Problemet financiare dhe situata e vështirë te KF Trepça pritet të shkaktojnë largimin e disa prej futbollistëve kryesorë të afruar gjatë kësaj vere. Mes tyre është edhe Rudolf Turkaj, i cili nuk do të vazhdojë më të jetë pjesë e klubit nga Mitrovica.

Vendimi vjen në një moment të pazakontë mes aksionerëve, situatë e raportuar edhe një ditë më parë nga “Newsport.al”. Për rrjedhojë, mbrojtësi 31-vjeçar, ish-futbollist i Laçit, rikthehet në treg si lojtar i lirë dhe përbën një mundësi interesante për ekipet e tjera.

Drenica ka shfaqur interes për shërbimet e tij, ndërsa oferta kanë ardhur edhe nga skuadra të Ligës së Parë të Kosovës. Megjithatë, Turkaj, i cili numëron 2 ndeshje me Kombëtaren shqiptare, pritet ta shqyrtojë me qetësi vendimin e ardhshëm.

KF Trepça kishte bërë një seri afrimesh gjatë kësaj merkatoje, duke ndërtuar një skuadër që synonte ngjitjen në elitën e futbollit kosovar, Superligë.

The post Kriza te Trepça sjell largimin e mbrojtësit me dy ndeshje me Kombëtaren pas vetëm një muaji appeared first on Albeu.com.

Pavarësisht përforcimeve të realizuara gjatë merkatos së verës, KF Trepça po kalon një krizë të rëndë që mund ta çojë deri në shkrirje. “Newsport.al” ka zbuluar prapaskenat e situatës që ka shkaktuar trazira të mëdha te klubi i Ligës së Parë të Kosovës.

Pronësia e klubit nga Mitrovica ndahet në mënyrë të barabartë mes dy aksionerëve, të cilët zotërojnë nga 50% secili. Megjithatë, vetëm njëri prej tyre ka financuar gjatë merkatos transferimet e futbollistëve, pagat dhe detyrimet e tjera ekonomike të premtuara. Ortaku tjetër, ndonëse kontrollon gjysmën e aksioneve, nuk ka kontribuar me asnjë “kacidhe”.

Për këtë arsye, financuesi kryesor i ka kërkuar partnerit që t’i kalojë edhe 50% të aksioneve të tij, në mënyrë që të bëhet pronari i vetëm legjitim i Trepçës. Kërkesa është refuzuar dhe ky qëndrim e ka futur klubin në gjendjen e vështirë ku ndodhet aktualisht.

Aksioneri që deri tani ka mbuluar shpenzimet nuk pranon të vazhdojë investimet pa marrë edhe pjesën prej 50% që i përket ortakut. Sipas informacioneve të “Newsport.al”, nesër është parashikuar të mbahet një mbledhje brenda klubit.

Të dy presidentët do të dalin përpara lojtarëve. Pronari që nuk ka investuar ua ka bërë të qartë paraprakisht futbollistëve se ata që duan mund të vazhdojnë të qëndrojnë, ndërsa të tjerët janë të lirë të largohen. “Newsport.al” mëson se skuadra ka besim vetëm tek aksioneri që ka financuar klubin, çka e komplikon edhe më shumë situatën dhe shton mundësinë që një numër i konsiderueshëm lojtarësh të largohen.

Gjatë merkatos, KF Trepça afroi edhe disa emra të njohur në Shqipëri, mes tyre ish-lojtarin e Tiranës, Okseold Sefa, ish-mbrojtësin e Laçit, Rudolf Turkaj, si dhe ish-portierin e Vllaznisë, Jurgen Mehidri. Tashmë, secili prej tyre ka të drejtën dhe mundësinë të largohet.

The post Trepça rrezikon shpërbërjen, përplasja mes pronarëve: Dorëzo 50% të aksioneve, përndryshe ndalen investimet appeared first on Albeu.com.

KF Trepça ndodhet përballë një situate alarmante dhe mund të pushojë së ekzistuari. Sipas raportimit të “Zëri i Sportit”, klubi nga Mitrovica, pjesë e Ligës së Parë të Kosovës, rrezikon ta ndërpresë këtu një rrugëtim të nisur me ambicie të mëdha.

Edhe pse gjatë merkatos realizoi përforcime të rëndësishme dhe u konsiderua një prej skuadrave pretendente për promovimin në Superligën e Kosovës, e ardhmja e klubit tashmë duket e pasigurt.

Burimet bëjnë me dije se, duke nisur nga dita e nesërme, futbollistët do të mund të largohen dhe të kërkojnë ekipe të reja. Mes emrave të afruar në këtë periudhë ishin Okseold Sefa, Rudolf Turkaj dhe Jurgen Mehidri.

Kriza vjen pavarësisht nisjes pozitive të kampionatit, ku KF Trepça triumfoi 3-1 ndaj Mitrovicës në ndeshjen e parë.

The post E PAPRITUR! Pas merkatos së bujshme, KF Trepça rrezikon të shpërbëhet appeared first on Albeu.com.

Jurgen Mehidri do të vijojë karrierën te KF Trepça Mitrovicë. Portieri 28-vjeçar i ka dhënë fund eksperiencës së tij me Korabin dhe ka zgjedhur të transferohet në Ligën e Parë të Kosovës.

Për gardianin, ky do të jetë angazhimi i parë jashtë kampionatit të Superiores dhe Kategorisë së Parë, si edhe përvoja e parë në futbollin kosovar. Paraqitjet e tij në karrierë kanë bërë që klubi nga Mitrovica të vendosë ta afrojë në skuadër.

Mehidri i hodhi hapat e parë si futbollist te Shkëndija e Tiranës. Gjatë karrierës së tij, 28-vjeçari ka qenë pjesë edhe e Laçit, Tërbunit, Vorës, Vllaznisë, Besës së Kavajës dhe së fundmi Korabit.

The post Ish-portieri i Vllaznisë lë Shqipërinë, Jurgen Mehidri firmos me Trepça Mitrovicë appeared first on Albeu.com.