Drita, kampione e Kosovës, e hap këtë mbrëmje një tjetër kapitull evropian në kuadër të kualifikimeve për Ligën e Kampionëve në edicionin 2026/27.

Ekipi nga Gjilani luan ndeshjen e parë të raundit kualifikues në transfertë përballë Kauno Zalgiris të Lituanisë.

Ky duel nis në orën 18:00, ndërsa synimi i Dritës është të dalë me një rezultat të favorshëm, i cili do t’i krijonte epërsi para sfidës së kthimit.

Për këtë përballje, trajneri Zekrija Ramadani ka zgjedhur të hedhë në fushë formacionin më të mirë në dispozicion. Në portë është Faton Maloku, teksa në fazën sulmuese pritshmëritë më të mëdha janë nga Kristal Abazaj, Igball Jashari dhe Blerim Krasniqi.

Drita e luan këtë ndeshje me statusin e kampiones së Kosovës dhe me synimin për të ecur më tej në kompeticionet evropiane. Një rezultat pozitiv në Lituani do të përbënte një hap të rëndësishëm drejt kualifikimit në raundin e ardhshëm të eliminatoreve të Ligës së Kampionëve.

Kauno Zalgiris: Svedkauskas, Moutachy, Tolordava, Lekiastas, Konatar, Karshima, Ribeiro, Benchalb, Baldassarra, Ourega, Oliveira.

Drita: Maloku, Ovouka, Pellumbi, Bytyqi, B. Krasniqi, Dabiqaj, Limaj, Sheji, Abazaj, Bl. Krasniqi, Jashari.

The post Drita e nis sonte rrugëtimin në Evropë, publikohen formacionet zyrtare ndaj Kauno Zalgiris appeared first on Albeu.com.

Drita e ka mbyllur përgatitjen për duelin e parë ndaj Kauno Žalgiris, i vlefshëm për raundin e parë kualifikues të Ligës së Kampionëve.

Në prag të ndeshjes, trajneri Zekirija Ramadani dhe kapiteni Besnik Krasniqi deklaruan në konferencë për shtyp se skuadra është përgatitur në maksimum dhe se objektivi është një rezultat pozitiv para takimit të kthimit në Kosovë.

Besnik Krasniqi veçoi gjendjen brenda grupit, duke thënë se atmosfera në ekip mbetet një prej armëve më të forta të Dritës.

“Atmosfera është shumë e mirë. Drita njihet gjithmonë për atmosferën që e ka dhe jemi munduar shumë ta ruajmë atë. Jemi mjaft të përgatitur dhe shumë të motivuar për ndeshjen e nesërme. Secili duhet ta japë maksimumin për të marrë një rezultat pozitiv. Nuk duhet të harrojmë se nuk është vetëm një ndeshje, por janë dy takime dhe duhet të jemi të kujdesshëm”, deklaroi Krasniqi.

Nga ana e tij, Zekirija Ramadani theksoi se skuadra është gati në planin psikologjik, fizik dhe taktik, ndërsa shprehu besimin se Drita mund të sigurojë një rezultat të mirë në transfertë.

“Unë e shoh ekipin tim të përgatitur në aspektin psikologjik, fizik dhe taktik. Shpresoj që do të nxjerrim një rezultat pozitiv nga ndeshja e nesërme. Pastaj kemi ndeshjen e kthimit, ku do ta kemi mbështetjen e tifozëve tanë dhe normalisht do të jemi shumë më të forte”.

“Do të doja të ktheheshim me një avantazh dhe besoj se kjo është reale dhe normale. Megjithatë, duhet të bëjmë maksimumin. Nesër kemi 90 minuta punë dhe vetëm pas tyre mund të bëjmë llogaritë për ndeshjen e kthimit, nëse duhet të jemi më agresivë, më ofensivë apo më defensivë. Gjithçka do të varet nga rezultati i ndeshjes së parë”, u shpreh Ramadani.

Ndeshja e parë mes Dritës dhe Kauno Žalgiris zhvillohet nesër (e martë), në kuadër të raundit të parë kualifikues të Ligës së Kampionëve, ku skuadra synon të ndërtojë një pozicion sa më të favorshëm para sfidës së kthimit para tifozëve të vet.

The post Ramadani dhe Krasniqi optimistë para përballjes me Kauno Žalgiris: Drita kërkon të kthehet me rezultat të favorshëm appeared first on Albeu.com.

Pas shortit të tërhequr të martën në selinë e UEFA-s në Nyon të Zvicrës, kampionia e Kosovës u vendos përballë Kauno Zalgirisit në sfidën e saj të parë evropiane të sezonit të ri.

Ekipi nga Gjilani bënte pjesë në grupin 2 të skuadrave bartëse, një pozicion që e ndihmoi të evitonte disa emra potencialisht më të vështirë në këtë etapë të garës.

Sidoqoftë, përballja do të jetë ndaj një skuadre që ka eksperiencë në skenën evropiane dhe që gjithashtu synon kalimin në raundin e dytë.

Takimi i parë është paraparë të luhet më 7 ose 8 korrik në Lituani, ku Drita do të jetë mysafire, ndërsa ndeshja e kthimit do të zhvillohet një javë më pas, më 14 ose 15 korrik në Kosovë.

Në anën tjetër, skuadra tjetër shqiptare, Egnatia, nuk pati të njëjtin fat si Drita, pasi do të përballet me kampionin e Rumanisë, Petrocub.

The post Drita njeh rivalin e parë në kualifikimet e Ligës së Kampionëve appeared first on Albeu.com.