeve më thonin se duhej ta largoja atë.

Lojtarët e afruar janë përshtatur deri në njëfarë mase, por u duhet koha e tyre. Manellari na ka dhënë shumë ndihmë si skuadër dhe në fushë kemi një komunikim shumë të mirë me të.

Nuk është diçka e vogël të përmbysësh Astanën.

Sa i përket rezultatit të kundërshtarit në ndeshjen paralele, në letër Steaua Bukureshti është një ekip i madh dhe ne prisnim që të fitonte”, deklaroi Qefalija.

The post Klevi Qefalija pas kualifikimit: Goli ka vlerë, por preferoj të luaj pranë portës appeared first on Albeu.com.

Mesfushori i Dinamos, Klevi Qefalija, doli në konferencë për shtyp përpara sfidës së radhës, ku foli për përgatitjet dhe formën aktuale të ekipit.

“Tashmë e njohim më mirë kundërshtarin dhe e kemi studiuar. Përmes pamjeve filmike kemi analizuar ndeshjen e parë, për të kuptuar se ku duhet të përmirësohemi dhe cilat ishin gjërat që bëmë mirë në Slloveni. Na pret një përballje e vështirë, pasi nuk kemi përballë një kundërshtar të lehtë, por do të japim maksimumin për të marrë rezultatin më të mirë në këtë sfidë”, deklaroi Qefalija.

Ai theksoi se Dinamo ndodhet në një gjendje shumë të mirë psikologjike, sidomos pas eliminimit të një skuadre të fortë si Astana. Sipas mesfushorit, ekipi ruajti besimin te kualifikimi edhe pse e nisi nga disavantazhi i ndeshjes së parë dhe kishte pësuar gol atje.

Qefalija u shpreh se, megjithëse takimi në Slloveni përfundoi në barazim, Dinamo e pati lojën gjatë gjithë kohës nën kontroll dhe brenda skuadrës ekziston bindja se mund të sigurohet kalimi në fazën tjetër. Në lidhje me mungesat e përballjes së parë, ai nënvizoi se këta futbollistë janë pjesë e grupit, ndërsa veçoi Malomon, i cili ka qenë titullar në shumicën e ndeshjeve dhe pritet të japë kontributin e tij në objektivin për kualifikim.

The post Qefalija beson te kualifikimi i Dinamos: Gjendja psikologjike e skuadrës është shumë e mirë appeared first on Albeu.com.