Bashkëpunimi i KFV Prishtina me Webster University Geneva Campus u mundëson vajzave ta shohin futbollin përtej karrierës në fushë, si një mundësi për t’u përgatitur për drejtimin dhe administrimin e sportit. Lojtaret e klubit që vendosin të ndjekin studimet në Administrim Biznesi me fokus në Menaxhim Sportiv mund të përfitojnë bursë që mbulon 30 për qind të tarifës së shkollimit.

Debati për barazinë gjinore në sport është lidhur prej vitesh me nevojën për t’u krijuar vajzave më shumë hapësira në futboll. KFV Prishtina synon ta zgjerojë këtë qasje, duke ngritur edhe çështjen e rolit që ato mund të kenë pasi të largohen nga fusha dhe të ardhmes së tyre në drejtimin e sportit.

Mbi këtë vizion është ndërtuar marrëveshja me Webster University Geneva Campus, e cila synon t’u ofrojë vajzave mundësi zhvillimi përtej profesionit të futbollistes.

Sipas marrëveshjes, vajzat e KFV Prishtina që dëshirojnë të regjistrohen në programin Bachelor në Administrim Biznesi, me fokus në Menaxhim të Sportit në Webster University Geneva Campus, do të kenë mundësi të marrin bursë në vlerën e 30 për qind të tarifës së shkollimit.

Për klubin, marrëveshja përfaqëson më shumë se një ndihmë financiare për arsimimin. Ajo shihet si investim në një brez vajzash që në të ardhmen mund të drejtojnë klube, federata, organizata dhe institucione sportive.

Barazia gjinore nuk duhet të kufizohet vetëm në fushën e lojës

Rritja e pjesëmarrjes së vajzave në sport është një zhvillim i rëndësishëm, por prania e tyre si lojtare nuk mjafton nëse ato mbeten të përfaqësuara në numër të vogël në vendet ku merren vendimet.

Sporti nuk përcaktohet vetëm në 90 minutat e një ndeshjeje. Ai formësohet në administratat e klubeve dhe federatave, në bordet drejtuese, gjatë hartimit të strategjive, menaxhimit të buxheteve, negocimit të partneriteteve, marketingut, komunikimit dhe përcaktimit të politikave të investimeve.

Për këtë arsye, hapi i radhës për barazinë gjinore në sport nuk lidhet vetëm me shtimin e numrit të vajzave që luajnë futboll.

Synimi është që më shumë vajza të marrin pjesë edhe në vendimmarrjen për futbollin.

KFV Prishtina dëshiron që vajzat që po formohen sot në klub ta shohin veten nesër si menaxhere sportive, drejtuese klubesh, administratore, stratege, sipërmarrëse dhe udhëheqëse të institucioneve sportive kombëtare e ndërkombëtare.

Kur vajzat mungojnë në strukturat ku përcaktohen drejtimet e sportit, përvoja dhe këndvështrimi i tyre mbeten më pak të pasqyruara në planifikimin e së ardhmes së tij.

Marrëveshja vijon objektivat e projektit me UEFA Foundation for Children

Partneriteti me Webster University Geneva Campus lidhet drejtpërdrejt me synimet e projektit që KFV Prishtina po zbaton me mbështetjen e UEFA Foundation for Children. Në qendër të këtij vizioni janë edukimi, fuqizimi i vajzave dhe krijimi i mundësive që ato të kenë rol më të madh në proceset vendimmarrëse.

KFV Prishtina e konsideron futbollin një mjet për të krijuar mundësi që tejkalojnë rezultatet në sport. Përgatitja e vajzave për role drejtuese dhe investimi në edukimin e tyre përbëjnë vijim të natyrshëm të një modeli që synon t’i mbështesë jo vetëm në pjesëmarrjen sportive, por edhe në ndikimin që mund të kenë në organizimin dhe zhvillimin e sportit.

Në këtë kuadër, marrëveshja me Webster University Geneva Campus e shndërron një nga këto objektiva në mundësi konkrete. Vajzat që rriten përmes futbollit mund të ndjekin arsimin universitar dhe të përgatiten për pozita të ardhshme në menaxhimin dhe vendimmarrjen sportive.

Një element i veçantë i këtij bashkëpunimi është edhe lokacioni i Webster University Geneva Campus.

Studimet në Gjenevë do t’i vendosin vajzat në një ambient ndërkombëtar, pranë një prej qendrave më të rëndësishme evropiane për sportin dhe qeverisjen sportive.

Në një distancë relativisht të afërt ndodhen UEFA dhe selia e UEFA Foundation for Children në Nyon, FIFA në Zürich si dhe Komiteti Olimpik Ndërkombëtar në Lausanne.

Për një vajzë nga Kosova që synon të ardhmen në menaxhimin sportiv, kjo përvojë shkon përtej pajisjes me diplomë. Ajo nënkupton studimin në një mjedis ku sporti ndërkombëtar administrohet, trajtohet dhe zhvillohet çdo ditë, pranë institucioneve që kanë ndikim të drejtpërdrejtë në të ardhmen e sportit në Evropë dhe në botë.

Ky është horizonti që KFV Prishtina synon t’ua bëjë të arritshëm vajzave të klubit.

Thelbi i marrëveshjes mbështetet në idenë se lidhja e një vajze me futbollin nuk duhet të përfundojë kur ajo ndalon së luajturi.

Përvoja e fituar si sportiste mund të jetë vetëm nisja e rrugëtimit të saj profesional.

Futbollistja e sotme mund të shndërrohet në menaxhere sportive nesër. Kapitenia e një ekipi mund të marrë drejtimin e një klubi, ndërsa një vajzë që sot mëson përgjegjësinë në fushë, në të ardhmen mund të hartojë strategjinë e një federate ose të drejtojë një organizatë ndërkombëtare sportive.

Rëndësia kryesore e bashkëpunimit mes KFV Prishtina dhe Webster University Geneva Campus qëndron pikërisht në lidhjen që krijohet mes sportit, arsimit dhe lidershipit.

Kështu, marrëveshja e zgjeron misionin e KFV Prishtina përtej formimit të vajzave si futbolliste. Rruga e nisur në fushë synohet të vazhdojë përmes arsimit, duke u krijuar vajzave nga Kosova mundësinë të përgatiten profesionalisht edhe për administrimin dhe drejtimin e sportit.

Bursa prej 30 për qind përbën një masë konkrete, ndërsa rëndësia e marrëveshjes nuk kufizohet te mbështetja financiare. Ajo u jep vajzave që sot janë pjesë e futbollit mundësinë që nesër të angazhohen në institucionet, klubet dhe organizatat ku ndërtohen strategjitë dhe merren vendimet për të ardhmen e sportit.

Zhvillimi i futbollit të vajzave nuk vlerësohet vetëm nga numri i atyre që hyjnë në fushë, por edhe nga numri i vajzave që, falë arsimit dhe mundësive të barabarta, arrijnë një ditë ta udhëheqin sportin.

The post KFV Prishtina dhe Webster University Geneva Campus hapin rrugë të reja për vajzat në menaxhimin sportiv appeared first on Albeu.com.

Dy prej shtyllave kryesore të KFV Prishtina, Aurora Cakolli dhe Liza Hoxha, kanë mbërritur në Zvicër për të zhvilluar një periudhë prove dyjavore tek ekipi Yverdon Sport Women. Ky moment shënon hapin e parë konkret të bashkëpunimit strategjik mes dy klubeve dhe hap një rrugë të re për futbollistet kosovare drejt skenës evropiane.

Talente të spikatura të projektit sportiv prishtinas dhe elemente të rëndësishme të kombëtares U19 të Kosovës, Aurora dhe Liza tashmë ndodhen nën vlerësimin e stafit teknik zviceran. Në rast se arrijnë të impresionojnë gjatë këtyre dy javëve, vajzat do të kenë mundësinë që sezonin e ardhshëm ta fillojnë me fanellën e Yverdon Sport Women, duke hedhur hapin më të rëndësishëm të karrierës së tyre deri tani.

Kjo ftesë nuk erdhi pa bazë. Gjatë dy takimeve miqësore që u luajtën mes KFV Prishtina dhe Yverdon Sport Women, Aurora dhe Liza lanë mbresa të forta dhe performancat e tyre tërhoqën menjëherë vëmendjen e trajnerëve zviceranë. Ato paraqitje u bënë pikërisht pikënisja e këtij hapi madhor drejt futbollit profesionist.

Ky zhvillim vjen si rezultat i marrëveshjes së nënshkruar së fundmi në Nyon, në kuadrin e aktiviteteve të UEFA Foundation for Children dhe Orllati SA, e cila synon të krijojë një sistem të qëndrueshëm për zhvillimin dhe promovimin e lojtareve të reja nga Kosova në arenën ndërkombëtare.

Lidhja mes dy skuadrave kishte zënë fill një vit më parë. Në muajin shkurt, falë sponsorit të përbashkët Orllati, KFV Prishtina dhe Yverdon Sport Women realizuan një fazë përgatitore të përbashkët në Zvicër, ku lojtaret dhe trajnerët ndanë eksperienca profesionale dhe zhvilluan stërvitje të përbashkëta. Aktiviteti u kurorëzua me një ndeshje miqësore midis formacioneve të para, pikërisht në ditën e përvjetorit të pavarësisë së Kosovës. Ato themele besimi dhe bashkëpunimi tani po marrin jetë me mundësi të prekshme për vajzat kosovare.

Një rol thelbësor në ndërtimin e kësaj ure ka pasur Erlinda Orllati dhe kompania Orllati në Zvicër. Përpos përkrahjes së vazhdueshme financiare për KFV Prishtina, kompania ka realizuar një nga investimet më të ndjeshme në futbollin e vajzave në Kosovë, duke mbuluar bursa mujore për 15 futbolliste të klubit gjatë një periudhe dyvjeçare.

Angazhimi i Orllatit ka shkuar përtej kësaj, duke shërbyer si pikë lidhëse mes KFV Prishtina dhe Yverdon Sport Women dhe duke mbështetur krijimin e partneritetit strategjik që u jep vajzave më të talentuara mundësinë të vazhdojnë karrierën në futbollin zviceran. Ky vizion afatgjatë tregon se investimi në talente nuk ndalet vetëm tek mbështetja financiare, por shndërrohet në shtigje reale për zhvillim profesional dhe ndërkombëtarizim të rrugëtimit sportiv.

Nga ana e KFV Prishtina, theksojnë se ky është thjesht fillimi i një projekti më ambicioz.

“Qëllimi ynë është të ndërtojmë një rrugë të qartë drejt futbollit evropian për vajzat e Kosovës. Aurora dhe Liza janë futbollistet e para që përfitojnë nga ky partneritet, por synimi ynë është që çdo vit gjithnjë e më shumë lojtare të KFV Prishtina të kenë mundësinë të provojnë dhe të ndërtojnë karrierën e tyre në klubet evropiane. Ky është modeli që duam të ndërtojmë: zhvillim, mundësi dhe perspektivë për çdo vajzë që ëndërron futbollin profesionist”, shpjegon Erlinda me plot emocione.

KFV Prishtina ka falënderuar Yverdon Sport Women për besimin e treguar ndaj futbollisteve kosovare, si dhe kompaninë Orllati dhe Erlinda Orllatin, angazhimi i të cilëve po provon se partneritetet e mbështetura mbi vizion dhe besim mund të gjenerojnë mundësi konkrete për brezin e ri të futbollisteve.

Marrëveshja mes KFV Prishtina dhe Yverdon Sport Women tani kapërcen kuptimin e thjeshtë të një bashkëpunimi. Ajo po shndërrohet në një model zhvillimor për futbollin e vajzave në Kosovë, duke krijuar një korridor të drejtpërdrejtë drejt Evropës dhe duke dëshmuar se talenti vendor, kur gjen vizionin dhe partnerët e duhur, mund të prekë majat e sportit.

The post Aurora Cakolli dhe Liza Hoxha nisin rrugëtimin drejt Superligës Zvicerane me prova te Yverdon Sport Women appeared first on Albeu.com.

Një tjetër aleancë strategjike me botën e futbollit spanjoll është vulosur nga KFV Prishtina, kësaj radhe përmes nënshkrimit të një marrëveshjeje bashkëpunimi me FCA International, krahu ndërkombëtar i FC Andorra-s. Kjo nismë u hap rrugë të drejtpërdrejtë zhvillimi futbollisteve dhe futbollistëve premtues nga Kosova e rajoni, duke i futur në një prej sistemeve më të përparuara futbollistike të kontinentit.

Marrëveshja mban firmat e Flamur Kelmendit, Sekretar i Përgjithshëm i KFV Prishtina, dhe Marc Balsells, që përfaqëson FCA International. Ky akt shënon nisjen e një bashkëpunimi të qëndrueshëm që synon të ndërtojë ura të forta midis Kosovës dhe Katalunisë, duke përdorur futbollin si gjuhë të përbashkët.

Kjo është lidhja e dytë me peshë që klubi kosovar krijon në Spanjë. Pas angazhimit rajonal me FC Barcelona Academy, tashmë portofoli ndërkombëtar pasurohet edhe me FC Andorra-n. Ky hap rikonfirmon vizionin e qartë për t’iu siguruar talenteve vendorë akses të pakursyer në mjediset më prestigjioze formuese të Spanjës.

Falë kësaj marrëveshjeje, djemtë dhe vajzat nga Kosova do të kenë mundësi të stërviten në thelb të Katalunisë, pranë Club Gimnastic Manresa. Kjo është akademia partnere e FC Andorra-s dhe një nga qendrat më të nderuara për kultivimin e lojtarëve të rinj në zonë. Me mbi pesë dekada histori, Gimnastic Manresa ka nxjerrë talente që më pas kanë veshur fanellat e gjigantëve si FC Barcelona, Real Madrid, Villarreal e Espanyol, si dhe të shumë skuadrave të tjera elitare.

Partneriteti u ofron talenteve nga Kosova një gamë të gjerë mundësish, përfshirë programe testimi dhe zhvillimi elitar, si dhe programe tre mujore ose sezonale me akomodim, duke filluar nga grupmoshat U9. Për më të rriturit, ofrohet programi profesional U23, stërvitje me intensitet të lartë dhe vlerësime të thelluara nga stafi teknik i FC Andorra-s. E gjithë kjo shoqërohet me programe që ndërthurin futbollin me edukimin shkollor dhe rritjen personale. Mbi të gjitha, krijohet një shteg real drejt futbollit evropian, ku talentet kosovare futen në një ambient profesional, ku përparimi mbështetet tërësisht mbi meritat individuale.

Pesha e këtij bashkëpunimi rritet nga fakti se FC Andorra bën pjesë në sistemin futbollistik spanjoll, një nga më prestigjiozët dhe më konkurruesit në rang global. Për një lojtar të ri nga Kosova, integrimi në këtë ekosistem do të thotë jo thjesht përvetësim i metodologjisë spanjolle, por edhe mundësi konkrete për t’u vëzhguar nga trajnerë, skautë dhe klube që veprojnë në një prej tregjeve më të zhvilluara të futbollit. Për shumë të rinj, kjo mund të jetë ura vendimtare që lidh talentin bruto me një karrierë profesioniste.

Ky partneritet ka rrënjë në një marrëdhënie të ndërtuar vite më parë përmes projektit me UEFA Foundation for Children. Në vitin 2023, me përkrahjen e FC Barcelona, ekipi U17 i KFV Prishtina udhëtoi në Manresa për një ndeshje miqësore kundër vajzave të FC Andorra-s. Ajo përvojë nxori në pah vlerën e bashkëpunimit ndërkombëtar, shkëmbimit kulturor dhe rëndësinë e zhvillimit elitar. Besimi dhe perspektiva e përbashkët e ndërtuar atëherë janë materializuar sot në një marrëveshje zyrtare me synime afatgjata.

Për KFV Prishtina-n, kjo marrëveshje kapërcen kuadrin e një memorandumi të thjeshtë bashkëpunimi. Ajo simbolizon një investim të mirëfilltë në të ardhmen e futbollit kosovar dhe një përkushtim të palëkundur për t’u ofruar të rinjve mundësi që më parë dukeshin të paarritshme. Klubi po provon vazhdimisht se zhvillimi i talenteve matet përtej rezultateve në fushë; ai ndërtohet mbi partneritete strategjike me institucione që përqafojnë të njëjtin vizion për edukimin, profesionalizmin dhe përsosmërinë.

Të dhënat e plota mbi regjistrimet, kalendarin e programeve dhe hapat e përzgjedhjes së kandidatëve do të publikojnë gjatë javëve në vazhdim.

Nga Kosova për në Kataluni. Një itinerar i ri ka marrë jetë.

The post KFV Prishtina forcon aleancën spanjolle përmes FC Andorra-s, një tjetër shteg i hapur për talentet kosovare drejt elitës së futbollit appeared first on Albeu.com.