Shkëndija nuk ia doli të siguronte një vend në play-offin e finales së Ligës së Konferencës, pasi u eliminua nga Hiberniani.

Skuadra skoceze, e cila në raundin e kaluar kishte nxjerrë nga gara Malishevën, eliminoi edhe ekipin tjetër shqiptar, duke triumfuar me rezultatin e përgjithshëm 1-2 pas dy ndeshjeve.

Në takimin si nikoqire, Shkëndija bëri një paraqitje mjaft të mirë, por nuk arriti të shfrytëzonte rastet e krijuara dhe sfida përfundoi pa gola, 0-0.

Ekipi nga Maqedonia e Veriut provoi në shumë raste dhe regjistroi plot 15 gjuajtje, megjithatë nuk pati fat në konkretizim.

Shkëndija u paraqit në nivel të lartë edhe në fazën mbrojtëse, duke neutralizuar mundësitë e shumta të Hibernianit.

Pas këtij eliminimi, Shkëndija mbetet pa pjesëmarrje në Evropë këtë vit. Tashmë skuadrës i mbetet të garojë për titullin në Maqedoni, me synimin që ta sigurojë sërish mundësinë vitin e ardhshëm.

The post Shkëndija ndalet nga Hiberniani dhe i jep fund rrugëtimit në Ligën e Konferencës appeared first on Albeu.com.

Shkëndija e Tetovës është kualifikuar në raundin e tretë eliminator të Ligës së Konferencës, pasi mposhti skuadrën sllovene Bravo me shifrat e përgjithshme 4-3 në dy ndeshje.

Ekipi tetovar kishte humbur 2-1 në transfertën e parë, por në përballjen e kthimit arriti të përmbyste gjithçka me fitoren 3-1, rezultat që i siguroi vazhdimin e aventurës në këtë kompeticion.

Vendasit e nisën sfidën në mënyrë pozitive dhe krijuan mundësi që në minutat e para, megjithatë ishin sllovenët ata që zhbllokuan rezultatin. Jakoslav Stankovic shënoi në minutën e 17-të për epërsinë 0-1 të Bravos, duke vendosur përkohësisht baraspeshën në bilancin e përgjithshëm.

Përgjigjja e Shkëndijës nuk vonoi. Në minutën e 36-të, mbrojtësi i Bravos, Gašper Jovan, e dërgoi topin në portën e vet, duke barazuar rezultatin dhe duke i rikthyer skuadrës tetovare epërsinë në totalin e dy takimeve.

Edhe pas pushimit, Shkëndija hyri fuqishëm në fushë. Vetëm pak minuta nga nisja e pjesës së dytë, Almir Kryeziu shënoi golin e përmbysjes për 2-1, duke e çuar ekipin maqedonas më pranë kualifikimit.

Fitorja u konfirmua përfundimisht në minutën e 88-të. Marko Gjorgjievski realizoi golin e tretë të vendasve, duke përcaktuar rezultatin 3-1 të mbrëmjes dhe atë të përgjithshëm 4-3.

Në raundin e tretë kualifikues të Ligës së Konferencës, Shkëndija do të ketë përballë fituesin e duelit Malisheva – Hibernian. Skuadra tetovare tani pret të mësojë emrin e kundërshtarit të ardhshëm në rrugëtimin evropian.

The post Shkëndija përmbys Bravon në fund dhe kualifikohet në raundin e tretë appeared first on Albeu.com.

Shkëndija e ka nisur me këmbë të mbarë aventurën evropiane, pasi fitoi 5-0 në transfertë ndaj Europa FC.

Ekipi kuqezi nga Tetova kontrolloi takimin gjatë gjithë lojës dhe hodhi një hap shumë të rëndësishëm drejt kualifikimit në këtë fazë.

Avantazhi i parë erdhi në minutën e 28-të, kur Fahd Ndzengue realizoi pas asistimit të Endrit Krasniqit.

45 minutat e para përfunduan me epërsi minimale për Shkëndijën, por në fraksionin e dytë tetovarët treguan forcën e tyre duke gjetur edhe katër herë rrugën e rrjetës.

Fabrice Tamba shënoi dy herë, në minutën e 52-të dhe të 75-të, duke e afruar ndjeshëm skuadrën e tij te fitorja e sigurt.

Në paraqitjen e tij të parë zyrtare, Almir Kryeziu la gjurmë duke realizuar golin për 4-0 në minutën e 83-të.

Rezultati përfundimtar 5-0 u vulos nga Besar Ibrahimi.

Nga minuta e parë u aktivizuan Endrit Krasniqi dhe Drilon Islami, ndërsa Almir Kryeziu hyri në lojë gjatë pjesës së dytë. //

The post Shkëndija e hap me triumf bindës rrugëtimin në Evropë, Almir Kryeziu shënon në debutim appeared first on Albeu.com.

Shkëndija e Tetovës ka bërë zyrtar një përforcim të rëndësishëm, pasi ka siguruar transferimin e sulmuesit Almir Kryeziu.

Gjatë sezonit të kaluar, Kryeziu ishte futbollisti më në formë te Ballkani dhe një nga emrat kryesorë që kontribuan që skuadra ta përfundonte edicionin në vendin e nënkampionit.

Pas vendimit të të dyja palëve për t’i dhënë fund bashkëpunimit, anësori ka vepruar shpejt duke e finalizuar lëvizjen e tij te Shkëndija.

Klubi tetovar e konfirmoi afrimin përmes një njoftimi zyrtar, ku i shprehu mirëseardhje ish-yllit të Ballkanit.

“Mirë se vjen Kryeziu”, thuhej mes tjerash në reagimin e klubit.//

The post Shkëndija e Tetovës zyrtarizon afrimin e Almir Kryeziut appeared first on Albeu.com.