I dyshuari kishte bërë ankimim në shkallën e dytë, por ditën e sotme kërkesa u rrëzua dhe u la në fuqi vendimi i shkallës së parë të GJKKO-së.

Ai akuzohet për veprat penale “Korrupsioni aktiv i personave që ushtrojnë funksione publike” dhe “Shpërdorimi i detyrës”, të kryera në bashkëpunim.

Zhilla dyshohet se i ka kërkuar ryshfet 1 mijë euro një biznesmeni në zonën e Kombinatit, me qëllim moskryerjen e veprimeve ligjore për tendën e lokalit që kishte zbatuar hapësirën publike.

Për këtë çështje janë të akuzuar dhe disa persona të tjerë.

Zhilla u vetëdorëzua në polici më 30 gusht. Punonjësi i IMT së Tiranës, ishte shpallur në kërkim gjatë një operacioni të SPAK dhe Policisë, pasi mori ryshfet për të mos hequr tendën e një lokali.

Pas hekurave përfunduan edhe Gerald Fuçia dhe Edmond Çela, ndërsa u shpall në kërkim Klajdi Zhilla, si dhe një tjetër.

Arrestimi i tyre mësohet se ka ndodhur në zonën e Kombinatit, në lokalin e ish-deputetit Mark Frroku, ku dhe u sekuestruan kamerat e sigurisë.

Vendimi i Aplit të GJKKO-së:

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Igerta Hysi, shpalli sot vendimin mbi çështjen penale nr. 67 akti, datë 22.09.2025 regjistrimi, mbi ankimin e personit nën hetim K.Zh., me objekt: “Ankim ndaj vendimit nr. 89, datë 01.09.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Vleftësimin e ligjshëm të ndalimit dhe caktimin e masës së sigurimit personal “arresti në burg”, parashikuar nga neni 238, i Kodit të Procedurës Penale” dhe vendosi:

Miratimin e Vendimit nr. 89, datë 01.09.2025 të Gjykatës së Posaçme të Shkallës së Parë për Korrupsionin e Krimin e Organizuar.

Kundër këtij vendimi mund të bëhet rekurs në Gjykatën e Lartë brenda 45 ditëve, nga e nesërmja e njoftimit të vendimit. U shpall në Tiranë, me datë 30.09.2025”.

The post Mori 1 mijë euro për të mos hequr tendën e lokalit, Apeli i GJKKO-së lë në burg inspektorin e IMT-së së Tiranës appeared first on Albeu.com.