Ministri në detyrë i Administrimit të Pushtetit Lokal, Elbert Krasniqi, u është drejtuar sot zyrtarisht kryetarëve të Mitrovicës së Veriut, Zveçanit dhe Zubin-Potokut, duke kërkuar ndërmarrjen e hapave të nevojshëm për përfaqësimin e komuniteteve në institucionet komunale.

Kërkesa e tij përmban dy pika konkrete: emërimin e nënkryetarëve për komunitete dhe caktimin e zëvendëskryesuesve të kuvendeve komunale për komunitete.

Sipas Krasniqit, këto veprime nuk varen nga vullneti i institucioneve, pasi bëhet fjalë për detyrime që burojnë nga legjislacioni në fuqi i Republikës së Kosovës.

Ai ka sjellë si shembull komunat e Gjakovës, Lipjanit, Ferizajt dhe të tjera, të cilat, megjithëse nuk kanë qenë drejtpërdrejt të obliguara me ligj për këtë lloj përfaqësimi, e kanë realizuar atë falë vullnetit politik dhe institucional. Krasniqi vlerësoi se këto raste dëshmojnë angazhim për gjithëpërfshirjen dhe përfaqësimin e komuniteteve.

Në të kundërt, ai e cilësoi të papranueshme moszbatimin e këtyre detyrimeve nga komunat që janë ligjërisht të obliguara t’i përmbushin ato.

Krasniqi bëri të ditur se Ministria e Administrimit të Pushtetit Lokal do të vijojë t’u kërkojë të gjitha komunave respektimin dhe zbatimin e plotë të legjislacionit për vetëqeverisjen lokale, me qëllim garantimin e përfaqësimit, gjithëpërfshirjes dhe trajtimit të barabartë të të gjithë qytetarëve dhe komuniteteve.

The post Krasniqi me kërkesë zyrtare për tri komunat veriore: Të përmbushen urgjentisht dy obligime appeared first on Albeu.com.

Grupi Parlamentar i Partisë Demokratike të Kosovës, përmes sekretares së Përgjithshme Vlora Çitaku, i ka kërkuar kryesuesit të seancës konstituive, Avni Deharit, që të veprojë në përputhje me Kushtetutën dhe Rregulloren e Kuvendit dhe ta caktojë vazhdimin e seancës më 1 shtator 2026, në orën 11:00.

PDK-ja thekson se, sipas jurisprudencës së Gjykatës Kushtetuese, tejkalimi i afatit kushtetues nuk e eliminon detyrimin që Kuvendi të konstituohet.

Në letrën drejtuar Deharit thuhet:

I nderuar z. Dehari,

Në funksionin tuaj si kryesues i seancës konstituive sipas moshës, në pajtim me Nenin 9 të Rregullores së Punës së Kuvendit të Republikës së Kosovës, ju kërkojmë, në emër të deputetëve të Partisë Demokratike të Kosovës, të përmbushni përgjegjësinë tuaj kushtetuese dhe procedurale. Për këtë arsye, më 01 shtator 2026, në ora 11.00, duhet të thërrisni vazhdimin e seancës konstituive, në përputhje me kërkesat e Rregullores së Kuvendit të Republikës së Kosovës.

Moskonstituimi i Kuvendit brenda afatit të përcaktuar ka sjellë tashmë një situatë serioze, e cila lidhet me shkeljen e Kushtetutës dhe moszbatimin e aktgjykimeve të Gjykatës Kushtetuese. Mosrespektimi i afateve dhe procedurave të parashikuara në Rregulloren e Kuvendit e rëndon edhe më shumë këtë gjendje.

Duhet të merrni parasysh se jurisprudenca e Gjykatës Kushtetuese përcakton që, edhe në rast të tejkalimit të afatit kushtetues, Kuvendi duhet të konstituohet. Kalimi i këtij afati nuk e heq detyrimin për përfundimin e procesit të konstituimit.

Thirrja e vazhdimit të seancës konstituive ju jep mundësinë, por njëkohësisht ju ngarkon edhe me detyrimin, që të shmangni një shkelje tjetër dhe të siguroni vijimin e procesit të konstituimit të Kuvendit.

Ju rikujtojmë se kompetencat tuaja si kryesues i seancës konstituive sipas moshës janë të përcaktuara dhe të kufizuara nga Kushtetuta, aktgjykimet e Gjykatës Kushtetuese dhe Rregullorja e Kuvendit. Detyra juaj është të mundësoni zhvillimin dhe vazhdimin e seancës deri në konstituimin e Kuvendit. Nuk mund të vendosni, mbi bazën e vlerësimeve ose konsideratave politike, nëse dhe kur do të vazhdojë procesi i konstituimit të Kuvendit, pasi kjo nuk hyn në kompetencat tuaja.

Vlerësimet dhe negociatat politike janë përgjegjësi e forcave politike dhe mund të zhvillohen vetëm brenda kornizës kushtetuese të Republikës së Kosovës, të cilën të gjithë jemi të detyruar ta respektojmë.

Andaj, ju kërkojmë që, pa asnjë vonesë të mëtejshme, ta thërrisni vazhdimin e seancës konstituive më 01 shtator 2026, në ora 11.00, duke mundësuar kështu ushtrimin e mandatit kushtetues nga deputetët e zgjedhur të Republikës së Kosovës.

Me respekt,

Vlora Çitaku

Deputete e Kuvendit të Republikës së Kosovës

Sekretare e Përgjithshme e Partisë Demokratike të Kosovës

The post PDK kërkon nga Avni Dehari thirrjen e seancës konstituive më 1 shtator në orën 11:00 appeared first on Albeu.com.

Hapi fillestar drejt ngritjes së institucioneve të reja të Kosovës, konstituimi i Kuvendit, nuk përfundoi sipas pritjeve gjatë paradites së 6 gushtit.

Pasi deputetët e rinj dhanë betimin, kryesuesi vendosi ta shtyjë seancën konstituive të së enjtes. Kjo u bë me kërkesën e kryetarit të Lëvizjes Vetëvendosje (LVV), partisë më të madhe, për t’u lënë kohë bisedimeve për një marrëveshje politike me Lidhjen Demokratike të Kosovës (LDK).

Megjithatë, dy subjektet nuk japin shenja se janë pranë një ujdie, ndërsa afati kushtetues për konstituimin e Kuvendit përfundon të premten në mesnatë. Përmbyllja e këtij procesi do t’i hapte rrugë krijimit të qeverisë dhe zgjedhjes së presidentit të vendit.

Një pengesë shtesë në negociata mund të bëhet kërkesa që LDK-ja ka paraqitur publikisht për ta marrë postin e kreut të shtetit.

LVV-ja e kryeministrit në detyrë, Albin Kurti, këmbëngul që presidenti i ardhshëm të jetë figurë konsensuale dhe jopartiake. Qëndrimi i LDK-së, ndërkaq, është se kandidat mund të jetë kushdo që arrin t’i sigurojë 80 vota.

Analistët politikë e konsiderojnë të ligjshme kërkesën për Presidencën të partisë së Lumir Abdixhikut, e cila është e vetmja që ka pranuar të hyjë në negociata me LVV-në. Sipas tyre, kjo do të krijonte ekuilibër në shpërndarjen e pushtetit.

Politologu Dritëro Arifi, megjithatë, e cilëson këmbënguljen vetëm për postin e presidentit si një kërkesë “të ngushtë” dhe “jovizionare”. Ai argumenton se, në rast të një qeverie të përbashkët, vëmendja duhet të drejtohet te politikat qeverisëse.

Arifi thekson se presidenti nuk ushtron kompetenca ekzekutive dhe, për pasojë, kjo pozitë nuk do t’i jepte LDK-së mundësi të ndikonte mbi politikat e kabinetit qeveritar.

“Vetëm pozita e presidentit… besoj që nëse LVV-ja është pak inteligjente, ajo do ta pranonte, sepse nuk do të thotë asgjë. Pra, as për LVV-në. Shumë pak ka peshë, por për LDK-në fare, hiç”, deklaron Arifi për Radion Evropa e Lirë (REL).

Programi qeverisës para ndarjes së posteve

Ilir Deda, njohës i zhvillimeve politike, thotë se baza e marrëveshjes duhet të jetë programi qeverisës. Ndër temat kryesore ai rendit qasjen e ekzekutivit ndaj serbëve në veri të Kosovës, riparimin e marrëdhënieve me aleatët dhe pjesëmarrjen në projektet energjetike të përkrahura nga Uashingtoni.

“Në qoftë se nuk ka ndryshim të politikës, dhe qeveri potenciale LVV-LDK, atëherë duhet ta pyesim LDK-në pse ka qëndruar në opozitë tërë këto vite, nëse e pranojnë mbajtjen e kursit aktual politik”, shprehet Deda për REL-in.

Në vlerësimin e Arifit, LDK-ja duhet të dëshmojë gjatë negociatave se po arrin të përfshijë disa nga politikat e veta në marrëveshje; në të kundërt, ajo do të rezultojë humbëse. Ai konsideron se Kurti ndodhet në një pozitë më të favorshme sesa LDK-ja “në secilin variant që po analizojnë”.

Pikërisht pretendimi i LDK-së për Presidencën e vendos në pikëpyetje mundësinë që dy partitë ta finalizojnë marrëveshjen.

Kjo kërkesë mund t’i vështirësojë bisedimet dhe ta shtojë rrezikun e zgjedhjeve të reja, të cilat do të ishin të katërtat brenda gati dy vjetësh. Sipas Dedës, përgjigjja për të dyja këto çështje është po.

Presidenti i ardhshëm: Përfaqësues partiak apo figurë e pavarur?

Deda beson se palët mund të gjejnë kompromis për presidentin nëse LDK-ja propozon një personalitet të fuqishëm politik, por pa përkatësi partiake, tek i cili ajo ka besim.

Sipas tij, kreu i ri i shtetit duhet të ketë aftësinë për të krijuar konsensus brenda vendit. Deda vlerëson se presidentët me prejardhje partiake në historinë e re të Kosovës nuk “kanë ditur dhe nuk kanë dashur të ndërtojnë konsensus politik dhe shoqëror”.

LDK-ja nuk ka sqaruar ende nëse synon të propozojë dikë nga radhët e veta apo një kandidat jopartiak.

Në zgjedhjet e fundit, LDK-ja e paraqiti ish-presidenten Vjosa Osmani si kandidate për postin e kreut të shtetit. Megjithatë, Deda thotë se kësaj partie, si forca e tretë politike, nuk “i takon” të propozojë një anëtar të saj në vend të një figure të pavarur, e cila, sipas tij, do ta plotësonte njëkohësisht edhe kushtin e LVV-së.

Deda vlerëson se LVV-ja e ka “betonuar” kërkesën për një president konsensual dhe jopartiak, duke e quajtur këtë “pozicion të drejtë”. Për këtë arsye, ai nuk mendon se LVV-ja do ta pranonte Osmanin sërish në Presidencë.

Nga ana tjetër, Arifi thotë se asnjëra prej palëve nuk udhëhiqet nga parimet. Ai rikujton se Kurti e kishte mbështetur Osmanin për presidente gjatë mandatit të parë dhe vlerëson se kryeministri në detyrë, “varësisht nga interesi personal, po i ndryshon qasjet”.

Arifi mendon se LDK-ja do të mbetet “parti humbëse” edhe nëse arrin ta marrë postin e presidentit.

Bisedimet ndërmjet LVV-së dhe LDK-së po mbahen në një periudhë përplasjesh të brendshme në partinë e Abdixhikut. Vetëm disa ditë më parë, ai i mbijetoi një mocioni që synonte largimin e tij nga drejtimi i LDK-së.

Megjithatë, Arifi beson se deputetët e kësaj partie do t’i bashkonin votat nëse vazhdon narracioni i kufizuar vetëm te kërkesa për Presidencën.

Në kohën kur subjektet politike po mundohen të pengojnë përkeqësimin e mëtejshëm të krizës institucionale, qytetarët e anketuar nga REL-i shprehen të lodhur nga ciklet e shpeshta zgjedhore.

Nëse nuk gjendet një kompromis për presidentin, Kosova mund të hyjë sërish në fushatë elektorale. Këtë mundësi nuk e kanë përjashtuar as Albin Kurti dhe as Lumir Abdixhiku.

The post Presidenca në qendër të negociatave: A mund të arrijnë marrëveshje LDK-ja dhe LVV-ja? appeared first on Albeu.com.

Albulena Haxhiu, ushtruese e detyrës së presidentes, e ka cilësuar krijimin e Gjykatës Speciale si një hap të padrejtë dhe të dëmshëm, ndërsa ka shprehur shpresën se kërkesa e Prokurorisë së Specializuar do të korrigjohet.

“Duke qenë në thelb e padrejtë, natyrisht që sa herë kalojnë vitet na kujtohet se sa i dëmshëm ka qenë vendimi për ta formuar Gjykatën Speciale. Uroj që Gjykata ta korrigjojë kërkesën e padrejtë të Prokurorisë së Specializuar”, ka deklaruar Haxhiu për Kosovapress.

Sipas saj, themelimi i kësaj gjykate përbën një gabim historik dhe do të kujtohet përgjithmonë si një prej vendimeve më të dëmshme të marra nga Kuvendi i Kosovës.

“E kemi konsideruar si një nga gabimet historike që do të mbahen mend përgjithmonë si vendim i dëmshëm i Kuvendit, është pikërisht formimi i Speciales”, është shprehur Haxhiu.

The post Haxhiu shpreson që Specialja të korrigjojë kërkesën e padrejtë të Prokurorisë së Specializuar appeared first on Albeu.com.

Parlamenti Evropian i ka bërë thirrje Kosovës të garantojë funksionimin e institucioneve, me qëllim përshpejtimin e reformave të domosdoshme dhe avancimin e normalizimit të marrëdhënieve me Serbinë.

Sipas Parlamentit Evropian, një legjislaturë dhe një qeveri funksionale janë të domosdoshme për zbatimin e reformave të lidhura me Bashkimin Evropian, si dhe për të mbështetur përparimin e Kosovës drejt anëtarësimit në BE, në cilësinë e vendit kandidat potencial.

“Kosova duhet të përshpejtojë reformat dhe të normalizojë marrëdhëniet me Serbinë.

Parlamenti bën thirrje për një legjislaturë dhe qeveri funksionale, në mënyrë që të avancohen reformat që lidhen me Bashkimin Evropian dhe të mbështetet rruga e Kosovës drejt BE-së si vend kandidat potencial”, thuhet në postimin e Parlamentit Evropian në X.

The post Parlamenti Evropian kërkon krijimin e institucioneve funksionale në Kosovë appeared first on Albeu.com.

Në seancën e datës 20 korrik, Këshilli Prokurorial i Kosovës hodhi poshtë kërkesën e pesë prokurorëve dhe 15 punonjësve administrativë të komunitetit serb, të cilët kishin kërkuar të tërhiqnin dorëheqjet e tyre të paraqitura në nëntor 2022. Ata ishin pjesë e valës së largimeve masive të serbëve nga institucionet shtetërore kosovare.

Në atë periudhë, rreth 130 pjesëtarë të sistemit të drejtësisë, përfshirë gjyqtarë, prokurorë dhe staf administrativ, u tërhoqën nga detyra në katër komunat veriore me shumicë serbe: Mitrovicë e Veriut, Leposaviq, Zveçan dhe Zubin Potok. Këto dorëheqje u shtrinë edhe në radhët e Policisë së Kosovës dhe administratës vendore.

Largimet u orkestruan nga Lista Serbe, formacioni dominues politik i serbëve në Kosovë i përkrahur nga Beogradi, si reagim ndaj nismës së Qeverisë së Kosovës për t’i konvertuar targat e makinave të lëshuara nga Serbia në ato kosovare, duke i ndaluar praktikisht të parat.

Propozimi për refuzimin e rikthimit në poste erdhi nga nënkryetari i Këshillit, Dardan Vuniqi, dhe u mbështet nga anëtarët. Në anën tjetër, kryesuesi Arian Gashi kishte sugjeruar shtyrjen e trajtimit të çështjes për një mbledhje të mëvonshme, duke argumentuar se nevojitej paraprakisht një konsultim me Këshillin Gjyqësor të Kosovës.

Hapi final për largimin zyrtar të prokurorëve serbë nga sistemi i takon ushtrueses së detyrës së presidentit, Albulena Haxhiu. Në mes të qershorit, ajo u kishte bërë thirrje të dy këshilleve që t’i mbyllnin procedurat pa zvarritje, duke theksuar se vonesat po dëmtonin funksionimin e rregullt të sistemit të drejtësisë.

Ndërkaq, nga Këshilli Gjyqësor i Kosovës bënë të ditur për Radion Evropa e Lirë se ende nuk kanë marrë një vendim mbi kërkesat e ngjashme të gjyqtarëve serbë për anulimin e dorëheqjeve. Ata siguruan se opinioni publik do të vihet në dijeni në kohën e duhur, por nuk specifikuan numrin e gjyqtarëve dhe punonjësve të tjerë që kanë shprehur dëshirën për t’u rikthyer.

Çështja e dorëheqjeve të pazgjidhura mori një vëmendje të ripërtërirë në gjysmën e dytë të qershorit. Më 15 korrik, Bashkimi Evropian konfirmoi për Radion Evropa e Lirë se kjo temë po trajtohet në kuadër të bisedimeve për normalizimin e marrëdhënieve mes Kosovës dhe Serbisë.

The post Këshilli Prokurorial i Kosovës rrëzon kërkesën e prokurorëve serbë për rikthim në detyrë appeared first on Albeu.com.

Ilir Ferati, sekretari i Lidhjes Demokratike të Kosovës, ka bërë të ditur se deri në këto momente në selinë e partisë nuk ka mbërritur asnjë kërkesë zyrtare për thirrjen e një Kuvendi të Jashtëzakonshëm, pavarësisht zërave se të martën do të dorëzoheshin nënshkrimet për këtë qëllim, njofton KosovaPress.

Në një deklaratë për gazetarët, Ferati theksoi se mungon çdo provë formale që do të konfirmonte se një nismë e tillë është duke u materializuar.

Megjithatë, ai nënvizoi se kryetari Lumir Abdixhiku nuk u shmanget rregullave statutore që përcaktojnë mbledhjen e kuvendit dhe testimin e besimit ndaj tij.

“Nuk pamë asnjë burim të cituar, as nga një figurë me pesë brenda LDK-së, e as nga ndonjë grup serioz. Deri tani, zero firma janë depozituar. Sapo të ketë kërkesa, si parti e madhe do t’i trajtojmë dhe do t’i shqyrtojmë deri në përmbushjen e numrit të duhur të delegatëve. Kryetari e ka provuar tri herë me votim të fshehtë dhe nuk i trembet aspak mekanizmave statutorë të LDK-së”, u shpreh ai.

Lidhur me faktin që Vjosa Osmani po qëndron në zyrat e LDK-së, Ferati vlerësoi se kjo nuk përbën ndonjë risi dhe se partia ka prioritet krijimin e institucioneve të reja të vendit.

“Prania e zonjës Osmani këtu është e përditshme, në varësi të dinamikave të brendshme. Kuvendi ynë i Përgjithshëm vendosi për bartësen e listës dhe tani gjithë vëmendja është te themelimi i institucioneve të Kosovës. Mendoj se qytetarët presin pikërisht këtë përgjigje nga ne, jo nëse bie apo jo një kryetar”, deklaroi ai.

Ferati mohoi gjithashtu që në takimin mes Abdixhikut dhe kryeministrit në detyrë Albin Kurti të jetë biseduar për ndarje pozitash apo oferta konkrete për bashkëqeverisje.

Sipas tij, bisedimet u përqendruan ekskluzivisht në parimet themelore për një marrëveshje që do t’i kthente funksionalitetin institucioneve.

“Me sa kam marrë vesh nga kryetari, nuk ra fjala për ndonjë ofertë klasike politike, por për themelet mbi të cilat mund të ndërtohet një pakt për stabilizimin e shtetit. Askush nuk diskutoi emra apo poste specifike. Abdixhiku ka mandat të plotë përfaqësimi dhe e ushtron kudo që sheh të arsyeshme, këtë herë në shoqëri të bartëses së listës, që është krejtësisht legjitime”, sqaroi Ferati.

I pyetur për mbledhjen e firmave për Kuvend të Jashtëzakonshëm, sekretari i LDK-së theksoi se ky proces është shprehje e një të drejte demokratike të atyre që mendojnë ndryshe nga shumica.

Megjithatë, ai shprehu dyshimin se dikush brenda partisë synon të bllokojë një marrëveshje të mundshme me Lëvizjen Vetëvendosje. Ferati u kërkoi anëtarëve dhe strukturave që mosmarrëveshjet t’i zgjidhin brenda forumeve të brendshme dhe jo përmes mediave.

“Kjo shtëpi demokratike na përket të gjithëve, jo disa individëve. Statuti dhe morali politik na detyrojnë që shqetësimet t’i trajtojmë në organet tona, pa e shqetësuar anëtarësinë e gjerë me deklarata publike”, u apeloi ai.

KosovaPress raportoi javën e shkuar se Gazmend Muhaxheri, kryetar i Pejës, po drejton përpjekjet për mbledhjen e nënshkrimeve, duke vizituar degët anembanë vendit për të siguruar mbështetjen e delegatëve për votëbesimin ndaj Abdixhikut.

Iniciativa për shkarkim vjen si pasojë e pakënaqësive të brendshme pas rezultatit të dobët të LDK-së në zgjedhjet e 7 qershorit, ku partia siguroi vetëm 16.69 për qind të votave, apo 18 ulëse në Kuvend.

Fillimisht iu kërkua dorëheqja Abdixhikut, por ai e cilësoi të papranueshme një hap të tillë.

Statuti i LDK-së parashikon që firmat e një të tretës së anëtarëve të Kuvendit nuk sjellin shkarkimin automatik të kryetarit, por thjesht aktivizojnë procedurën formale për votëbesim.

Kuvendi i LDK-së ka 355 delegatë të zgjedhur nga degët, përfshirë edhe vetë kryetarin aktual Lumir Abdixhiku. Në janar të këtij viti, Abdixhiku i rezistoi një votëbesimi pas rezultatit zhgënjyes në zgjedhjet e 28 dhjetorit të vitit të kaluar.

The post Abdixhiku nuk ikën nga votëbesimi, Ferati: Në LDK ende asnjë firmë për Kuvend të Jashtëzakonshëm appeared first on Albeu.com.

Organi i akuzës në Prishtinë ka konfirmuar se ka marrë njoftimet për incidentin e dyshuar të helmimit ushqimor, i cili besohet se ka prekur afro 20 qytetarë. Sipas të dhënave paraprake, personat e prekur kishin blerë sanduiçë në një degë të zinxhirit të restoranteve “Sach Pizza” në kryeqytet.

Në një komunikatë drejtuar mediave, zyra e Prokurorisë theksoi se prokurori kujdestar tashmë ka nisur mbledhjen e provave dhe veprimet procedurale. “Prokuroria Themelore në Prishtinë ka pranuar informacione lidhur me helmimin e disa personave. Prokurori i shtetit është duke ndërmarrë të gjitha veprimet e nevojshme hetimore lidhur me këtë rast. Për çdo zhvillim të ri rreth kësaj çështje ju njoftojmë me kohë,” citohet në përgjigjen zyrtare.

Në të njëjtën kohë, Policia e Kosovës njoftoi se pas marrjes së sinjalizimit më 10 korrik 2026, menjëherë janë angazhuar njësitet përkatëse në bashkëpunim me prokurorinë dhe agjencitë e tjera shtetërore. Zëdhënësi i policisë, Pllana, deklaroi se: “Lidhur me rastin, ju njoftojmë se më 10.07.2026, Policia ka pranuar një informatë lidhur me dyshimin për helmim nga ushqimi të disa personave. Menjëherë janë ndërmarrë veprimet e nevojshme policore në koordinim me Prokurorin e Shtetit dhe institucionet përkatëse”.

Autoritetet kompetente po vijojnë punën hetimore për të zbardhur plotësisht rrethanat e ngjarjes.

The post Dyshimet për helmim në kryeqytet, organet e drejtësisë nisin hetimet appeared first on Albeu.com.

Qeveria në detyrë zhvilloi një mbledhje elektronike gjatë mbrëmjes së sotme.

Në njoftimin për media bëhet e ditur se nga kjo mbledhje dolën dy vendime.

Njëri prej tyre ishte miratimi i kërkesës për ndarjen e mjeteve buxhetore në vlerë prej 2,240,000 € (dy milionë e dyqind e dyzet mijë euro) për Radio Televizionin e Kosovës.

Po ashtu, sipas njoftimit të Qeverisë, është miratuar edhe kërkesa e Agjencisë Kosovare të Privatizimit për kthimin e fondeve në shumën 48,216.57 € (dyzetetetë mijë e dyqindegjashtëmbëdhjetë euro e pesëdhjetë e shtatë centë), të cilat ishin transferuar në Buxhetin e Republikës së Kosovës, për Ndërmarrjen Shoqërore NSH. “Magjistrala”.

The post Ekzekutivi në detyrë miraton 2.24 milionë euro për RTK-në appeared first on Albeu.com.

Sipas reagimit të saj, çështjet që aktualisht po hetohen konsiderohen raste të veçanta dhe, siç thuhet, nuk pasqyrojnë punën dhe profesionalizmin e pjesës më të madhe të operatorëve të këtij sektori, të cilët ushtrojnë aktivitetin e tyre në përputhje me ligjin dhe standardet në fuqi.

Në reagim thuhet: “Shoqata e Naftëtarëve të Kosovës mbetet e përkushtuar për bashkëpunim të ngushtë me institucionet kompetente dhe mbështet çdo proces që forcon sundimin e ligjit, nxit konkurrencën e ndershme dhe rrit besimin e qytetarëve në tregun e naftës”.

Më tej, Shoqata thekson se çdo shkelje e mundshme duhet të trajtohet duke u mbështetur në fakte dhe se përgjegjësia duhet të jetë individuale, pa u shtrirë si përgjithësim mbi të gjithë sektorin.

Në të njëjtën kohë, një aksion i gjerë policor kundër krimit të organizuar, i drejtuar nga Prokuroria Speciale dhe Drejtoria për Hetimin e Krimeve të Rënda dhe Krimit të Organizuar në Policinë e Kosovës, me asistimin e Doganës dhe Administratës Tatimore të Kosovës, ka çuar sot në arrestimin e 9 personave.

Me urdhër të Gjykatës Themelore në Prishtinë, gjatë këtij operacioni janë zhvilluar kontrolle në 21 lokacione.

Ky operacion është realizuar në kuadër të veprimeve procedurale hetimore, ndërsa pas mbledhjes së informacioneve dhe sigurimit të provave, ekziston dyshimi se të arrestuarit kanë funksionuar si grup i strukturuar kriminal, duke paraqitur dokumente të rreme për tatimet, si edhe duke kryer shitje dhe transaksione fiktive të derivateve të naftës.

The post Shoqata e Naftëtarëve të Kosovës përkrah hetimet dhe kërkon që sektori të mos trajtohet në mënyrë të përgjithësuar appeared first on Albeu.com.