Superliga e Kosovës ka tërhequr ndër vite futbollistë të njohur, nga reprezentues të Shqipërisë, Kosovës dhe vendeve të tjera, deri te lojtarë me përvojë në kampionate të ndryshme evropiane.

Zhvillimi i futbollit kosovar është vërejtur jo vetëm në organizim dhe konkurrencë, por edhe në profilin e lojtarëve që kanë zgjedhur të jenë pjesë e këtij kampionati. Prania e futbollistëve që kanë luajtur në gara evropiane apo në liga të huaja i ka dhënë Superligës një dimension të ri dhe më shumë vëmendje gjatë afateve kalimtare.

Shembulli më i fundit është Besar Halimi, i cili pak ditë më parë u prezantua si përforcim i Dritës. Mesfushori, që ka luajtur në Bundesliga, Superligën e Danimarkës, Zvicër, Poloni dhe Letoni, iu bashkua klubit nga Gjilani pas periudhës së kaluar në Marok.

Megjithatë, Halimi është vetëm njëri nga emrat e shumtë me karrierë ndërkombëtare që kanë zgjedhur të luajnë në futbollin kosovar.

Armend Dallku

Mbrojtësi shqiptar kaloi tetë vite te Vorskla Poltava në Ukrainë, ku u shndërrua në një prej futbollistëve kryesorë të ekipit. Në vitin 2016, ai u transferua te Prishtina, duke ardhur drejtpërdrejt nga Vorskla.

Debatik Curri

Ish-mbrojtësi i Shqipërisë kishte përvojë të rëndësishme me Vorskla Poltava, Genvlerbirligi, Hoverla Uzhhorod dhe Sevastopol. Në vitin 2017 u kthye në Kosovë për t’iu bashkuar Prishtinës, pas periudhës së tij te Flamurtari i Vlorës.

Besart Berisha

Berisha është ndër sulmuesit shqiptarë më të suksesshëm në futbollin australian, ku ka luajtur për Brisbane Roar, Melbourne Victory dhe Ëestern United. Ai ka pasur gjithashtu eksperienca në Gjermani, Angli dhe Japoni. Në shtator 2021 u bë pjesë e Prishtinës, duke ardhur nga Western United dhe duke u rikthyer për herë të parë në futbollin kosovar.

Besar Halimi

Mesfushori kosovar ka mbajtur fanellat e klubeve si Mainz, Brondby, Sandhausen, Riga dhe Slask Wroclaw, ndërsa karriera e tij përfshin Gjermaninë, Danimarkën, Zvicrën, Letoninë dhe Poloninë. Në shtator 2026 iu bashkua Dritës, pasi vinte nga Raja Casablanca dhe pas aventurës së tij në Marok.

Ergys Kaçe

Ish-mesfushori i Kombëtares së Shqipërisë u formua dhe u afirmua te PAOK-u. Në vazhdim ai luajti edhe për Panathinaikos, Viktoria Plzez, Aris, Partizani i Tiranës, Panevezys dhe Kalamata. Në vitin 2024 u transferua te Gjilani, nga Kalamata.

Alban Pnishi

Qendërmbrojtësi i Kosovës e zhvilloi pjesën kryesore të karrierës në Zvicër, ku përfaqësoi Wohlen dhe Grasshoppers. Ai pati gjithashtu përvoja në Izrael me Bnei Sakhnin dhe Bnei Yehuda. Në gusht 2020 kaloi te Feronikeli, duke ardhur nga Bnei Yehuda.

Kristi Vangjeli

Mbrojtësi shqiptar, i cili ka qenë edhe pjesë e Shqipërisë, ka luajtur për Aris, Chornomorets Odesa, Skënderbeun, Astra Giurgiu dhe Tiranën. Në verën e vitit 2021 u bë pjesë e Prishtinës, pas largimit nga Tirana.

Herolind Shala

Mesfushori i Kosovës ka luajtur në kampionatet e Norvegjisë, Çekisë, Turqisë dhe Shqipërisë. Gjatë karrierës së tij ka përfaqësuar Odd, Sparta Praga, Slovan Liberec, Kasimpasa, Valerenga, Erzurumspor dhe Partizani. Në shkurt 2026 firmosi me Feronikelit ’74, pasi më herët gjatë atij sezoni kishte qenë pjesë e Partizanit.

Anel Rashkaj

Pjesën më të madhe të karrierës së tij, ish-mesfushori i Kosovës e kaloi në Suedi dhe Norvegji. Ai luajti për Halmstads BK, Sandnes Ulf, AFC Eskilstuna, SJK dhe Orgryte. Në gusht 2017 u transferua te Prishtina nga AFC Eskilstuna.

Toni Domgjoni

Mesfushori kosovar u formua te FC Zurich, ndërsa më pas vazhdoi karrierën në Holandë me Vitesse. Ai ka përfaqësuar edhe Zvicrën në grupmoshat e reja. Në shkurt 2026 iu bashkua Ballkanit, pas ndërprerjes së kontratës me Vitesse.

Toni Gomes

Sulmuesi i Guinea-Bissau-së ka luajtur në Turqi, Azerbajxhan, Izrael dhe Korenë e Jugut, ku ka përfaqësuar klube si Menemen, Zira, Hapoel Hadera dhe Seongnam. Në korrik 2025 u transferua te Prishtina e Re, pas aventurës me Seongnam FC. Gomes ka qenë gjithashtu pjesë e akademisë së Liverpoolit dhe tani luan te Liria e Prizrenit.

Cheick Doukoure

Mesfushori nga Bregu i Fildishtë ka një karrierë të rëndësishme në Francë dhe Spanjë, ku ka luajtur për Lorient, Metz, Levante, Huesca dhe Leganes. Më pas ai vazhdoi në Greqi me Aris dhe Iraklis. Në tetor 2025 iu bashkua Prishtinës së Re, pas përfundimit të aventurës te Iraklis.

Gjelbrim Taipi

Mesfushori shqiptar i Kosovës ka kaluar një periudhë të gjatë në futbollin zviceran, me Wil, Schaffhausen, St. Gallen, Grasshoppers dhe Winterthur. Në Shqipëri ai ka luajtur për Kukësin dhe Partizanin. Në vitin 2025 iu bashkua Prishtinës, duke ardhur nga Partizani. Taipi tani është pjesë e Feronikelit ’74.

Hysen Memolla

Mbrojtësi i Kombëtares së Shqipërisë ka pasur eksperienca në Itali, Slloveni, Kroaci, Finlandë, Hungari dhe Rumani. Ai ka luajtur për Hajduk Split, Koper, Salernitana, Diosgyor dhe Chindia Targoviste. Në vitin 2024 u transferua te Suhareka, pasi vinte nga Egnatia, kampionia e Shqipërisë.

Enea Koliçi

Portieri shqiptar ka një përvojë të gjatë në futbollin shqiptar dhe atë ndërkombëtar. Ai ka mbrojtur portën e Skënderbeut, Kukësit, Partizanit dhe Flamurtarit, ndërsa ka luajtur edhe në Kosovë. Te Gjilani kaloi nga Skënderbeu, duke sjellë përvojën e fituar në futbollin shqiptar dhe në garat evropiane. Më vonë, Koliçi luajti edhe te Ballkani.

Prania e këtyre futbollistëve tregon se Superliga e Kosovës është kthyer në një destinacion për lojtarë me eksperiencë të konsiderueshme. Përveç atyre që kërkojnë një sfidë të re, në kampionat po rikthehen ose po afrohen emra që kanë lënë gjurmë në liga dhe gara ndërkombëtare.

The post 15 futbollistë me përvojë ndërkombëtare që kanë luajtur në Superligën e Kosovës appeared first on Albeu.com.

Drita ka konfirmuar afrimin e mesfushorit Besar Halimi, duke shtuar një tjetër emër të njohur në radhët e saj. Futbollisti 31-vjeçar do të jetë pjesë e kampiones në fuqi të Kosovës dhe do të luajë me fanellën bardhekaltër.

Përmes një njoftimi në rrjetet sociale, klubi gjilanas bëri të ditur transferimin me mesazhin: “Gilangjia Besar Halimi është Bardh e Kaltër! Forcë e re. Energji e re. I njëjti synim”.

Halimi është me origjinë nga Gjilani, ndaj ky transferim shënon rikthimin e tij në qytetin e lindjes, ku tashmë do të përfaqësojë Dritën.

Klubi i ka uruar mirëseardhje mesfushorit të ri dhe ka shprehur bindjen se ai është i gatshëm për përballjet e ardhshme.

“Gati për sfidat që na presin. Gati për të dhënë gjithçka për fanellën, qytetin dhe stemën tonë. Mirë se vjen në shtëpi, Besar!”, thuhet në komunikatën e Dritës.

Gjatë karrierës së tij, Halimi ka luajtur për disa skuadra të njohura evropiane. Ai e nisi te Stuttgart Kickers, ndërsa më pas u aktivizua me Mainz, Brøndby, Sandhausen, Riga, Apollon, Hallescher dhe Slask Wrocław.

Skuadra e fundit ku ka luajtur mesfushori ishte Raja Casablanca. Tani, ai do ta vazhdojë karrierën në Superligën e Kosovës si futbollist i Dritës.

Halimi është pjesë edhe e Kombëtares së Kosovës, me të cilën ka zhvilluar 32 ndeshje dhe ka shënuar tri gola.

The post Besar Halimi rikthehet në Gjilan, zyrtarizohet transferimi te Drita appeared first on Albeu.com.

Drita regjistroi një fitore të vlefshme në transfertë, duke mposhtur Dukagjinin me rezultatin 2-1 në stadiumin “13 Qershori” të Klinës, në ndeshjen e vlefshme për xhiron e shtatë të Superligës së Kosovës.

Miqtë nga Gjilani e kontrolluan më mirë fillimin e takimit dhe në minutën e 34-t gjetën golin e avantazhit. Liridon Balaj shërbeu Blerim Krasniqin, i cili nuk gaboi në përballjen me portierin dhe e dërgoi topin në rrjetë për 1-0.

Vendasit u përpoqën të reagonin para mbylljes së pjesës së parë, por nuk arritën ta thyenin mbrojtjen e Dritës. Kështu, skuadrat shkuan në pushim me epërsinë 0-1 të gjilanasve.

Drita e nisi edhe pjesën e dytë në mënyrën më të mirë të mundshme, duke e thelluar avantazhin. Pas një situate të rrëmujshme në zonën e Dukagjinit, Besnik Krasniqi reagoi shpejt dhe nga distanca e afërt shënoi për 2-0.

Dukagjini nuk hoqi dorë nga përpjekjet dhe arriti ta ngushtojë diferencën. Dienit Isufi realizoi për 2-1, duke i dhënë ekipit klinas besim për të kërkuar barazimin.

Vendasit e shtuan presionin në minutat e fundit dhe në kohën shtesë patën rastin më të mirë për ta barazuar rezultatin. Megjithatë, goditja e tyre u përplas në shtyllë, duke i mohuar Dukagjinit mundësinë për një rikthim.

Drita e ruajti avantazhin deri në vërshëllimën përfundimtare dhe u largua nga Klina me tri pikë. Pas kësaj fitoreje, skuadra gjilanase shkon në kuotën e 11 pikëve, ndërsa Dukagjini mbetet i treti me 12 pikë.

The post Drita merr tri pikë në Klinë, Dukagjini ndalet nga shtylla në shtesë appeared first on Albeu.com.

Dukagjini dhe Drita do të matin forcat në stadiumin “13 Qershori” të Klinës, në përballjen e vlefshme për javën e shtatë të Superligës së Kosovës.

Ekipi nga Klina ka zhvilluar një sezon të mirë deri tani, me tri fitore dhe tri barazime në ndeshjet e luajtura.

Drita, kampionia aktuale e Kosovës, në pesë takimet e para ka marrë dy fitore, ka barazuar dy herë dhe ka pësuar një humbje.

Armend Dallku ka zgjedhur Iljesa Zulfijin, Stevensonin dhe Dienit Isufin për repartin ofensiv të Dukagjinit.

Te skuadra gjilanase, Rron Broja rikthehet në formacion, ndërsa në sulm do të luajnë Jashari, Balaj dhe Bletrimi Krasniqi.

Të dyja skuadrat hyjnë në këtë duel me synimin për të marrë fitoren, në një ndeshje që pritet të sjellë rivalitet në elitën e futbollit kosovar.

Dukagjini: Haxhihamza, Bardhoku, Sinani, Basri, Bytyqi, Hugo, Pefqeli, Rexhaj, Zulfiji, Stevenson, Isufi.

Drita: Maloku, Besart Krasniqi, Pëllumbi, Salihu, Ovouka, Broja, Dabiqaj, Limaj, Jashari, Balaj, Bletrimi Krasniqi.

The post Publikohen formacionet e Dukagjinit dhe Dritës, Dallku e Nuiu synojnë fitoren appeared first on Albeu.com.

Superliga e Kosovës vijon sonte me dy ndeshje që pritet të sjellin rivalitet dhe emocione.

Në Klinë, Dukagjini do të jetë nikoqir i kampiones Drita, ndërsa Llapi do të udhëtojë për t’u përballur me Drenicën, me synimin për të siguruar pikët e plota.

Interesimi kryesor do të përqendrohet te dueli në Klinë, ku “Intelektualët” kërkojnë të reagojnë pas formës së dobët dhe të dalin me fitore.

Dukagjini, ndërkohë, po gëzon një ecuri shumë të mirë, pasi nuk ka pësuar humbje në pesë ndeshjet e fundit dhe synon ta ruajë të njëjtin ritëm.

Një takim interesant parashikohet edhe mes Drenicës dhe Llapit, dy skuadra që kanë si objektiv të largohen nga pjesa e poshtme e tabelës.

Të dyja përballjet do të fillojnë në orën 19:00.

The post Dy duele sonte në Superligë, sytë drejtohen nga përballja në Klinë appeared first on Albeu.com.

Xhiroja e gjashtë në Superligën e Kosovës është përmbyllur me përballje që sollën shumë gola, por edhe me ndeshje ku rrjetat mbetën të paprekura.

Prishtina e zgjati ecurinë fituese duke e mposhtur Feronikelin ’74 me shifrat 3-0. Malisheva, ndërkaq, shkëlqeu si mysafire dhe triumfoi 4-0 kundër Llapit.

Edhe Drenica siguroi fitore 3-0, duke kaluar Vushtrrinë. Pa fitues dhe pa gola u mbyll derbi ndërmjet Dritës dhe Gjilanit, 0-0, ndërsa i njëjti rezultat u regjistrua edhe në duelin Ballkani-Dukagjini.

Pas këtyre takimeve, Telegrafi ka përzgjedhur formacionin më të mirë të javës së gjashtë, të rreshtuar në skemën 3-4-3.

Arijon Ymeri i Drenicës është zgjedhur për portën. Ai bëri një paraqitje të nivelit të lartë dhe e ruajti avantazhin e ekipit të tij gjatë periudhës kur Vushtrria po përpiqej të kthehej në lojë. Ymeri vazhdoi me ndërhyrje të mëdha edhe pasi Drenica realizoi golin e dytë, duke mos lejuar që sfida të bëhej sërish e hapur.

Reparti defensiv nis me Hajdin Salihin e Dritës. Ndonëse u ndëshkua me karton të verdhë që në minutat e para, ai i përmbushi detyrat e tij pothuajse në mënyrë të përkryer.

Në këtë repart përfshihet edhe Egzon Sinani i Dukagjinit, i cili u dallua me një paraqitje të jashtëzakonshme dhe neutralizoi thuajse çdo aksion që mund të sillte rrezik nga kundërshtari.

Mbrojtja me tre lojtarë kompletohet nga Anio Poci i Prishtinës. Ai po përshtatet gjithnjë e më mirë dhe nga java në javë po regjistron paraqitje të mëdha. Poci ishte pothuajse i pagabueshëm në prapavijë edhe përballë Feronikelit ’74.

Në mesfushë është përzgjedhur Altin Vojvoda i Drenicës, i cili po kalon një sezon pozitiv. Kundër Vushtrrisë, ai zhbllokoi rezultatin dhe përbëri kërcënim të vazhdueshëm për portën vushtrriase.

Lorik Boshnjaku ishte shtylla e Gjilanit në derbin me Dritën. Ai doli fitues në pothuajse të gjitha duelet dhe kontribuoi që skuadra e tij ta zhvendoste lojën përpara.

Krahas tij renditet Arijanit Fazlija i Prishtinës, protagonist ndaj Feronikelit ’74 me një gol dhe një asistim. Paraqitjet e tij në këtë fillim sezoni dëshmojnë se po kalon një formë të shkëlqyer.

Pozita në krahun e majtë i takon Omer Bajraktarit të Malishevës. Me depërtimet dhe rolin udhëheqës në ndërtimin e aksioneve, ai ishte i pandalshëm. Në stadiumin “Zahir Pajaziti”, thuajse të gjitha sulmet e rrezikshme të Malishevës ndaj Llapit u zhvilluan përmes krahut të tij.

Xhemajl Ibishi i Malishevës zë një nga vendet në repartin ofensiv. Me një gol dhe një asistim, ai u shndërrua në një problem që mbrojtja llapjane nuk arriti ta zgjidhte.

Në qendër të sulmit është Donat Mehmeti i Drenicës, i cili bëri një paraqitje të fuqishme kundër Vushtrrisë. Në kohën kur epërsia ishte ende minimale, Mehmeti e krijoi vetë golin, fillimisht duke ia rrëmbyer topin kundërshtarit dhe më pas duke mposhtur portierin.

Assane Diatta i Prishtinës mbyll treshen sulmuese. Futbollisti më në formë i skuadrës kryeqytetase realizoi dy herë ndaj Feronikelit ’74 dhe po vazhdon të jetë ndër lojtarët më të spikatur të këtij fillimsezoni.

Për trajner të javës është përzgjedhur Orges Shehi i Prishtinës. Nën drejtimin e tij, ekipi ka arritur fitoren e pestë në po aq ndeshje. Kryeqytetasit shfaqën nivel të lartë kundër Feronikelit ’74, ndërsa edhe ndërhyrjet e Shehit përmes zëvendësimeve po japin rezultat.

Ndryshimet në formacion nuk kanë ndikuar në rendimentin e Prishtinës. Skuadra vazhdon të prodhojë shumë raste dhe gjatë këtij sezoni po shfaq efikasitet më të madh përpara portës.

The post Më të mirët e xhiros së gjashtë në Superligën e Kosovës appeared first on Albeu.com.

Drita dhe Gjilani nuk prodhuan fitues në përballjen e vlefshme për javën e gjashtë të Superligës së Kosovës, teksa derbi përfundoi me rezultatin 0-0.

Të dyja skuadrat patën mundësi për të shënuar, por asnjëra nuk arriti t’i konkretizonte rastet e krijuara.

Gjatë pjesës më të madhe të takimit, Drita u shfaq më kërkuese dhe regjistroi mbi katër goditje drejt portës, megjithatë nuk gjeti dot rrugën e rrjetës.

Gjilani u mbështet kryesisht te kundërsulmet, me synimin për ta befasuar kampionin, por tentativat e saj nuk dhanë rezultat.

Si rrjedhojë, derbi i Gjilanit u mbyll pa gola, ndërsa të dy klubet morën nga një pikë.

Gjilani renditet i treti me 11 pikë, ndërsa Drita ndodhet në vendin e gjashtë me tetë pikë. Megjithatë, Drita ka zhvilluar një ndeshje më pak se “Skifterët”.

The post Derbi i Anamoravës mbyllet pa gola, Drita dhe Gjilani ndahen me nga një pikë appeared first on Albeu.com.

Ndeshja mes Dritës dhe Gjilanit, e vlefshme për xhiron e gjashtë të Superligës së Kosovës, do të zhvillohet me skuadrën gjilanase në rolin e vendasit.

Pas një starti jo të kënaqshëm të sezonit, “Intelektualët” do të kërkojnë të reagojnë dhe të rikthehen te rezultatet pozitive.

Në anën tjetër, Gjilani vjen pas fitores së fundit dhe synon ta vijojë këtë ecuri edhe në derbin e Anamoravës.

Formacionet zyrtare:

Drita: Pas pak…

Gjilani:

Takimi do të nisë në orën 19:00.//

The post Drita kërkon rikthimin te fitorja, Gjilani synon të ruajë ritmin: Dalin formacionet zyrtare të derbit të Anamoravës appeared first on Albeu.com.

Java e gjashtë e Superligës së Kosovës vazhdon sot me tri ndeshje, ndërsa interesimi më i madh pritet të përqendrohet në Gjilan, ku Drita dhe Gjilani do të përballen në derbin lokal.

Programi i ditës hapet në Vushtrri në orën 16:00, me skuadrën vendase që pret Drenicën. Të dyja ekipet pritet të zhvillojnë një duel të fortë, pasi synojnë pikë me rëndësi për ecurinë e tyre të mëtejshme në kampionat.

Vushtrria do të përpiqet ta kthejë avantazhin e fushës në një rezultat pozitiv, kurse Drenica udhëton me objektivin për të mos u larguar pa pikë.

Nga ora 19:00, në Gjilan do të luhet sfida kryesore e ditës mes Dritës dhe Gjilanit. Përveç ndikimit që rezultati mund të ketë në renditje, takimi pritet të karakterizohet nga rivaliteti tradicional ndërmjet dy klubeve të qytetit.

Të dyja skuadrat do të kërkojnë fitoren në këtë përballje. Drita synon të ruajë vazhdimësinë e rezultateve pozitive dhe të dëshmojë pretendimet e saj në kampionat, ndërsa Gjilani do të tentojë të sigurojë një sukses të rëndësishëm ndaj rivalit lokal.

Po në orën 19:00 do të zhvillohet edhe dueli tjetër i mbrëmjes, me Prishtinën që do ta presë Feronikelin në kryeqytet.

Skuadra prishtinase do të synojë t’i shfrytëzojë kushtet e fushës vendase për të marrë tri pikët, ndërsa Feronikeli do të kërkojë ta befasojë ekipin nikoqir dhe të kthehet me rezultat pozitiv.

The post Tri ndeshje sot në Superligën e Kosovës, spikat përballja mes Dritës dhe Gjilanit appeared first on Albeu.com.

Feronikeli ’74 ka triumfuar 1-0 në Drenas përballë Dritës, kampiones në fuqi, duke marrë kështu suksesin e parë të këtij edicioni në Superligë.

45 minutat e para u zhvilluan në ekuilibër, ndërsa të dyja skuadrat krijuan pak mundësi për të shënuar. Menjëherë pas pushimit, vendasit goditën në kundërsulm dhe arritën të kalojnë në epërsi.

Egert Selmani u bë vendimtar për Niklin në minutën e 47-të, kur shfrytëzoi asistimin e bukur të Gjelbrit Taipit dhe mposhti Faton Malokun.

Skuadra nga Drenasi pati edhe dy raste të mira në fund të takimit, por mbrojtja gjilanase reagoi në kohë dhe shmangu pësimin e golit të dytë.

Jorgo Pëllumbi provoi të ndryshojë rezultatin gjatë kohës shtesë, megjithatë goditja e tij përfundoi mbi kuadrat.

Me këtë fitore, Feronikeli ’74 regjistron suksesin e parë në kampionat. Drita, ndërkohë, pëson humbjen e parë dhe mbetet me 7 pikë pas ndeshjeve të zhvilluara, teksa ende nuk e ka luajtur takimin ndaj Prishtinës.

The post Feronikeli ’74 mposht Dritën dhe regjistron fitoren e parë në Superligë appeared first on Albeu.com.