Ish-ministri i Arsimit, Arsim Bajrami, ka kërkuar nga deputetët e Kuvendit të Kosovës dhe përfaqësuesit e të gjitha subjekteve politike që të tejkalojnë ndarjet dhe të angazhohen për krijimin e institucioneve të vendit.

Në një intervistë në emisionin “InfoMagazine”, Bajrami tha se bllokadat dhe përplasjet e vazhdueshme në politikë po i sjellin dëme Kosovës, ndërsa pasojat po bien mbi interesin e qytetarëve.

Ai u bëri thirrje edhe partive fituese të zgjedhjeve, edhe atyre që janë në opozitë, të rikthehen në dialog dhe të kontribuojnë për vënien në funksion të institucioneve.

“Unë edhe nga kjo studio, edhe pse jam jashtë rrjedhave politike, ju bëj ftesë të gjithë akterëve politikë pa dallim, qoftë atyre që kanë fituar zgjedhjet, qoftë atyre që s’i kanë fituar zgjedhjet, por që janë në opozitë, që t’i kthehen arsyes, mendjes së shëndoshë, të ulen dhe t’i themelojnë institucionet e Kosovës dhe të ecin përpara”, tha Bajrami.

Sipas tij, askush nuk përfiton nga vazhdimi i këtyre përplasjeve, pasi në fund çmimin e tyre e paguajnë qytetarët.

“Sepse në fund e fundit këto përplasjet politike na bëjnë të gjithë humbës. Po humbësi më i madh në këtë situatë është populli i Kosovës dhe ne do ta paguajmë faturën për këta politikanë të papërgjegjshëm që i ka zgjedhur populli i Kosovës”, u shpreh ai.

Bajrami nënvizoi se tejkalimi i gjendjes aktuale është përgjegjësi e përbashkët e të gjithë aktorëve politikë, pa marrë parasysh rolin që kanë në skenën politike.

The post Bajrami: Përplasjet politike po e dëmtojnë Kosovën dhe qytetarët e saj appeared first on Albeu.com.